Ndi Muntu wa Muringo Ki?

NOIJA KUKORA KI?

Teekateeka aha mbeera egi: Karen ari aha kagyenyi, bwanyima y’edakiika nka ikumi ahurira omuntu yaamugira ati:

Karen ahinduka areeba ari munywani we Jessica aine ecupa ibiri z’amaarwa ziigwire. Jessica ecupa emwe agiha Karen reero amugira ati: “Tori muto munonga, w’okutabaasa kushemererwaho, tikwo?”

Karen ayenda kwanga, kwonka amanya ngu Jessica ni munywani we. Kandi Karen tarikwenda ngu munywani we ateekateekye ngu tarikukunda kushemererwa. Oyihireho ekyo, Jessica naamanywa nk’omwishiki w’emicwe mirungi. Kandi ku araabe naanywa amaarwa, nikimanyisa ngu ti kibi. Karen ateekateeka ati: ‘Aga n’amaarwa, ti mabi nk’okukoresa emibazi y’ekitabura bwongo.’

Ku ogire ngu niiwe waabaire ori omu mbeera nk’eya Karen, okaba noija kukora ki?

TEEKATEEKA AHARI EKI!

Kubaasa kucwamu gye omu mbeera nk’egi, oine kumanya eki ori. Ekirikumanyisa oku orikutwaza n’oku abandi barikukumanya. Ekyo waaba nookimanya, nikiija kukuhwera kumanya oku oraacwemu kutwaza omu mwanya gw’abandi kukucweramu.​—1 Abakorinso 9:26, 27.

Noobaasa kugira ota obumanzi nk’obwo? Okugarukamu ebibuuzo ebiri ahaifo n’obutandikiro burungi.

1 NI BINTU KI EBI NDIKUKORA GYE?

Okumanya okubaasa kwawe n’emitwarize yaawe mirungi nikiija kuhamya obwesigye bwawe.

EKY’OKUREEBERAHO KY’OMU BAIBULI: Entumwa Paulo akahandiika ati: “N’obu ndaabe ndi omushema omu kugamba, kwonka tindi mushema mu bwengye.” (2 Abakorinso 11:6) Ahabw’okugira ngu Paulo akaba naamanya gye Ebyahandiikirwe, akabaasa kuguma ahamire n’obu abandi baabaire nibamuhakanisa. Taraikiriize ebigambo bibi byabo kutuubya obumanzi bwe.​—2 Abakorinso 10:10; 11:5.

YESHWIJUME. Ahaifo, handiikaho etalanta nari omurimo ogu orikumanya.

Hati shoboorora aha mutwarize murungi ogu oine. (Nk’eky’okureeberaho, noofayo aha bandi? ori efura? nooyesigwa? nookwata obwire?)

2 OBWEREMWA BWANGYE NI BUUHA?

Nk’oku oruzegyere rurikuba rugumire n’obu ruraabe nirurebera, n’obweremwa bwawe nibubaasa kuba obw’akabi waabwikiriza kukutegyeka.

EKY’OKUREEBERAHO KY’OMU BAIBULI: Paulo akaba naamanya obweremwa bwe. Akahandiika ati: “Omu mutima gwangye nsiima ebiragiro bya Ruhanga; kwonka omu ngingo zangye nshangamu ekindi kiragiro ekirwanisa ekiragiro eky’omu bwengye bwangye, kimpindura omuhuuku w’ebiragiro by’ekibi.”​—Abarooma 7:22, 23.

YESHWIJUME. Ni bweremwa ki obu oine kutegyeka?

3 NYINE BIGYENDERERWA KI?

Noobaasa kuza omu takisi reero ogambire omuvugi kuguma naayetoorora omu mwanya gumwe okuhitsya amajuta gaahwamu? Waakora otyo nooba ori omushema kandi nooshiisha sente!

Eky’okwega? Ebigyendererwa nibikuhwera kumanya eki oine kukora n’okutashiisha bwire. Nooba noomanya ahu oraatoore n’oku orahikyeyo.

EKY’OKUREEBERAHO KY’OMU BAIBULI: Paulo akahandiika ati: “Nyirukira ntyo, ti nk’otarikumanya i arikuza.” (1 Abakorinso 9:26) Paulo omu mwanya gw’okureka ebintu bikabaho bubaho, akataho ebigyendererwa kandi yaabihikiiriza.​—Abafilipi 3:12-14.

YESHWIJUME. Ahaifo, handiikaho ebigyendererwa bishatu ebi orikwenda kuhikiiriza omu mwaka ogurikwija.

4 NI BINTU KI EBI OINEHO OBUHAME?

Waaba otaine buhame aha bi orikwikiriza, torikubaasa kucwamu. Noija kuba nk’enyaruju, orikuhindahindura aha mitwarize yaawe kwenda ngu oshushane n’ab’orwingano rwawe, kandi ako n’akamanyiso akarikworeka ngu torikumanya eki ori.

Okutaana n’ekyo, waaba nookora ebintu orikwihirira aha buhame, noorinda akamanyiso kaawe, n’obu abandi baakukora ki.

EKY’OKUREEBERAHO KY’OMU BAIBULI: Nabi Danieli obu yaabaire akiri omushogoyo, ‘akamariirira omu mutima gwe’ kworobera ebiragiro bwa Ruhanga, n‘obu araabe yaabaire atari na bazaire be. (Danieli 1:8) Ekyo kikamubaasisa, kuhamira aha kihikire. Danieli akabaasa kugyendera aha bi yaabaire naikiriza ngu bihikire.

YESHWIJUME. Ni bintu ki ebi oineho obuhame? Nk’eky’okureeberaho: Noikiriza ngu hariho Ruhanga? Kyaba nikwo kiri, ahabw’enki? Niki ekirikukuhamiza ngu ariho?

Noikiriza ngu emitindo ya Ruhanga erikukwata aha micwe n’ey’oburungi bwawe? Ku oraabe noikiriza, ahabw’enki?

Mbwenu shi, okaayenzire kuba muntu wa muringo ki, nk’eibabi eririkuhuuhwa buri muyaga nari nk’omuti ogurikuguma guhami n’omu ihunga ry’amaani? Yeyongyere kuhama, noija kuba nk’omuti ogwo. Kandi ekyo nikiija kukuhwera kugarukamu ekibuuzo eki: Ndi muntu wa muringo ki?