Nimbaasa Kushoboorora nta Enshobe Zangye?

NOIJA KUKORA KI?

Teekateeka aha mbeera egi: Tim ariyo naazaana na banywani be, atambika omupiira gwata edirisa ya mutaahi waabo.

Ku ogire ngu niiwe Tim, okaakozire ki?

TEEKATEEKA AHARI EKI!

NOOBAASA KUKORA KIMWE AHARI EBI:

1. Okwiruka.

2. Okuta orubanja aha ndiijo.

3. Okugambira omutaahi ekyabaho, kandi okaikiriza kushashurira ekyasiisikara.

Noobaasa kwohibwa kutwaza omu Muringo A. Kwonka hariho enshonga nungi ahabw’enki oine kwikiriza enshobe zaawe, n’obu waakuba waayata edirisa nari ekindi kintu.

IKIRIZA ENSHOBE ZAAWE AHABW’ENSHONGA ISHATU

1. Nikyo kihikire eki oine kukora.

   Baibuli neegira eti: “Nitwetenga kutwaza gye omuri byona.”​—Abaheburaayo 13:18.

2. Abantu nibakira kusaasira abo abarikwikiriza enshobe zaabo.

   Baibuli neegira eti: “Orikushereka eby’okushiisha bye, tariba gye. Kwonka orikubyatura, akabireka, aryasaasirwa.”​—Enfumu 28:13.

3. Ekikuru munonga, nikishemeza Ruhanga.

   Baibuli neegira eti: “Omuntu orikwehabagiza n’ekirikunugwa ahari Ruhanga, kwonka ab’omutima ogugororokire abeesiga.”​—Enfumu 3:32.

Karina ow’emyaka 20, eizooba rimwe bakamuha ekipapura ahabw’okuvuga endiima, reero yaakishereka ishe. Kwonka akaba atarikubaasa kukishereka ebiro byona. Karina naagira ati: “Bwanyima y’omwaka nka gumwe, taata akareeba ekipapura ekyo kiri omu maziina gangye. Ekyo kikandeetera oburemeezi bwingi!”

Nikitwegyesa ki? Karina naagira ati: “Okushereka enshobi zaawe nikyongyerera aha buremeezi. Bwanyima noija ozishashurira!”

YEGYERA AHA NSHOBE ZAAWE

Baibuli neegira eti: “Twena tushobya omuri bingi.” (Yakobo 3:2) Kandi nk’oku twareeba, twikiriza enshobe zaitu ahonaaho, nitworeka ngu turi abacureezi kandi ngu tukuzire.

Ekindi eki oine kukora n’okwegyera aha nshobe zaawe. Omwishiki orikweta Vera akagira ati: “Niinteeraho kureeba buri nshobe nk’eky’okwegyeraho, kandi eki ndikwega nikimpwera kuba omuntu murungi ndeka kukora enshobe niyo emwe omurundi ogundi.” Ka tureebe oku orikubaasa kukikora.

Ka tugire ngu waakoresa egaari ya sho waagicwa. Noija kukora ki?

• Noobaasa kuhunama sho tarikwija kukimanya.

• Gambira sho ekyabaho kyenyine.

• Gambira sho ekyabaho kwonka ote orubanja aha ndiijo.

Ka tugire ngu waagwa ebigyezo ahabw’okugira ngu toshomire bitabo. Noija kukora ki?

• Yekwatse ekigyezo ngu kibaire kigumire.

• Yeteho orubanja ahabw’okugwa.

• Yekwatse omushomesa ngu naakuharana.

Aha mbeera ezo ezaagambwaho, yeshushanirize ngu niiwe (1) muzaire hamwe (2) n’omushomesa. Sho nari omushomesa naija kukutwara ata waikiriza enshobe zaawe? Naija kukutwara ata waashereka enshobe zaawe?

Hati teekateeka aha nshobi ei waakozire omwaka oguhweire reero ogarukyemu ebibuuzo ebi.

Okakora nshobe ki? Enshobe egyo okagishoboorora ota?

• Nkagishereka.

• Nkekwatsa omuntu ondiijo.

• Nkagiikiriza.

Ku oraabe otaraikiriize nshobe yaawe, bwanyima okeehurira ota?

• Nkehurira gye ahakuba tihaine owakimanyire!

• Nkeshinja ahakuba nkaba nshemereire kugamba amazima.

Okaba oshemereire kushoboorora gye ota enshobe egyo?

Okeegyera ki aha nshobe yaawe?

EKI OINE KUKORA

Ahabw’enki abantu baingi nibanga kwikiriza enshobe zaabo?

Abantu nibaija kukutwara bata butoosha waaba nooteeraho kushereka enshobe zaawe, kandi nibaija kukutwara bata waaba nooziikiriza?​—Luka 16:10.