Noosiima Yehova Ahabw’Okutureeba?

1, 2. Omuringo ogu Yehova arikutureebamu nigutaana guta n’ogwa kamera ezirikuteebwaho ab’obushoboorozi?

OMU mahanga maingi, ab’obushoboorozi nibataho zaakamera kuteera ebishushani abarikuvuga kubi, na butandu ezirikubaho. Zaakamera ezo niziteera n’ebishushani eby’abo abarikutomera abantu bakairuka kugira ngu ab’obushoboorozi babaase kubakwata. Ahabw’okugira ngu kamera ezi niziba ziri buri hamwe, abo abarikukora butandu nibabaasa kufubirwa.

² Baibuli neegira ngu amaisho ga Ruhanga gari hoonahoona. (Enf. 15:3) Kwonka shi ekyo nikimanyisa ngu eshaaha yoona naaba naatureeba arikusherura enshobe zaitu? Mbwenu shi naaba naayenda kutugyemesereza ngu tukuratire ebiragiro bye kandi ngu twaremwa atufubire? (Yer. 16:17; Heb. 4:13) Ngaaha tikwo kiri! Yehova naatureeba ahabw’okugira ngu naatukunda kandi naayenda ngu tube gye.​—1 Pet. 3:12.

3. Ni mu miringo ki etaano ei Yehova arikworeka ngu naatufaho?

³ Niki ekirikubaasa kutuhwera kwetegyereza ngu Yehova naafayo kutureeba ahabw’okugira ngu naatukunda? Ka tushwijume tureebe oku arikukikora. Naakikora (1) arikuturabura twatandika kugira emiteekateekyere mibi, (2) arikutuhana twatoora omuhanda mubi, (3) arikutuhabura kurabira omu misingye eri omu Kigambo kye, (4) arikutuhwera twahikwaho oburemeezi, kandi (5) arikutuha emigisha ahabw’okukora ekihikire.

YEHOVA NAATURABURA

4. Yehova akaba aine kigyendererwa ki obu yaarabura Kaini ngu “ekibi nikiija kuguma kibandami aha rwigi”?

⁴ Ka tubanze tureebe oku Ruhanga arikuturabura twatandika kugira emiteekateekyere mibi. (1 Bus. 28:9) Kubaasa kwetegyereza omuringo ogu Yehova arikworeka ngu naatufaho, ka tureebe oku yaatwariize Kaini, owaagizire “ekiniga kingi” Yehova ku yaayangire kusiima ekitambo kye. (Shoma Okutandika 4:3-7.) Yehova akahiga Kaini ‘kukora gye.’ Akamugira ngu ku araayangye, “ekibi nikiija kuguma kibandami aha rwigi.” Ruhanga yaamugira ati: “Iwe oshemereire kukitegyeka.” Ruhanga akaba naayenda ngu Kaini aikirize okurabura kwe abaase “kusiimwa.” Kuri noogira ngu Kaini akahurikiza, akaba naija kuguma aine omukago murungi na Ruhanga.

5. Yehova naaturabura ata aha bikwatiraine n’emiteekateekyere nari ebigyendererwa bibi ebi turikubaasa kuba twine?

⁵ Kandi shi itwe obunaku obu? Yehova naareeba ekiri omu mutima gwaitu, kandi titurikubaasa kumushereka emiteekateekyere nari ebigyendererwa byaitu. Yehova Tataitwe orikutukunda naayenda ngu tukuratire emihanda y’okuhikiirira, kwonka tarikutugyema kukikora. Kurabira omu Kigambo kye Baibuli, naaturabura twaba tutandikire kuhaba. Naakikora ata? Twaba nitushoma Baibuli butoosha, nitubaasa kushangamu ekyahandiikirwe ekirikubaasa kutuhwera kweihamu emiteekateekyere nari ebigyendererwa bibi. Kwongyerera ahari ekyo, omu bitabo byaitu eby’Ekikristaayo noobaasa kushoma aha nshonga erikworeka oku orikubaasa kusingura oburemeezi obu otwire oine. Kandi n’omu nteerane zaitu, twena nitutunga obuhabuzi omu bwire obu turikuba nitubwetenga.

6, 7. (a) Ahabw’enki nitubaasa kugira ngu ebirikutebeekanisibwa ahabw’abantu boona nibyoreka ngu Ruhanga naatufaho? (b) Yehova ku arikukufaho noogasirwa ota?

⁶ Okurabura nk’okwo nikworeka ngu Yehova naatufaho kandi naatukunda. N’amazima ngu Baibuli neegasira abantu boona, ebitabo byaitu nibiteerwa ahabw’abantu boona, n’enteerane nizigasira ekibiina kyona. Kwonka omuri ebi byona, Yehova naayenda ngu ote omutima aha Kigambo kye kugira ngu obaase kuhindura emiteekateekyere yaawe. N’ahabw’ekyo, eki nikyoreka ngu Yehova naakufaho iwe nk’omuntu.

⁷ Kubaasa kugasirwa omu kurabura kwa Ruhanga, twine kukyetegyereza ngu naatufaho. Bwanyima, twine kukora empindahinduka ezirikuhikaana n’Ekigambo kye, turikweihamu emiteekateekyere yoona ei atarikusiima. (Shoma Isaaya 55:6, 7.) Twagyendera aha kurabura oku turikuheebwa, nitwija kwetantara oburemeezi bwingi. Kwonka shi ku twakugyendera aha miteekateekyere yaitu mibi? Tataitwe orikutukunda naatuha buhwezi ki?

TATAITWE ORIKUTUKUNDA NAATUHANA

8, 9. Obuhabuzi obu Yehova arikutuha kurabira omu baheereza be nibworeka buta ngu naatufaho munonga? Ha eky’okureeberaho.

⁸ Nitubaasa kureeba ngu Yehova naatufaho ku turikuhanwa. (Shoma Abaheburaayo 12:5, 6.) N’amazima, nikibaasa kutugumira omuntu yaatuhana nari yaatuhabura. (Heb. 12:11) Kwonka, teekateeka aha ki ogwo orikuba naatuhabura nari naatuhana aine kutaho omutima. Aine kuba naamanya yaaba eki turikukora nikibaasa kushiisha omukago gwaitu na Yehova Ruhanga. Aine kuba naafayo aha nyehurira zaitu, kandi aine kuba ayetebeekaniise kugira obwire kutworeka Ebyahandiikirwe ebirikutuhwera kumanya empindahinduka ezi twine kukora kubaasa kushemeza Ruhanga. Nituba twine kwikiriza obuhabuzi obwo ahabw’okugira ngu nibuba niburuga ahari Yehova.

⁹ Ka tushwijume tureebe oku obuhabuzi kuruga aha bantu burikubaasa kworeka ngu Yehova naatufaho. Ow’eishe-emwe omwe obu yaabaire atakeegire mazima, akaba aine omuze gw’okureeba ebirikwitsa enshoni, kwonka bwanyima y’okwega amazima, akabaasa kugusingura. Kwonka nabwo akaba naakiteekateeka aha muze ogwo. Ku yaaguzire esimu nsya, ekongyerera aha ku yaabaire naateekateeka aha muze ogwo. (Yak. 1:14, 15) Akaba akoresa esimu ye kuza aha mikura erikworeka ebirikwitsa enshoni. Izooba rimwe ku baabaire nibakoresa esimu kubuurira, akatiiza omureeberezi esimu ye kugira endagiriro ezi yaasheruraho. Omureeberezi ku yaatandikire kukoresa esimu, emikura eriho ebirikwitsa enshoni yaareebeka aha simu. Ahonaaho omureeberezi akaha ow’eishe-emwe ogwo obuhabuzi, yaabwikiriza kandi akabaasa kugarukamu kusingura omuze ogwo. Yehova naareeba ebibi byaitu ebisherekirwe kandi atuhabura, omukago gwaitu nawe gutakasiisikaire.

NITUGASIRWA TWAGYENDERA AHA MISINGYE Y’OMU BAIBULI

10, 11. (a) Noobaasa kusherura ota obuhabuzi ahari Ruhanga? (b) Eka emwe ekagasirwa eta ahabw’okugyendera aha buhabuzi bwa Yehova?

¹⁰ Omuhandiiki wa zaaburi akeeshongorera Yehova ati: “Oryampabura n’obwengye bwawe.” (Zab. 73:24) Twaba nitwetenga obuhabuzi, twine kubusherura omu Kigambo kya Yehova kubaasa kureeba emiteekateekyere ye aha nshonga ezimwe. Okugyendera aha misingye ya Baibuli nikutuhwera kugasirwa omu by’omwoyo hamwe n’omu by’omubiri.​—Enf. 3:6.

¹¹ Eky’okureeberaho ekirikworeka oku bamwe bagasiirwe omu buhabuzi bwa Yehova, n’eky’omuhingi omwe orikutuura omu nshozi za Masbate omuri Philippines. We n’omukazi we ni baapayoniya ab’obutwire kandi nibareeberera eka mpango. Izooba rimwe bakatangaara munonga, mukama w’omwanya ogu baabaire nibapangisa ku yaabahaire ekihandiiko ekirikworeka ngu baine kugurugamu. Ahabw’enki? Haine owaabaire ababeihereire ngu n’abaryangatanisa. N’obu ow’eishe-emwe yaabaire ayerarikiriire ahu ab’eka ye baraatuure, akagira ati: “Yehova naija kutuhwera. Butoosha naafayo kutuha ebikuru ebi turikwetenga, n’obu haakubaho ki.” Ow’eishe-emwe ogwo akaba ahikire kwesiga Yehova. Bwanyima y’ebiro bikye, ab’omu ka egyo bakakyetegyereza ngu mukama w’omwanya ogwo akaba acwiremu kutababinga. Hakabaho ki? Mukama w’omwanya akakyetegyereza ngu ab’omu ka egyo ey’Abajurizi ba Yehova, bakaba nibagyendera aha misingye ya Baibuli kandi bakaba nibenda kurinda obusingye. Eki kikamushemeza munonga yaabaikiriza kugumaho kandi yaabongyera n’eitaka erindi kugira ngu babaase kuhingamu emisiri. (Shoma 1 Petero 2:12.) Yehova naatuha obuhabuzi kurabira omu Kigambo kye kubaasa kutuhwera kwemera oburemeezi n’embeera ezigumire omu nsi egi.

OMUNYWANI ORIKUTUHWERA KUGUMIISIRIZA OKUGYEZIBWA

12, 13. Ni buremeezi ki oburikureetera bamwe kwebuuza yaaba Ruhanga naareeba okubonabona kwabo?

¹² Oburemeezi obumwe nibugumaho kumara obwire buraingwa. Nitubaasa kuba twine endwara etarikukira, abanyabuzaare nibabaasa kuba nibatuhakanisa nari turikuhiiganisibwa. Kandi, nitubaasa kugira obutaikirizana n’abandi omu kibiina ahabw’okutashushanisa mitwarize nari emiteekateekyere.

¹³ Nk’eky’okureeberaho, ow’eishe-emwe naabaasa kugira eki yaagamba kikugwise kubi. Noobaasa kugira oti: ‘Eki tikishemereire kubaho omu kibiina kya Ruhanga!’ Kwonka ow’eishe-emwe ogambire ekyo naabaasa kugumizamu naaheebwa obujunaanizibwa omu kibiina kandi n’abandi barikureeba ngu taine nshonga. Noobaasa kwebuuza oti: Ekyo nikibaasika kita? Kwonka shi Yehova we tarikubireeba? Mbwenu shi tihaine eki araakore?​—Zab. 13:1, 2; Hab. 1:2, 3.

14. Ahabw’enki obumwe Yehova atarikwetasya omu nshonga zaitu?

¹⁴ Yehova naabaasa kuba aine enshonga ehikire ahabw’enki atarikwenda kubyetasyamu. Nk’eky’okureeberaho, noobaasa kuteekateeka ngu ondiijo niwe aine orubanja, kwonka Yehova naabaasa kuba naareeba enshonga omu muringo gw’omutaano. Kurugiirira ahari Yehova, noobaasa kuba niiwe ori omu nshobe. Eki ow’eishe-emwe yaagambire eki orikuteekateeka ngu ni kibi, nibubaasa kuba bwabaire buri obuhabuzi obuhikire obu oine kubanza kuteekateekaho. Ow’eishe-emwe Karl Klein, owaaheereizeho aha Kakiiko Akareeberezi arikugamba aha byamubaireho, akagamba aha obu yaatunga obuhabuzi butunu kuruga aha w’eishe-emwe J. F. Rutherford. Bwanyima, ow’eishe-emwe Rutherford akaramutsya ow’eishe-emwe Klein yaamwenya arikumugira ati: “Noogamba ki, Karl!” Kwonka ow’eishe-emwe Klein, ahabw’okugira ngu akaba akiine ekiniga ahabw’obuhabuzi obu baamuhaire, akagarukamu nk’otarikwenda. Ku yaakimanyire ngu Ow’eishe-emwe Klein akiine obusaasi, akamugira ngu atakaikiriza Sitaane kumusingura. Bwanyima ow’eishe-emwe Klein akahandiika ati: “Twabiika enziika ahabw’eki ow’eishe-emwe yaatugambira, kandi obwo buri obujunaanizibwa bwe, nituba twaikiriza Sitaane kutuhabisa.”a

15. Waaba oine oburemeezi niki ekirikubaasa kukuhwera kugumisiriza obwo otegyereize Yehova kukuhwera?

¹⁵ Kwonka oburemeezi obumwe nibubaasa kureebeka nk’obutarikubaasa kwemerwa. Nitubaasa kubwemera tuta? Ka tugire ngu noovuga emotoka reero ahabw’okugira ngu emotoka ni nyingi, zoona zemerera ahabw’okubura ah’okuraba. Torikumanya obwire obu ziraamare zemereire. Waagira ekiniga okacwamu kutoora omuhanda ogundi, noobaasa kubura. Noobaasa kuhendera omazire obwire bwingi kuhika ahu orikuza. Nikyo kimwe, waahamira aha buhabuzi oburi omu Kigambo kya Ruhanga, noija kuhika ahu orikwenda kuza.

16. Ni nshonga ki endiijo erikubaasa kureetera Yehova kutataaha omu nshonga twaba twine oburemeezi?

¹⁶ Yehova naabaasa kutataaha mu nshonga arikwenda ngu tutungye okutendekwa okurikwetengyesa. (Shoma 1 Petero 5:6-10.) Kwonka ekyo tikirikumanyisa ngu Ruhanga naatugyeza. (Yak. 1:13) “Sitaane omuzigu,” niwe arikutureetera oburemeezi. Kwonka we Ruhanga naatuhwera kuhama omu by’omwoyo twaba turi omu mbeera nk’egyo. Naareeba okubonabona kwaitu kwona ‘ahabw’okuba naatutaho omutima,’ kandi naija kuhamya ngu kwagumaho “akaanya kakye.” Mbwenu shi noosiima Yehova ahabw’okugira ngu naakureeba waaba oine oburemeezi, orikumwesiga ngu naija kukuhwera?​—2 Kor. 4:7-9.

EKICONCO KURUGA AHARI YEHOVA

17. Yehova naashwijuma emitima ya baahi, kandi ahabw’enki?

¹⁷ Eky’aha muheru, Yehova naashwijuma emitima y’abantu boona arikwenda kureeba abo abarikumukunda. Hanani omuhanuuzi akagambira omugabe Asa ati: “Amaisho ga MUKAMA gairuka oku n’oku nigabuga ensi yoona, okweyoreka ku ari ow’amaani kuhwera abaine emitima eshugaine ahariwe.” (2 Bus. 16:9) N’obu Ruhanga araabe yaareebire Asa ataine omutima ogumaririire kumuheereza, naija ‘kworeka amaani’ ge ahariiwe waagumizamu orikukora ekihikire.

18. Waateekateeka ngu torikusiimwa, niki eki oshemereire kwijuka ahari Yehova? (Reeba ekishushani aha kutandika.)

¹⁸ Ruhanga naayenda ngu ‘tusherure ebirungi,’ ‘tuhamye eby’oburyo,’ kandi ‘tukore ebirungi’ kugira ngu obundi ‘akaatugirira embabazi.’ (Amo. 5:14, 15; 1 Pet. 3:11, 12) Yehova naareeba abahikiriire kandi abaha emigisha. (Zab. 34:15) Teekateeka aha ky’okureeberaho ky’abazaarisa babiri Abaheburaayo Shifira na Pua. Obu Abaisraeli baabaire bari abahuuku omuri Misri, abakazi babiri aba bakatiina Ruhanga omu mwanya gw’okutiina Faraho owaabaire abaragiire kwita abaana b’aboojo Abaheburaayo baaheza kuzaarwa. Hatariho kubanganisa, omuntu waabo w’omunda akabahiga kukiza amagara g’abaana aba. Bwanyima, Shifira na Pua bakatunga amaka agaabo. (Kur. 1:15-17, 20, 21) Ebikorwa byabo birungi Yehova akabireeba. Obumwe nitubaasa kuteekateeka ngu tihariho orikureeba ebirungi ebi turikukora. Kwonka Yehova naatufaho. Naareeba buri kirungi eki tukozire kandi naija kutuha ebihembo.​—Mat. 6:4, 6; 1 Tim. 5:25; Heb. 6:10.

19. Munyaanyazi-itwe omwe akeetegyereza ata ngu ebirungi ebi turikukora Yehova naabireeba?

¹⁹ Munyaanyazi-itwe omwe kuruga Austria akeetegyereza ngu okukora kwe n’obweziriki Yehova akakureeba. Ahabw’okugira ngu akaba naagamba orurimi rwa Hungary, bakamuha endagiriro y’omuntu owaabaire naagamba orurimi orwo ngu amutaayaayire amubuurire. Ahonaaho akazayo, kwonka tihaine ou yaashangireyo. Akaguma naagarukayo. Obumwe akaba areeba ngu haine oriyo omuka, kwonka ku yaabaire ayeta, tihaine owaabaire amugarukamu. Akatsigaho ebitabo, ebaruha, endagiriro ye, n’ebindi ebirikumukwataho. Bwanyima y’omwaka gumwe n’ekicweka arikuguma naazayo, bakamwigurira! Omukazi ashemereirwe akaramutsya munyaanyazi-itwe, yaamugira ati: “Taahamu. Nkashoma buri kimwe eki waareetsire kandi ntuura nkutegyereize.” Omukazi ogwo akaba atwire naajanjabwa ahabw’endwara y’ekokoro kandi akaba atarikubaasa kugaaniira n’abantu. Munyaanyazi-itwe akatandika kumwegyesa Baibuli. Buzima munyaanyazi-itwe Yehova akamuha omugisha ahabw’okuba omweziriki!

20. Okugira ngu Yehova naakureeba oshemereire kukitwara ota?

²⁰ Yehova naareeba buri kimwe eki orikukora kandi naija kukuha ebihembo. Waakimanya ngu Yehova naakureeba, otakaateekateeka ngu naaba naakushwijuma nk’oku kamera z’abantu zirikushwijuma enkozi z’ebibi. Omu mwanya gw’ekyo, noobaasa kwirira haihi na Ruhanga orikukufaho buzima!