Abajurizi ba Yehova Nibaikiririza Omuri Yesu?

OKWIKIRIRIZA OMURI YESU NI KIKURU

Anthony: Agandi, Tim. Naashemererwa kukureeba ogundi murundi.

Tim: Naanye naashemererwa kukureeba.

Anthony: Naakureetera Omunaara gw’Omurinzi na Awake! ensya. Ninteekateeka ngu noija kusiima ebirimu.

Tim: Yebare. Waakora gye kwija eri izooba, ahabw’okuba haine eki ndikwenda kukubuuza.

Anthony: Tihariho nshonga, nooyenda kumbuuza ki?

Tim: Nyomwabazyo mbaire ningaaniira n’ou ndikukora nawe. Mbaire nimmugambira aha butabo obu waampaire n’oku bubaire buboneire. Kwonka angizire ngu tinshemereire kubushoma ahabw’okuba Abajurizi ba Yehova tibarikwikiririza omuri Yesu. Ago shi n’amazima? Mmugizire ngu niinyija kukubuuza ku oraagarukye.

Anthony: Naashemererwa munonga ahabw’okumbuuza. Waakora gye okubuuza omwe aha Bajurizi ba Yehova omu mwanya gw’okubuuza ondiijo muntu. Ahabw’okuba tihariho muringo murungi ogu orikubaasa kumanyamu eki omuntu arikwikiriza kureka waaba niwe waabuuza.

Tim: Naanye ekyo nikyo ncwiremu kukora.

Anthony: Amazima gari ngu, Abajurizi ba Yehova nibaikiririza omuri Yesu. Buzima, okwikiririza omuri Yesu ni kikuru kubaasa kutunga amagara agatahwaho.

Tim: Naanye mbaire ninteekateeka ntyo, kwonka ou ndikukora nawe ku agizire ngu timurikwikiririza omuri Yesu, kimpigire kubuuza. Nimpamya eki titukakigaaniirahoga.

Anthony: Okaayenzire ngu nkworekye Ebyahandiikirwe bimwe kuruga omu Baibuli ebirikworeka obukuru bw’okwikiririza omuri Yesu? Ebi n’ebyahandiikirwe ebi Abajurizi ba Yehova barikukira kukoresa omu kubuurira.

Tim: Eego.

Anthony: Ka tutandikye n’ebigambo bya Yesu byenyine ebiri omuri Yohaana 14:6. Ebi ni bimwe aha bigambo ebi Yesu yaakoreise obu yaabaire naagaaniira n’omwe aha ntumwa ze. Nibigira biti: “Niinye muhanda, n’amazima, n’amagara; tihariho oija ahari Isheboona, atarabire muriinye.” Kurugiirira aha kyahandiikirwe eki omuhanda gwonka ogw’okuhika ahari Tataitwe ni guuha?

Tim: N’okurabira omuri Yesu.

Anthony: Ohikire. Kandi Abajurizi ba Yehova ekyo nibakiikiriza bataine kubanganisa. Kurugiirira aha bi Ruhanga arikwenda ngu tukore, omuntu ku arikushaba, naashaba arikurabira omu iziina ry’oha?

Tim: N’omu iziina rya Yesu.

Anthony: N’amazima. Niyo nshonga ahabw’enki buri kushaba, ninshaba ndikurabira omu iziina rya Yesu. Kandi Abajurizi ba Yehova boona nikwo barikukora.

Tim: Ekyo naashemererwa kukimanya.

Anthony: Ekyahandiikirwe ekindi eki turikubaasa kushoma ni Yohaana 3:16. Ekyahandiikirwe eki ni kikuru munonga ahakuba kihikire n’aha kwetwa Engiri omu bugufu. Ekirikumanyisa ngu ekyahandiikirwe omu Baibuli ekirikubaasa kushoboorora ahari Yesu n’ebi yaakozire, ni Yohaana 3:16. Noobaasa kuhashoma.

Tim: Nihagira hati: “Ahakuba oku nikwo Ruhanga yaakunzire atyo ensi, akahayo Omwana we omwe nyamunegyere, ngu omuntu weena orikumwikiriza arekye kuhwerekyerera, kureka atungye amagara agatahwaho.”

Anthony: Yebare. Otwire noomanya ekyahandiikirwe eki?

Tim: Eego, ntwire ninkihurira, kandi ninkira kukireeba kihandiikirwe aha byapa.

Anthony: Abantu baingi nibamanya ekyahandiikirwe eki. Yetegyereze, Yesu akagira ngu: Rukundo ya Ruhanga neebaasisa abantu kutunga amagara agatahwaho. Kwonka baine kukora ki?

Tim: Baine kwikiririza omuri Yesu.

Anthony: Okukira munonga okwikiririza omu mwana we omwe nyamunegyere, Yesu Kristo. Kandi okugira ngu okwikiriza nikututeeraho omuhanda gw’okutunga amagara agatahwaho, nikworekwa aha rupapura 2 orwa magaziini ei naakureetera. Aha bikwatiraine n’ekigyendererwa kya Omunaara gw’Omurinzi, aha rupapura 2 nihooreka ngu kimwe aha bigyendererwa bya magaziini egi, “neetuhiga kwikiririza omuri Yesu Kristo, owaatufeereire ngu tutungye amagara agatahwaho hati naategyeka nk’Omugabe w’Obukama bwa Ruhanga.”

Tim: Hati naakireeba buzima. Na magaziini yaanyu neehamya ngu Abajurizi ba Yehova nibaikiririza omuri Yesu.

Anthony: Hatariho kubanganisa.

Tim: Mbwenu shi, ahabw’enki abantu nibagira ngu timurikwikiririza omuri Yesu?

Anthony: Noobaasa kushanga hariho enshonga nyingi ahabw’enki abantu nibagira batyo. Abamwe nibakigamba, ahabw’okugira ngu bakahurira abandi barikukigamba. Nari abeebembezi baabo nibo barikubaasa kuba baabeegyeise ebyo ebitahikire.

Tim: Ninteekateeka ngu abantu abamwe nibagira ngu timurikwikiririza omuri Yesu ahabw’okugira ngu nimweyeta Abajurizi ba Yehova, beitu batari Bajurizi ba Yesu.

Anthony: Noobaasa kushanga abamwe barikwihirira n’ahari ekyo.

Tim: Ahabw’enki nimugamba ahari Yehova munonga?

“NKABAMANYISA EIZIINA RYAWE”

Anthony: Nitwikiriza ngu ni kikuru kukoresa eiziina rya Ruhanga, Yehova nk’oku Omwana we Yesu yaarikoreise. Teekateeka aha ki Yesu yaagambire obu yaabaire naashaba Ishe. Okushaba kwe kuhandiikire omuri Yohaana 17:26. Okaayenzire kushoma ekyahandiikirwe ekyo?

Tim: Eego. “Nkabamanyisa eiziina ryawe, kandi ndyarimanyisa, ngu okukunda oku waankunzire, kube omuribo, naanye mbe omuribo.”

Anthony: Yebare. Yetegyereze ngu Yesu akagira ngu akamanyisa eiziina rya Ruhanga. Nooteekateeka ahabw’enki ekyo yaakikozire?

Tim: Tindikumanya.

Anthony: Ka tureebe ekyahandiikirwe ekindi ekirikwongyera kushoboorora enshonga egyo. Naaba ninteekateeka aha Ebyakozirwe 2:21. Nikigira kiti: “Omuntu weena oritakira eiziina rya Mukama aryajunwa.” Hati nimpamya noikiriza ngu kubaasa kujunwa ku kiraabe nikyetengyesa okutakira eiziina rya Ruhanga Yehova, hatariho kubanganisa Yesu ekyo akaba naakimanya.

Tim: Eego buzima.

Anthony: Yesu akaba naakimanya ngu abakuratsi be kubaasa kujunwa, baine kumanya kandi bakakoresa eiziina rya Ruhanga. Egi n’emwe aha nshonga nkuru ahabw’enki nitugamba ahari Yehova munonga. Nitumanya ngu ni kikuru kumanyisa abandi eiziina rya Ruhanga kandi tukabahwera kuritakira.

Tim: Kwonka abantu n’obu baakuba batamanyire eiziina rya Ruhanga nari kurikoresa butunu, nabwo nibaba nibamanya ou barikugambaho ku barikugira ngu Ruhanga.

Anthony: Ekyo nikibaasa kuba kihikire. Kwonka Ruhanga okutugambira eiziina rye, nikituhwera kurahukirwa kumwirira haihi.

Tim: Noomanyisa ki?

Anthony: Kiteekateekeho oti: Ku ogire ngu titurikumanya eiziina rya Musa, tukaabaire nitumugambaho nk’omushaija owaabaganiisemu Enyanja Erikutukura, nari omushaija owaatungire Ebiragiro Ikumi. Nikyo kimwe na Noa, tukaabaire nitumugambaho nk’omushaija owaayombekire obwato, reero akakiza eka ye n’enyamaishwa. Nangwa na Yesu akaabaire naamanywa nk’ogwo owaarugire omu iguru kwija kufeera abasiisi. Tikwo?

Tim: Ningira nikwo.

Anthony: Kwonka Ruhanga akahamya ngu twamanya amaziina g’abantu abo. Okumanya amaziina gaabo, nikituhwera kutwara ebi baakozire nk’ebyabuzima. N’obu turaabe tutakareebaga Musa, Noa, nari Yesu, okumanya amaziina gaabo, nikituhwera kubatwara nk’abaabuzima.

Tim: Ekyo tinkakiteekateekahoga ntyo, kwonka nikikora amakuru!

Anthony: Kandi egi n’enshonga endiijo ahabw’enki Abajurizi ba Yehova nibakoresa munonga eiziina rya Ruhanga. Nitwenda kuhwera abantu kwikiririza omuri Yehova Ruhanga, bamutware nk’owaabuzima ou barikubaasa kwirira haihi. Kandi nabwo, nitufayo munonga aha murimo mukuru ogu Yesu arikukora omu kuhwera abantu okujunwa. Ka tushome ekyahandiikirwe ekindi kimwe ekirikubaasa kutuhwera kwetegyereza gye enshonga.

Tim: Tikiine nshonga.

Anthony: Twaba twashomire Yohaana 14:6. Ijuka Yesu akagira ngu niwe “muhanda, n’amazima, n’amagara.” Kwonka hati ka tushome ebigambo ebiri omuri Yohaana 14:1. Noobaasa kushoma eki Yesu yaagambire omu bigambo ebirikuhererukayo omu runyiriri orwo.

Tim: Nihagira hati: “Mwikirize Ruhanga, naanye muunyikirize.”

Anthony: Yebare. Mbwenu shi okwikiriza okwabuzima nikimanyisa okucwamu kwiriza Yesu nari Ruhanga?

Tim: Ngaaha. Yesu akagira ngu twine kwikiririza omuri bombi.

Anthony: N’amazima. Kandi nimpamya ngu nookimanya ngu tikirikumara kugira ngu noikiririza omuri Ruhanga n’omuri Yesu. Buzima, twine kukora ebirikworeka ngu nitubaikiririzamu.

Tim: Buzimazima.

Anthony: Kwonka shi omuntu naabaasa kworeka ata ngu naikiririza omuri Ruhanga na Yesu? Shana nitubaasa kugaaniira aha kibuuzo ekyo omurundi ogundi.a

Tim: Eego buzima.