EBIBUUZO EBI BAIBULI ERIKUGARUKAMU
Ensi yaitu eriho ahabw’ekigyendererwa?
Ensi ekahangwa eri ey’okuba omwanya murungi gw’okutuurwamu abantu.
Ensi yaitu ekozirwe gye neebaasa kubaisaho ebiine amagara. Eine amaizi agarikwetengwa kubaisaho amagara. Oku ensi erikwetoorora, n’omwanya ogu erikwetoororeramu, nibirinda enyanja empango kutakwata rubaare nari amaizi gaazo kutatabura gakooma. Omwanya oguri ahaiguru y’ensi n’amaani agarikukingira amaranzi g’eizooba, nibiturinda kutahikwaho kabi. Omuringo ogu enyamaishwa n’ebimera birikuhwerahweranamu omu nsi nigutangaaza. N’ahabw’ekyo, abantu baingi bakyetegyereize ngu ensi yaitu ekakorwa ahabw’ekigyendererwa.—Shoma Isaaya 45:18.
Kwonka noobaasa kwebuuza oti: Ensi ku eraabe yaakozirwe ahabw’ekigyendererwa, okubonabona n’obutari buringaaniza nibitwarirwa omu kigyendererwa ekyo?—Shoma Eky’Ebiragiro 32:4, 5.
Mbwenu shi ekigyendererwa ky’ensi egi nikiija kuhikiirizibwa?
Ensi ekahangwa eri ey’okuba omwanya murungi gw’okutuurwamu abantu abarikuhaana ekitiinisa kandi bakakunda n’Omuhangi waabo. N’ahabw’ekyo, abantu bakahangwa baine ekigyendererwa ky’ahaiguru kukira enyamaishwa n’ebimera. Nitubaasa kumanya gye Omuhangi waitu, tumwegombe, kandi tutooreze rukundo ye n’oburingaaniza bwe.—Shoma Omubuurizi 12:13; Miika 6:8.
Omuhangi waitu naabaasa kuhikiiriza ebi arikwenda kukora. N’ahabw’ekyo, nitubaasa kuhamya ngu naija kwihaho okubonabona n’obutari buringaaniza, kandi aboneze n’ensi egarukye ebe omwanya murungi gw’okutuurwamu abantu.—Shoma Zaaburi 37:11, 29; Isaaya 55:11.