Gira Omujinya nk’Ogwa Yesu omu Kubuurira

1. Ni mutwarize ki gumwe ogurikureetera abaheereza ba Yehova kuba ab’omutaano?

KIMWE aha bintu ebirikureetera abaheereza ba Yehova kutaana aha Abakristaayo ab’ebishobobo n’okugira omujinyaa omu buheereza. (Tit. 2:14) Obumwe, noobaasa kuhurira otaine muhimbo omu kubuurira. Obundi noobaasa kuba oine enyehurira nk’ez’omureeberezi omwe orikukora munonga owaagizire ati: “Obumwe, nimba ntaine kihika ky’okubuurira.”

2. Obumwe niki ekirikutureetera kugumirwa kubuurira n’omujinya?

² Nitubaasa kuba nitukunda munonga kwejumba omu buheereza obundi okukira okuza omu kubuurira. Ahabw’enki? Ahabw’okuba nitubaasa kurahuka kureeba ebirungi ebirikurugamu kandi twehurire gye twayombeka Ebyombeko by’Obukama, tukabireeberera, tukahwera abahikirweho ebihikiirizi, nari tukagumya ab’eishe-emwe. Nikitushemeza kureeba obusingye na rukundo ebi turikutunga twakora n’ab’eishe-emwe, kandi nitumanya ngu nibasiima byona ebi turikubakorera. Kwonka, nitubaasa kuba tumazire obwire bwingi turikubuurira omu kicweka ahu abantu bakye barikutuhurikiza, nari barikwanga obutumwa bwaitu. Kandi nitumanya ngu emperu yaagumizamu kwirira haihi, abantu nibaija kwongyera kwanga obutumwa bwaitu. (Mat. 10:22) Niki ekirikubaasa kutuhwera kuguma twine omujinya gw’okubuurira nari kwongyera kugugira?

3. Luka 13:​6-9 neegamba ki aha mujinya gwa Yesu?

³ Nitubaasa kugira omujinya nk’ogwa Yesu omu murimo gw’okubuurira twatooreza eky’okureeberaho kye. Omu buheereza bwe omu nsi, akaguma aine omujinya. Nangwa na bwanyima y’obwire, akoongyera aha mujinya gwe omu kubuurira. (Shoma Luka 13:​6-9.) Nk’omuhingi w’emizaabibu owaamazire emyaka eshatu arikureeberera ekiti ky’omutiini ekitaraanire bijuma, Yesu akamara emyaka eshatu arikubuurira Abayudaaya kandi baingi aharibo tibarakunzire obutumwa bwe. Kwonka, nk’oku omuhingi w’emizaabibu atarahanikire akabirugaho, Yesu nawe tararekyeire aho kubuurira abantu nari kugira omujinya omu buheereza bwe. Kureka, akoongyera kubuurira kugira ngu ahikye baingi aha mutima.

4. Ni mbeera ki ina ezi turikuza kushwijuma omu ky’okureeberaho kya Yesu?

⁴ Omu kicweka eki, nituza kushwijuma oku Yesu yaayorekire omujinya, na munonga omu meezi mukaaga ag’aha muheru omu buheereza bwe. Twamutooreza kandi tukeegyera aha bi yaayegyeise nikiija kutuhwera kuguma twine omujinya obunaku obu. Ka tushwijume eky’okureeberaho kya Yesu omu mbeera ina ezi: (1) Akata omutima aha bi Yehova arikukunda, (2) akata omutima aha bunabi bwa Baibuli, (3) akeesiga obushagiki bwa Yehova, kandi (4) akaguma aine emiteekateekyere mirungi ngu bamwe nibaija kumuhurikiza.

AKATA OMUTIMA AHA BI YEHOVA ARIKUKUDA

5. Yesu akooreka ata ngu akaba ataire omutima aha kukora ebi Ruhanga arikukunda?

⁵ Yesu akabuurira n’omujinya amakuru marungi g’Obukama bwa Ruhanga ahakuba akaba naamanya ngu nigwo murimo ogu Ruhanga yaabaire naayenda ngu akore. (Luk. 4:43) Yesu akaba naayebembeza obuheereza. Ku yaabaire ari haihi kuhendera obuheereza bwe, akagyenda “omuri tauni n’ebirorero,” naayegyesa abantu. (Luk. 13:22) Kandi akatendeka abeegi abandi baingi kukora nawe omurimo gw’okubuurira.—Luk. 10:1.

6. Omurimo gw’okubuurira gwine akakwate ki n’emirimo endiijo ey’ekibiina? (Reeba n’ekishushani.)

⁶ N’obunaku obu, okubuurira amakuru marungi nigwo murimo mukuru ogu Yehova na Yesu barikwenda ngu tukore. (Mat. 24:14; 28:​19, 20) Okubuurira kwine akakwate kahango n’emirimo endiijo y’ekibiina. Nk’eky’okureeberaho, nitwombeka ebyombeko by’ekibiina nari tuheereza aha Beseeli kushagika omurimo gw’okubuurira. Nituhwera ab’eishe-emwe na banyaanyazi-itwe abahikirweho ebihikiirizi, kandi tubahwera kugaruka kugira entebeekanisa y’eby’omwoyo, erikutwariramu okubuurira. Twamanya obukuru bw’omurimo gw’okubuurira, kandi tukaijuka ngu nigwo murimo omukuru ogu Yehova arikwenda ngu tukore nitwija kuhigwa kubuurira obutoosha n’omujinya. János, omureeberezi omuri Hungary, naagira ati: “Niinyeyijutsya ngu tihariho eki turikukora omu buheereza ekirikubaasa kuza omu mwanya gw’okubuurira, nigwo murimo ogurikukirayo obukuru.”

7. Ahabw’enki Yehova naayenda ngu tugumizemu nitubuurira? (1 Timoseo 2:​3, 4)

⁷ Nitubaasa kwongyera kugira omujinya omu buheereza twareeba abantu nk’oku Yehova arikubareeba. Naayenda ngu abantu baingi bahurire amakuru marungi, kandi bagiikirize. (Shoma 1 Timoseo 2:​3, 4.) Okuhitsya obu ekyo kiraabeho, naatutendeka kugira ngu tubaase kubuurira gye obutumwa obwo oburikukiza amagara. Nk’eky’okureeberaho, akatabo Kunda Abantu—Obahindure Abeegi nikatuhwera kutandika ekigaaniiro twine ekigyendererwa ky’okuhindura abantu abeegi. Abantu n’obu barikuba bataikiriize hati, nibabaasa kugira omugisha gw’okwikiriza okubonabona kwingi kutakahendeire. Ebi turikubagambira hati nibibaasa kubahwera omu biro by’omumaisho. Kwonka ekyo nikiija kubaasika twagumizamu nitubuurira.

AKATA OMUTIMA AHA BUNABI BWA BAIBULI

8. Yesu okumanya obunabi bwa Baibuli kikamuhiga kukoresa ata obwire bwe?

⁸ Yesu akaba naayetegyereza oku obunabi bwa Baibuli bwabaire nibwija kuhikiirira. Akaba naamanya ngu obuheereza bwe nibwija kumara emyaka eshatu n’ekicweka. (Dan. 9:​26, 27) Kandi akaba naamanya obunabi oburikukwata aha bu yaabaire naija kufa, n’oku yaabaire naija kwitwa. (Luk. 18:​31-34) Ekyo kikabaasisa Yesu kukoresa gye obwire bwe. N’ekyarugiremu, akabuurira n’omujinya kugira ngu abaase kuheza omurimo ogu yaahairwe.

9. Obunabi bwa Baibuli nibutuhiga buta kubuurira n’omujinya?

⁹ Twayetegyereza obunabi bwa Baibuli nikituhiga kubuurira n’omujinya. Nitumanya ngu hatsigaireyo obwire bukye entebeekanisa y’obusingye obu kuhendera. Nitureeba ngu embeera n’emitwarize y’abantu obunaku obu neeyoreka obumanyiso bw’ebiro by’emperu obu Baibuli yaagambireho. Nitwetegyereza ngu okuharangatana okuri aha gati y’Obutegyeki Kirimaani obwa Bungyereza na Amerika hamwe na Russia n’abashagiki baayo nikuhikiiriza obunabi oburikukwata aha mugabe wa bukiizi-bwa-buryo n’owa bumosho ‘omu bunaku bw’aha muheru.’ (Dan. 11:40) Kandi nitumanya ngu Obutegyeki Kirimaani obwa Bungyereza na Amerika nibujwekyera ebigyere by’ekishushani ekirikugambwaho omuri Danieli 2:​43-45. Nituhamya gye nk’oku obunabi burikworeka ngu juba Obutegyeki bwa Ruhanga nibwija kucwekyereza gavumenti z’abantu. Obunabi obwo bwona nibutuhamiza ngu turi haihi n’emperu, kandi twine kubuurira n’omujinya.

10. Ni mu muringo ki endiijo oku obunabi bwa Baibuli burikutuhiga kugumizamu nitubuurira n’omujinya?

¹⁰ Kandi obunabi bwa Baibuli burimu obutumwa obu twine kugambira abandi. Carrie, munyaanyazi-itwe orikuheereza omuri Dominican Republic naagira ati: “Ebiraganiso bya Yehova ebirikukwata ahari nyentsya nungi nibimpiga kugambira abandi.” Naayongyeraho ati: “Twareeba embeera ezi abantu abarikurabamu, nikimpwera kwetegyereza ngu ebiraganiso ebi tibirikugasira nyowe nyenka, kureka nibigasira n’abandi.” Obunabi bwa Baibuli nibutuhiga kugira omujinya gw’okugumizamu nitukora omurimo gw’okubuurira turikumanya ngu twine obushagiki bwa Yehova. Leila, orikutuura Hungary, naagira ati: “Isaaya 11:​6-9 nihampiga kwejumbira kimwe omu kubuurira abandi amakuru marungi otwariiremu n’abo abarikureebeka nk’abataraije kugakunda. Niimanya ngu omuntu weena naabaasa kuhinduka yaahwerwa Yehova.” Kandi ow’eishe-emwe Christopher, owa Zambia, naagira ati: “Nk’oku kyagambirwe omuri Mako 13:10 amakuru marungi nigabuurirwa omu nsi yoona, kandi n’omugisha gw’omuhendo kwejumba omu kuhikiiriza obunabi obu.” Ni bunabi ki bwa Baibuli oburikukuhiga kugumizamu noobuurira?

AKEESIGA YEHOVA KUMUSHAGIKA

11. Ahabw’enki Yesu yaabaire aine kwesiga Yehova kumuhwera kugumizamu naabuurira n’omujinya? (Luka 12:​49, 53)

¹¹ Yesu akaba naayesiga ngu Yehova naija kugumizamu naamushagika kubuurira n’omujinya. N’obu Yesu araabe yaabaire naabuurira n’obwegyendesereza, akaba naamanya ngu amakuru marungi g’Obukama bwa Ruhanga nigabaasa kugwisa kubi abantu abamwe, kandi abandi bagahakanise munonga. (Shoma Luka 12:​49, 53.) Egi niyo nshonga ahabw’enki abeebembezi b’ediini baataireho munonga kwita Yesu. (Yoh. 8:59; 10:​31, 39) Kwonka Yesu akagumizamu naabuurira ahakuba akaba naamanya ngu Yehova ari hamwe nawe. Akagira ati: “Nkwatanisa na Tata owaantumire. . . . Takantsigahoga nyenka, ahabw’okuba obutoosha nkora ebimushemeza.”—Yoh. 8:​16, 29.

12. Yesu akatebeekanisa ata abeegi kugumizamu nibabuurira n’obu baraabe baabaire nibaija kuhiiganisibwa?

¹² Yesu akaijutsya abeegi be ngu nibabaasa kwesiga Yehova kubashagika. Akabahamiza emirundi mingi ngu Yehova akaba naija kubahwera n’obu baakuhiiganisibwa. (Mat. 10:​18-20; Luk. 12:​11, 12) N’ahabw’ekyo, akabahiga kuba abeegyendesereza. (Mat. 10:16; Luk. 10:3) Akabagira ngu batagyema obutumwa bwabo abatarikwenda kubahurikiza. (Luk. 10:​10, 11) Kandi akabagira ngu baine kuhunga baahiiganisibwa. (Mat. 10:23) N’obu Yesu araabe yaabaire aine omujinya omu kubuurira, kandi arikwesiga Yehova, akaba naayetantara kuta amagara ge omu kabi ahu kyabaire kitarikwetengyesa.—Yoh. 11:​53, 54.

13. Ahabw’enki orikubaasa kugira obwesigye ngu Yehova naija kukuhwera?

¹³ Twena nitwenda obuhwezi bwa Yehova kubaasa kugumizamu nitubuurira n’omujinya twaba nituhiiganisibwa. (Kush. 12:17) Ahabw’enki noobaasa kuhamya ngu Yehova naija kukushagika? Teekateeka aha kushaba kwa Yesu okuri omuri Yohaana eshuura 17. Yesu akashaba Yehova kurinda entumwa ze, kandi Yehova akagarukamu okushaba kwe. Ekitabo eky’Ebyakozirwe nikyoreka oku yaabahweraire kubuurira n’omujinya n’obu baraabe baahiiganisiibwe. Kandi omu kushaba kwa Yesu akagambira Yehova kurinda abaabaire nibaija kwikiririza omu bi entumwa baabuuriire. Ekyo nikitwariramu naiwe. Yehova naakigumizamu kuhurira okushaba kwa Yesu, kandi naiwe naija kukuhwera nk’oku yaahweraire entumwa.—Yoh. 17:​11, 15, 20.

14. Nitumanya tuta ngu nitwija kugumizamu nitubuurira n’omujinya? (Reeba n’ekishushani.)

¹⁴ Emperu yaaguma neirira haihi nitubaasa kwongyera kugumirwa kubuurira amakuru marungi n’omujinya, kwonka nitwija kutunga obuhwezi oburikwetengyesa. (Luk. 21:​12-15) Nka Yesu n’entumwa ze, nitureka abantu kwecweramu yaaba baraikirize nari bakanga, kandi titurikuteera nabo empaka. Kandi omurimo gwaitu gw’okubuurira gwazibirwa, ab’eishe-emwe nibagumizamu barikubuurira amakuru marungi ahakuba nibeesiga Yehova, beitu gatari maani gaabo. Nk’oku Yehova yaahaire amaani abaheereza be ab’ekyasha ky’okubanza, obunaku obu naatuha amaani ‘g’okugambira kimwe ekigambo kya Ruhanga’ nk’oku arikwenda. (2 Tim. 4:17) Noobaasa kugira obwesigye ngu waayesiga Yehova, noija kugumizamu noobuurira n’omujinya.

AKAGUMA AINE EMITEEKATEEKYERE MIRUNGI

15. Niki ekirikworeka ngu Yesu akaba aine emiteekateekyere mirungi aha buheereza?

¹⁵ Yesu akaba aine emiteekateekyere mirungi aha kubuurira. Ekyo kikamuhwera kuguma aine omuhimbo omu buheereza. Nk’eky’okureeberaho, omwaka gwa 30 Y A K. guri haihi kuhwa, Yesu akeetegyereza ngu abantu baingi bakaba beteekateekire kumuhurikiza, kandi akabagyeragyeranisa n’omusiri ogwezire oguhikire kushaaruurwa. (Yoh. 4:35) Bwanyima y’omwaka gumwe, akagambira abeegi be ati: “Eby’okugyesha ni bingi munonga.” (Mat. 9:​37, 38) Na bwanyima akagaruka yaakihamisiriza ati: “Eby’okugyesha ni bingi munonga. . . N’ahabw’ekyo mushabe Mukama w’eigyesha atume abagyesi omu kugyesha kwe.” (Luk. 10:2) Yesu akaguma aine obwesigye ngu abantu nibaija kwikiriza amakuru marungi, kandi akaba ashemererwa munonga ku baabaire baikiriza.—Luk. 10:21.

16. Eby’okureeberaho bya Yesu bikooreka bita ngu aine emiteekateekyere mirungi aha buheereza? (Luka 13:​18-21) (Reeba n’ekishushani.)

¹⁶ Yesu akeegyesa abeegi be kuguma baine emiteekateekyere mirungi aha butumwa bwabo, kandi ekyo kikaba nikiija kubahwera kuguma baine omujinya. Nk’eky’okureeberaho, teekateeka aha by’okureeberaho bibiri ebi, ebi yaakoreise. (Shoma Luka 13:​18-21.) Yesu akakoresa akajuma ka sinaapi kwegyesa ngu obutumwa bw’Obukama bukaba nibwija kujanjaara omu muringo ogurikutangaaza, kandi gukaba gutarikwija kwemerezibwa. Akakoresa n’ekitumbisa kworeka oku obutumwa bw’Obukama bwabaire nibwija kujanjaara, kandi bukareetaho empinduka ezitarikureebwa butunu. Yesu okukora atyo akahwera abeegi be kureeba ngu obutumwa obu baabaire nibabuurira bukaba nibwija kuhwera baingi.

17. Ni nshonga ki erikutureetera kuguma twine emiteekateekyere mirungi aha buheereza?

¹⁷ Nitugira omujinya gw’okugumizamu nitubuurira twateekateeka aha birikuhikiirizibwa omu nsi yoona. Buri mwaka, obukaikuru bw’abantu nibaija aha Kiijutsyo, kandi tubeegyesa Baibuli. Abantu baingi munonga nibabatizibwa, kandi batwegaitaho omu murimo gw’okubuurira. Titurikumanya omuhendo gw’abantu abari hakye kwikiriza obutumwa obu turikubuurira, kwonka nitumanya ngu Yehova naarundaana omutwe muhango gw’abantu, abaraahonokeho omu kubonabona kwingi okuri haihi kubaho. (Kush. 7:​9, 14) Mukama w’eigyesha naagumizamu kureeba ebirungi ebirikubaasa kuruga omu kubuurira, n’ahabw’ekyo twine enshonga nungi ahabw’enki twine kugumizamu nitubuurira.

18. Nitwenda ngu abantu bareebe ki aha bikwatiraine n’obuheereza bwaitu?

¹⁸ Abeegi ba Yesu batwire nibamanywa ahabw’okubuurira n’omujinya. Abantu ku baareebire abeegi nibagamba n’obumanzi “baijuka ku baabaire batuura na Yesu.” (Byak. 4:13) Abantu baaba nibatureeba omu kubuurira, ka bareebe ngu twine omujinya nk’ogu Yesu yaabaire aine!