Tooreza Baamaraika Abeesigwa

1-2. (a) Ahabw’enki abantu nibataana aha baamaraika? (b) Niki eki turikushushanisa na baamaraika?

YEHOVA ku yaakureetsire omu mazima, okeegaita aha ka mpango y’abaheereza be, erikutwariramu baamaraika abeesigwa nyamwingi. (Dan. 7:​9, 10) Twateekateeka ahari baamaraika, nitureeba ngu buzima nibataana ahariitwe. Nk’eky’okureeberaho, baatwaireho obwire bwingi kutukira. (Yob. 38:​4, 7) Baine amaani maingi kutukira. N’abarikwera, kandi bahikiriire kuhika aha rurengo oru tutarikubaasa kuhikaho ahabw’okutahikiriira.—Luk. 9:26.

² N’obu turaabe nitutaana na baamaraika omu miringo egyo, haine ebi turikushushanisa nabo. Nk’eky’okureeberaho, itwe na baamaraika nitubaasa kutooreza emitwarize ya Yehova. Twine obugabe bw’okwecweramu. Twine amaziina, emitwarize n’obujunaanizibwa nkabo. Kandi, twine ekyetengo ky’okuramya Omuhangi waitu nk’abo.—1 Pet. 1:12.

3. Nitubaasa kwegyera ki ahari baamaraika abeesigwa?

³ Ahabw’okugira ngu twine bingi ebi turikushushanisa na baamaraika, eky’okureeberaho kyabo kirungi nikitugumya. Nangwa, nitubaasa kubeegyeraho bingi. Omu kicweka eki, nituza kureeba oku turikubaasa kutooreza baamaraika abeesigwa, turikuba abacureezi, turikukunda abantu, turikugumisiriza, kandi tukarinda ekibiina kuguma kishemeire.

BAAMARAIKA N’ABACUREEZI

4. (a) Baamaraika nibooreka bata obucureezi? (b) Ahabw’enki baamaraika n’abacureezi? (Zaaburi 89:7)

⁴ Baamaraika abeesigwa n’abacureezi. N’obu baraabe nibamanya bingi, baine amaani, n’obwengye, niboorobera obuhabuzi bwa Yehova. (Zab. 103:20) Baaba nibahikiriza obujunaanizibwa bwabo, tibarikwehimbisa ahabw’ebi barikukora, nari kukoresa amaani gaabo maingi kwenda kweyoreka. Nibashemererwa kukora ebi Ruhanga arikukunda n’obu haraabe hataine orikumanya amaziina gaabo.a (Kut. 32:​24, 29; 2 Bag. 19:35) Nibanga kuheebwa ekitiinisa ekishemereire Yehova. Ahabw’enki baamaraika n’abacureezi? N’ahabw’okugira ngu nibakunda Yehova, kandi nibamuha ekitiinisa kingi.—Shoma Zaaburi 89:7.

5. Maraika omwe akooreka ata obucureezi obu yaabaire naahabura Yohaana? (Reeba n’ekishushani.)

⁵ Teekateeka aha ky’okureeberaho ekirikworeka ngu baamaraika n’abacureezi. Nk’omu gwa 96 Y.A.K, maraika otarikumanywa eiziina akahwera entumwa Yohaana kutunga okworekwa okurikushemeza. (Kush. 1:1) Yohaana akatwaza ata? Akateeraho kuramya maraika. Kwonka, maraika ogwo akamuzibira ahonaaho, arikugira ati: “[Yegyendesereze! Otakikora!] ndi omuheereza mugyenzi waawe n’owa beene sho. . . Ramya Ruhanga” (Kush. 19:10) Maraika ogwo ka yaayorekire ngu n’omucureezi! Akaba atarikwenda kuheebwa ekitiinisa nari kuhimbisibwa. Ahonaaho akagambira Yohaana kuramya Yehova Ruhanga. Kandi maraika ogwo tareetwire nk’orikukira Yohaana. Akaba aheereize Yehova kumara obwire buraingwa, kandi arikukiza entumwa Yohaana amaani, kwonka omu bucureezi akagira ngu n’omukozi mugyenzi we. N’obu maraika yaabaire aine kuhabura Yohaana owaabaire ari omugurusi, taramugambiire kubi nari kumutwariza kubi. Kureka, akagamba nawe omu muringo gw’embabazi. Akeetegyereza ngu eki Yohaana yaakozire, akakikora ahabw’okworekwa okurikutangaaza oku yaareebire.

6. Nitubaasa kutooreza tuta baamaraika tukaba abacureezi?

⁶ Nitubaasa kutooreza tuta baamaraika abacureezi? Naitwe nitubaasa kuhikiiriza obujunaanizibwa bwaitu tutarikwehimbisa nari kuteeraho kwereeba nk’ab’omutaano ahabw’ebi tuhikiirize. (1 Kor. 4:7) Kandi, titwine kwereeba nk’abarikukira abandi twaba tuheereize Yehova kumara obwire buraingwa nari twine obujunaanizibwa obu bataine. Nangwa, twayongyerwaho obujunaanizibwa, nituba twine kwongyera kwereeba nk’ab’ahansi. (Luk. 9:48) Nitwenda kutooreza baamaraika turikuheereza abandi. Titurikwenda kwetunguura.

7. Nitubaasa kworeka tuta obucureezi omuntu yaatuhabura nari yaatuhana?

⁷ Kandi, nitubaasa n’okworeka obucureezi twaba twine kuhabura nari kuhana ow’eishe-emwe nari omwana waitu. Kwonka nituba twine kuhamira aha kihikire. Nka maraika owaahabwire Yohaana omu muringo gw’embabazi, nitubaasa kuhabura omuntu tutamureeteire kwehurira kubi. Twaba tutarikwereeba nk’abarikukira abandi, nitwija kuha obuhabuzi oburikwegamira ahari Baibuli omu muringo gw’ekitiinisa, kandi ogwa rukundo.—Kol. 4:6.

BAAMARAIKA NIBAKUNDA ABANTU

8. (a) Kurugiirira ahari Luka 15:​10, baamaraika nibooreka bata ngu nibakunda abantu? (b) Baamaraika nibatuhwera bata omu murimo gw’okubuurira? (Reeba n’ekishushani .)

⁸ Baamaraika tibarikwetunguura nari kwetaanisa aha bantu. Nibakunda abantu. Nibashemererwa omusiisi yaayeteisa akagarukira Yehova, nari omuntu yaahindura emitwarize ye akaija omu mazima. (Shoma Luka 15:10.) Kandi nibeejumbira kimwe omu murimo gw’okubuurira aha Bukama. (Kush. 14:6) N’obu baraabe batarikubuurira butunu, nibabaasa kuhwera omubuurizi kuhika aha muntu orikwenda kwega ebirikukwata ahari Yehova. Amazima gari ngu, titurikubaasa kuhamya ngu baamaraika bakatuhwera kuhika aha muntu nanka, ahakuba Yehova naabaasa kukoresa emiringo endiijo nk’omwoyo gurikwera, kuhwera abantu nari kutubaasisa kubahikaho. (Byak. 16:​6, 7) Kandi, naakoresa baamaraika kutuhwera omu buheereza. N’ahabw’ekyo nitubaasa kugira obwesigye ngu nibaba bariho kutushagika.—Reeba akabokusi “Okushaba Kwabo Kukagarukwamu.”b

9. Nitubaasa kutooreza tuta baamaraika tukakunda abantu?

⁹ Nitubaasa kutooreza tuta baamaraika omu kukunda abantu? Twahurira ekirango ngu omuntu agarukire omu kibiina, nitushemererwa hamwe na baamaraika. Nitubaasa kwakiira ow’eishe-emwe ogwo, kandi tumuhamize ngu nitumukunda. (Luk. 15:​4-7; 2 Kor. 2:​6-8) Kandi nitubaasa kutooreza baamaraika turikukora kyona eki turikubaasa omu murimo gw’okubuurira. (Mub. 11:6) Nk’oku baamaraika barikutuhwera twaba nitubuurira, naitwe nitubaasa kufayo kushagika ab’eishe-emwe na banyaanyazi-itwe bagyenzi baitu omu kubuurira. Nk’eky’okureeberaho, nitubaasa kukora entebeekanisa y’okubuurira n’ababuurizi abasya. Nari nitubaasa kushagika Abakristaayo bagyenzi baitu abakuzire, nari abaine amagara mabi kwejumba omu buheereza.

10. Nitwegyera ki aha byahikire ahari Sara?

¹⁰ Kwonka shi ku twakuba tutarikubaasa kukora byona ebi turikwenda omu buheereza? Nitubaasa kusherura emiringo endiijo y’okukora na baamaraika omu murimo gw’okubuurira. Teekateeka aha byahikire ahari munyaanyazi-itwe Sara,c owa India. Bwanyima y’okuheereza nka payoniya kumara emyaka nka 20, akarwara kandi akaba atarikubaasa kwimuka omu kitanda. Eki kikamureetera amaganya maingi. Kwonka okushoma Baibuli obutoosha n’okuhwerwa eka ye y’eby’omwoyo, kikamubaasisa kugaruka kugira emiteekateekyere mirungi. Amazima gari ngu, akaba aine kumanyiira emiringo y’okubuurira erikuhikaana n’embeera ye. Ahabw’okugira ngu akaba atarikubaasa kushutama kuhandiika amabaruha, akaba akoresa esimu yonka kubuurira. N’ahabw’ekyo, akaba agarukira abantu arikubateerera esimu, kandi abu yaabaire agarukira bakaba bamugambira abandi abaabaire nibenda kumanya amazima. Niki ekyarugiremu? Omu meezi makye, Sara akaba aine abeegi ba Baibuli 70, akaba atarikubaasa kubeegyesa boona wenka. N’ahabw’ekyo, abamwe akabaha banyaanyazi-itwe abandi omu kibiina. Baingi aha beegi abo hati nibaza omu nteerane. Baamaraika ka nibashemererwa kukora n’ab’eishe-emwe na banyaanyazi-itwe, nka Sara, abarikukora kyona eki barikubaasa omu murimo gw’okubuurira!

BAAMARAIKA NIBAGUMISIRIZA

11. Baamaraika abeesigwa boorekire bata okugumisiriza?

¹¹ Baamaraika abeesigwa n’eky’okureeberaho kirungi ky’okugumisiriza. Bagumisiriize obutari buringaniza n’obubi kumara emyaka mingi. Bakareeba Sitaane na baamaraika baingi, abu baabaire nibaheereza nabo barikugomera Yehova. (Kut. 3:1; 6:​1, 2; Yud. 6) Baibuli neegamba ahari maraika omwesigwa owaahakanisiibwe daimoni y’amaani butunu. (Dan. 10:13) Kandi, omu byafaayo by’abantu, bareebire abantu bakye munonga barikwejumba omu kuramya okw’amazima. Oyihireho ebyo byona, baamaraika abeesigwa nibagumizamu barikuheereza Yehova n’obweziriki bashemereirwe. Nibamanya ngu omu bwire obuhikire, Ruhanga naija kumariraho kimwe obutari buringaaniza.

12. Niki ekiraatuhwere kugumisiriza?

¹² Nitubaasa kutooreza tuta baamaraika omu kugira okugumisiriza? Nka baamaraika, nitubaasa kuhikwaho obutari buringaaniza. Naitwe twine obwesigye ngu Ruhanga naija kwihaho ebintu bibi byona omu bwire obuhikire. N’ahabw’ekyo nka baamaraika abeesigwa, “turekye kuruha omu kukora gye.” (Gal. 6:9) Yehova naaraganisa kutuhwera kugumisiriza. (1 Kor. 10:13) Nitubaasa kumushaba kutuha omwoyo gwe, ogurikutuhwera kugira okugumisiriza n’okushemererwa. (Gal. 5:22; Kol. 1:11) Mbwenu shi ku waakuhikwaho okuhakanisibwa? Yesigire kimwe Yehova, kandi otatiina. Butoosha Yehova naija kukushagika, kandi akuhe amaani.—Heb. 13:6.

BAAMARAIKA NIBAHWERA EKIBIINA KUGUMA KISHEMEIRE

13. Ni bujunaanizibwa ki bw’omutaano obu baamaraika baine omu biro ebi eby’emperu? (Matayo 13:​47-49)

¹³ Omu biro by’emperu, Yehova ahaire baamaraika obujunaanizibwa bw’omutaano. (Shoma Matayo 13:​47-49.) Abantu baingi kuruga omu nsi yoona nibasiima amakuru marungi. Bamwe aharibo nibakora empinduka kuba Abakristaayo abaabuzima, kandi abandi tibarikuzikora. Baamaraika bakaheebwa obujunaanizibwa ‘bw’okwiha ababi omu bahikiriire.’ Ekyo nikimanyisa ngu nibahwera kurinda ekibiina kuguma kishemeire. Ekyo tikirikumanyisa ngu weena orikwetaanisa aha kibiina tarikubaasa kugaruka, nari ngu ekibiina tikiraabemu buremeezi. Kwonka, nitubaasa kuhamya ngu baamaraika nibakora n’amaani kurinda ekibiina kuguma kishemeire.

14-15. Nitubaasa kutooreza tuta baamaraika tukarinda ekibiina kuguma kishemeire? (Reeba n’ebishushani.)

¹⁴ Nitubaasa kutooreza tuta baamaraika omu kurinda ekibiina kuguma kishemereire? Turikuteeraho kugira eki twakora kurinda ekibiina kuguma kishemereire omu micwe n’omu by’omwoyo. Kandi, nituteeraho kurinda omutima gwaitu turikugira abanywani barungi, tukeetantara n’ekintu kyona ekirikubaasa kututokooza. (Zab. 101:3) Nitubaasa n’okuhwera Abakristaayo bagyenzi baitu kuguma bahamiire ahari Yehova. Nk’eky’okureeberaho, twine kukora ki twamanya ngu haine okozire ekibi ky’amaani? Rukundo ei tumwiniire, neija kutuhiga kumugambira kumanyisa abareeberezi. Yaayanga kukikora, nitubamanyisa enshonga egyo. Nitwenda ngu Omukristaayo mugyenzi waitu ahwerwe omu by’omwoyo ahonaaho!—Yak. 5:​14, 15.

¹⁵ Eky’obusaasi, abamwe abarikukora ebibi by’amaani nibaihwa omu kibiina. Ekyo kyabaho,niturekyera aho ‘kukwatanisa’ nabo.d (1 Kor. 5:​9-13) Entebeekanisa egyo, neehwera ekibiina kuguma kishemeire. Twacwamu kutakwatanisa n’abaihirwe omu kibiina, nikyoreka ngu tubainiire embabazi. Eki nikibahwera kumanya ngu baine kugarukira Yehova. Kandi baamugarukira, twena otwariiremu Yehova na baamaraika nitushemererwa.—Luk. 15:7.

16. Noobaasa kuteeraho ota kutooreza baamaraika?

¹⁶ Ka twine omugisha muhango kureeba ebiri omu butuuro bw’eby’omwoyo n’amaisho g’okwikiriza, kandi tukakorera hamwe na baamaraika! Ka tutooreze emitwarize yaabo mirungi, obucureezi bwabo, rukundo ei bainiire abantu, n’oku barikufayo kurinda ekibiina kuguma kishemeire omu by’omwoyo, n’omu micwe. Twatooreza baamaraika abeesigwa nitubaasa kuba omu ka ya Yehova ey’abaheereza be ebiro byona.