Obuhwezi bw’Abakazi Abarikutwarizibwa Kubi
“ OBUKAIKURU bw’abakazi n’abaishiki omu nsi yoona batwire nibatwarizibwa kubi. Ori omwe aharibo? Manya ahabw’enki Ruhanga naafayo aha burinzi bwawe, n’eki arikwija kukora abarikutwarizibwa kubi abakazi.”
Ebigambo ebyo nibyo biri aha ntandikiro y’ekicweka ekiri aha jw.org ekiine omutwe “Eki Baibuli Erikugamba aha Burinzi bw’Abakazi.” Linki eri aha muheru gw’ekicweka ekyo neebaasa kukuhwera kwiha ekicweka ekyo, omu muringo oguteirwe nari PDF ei orikubaasa kuta aha rupapura ekaba turakiti erikubaasa kukubwamu emirundi ena. Munyaanyazi-itwe orikwetwa Stacy kuruga United States naagira ati: “Nyowe na munyaanyazi-itwe ondiijo tukateera kopi z’ekicweka ekyo, reero twazitwara omu mwanya ahu abakazi abarikutwarizibwa kubi barikuhungira kubaasa kutunga obuhwezi oburikwetengyesa omu kicweka kyaitu.”
Orikukora omu mwanya ogwo akatushaba yaaba naabaasa kutunga kopi ezindi kugira ngu azigabire abakazi abu yaabaire naahwera. N’ekyarugiremu bakamureetera kopi ezindi 40 na kaada 30 eza jw.org. Ku baagarukireyo omurundi ogundi, orikureeberera omwanya ogwo akashaba banyaanyazi-itwe kugamba n’abakazi abo aha ntebeekanisa y’okwega Baibuli.
Stacy na banyaanyazi-itwe abandi babiri bakaza omu mwanya gw’abakazi ogundi ahu baagabire kopi itaano za turakiti egyo kandi bakabashaba ezindi. Omwe aha bakozi akagira ati: “Obutumwa obu nibuza kuhwera abakazi abari aha.” Kandi akoongyeraho ati: “Eki nikyo turikwetenga.” Okutaayaaya okwakuratsireho, abakazi omu mwanya ogwo bakeerundaana kureeba ekirikutwarirwa omu kwega Baibuli, kandi babiri aharibo bakooreka ekihika ky’okwija aha ruteerane wiikenda.
Stacy naagira ati: “Tukatangaara kureeba oku abantu baakunzire obutumwa oburi omu kicweka eki. Okuteera ekicweka ekyo aha mpapura n’omuringo murungi gw’okugambira abakazi abarikutwarizibwa kubi aha butumwa oburikukwata aha bukama. Tukakwatwaho kureeba oku abantu abo baakunzire obutumwa obwo, kandi twine ekihika ky’okugumizamu nitubahitsyaho amakuru marungi.”