Ekitambo kya Yesu ‘Nikicungura Baingi’ Kita?
Eki Baibuli erikugarukamu
Ekitambo kya Yesu nigwo muringo ogu Ruhanga arikukoresa kucungura abantu, nari kubajuna ekibi n’okufa. Baibuli neegamba aha shagama ya Yesu eyaasheeshekire nk’ekitambo ky’okucungura. (Abaefeso 1:7; 1 Petero 1:18, 19) N’ahabw’ekyo, Yesu akagira ngu akaija ‘kuhayo amagara ge okucungura baingi.’—Matayo 20:28.
Ahabw’enki ‘ekitambo kya baingi kyabaire’ nikyetengyesa?
Omushaija w’okubanza Adamu, akahangwa ari ohikiriire, nari ataine kibi. Akaba aine amatsiko g’okutuuraho ebiro byona kwonka akagafeerwa arikucwamu kugomera Ruhanga. (Okutandika 3:17-19) Ku yaazaire abaana, akabahunguza ekibi. (Abarooma 5:12) Ahabw’enshonga egi, Baibuli neegira ngu Adamu ‘akeeguza’ n’abaijukuru kuba abahuuku b’ekibi n’okufa. (Abarooma 7:14) Boona ahabw’okuba abatahikiriire, tihaine owaabaire naabaasa kugaruraho eki Adamu yaafeereirwe.—Zaaburi 49:7, 8.
Ruhanga akasaasibwa baijukuru b’Adamu abaabaire bataine matsiko. (Yohaana 3:16) Kwonka, omutindo gwa Ruhanga ogw’oburingaaniza gukaba gutari okwehuzya ebibi byabo hatariho ah’okwihirira. (Zaaburi 89:14; Abarooma 3:23-26) Ruhanga naakunda abantu, n’ahabw’ekyo akataho entebeekanisa ehikire ey’okusaasira ebibi byabo n’okubiihiraho kimwe. (Abarooma 5:6-8) Ekitambo niyo ntebeekanisa egyo ehikire.
Ekitambo nikikora kita?
Omu Baibuli, ekigambo ekitambo nikitwariramu ebintu bishatu ebi:
N’omubaro nari omuhendo ogurikushashurwa.—Okubara 3:46, 47.
Nikireeta okucungurwa nari okurekurwa.—Okuruga 21:30.
Nikiba nikingaingana n’ekintu ekirikushashurirwa.a
Yetegyereze oku ebi byona birikuhikaana n’ekitambo kya Yesu Kristo.
Omuhendo ogwashashwirwe. Baibuli neegira ngu Abakristaayo ‘bakagurwa n’obuguzi bwingi.’ (1 Abakorinso 6:20; 7:23) Omuhendo ogwo n’eshagama ya Yesu, eyaasheeshekire kubaasa ‘kucungurira Ruhanga abantu b’enganda zoona n’endimi zoona n’amahanga goona.’—Okushuuruurwa 5:8, 9.
Okucungurwa. Ekitambo kya Yesu ‘kikacungura’ abantu kuruga omu kibi.—1 Abakorinso 1:30; Abakolosai 1:14; Abaheburaayo 9:15.
Ekirikwingaingana. Ekitambo kya Yesu nikiinganira kimwe n’eki Adamu yaafeereirwe, nigo amagara agatahwaho. (1 Abakorinso 15:21, 22, 45, 46) Baibuli neegira eti: “Nk’oku baingi baahindukire abasiisi ahabw’okutahurira kw’omuntu omwe [Adamu], nikwo baingi barihinduka abahikiriire ahabw’okuhurira kw’omwe [Yesu Kristo].” (Abarooma 5:19) Eki nikishoboorora gye oku okufa kw’omuntu omwe kurikubaasa kuba ekitambo ky’abasiisi baingi. Nangwa, Yesu naagambwaho ‘nk’owaayehaireyo kucungura abantu boona’ abarikukora ekirikubaasika kyona kugasirwa omu kitambo kye.—1 Timoseo 2:5, 6.
a Omu Baibuli, ekigambo ekirikuvunuurwa nk’ekitambo kiine amakuru g’omubaro nari ekintu ky’omuhendo ekirikushashurwa. Nk’eky’okureeberaho, ekigambo ky’Oruheburaayo ka·pharʹ nikimanyisa “okushweka” nari okusiiga. (Okutandika 6:14) Nikikira kukoresibwa aha kushweka ekibi. (Zaaburi 65:3) Ekiine akakwate nakyo ni koʹpher ekirikumanyisa omuhendo ogurikushashurwa kushweka nari kucungura. (Okuruga 21:30) Nikyo kimwe, ekigambo ky’Orugriika lyʹtron, ekirikukira kuvunuurwa ‘nk’ekitambo,’ nikibaasa kwetwa “omuhendo gw’okucungura.” (Matayo 20:28; The New Testament in Modern Speech, eya R. F. Weymouth) Abahandiiki Abagriika bakaba nibakoresa ekigambo ekyo kumanyisa omuhendo ogwabaire niguheebwayo kurekura omuntu okwatsirwe omu rutaro nari omuhuuku.