Jezu “Adapfunza Kukhala Munthu Wakubvera”

Jezu nthawe zentse akhabvera Yahova. (Juwau 8:29) Tsono thangwe ranyi Bibliya limbalewa kuti: “Iye adapfunza kukhala munthu wakubvera thangwe ra bzinthu bzomwe adabonera nabzo”? — Ahebereu 5:8.

Pomwe Jezu akhali pa dziko la pantsi, adagumana na bzinthu bzomwe alibe kugumana nabzo kudzulu. Abereki wace akhafuna Yahova, tsono akhali wakuperewera. (Luka 2:51) Iye adacitiridwa bzinthu bzakuipa na atsogoleri wa magereja pabodzi na maboma. (Mateu 26:59; Marko 15:15) Ndipo adakhala na infa yakuwawa kwene-kwene. Bibliya limbati: “Iye adabzicepesa ndipo adakhala wakubvera mpaka infa.” — Afilipi 2:8.

Bzomwe Jezu adagumana nabzobzi, bzidamupfunzisa kukhala wakubvera mu njira inango pomwe akhali pa dziko la pantsi pano. Na tenepo, iye angadakhala Mambo wakulungama na Mkulu wa Antsembe omwe angadakwanisa kutibvesesa bwino. (Ahebereu 4:15; 5:9) Pambuyo pakupfunza kukhala wakubvera thangwe ra bzinthu bzomwe adagumana nabzo, Jezu adakhala wakufunika kwene-kwene kwa Yahova. Bzimwebzi bzingaticitikirembo. Tikapitiriza kukhala wakubvera napo pa nthawe zakunesa, tingakhale wakufunika kwene-kwene kwa Yahova ndipo tingaphatisidwe basa pa basa liri-lentse lomwe iye angatipase. — Tiyago 1:4.