Abale Awiri Anovu Wa m’Bungwe Lakutonga

PA 5 OUTUBRO, 2024, padaperekedwa cidziwiso cakupambulika pa mtsonkhano wa pagole cakuti: M’bale Jody Jedele na m’bale Jacob Rumph adasankhulidwa kuti atumikire m’Bungwe Lakutonga la Mboni za Yahova. Abalewa amala magole mazinji akutumikira Yahova mwakukhulupirika.

M’bale Jedele adabadwira ku Missouri ku Estados Unidos ndipo adaleredwa m’banja la Mboni za Yahova. Iye pabodzi na wanthu wa m’banja mwace akhakhala ku mbuto yomwe kukhalibe Mboni zizinji. Ndipopa iye adadziwana na abale na mpfumakazi zizinji omwe akhambayenda kukapalizira mu dziko limwelire. Lufoyi na ciphatano ca abale amwewa bzidamulimbikisa kwene-kwene. Iye adabatizidwa pa 15 Outubro, gole la 1983. Iye akhafuna kwene-kwene kupalizira, ndipopa pambuyo pakumaliza kupfunza adayamba kutumikira ninga mpainiya wakukhazikika mu Setembro, gole la 1989.

Pomwe M’bale Jedele akhali tswaka, abereki wace akhambatenga iye pabodzi na m’bale wace kuti akazungire Beteli. Bzimwebzi bzidacitisa awiriwo kukhala na cakulinga cakufuna kutumikira pa Beteli. Ndipo bzimwebzi bzidakwanisika. M’bale Jedele adayamba kutumikira ku Beteli ya Wallkill mu Setembro, gole la 1990. Cakuyamba, iwo adatumikira mu Depatimenti ya Limpeza ndipo patsogolo pace adatumikira mu Depatimenti ya Bzaulapi.

Na kupita kwa nthawe, magwere yomwe yakhalewalewa cirewedwe ca Espanholi yadayamba kuthumizirika mwakuti pakhafunikira abale kuti akathandizire. Na tenepo, M’bale Jedele adayenda kukatumikira mu libodzi mwa magwere yamweya ndipo adayamba kupfunza cirewedwe ca Espanholi. Pomwe padapita nthawe pang’ono, iye adadziwana na Damaris, omwe akhali mpainiya wa m’gawo limwelire. Na kupita kwa nthawe, iwo adalowolana ndipo adayenda kukatumikira ku Beteli pabodzi.

Mu 2005, iwo adacoka ku Beteli kuti akasamalire abereki wawo. Pa nthawe imweyi, iwo akhatumikira ninga apainiya wakukhazikika. M’bale Jedele adakhala pfunzisi wa Xikola ya Utumiki bwa Upainiya. Iye adatumikirambo mu Komiti Yakucezerana na Nyumba za Ulapi ya m’dzikolo na Komiti Yakusamalira Basa la Bzakumanga-manga la m’Madziko.

Mu 2013, banjali lidacemeredwa pomwe kuti likathandizire basa la kumanga-manga ku Beteli ya ku Warwick. Iro lidatumikirambo ku Beteli ya ku Patterson na Wallkill. M’bale Jedele adatumikirambo mu Depatimenti Yakunyang’anira bza Mabasa ya Bzakumanga-manga na mu Depatimenti Yakusamalira Nkhani za Xipitali. Mu Março 2023, iye adasankhulidwa kuti akatumikire ninga mthandizi wa m’Komiti ya Utumiki. Pakukumbukira mautumiki yakusiyana-siyana yomwe iye adakhala nayo, iye adati: “Nthawe zinango, imwepo mungacite mantha mukatambira utumiki bupsa. Ni nthawe imweyi yomwe tin’funika kuthemba kwene-kwene Yahova thangwe iye angaticitise kukhala ciri-centse comwe iye akufuna.”

M’bale Rumph adabadwira ku Califórnia, ku Estados Unidos. Pomwe iye akhali mwana, mai wace akhadawofoka mwauzimu, tsono iwo akhacita nyongo ya kumupfunzisa cadidi ca m’Bibliya. Kuthumizira bzimwebzi, gole liri-lentse iye akhambazungira yavu wace omwe akhali Mboni yakukhulupirika. Yavu wacewo adacitisa kuti iye afunisise kupfunza cadidi mwakuti pomwe iye akhana magole 13 adayamba kupfunza Bibliya. Iye adabatizidwa pa 27 Setembro, gole la 1992. Bzakudekeza mpsakuti mai wace adayamba pomwe kupalizira na kumbagumanika pa mitsonkhano ndipo pai wace na azibale wace adabatizidwa.

Pomwe M’bale Rumph akhali tswaka adakwanisa kuwona momwe apainiya akhaliri wakukondwa. Ndipopa pomwe adamaliza kupfunza adayamba kucita upainiya mu Setembro, gole la 1995. Mu 2000, iye adayenda kukakhala ku Equador komwe kukhafunikira apalizi azinji. Pomwe akhali kumweko, iye adadziwana na Inga, omwe akhali mpainiya wa ku Canadá, ndipo patsogolo pace adadzalowolana. Pambuyo pa kulowolana, iwo adayenda kukatumikira mu mzinda munango wa ku Equador komwe kukhana apalizi wakucepa. Tsono tsapano mu mzinda umweyu muna apalizi azinji.

Na kupita kwa nthawe, M’bale Rumph pabodzi na mkazace adauzidwa kuti atumikire ninga apainiya wakupambulika ndipo patsogolo pace ninga anyakunyang’anira dera. Mu 2011, iwo adacemeredwa kuti ayende ku Xikola ya Jileyade, turma 132. Pambuyo pakumaliza mapfunziroyo, iwo adayenda kukatumikira m’mbuto zakusiyana-siyana pa dziko lentse na m’mautumiki yakusiyana-siyana ninga pa Beteli, amisiyonario na anyakunyang’anira dera. M’bale Rumph adakhalambo na mwayi wakukhala mpfunzisi wa Xikola ya Apalizi wa Umambo.

Thangwe ra COVID-19, M’bale Rumph pabodzi na akazawo adabwerera ku Estados Unidos. Iwo adatumizidwa kuti akatumikire ku Beteli ya ku Wallkill komwe M’bale Rumph adakapfunzisidwa mu Depatimenti ya Utumiki. Na kupita kwa nthawe, iwo adauzidwa kuti abwerere ku Beteli ya ku Equador komwe M’bale Rumph adatumikira m’Komiti ya Mthambi. Mu 2023, iwo adatumizidwa kuti akatumikire ku Warwick. Ndipo mu Janeiro 2024, M’bale Rumph adatumizidwa kuti atumikire ninga mthandizi wa Komiti ya Utumiki. Pa kukumbukira mbuto zomwe iye adatumikira, iye adati: “Comwe cimbacitisa kuti utumiki bukhale bwakupambulika ni mbuto lini koma ni wanthu omwe umbatumikira nawo pabodzi.”

Timbatenda kwene-kwene basa lomwe abale amwewa ambacita ndipo timbapitiriza ‘kulemekeza kwene-kwene abale ninga amwewa.’ — Afilipi 2:29.