Phatisani Basa “Mphaso Zakucokera kwa Mulungu”

Ifepano timbalimbikisidwa tikambamala nthawe pabodzi na abale na mpfumakazi zathu. Tsono kuti nthawe zimwezi zimbakhale zakulimbikisa tin’funika kucita bzizinji m’mbuto mwakundombakhala nawo pabodzi basi. Bibliya limbalewa kuti kulimbikisa cikhulupiro ca winango ni ‘mphaso yakucokera kwa Mulungu.’ (Aroma 1:11, 12) Kodi ciyani comwe tingacite kuti titsimikizire kuti tikuphatisa basa mphaso imweyi?

Mbalimbikisani winango na bzomwe mumbalewa. Pomwe tikupereka mitawiro pa mitsonkhano bzingakhale bwino kuleka kumbalewa kwene-kwene bza makumbukidwe yathu. M’mbuto mwace, bzingakhale bwino kumbalewa bzomwe tapfunza pakulewa bza Yahova, bza Bibliya na atumiki wace wakukhulupirika. Ndipo pomwe tikuceza na abale pabodzi na mpfumakazi, tingambalewe nkhani zomwe zingalimbikise cikhulupiro cawo na cathu.

Mbalimbikisani winango na bzomwe mumbasankhula na kucita. Abale winango ambacita nyongo yakupitiriza mu utumiki bwa nthawe zentse napo kuti akugumana na mabvuto. Pomwe winango, ambakhala ciratizo cabwino mwa kumbafika pa mitsonkhano nthawe zentse napo kuti ana bvuto la thanzi ayai kuneta na basa lomwe ambacita. Penu imwepo mukugumanambo na mabvuto ninga yamweya, napo kuti bzingakhale lini bzakupusa, ciratizo canu cimbalimbikisa winango.

Kodi imwepo mumbalimbikisa abale na mpfumakazi na bzomwe mumbalewa na kucita? Kodi imwepo mumbakhala tceru kuti mulimbikisidwe na bzomwe abale na mpfuma-kazi ambalewa na kucita?