Pomwe Jezu akhali ku Galileya, adacita bzinthu bzizinji pa basa lace la kupalizira. Tsono iye adalewa kuti: ‘Bzin’funika ndikadziwise bzipsa bzabwino bza Umambo bwa Mulungu m’mizinda minango.’ Pomwe adalewa bzimwebzi, iye adalatiza kuti akhakumbukirambo bza kukapalizira ku mizinda inango sikuti ku Galileya kokha. Tenepo, iye adayenda ‘kukapalizira m’masinagoga ya ku Judeya.’ (Luka 4:43, 44) Bzikhali bzakubveseseka kuti iye acite bzimwebzi thangwe pa nthawe imweyi, ikhafendera nsiku ya kucita mwambo wa paskwa omwe ukhacitikira ku Jeruzalemu.

Mabukhu ya Mateu, Marko, Luka na Juwau, yambafotokoza lini bzizinji pa nkhani ya bzomwe Jezu adacita ku Judeya pakundendemeza na bzomwe adacita ku Galileya. Napo kuti wanthu azinji wa ku Judeya akhabvesera lini mafala yace, Jezu alibe kusiya basa lace la ku palizira mwa nyongo, na kucitira bzabwino wanthu winango kuli-kwense komwe iye akhayenda.

Patsogolo pace, Jezu adacita ulendo bwa kuyenda ku Jeruzalemu mzinda omwe ukhali likulu la m’cigawo ca Judeya kuti akacite mwambo wa paskwa wa mu 31 EC. Iye adapita na pa cipata ca mabira comwe cikhali pafupi na thawale lomwe likhadziwika na dzina lakuti Betezata. Wanthu azinji wakuduwala, azimola na wanthu wakulemala, akhayenda ku thawale limwero. Thangwe ranyi? Thangwe iwo akhakhulupira kuti akapita mu thawalemo pomwe madziyo yakhabvunduka, angadalimba.

Jezu atafika ku thawaleri, adawona munthu omwe akhaduwala kwa magole 38, koma imweyi ikhali nsiku ya Malinkhuma. Ndipo Jezu adabvunza munthuyo kuti: ‘Kodi un’funa kucira?’ Munthuyo adamutawira kuti: ‘Mbuya, ndiribe munthu omwe angandibvike m’thawalemu madziya yakabvunduka, ndipo ndikafuna kukapita, wanthu winango ambandipitirira acikapita ndiwo.’—Juwau 5:6, 7.

Tenepo, Jezu adalewa mafala yomwe yadadabwisa munthuyo pabodzi na munthu ali-wense omwe adamubva ankulewalewa. Iye adamuuza kuti: ‘Lamuka! Nyamula makha yako ufambe.’ (Juwau 5:8) Ndipo munthuyo adacitadi bzimwebzo. Nthawe imweyoletu iye adalimba ndipo adanyamula makha yace aciyamba kufamba.

Tsono m’mbuto mwa kukondwa na bzinthu bzabwino bzomwe bzidacitikabzo, Ajuda pomwe adamuwona munthuyo, adayamba kulewalewa mwakumuyeruza kuti: ‘Lero ni nsiku ya Malinkhuma; mpsakubvumizidwa lini kuti unyamule makha yakoya.’ Tsono munthuyo adawatawira kuti: ‘Munthu omwe wandipozayo wandiuza kuti: “Nyamula makha yako ufambe.”’ (Juwau 5:10, 11) Ajudawo akhafuna kugumana mathangwe kwa munthu omwe adapoza nyakulemalayo pa nsiku ya Malinkhuma.

Pakufuna kudziwa omwe adamupoza iwo adabvunza munthu omwe adapozedwayo kuti: ‘Ni munthu uponi omwe wakuuza kuti: “Nyamula makha yako ufambe”? Tsono nyakupozedwayo akhadziwa lini kuti munthuyo akhali yani, pakuti Jezu adanyembereka pakati pa thimu la wanthu omwe akhali pamwepowo,’ ndipo Ajudawo akhadziwambo lini kuti akhali Jezu. (Juwau 5:12, 13) Patsogolo pace, munthu wakupozedwayo adadzagumana pomwe na Jezu ku templo. Pa nthawe imweyo ni pomwe adamudziwa munthu omwe adamupoza ku thawale kule.

Tenepo, pomwe nyakupozedwa ule adadzagumana pomwe na Ajuda wale, adawauza kuti adapozedwa na Jezu. Ndipo Ajudawo atabva bzimwebzi, adayenda komwe kukhana Jezuyo. Tsono iwo alibe kuyenda kuna Jezuko kuti akadziwe comwe cikhamucitisa kuti ambakwanise kucita bzinthu bzakudabwisabzo. M’mbuto mwace adayenda kuti akamumange mulandu thangwe ra adacita bzinthu bzabwino pa nsiku ya Malinkhuma. Ndipo iwo adayamba kumuboneresa na nkhani imweyi.

Jezu atapoza munthu pa nsiku ya Malinkhuma, Ajuda winango adamumanga mulandu wa kuti waswa lamulo la nsiku ya Malinkhuma. Pakuwatawira, Jezu adalewa kuti: ‘Baba wangu ankupitiriza kuphata basa mpaka pano, ndipo inepano ndinkuphatambo basa.’—Juwau 5:17.

Bzomwe Jezu adacita pa nsikuyo bzikhali lini bzakuletsedwa mu cakutonga ca Mulungu. Jezu akhaphata basa la kupalizira pabodzi na kupoza wanthu mwa kutewezera mabasa ya bwino ya Mulungu. Tenepo, Jezu akhaphata basa nsiku iri-yense, iye akhalibe nabzo basa penu nsikuyo ikhali ya Malinkhuma ayai ne. Tsono bzomwe Jezu adawatawira bzidawakalipisa kwene-kwene mpaka Ajudawo akhafuna kumupha. Thangwe ranyi Ajudawo akhafuna kupha Jezu?

Kuthumizira pa bzomwe Jezu adacita pakupoza munthu pa nsiku ya Malinkhuma, Ajudawo adakalipa kwene-kwene pomwe adabva Jezu ankulewa kuti iye ni Mwana wa Mulungu. Ajudawo adawona ninga kuti Jezu akhanyoza Yahova Mulungu, pomwe adalewa kuti Mulungu ni Baba wace. Thangwe kwa Ajudawo, bzikhali ninga kuti Jezu ankulewa kuti iye ngwakundendemerana na Mulungu. Tsono Jezu alibe kucita mantha, iye adapitiriza kuwafotokozera bzinthu bzizinji pakulewa bza mbverano omwe ulipo pakati pa iye na Mulungu. Jezu adalewa kuti: ‘Babawo ambafuna Mwana wace, ndipo ambamuwonesa bzinthu bzense bzomwe iwo ambacita.’—Juwau 5:20.

Baba ndiye omwe ambapereka moyo ndipo adalatiza bzimwebzi m’mbuyomu pomwe adapereka mphanvu kwa wanthu winango kuti alamuse anyakufa. Jezu adapitiriza kulewa kuti: ‘Pakuti ninga momwe Baba ambalamusira anyakufa, aciwapasa moyo, Mwanayo ambapasambo moyo kwa munthu omwe iye afune.’ (Juwau 5:21) Bzomwe Jezu adalewabzi, mpsakulimbisa kwene-kwene tikakumbukira bzomwe bzin’dzacitika kutsogoloku. Napo nsiku zino Mwanayu ankupitiriza kulamusa wanthu omwe akhali wakufa mwauzimu. Ndipopa Jezu adalewa kuti: ‘Omwe ambabva mafala yangu, acikhulupirambo ule omwe adandituma, iye anaye moyo wakusaya kumala, ndipo an’dzayeruzidwa lini koma wacoka ku infa kuyenda ku moyo.’—Juwau 5:24.

Pa nthawe imweyi Jezu akhanati kale kulamusa munthu ali-wense, koma akhauza wanthu omwe akhamumanga mulanduwo kuti wanthu wakufa an’dzalamusidwa. Iye adalewa kuti: ‘In’dzafika nthawe yomwe wense omwe ali m’thenje lacikumbuso an’dzabva fala lace acidzabula.’—Juwau 5:28, 29.

Napo Jezu ana udindo bukulubu, iye adalewa mwakubveka bwino kuti ambabvera Mulungu. Iye adati: ‘Ndingacite lini cinthu ciri-cense mwakufuna kwangu. . . . Ndimbatewera lini bzakufuna bzangu, koma kufuna kwa ule omwe adandituma.’ (Juwau 5:30) Tsono Jezu adafotokoza bza udindo bwace pakukwanirisa bzakufuna bza Mulungu. Pa nthawe imweyi, iye akhanati kale kuwonesa udindo bwacebo pa gulu la wanthu. Ndipo wanthu winango omwe akhamumanga mulanduwo, akhadziwa kale bzinthu bzizinji bza Jezuyo. Ndipopa iye adawakumbusa kuti: ‘Imwepo mudatumiza wanthu kwa Juwau [Batista] ndipo iye adacitira umboni cadidi.’—Juwau 5:33.

Pinango wanthu omwe akhamanga mulandu Jezu akhadabva kale bzomwe bzidacitika patapita magole mawiri. Pa nthawe imweyo Juwau adauza atsogoleri wa bzipembedzo bzacijuda kuti munthu munango akhabwera m’mbuyo mwace omwe akhadziwika na dzina lakuti ‘Mpolofeta na Kristu.’ (Juwau 1:20-25) Jezu adapitiriza kuwakumbusa bza momwe akhawonera Juwau, omwe pa nthawe imweyi akhali m’kawoko. Jezuyo adati: ‘Kwa kanthawe kakucepa imwepo mukhafunisisa kukondwa mu ceza cace.’ (Juwau 5:35) Tsono pa nthawe imweyi, Jezu adawapasa umboni bwamphanvu kuposa bomwe Juwau Batista adawapasa.

Patsogolo pace Jezu adawauza kuti: ‘Mabasa yomwe Baba wangu adandipasa kuti ndiyacite [kuphatanidza basa lakupoza lomwe akhadandomala kulicita] yankucitira umboni bwakuti Babayo ndiye omwe adandituma.’ (Juwau 5:36, 37) Mwa ciratizo, Mulungu adacitira umboni bza Jezu pa nthawe yomwe akhabatizidwa.—Mateu 3:17.

Tenepo, wanthuwa akhalibe mathangwe ya kulambira Jezu thangwe bzinembo bzomwe akhambafufudza, bzikhamucitira kale umboni. Ndipo Jezu adamaliza na kulewa kuti: ‘Mungadakhulupira Mozeji, imwepo mungadakhulupirambo inepano, thangwe iye adanemba bza inepano. Koma, penu imwepo mumbakhulupira lini bzomwe iye adanemba, kodi mungakhulupire tani bzomwe ine ndimbalewa?’—Juwau 5:46, 47.

Tsapano Jezu na anyakupfunza wace ankucita ulendo bwa kuyenda kumpoto, ku mbali ya Galileya. Ikhali nthawe ya mainza ndipo tirigu ikhadatokota m’minda. Pakuti anyakupfunzawo akhabva njala, iwo adapulula ngala za tirigu acidya. Tsono nsikuyo ikhali ya Malinkhuma ndipo Afarizeu akhawona bzomwe anyakupfunzawo akhacita.

Kumbukirani kuti nsiku zing’ono-ng’ono mbuyomo, Ajuda winango ku Jeruzalemu akhafuna kupha Jezu thangwe ra kumunamizira kuti akhasunga lini nsiku ya Malinkhuma. Tsapano, Afarizeu adamanga mulandu Jezu kucokera pa bzomwe anyakupfunza wace akhacita. Iwo adati: ‘Ona! Anyakupfunza wako ankucita bzinthu bzomwe mpsakubvumizidwa lini kubzicita pa nsiku ya Malinkhuma.’—Mateu 12:2.

Afarizeu akhalewa kuti munthu akapulula acipsikisa ngala za tirigu m’manja kuti adye, bzikhali bzibodzi-bodzi na kubvuna ayai kupula. (Kufuluka 34:21) Mwakucita bzimwebzi, Afarizeuwo akhacitisa kuti nsiku ya Malinkhuma ikhale cimtolo kwa wanthu, napo nsikuyi ikhali yakuti wanthu ambakhale wakukondwa na wakulimbisidwa mwauzimu. Jezu adalatiza kuti makumbukidwe yawo yakhali yakuphonyeka mwa kupereka bziratizo bzomwe bzikhawonesa kuti Yahova Mulungu akhafuna lini kuti cakutonga cace ca nsiku ya Malinkhuma, cimbaphatisidwe basa mwa njira imweyire.

Ciratizo cakuyamba comwe Jezu adawauza cikhali ca Davide na amuna wace. Nthawe inango pomwe akhana njala, Davide na amuna wacewo adapita mu tendi la mkonkhano ndipo adadya mikate yomwe ikhaperekedwa pamaso pa Yahova. Mikateyo ikhadacosedwa pa maso pa Yahova ndipo akhadayikha kale inango, koma omwe akhathemera kudya mikate yakucosedwayo akhali wansembe okha basi. Koma mwakubverana na momwe bzinthu bzikhaliri pa nthaweyo, Davide na amuna wace alibe kumangidwa mulandu thangwe ra kudya mikateyo.—Mwambo 24:5-9; 1 Samuweri 21:1-6.

Pakufotokoza ciratizo caciwiri, Jezu adati: ‘Mukanati mwawerenga m’cakutonga kuti wansembe mu templo akhacita bzinthu mwakusaya kubvera cakutonga cakulemekeza nsiku ya Malinkhuma koma akhapitiriza kukhala wakusaya mulandu?’ Pakulewa mafala yamweya Jezu akhathandauza kuti wansembe akhapha bzirombo kuti apareke nsembe ndipo akhaphata basa linango pa templo pa nsiku ya Malinkhuma. Tenepo, Jezu adalewa kuti: ‘Tsono ine ndikukuuzani kuti cinthu cikulu kuposa temployo ciri pano.’—Mateu 12:5, 6; Mirewengo 28:9.

Pakufuna kuwathandiza kubvesesa bwino nfundo imweyi, Jezu adaphatisa basa bzinembo ndipo adalewa kuti: ‘Mungadabvesesa thandauzo la mafala yakuti: “Ndikufuna kudeka mtima, sikuti nsembe, mungadambayeruza lini wanthu wakusaya kuphonya.”’ Patsogolo pace, adamaliza na mafala yakuti: ‘Pakuti Mwana wa Munthu ni Mbuya wa nsiku ya Malinkhuma.’ Pamwepa Jezu akhalewa bza Umambo bwace bomwe bun’dzatonga mwa mtendere kwa magole 1.000.—Mateu 12:7, 8; Ozeya 6:6.

Kwa magole mazinji, wanthu ankubonera kwene-kwene na nkhondo pabodzi na bzinthu bza ciwembo bzomwe bzimbacitika thangwe Sathani ndiye ankutonga dzikoli. Bzimwebzi bzin’dzakhala bzakusiyana kwene-kwene na bzomwe bzin’dzacitika tikadzapita mu nsiku ya Malinkhuma ikulu yomwe inkuyimira utongi bwa Kristu. Pa nthawe imweyo, tin’dzapuma pa mabvuto yathu yense. Bzimwebzi ndibzo tinkubzidikhira kwa nthawe itali.

Nsiku inango yomwe ikhali ya Malinkhuma, Jezu adayenda ku sinagoga ndipo pinango ikhali ya ku Galileya. Pomwe akhali kumweko adagumana munthu omwe akhadapunduka boko. (Luka 6:6) Anembi na Afarizeu akhandonyang’anisa kuti awone bzomwe Jezu acite. Thangwe ranyi akhacita bzimwebzo? Bzomwe akhakumbuka bzidadzadziwika bwino pomwe adamubvunza kuti: ‘Kodi mpsakubvumizika kupoza munthu pa nsiku ya Malinkhuma?’—Mateu 12:10.

Atsogoleri wa bzipembedzo wacijuda, akhakhulupira kuti kupoza munthu pa nsiku ya Malinkhuma, kukhali kwakubvumizika pokhapokha penu moyo wa munthuyo uli pa ngozi. Mwa ciratizo, bzikhali lini bzakubvumizika kubwezeresa pfupa lomwe latcoka m’mbuto mwace ayai kumanga pomwe munthu wabzuguduka, thangwe bzikhali lini bzinthu bzakuikha moyo pa ngozi. Sikuti Anembi na Afarizeu akhabvunza Jezu thangwe akhana thupo na munthu wakupunduka boko ule ne. Iwo akhandonyang’ana mathangwe ya kumangira mulandu Jezu.

Tsono Jezu adadziwa makumbukidwe yakuphonyeka yomwe wanthuwo akhanayo. Ndipo adazindikira kuti wanthuwo akhakhwimisa kwene-kwene Cakutonga cakulewa bza mabasa yomwe wanthu akhafunika kuyaphata pa nsiku ya Malinkhuma, bzomwe bzikhali lini bzakubverana na Bzinembo. (Kufuluka 20:8-10) Pa nthawe imweyi wanthu winango akhadamumanga kale mulandu thangwe ra bzinthu bzabwino bzomwe akhacita. Koma nkhaniyo idakula pomwe Jezu adauza munthu omwe akhadapunduka boko ule kuti: ‘Lamuka ndipo bwera pakatipa.’—Marko 3:3.

Patsogolo pace Jezu adanyang’anisa Anembi na Afarizeu aciwabvunza kuti: ‘Mbani wa imwepo omwe ana bira m’bodzi, ndipo birayo nkugwera m’cidindi pa nsiku ya Malinkhuma, kodi mungaleke kumuphata mucimucosa m’dindimo?’ (Mateu 12:11) Pa nthawe imweyo bira cikhali cifuwo cakuumira kwene-kwene. Tsono birayo akagwera m’dindi, mwenekaciro angadamusiya lini m’dindimo mpaka kufika nsiku inango thangwe angadafa ndipo angadaluza kobiri zizinji. Ndipo Bzinembo bzimbalewa kuti: ‘Munthu wakulungama ambasamalira cifuwo cace.’—Mimwani 12:10.

Pakufuna kuthandiza wanthuwo kubvesesa nfundo yace, Jezu adawauza kuti: ‘Munthu ngwakufunika kwene-kwene kuposa bira! Ndipopa, mpsakubvumizika inde kuphata basa labwino pa nsiku ya Malinkhuma.’ (Mateu 12:12) Bzimwebzi bzinkulatiza kuti Jezu alibe kuswa cakutonga ca Malinkhuma pomwe adapoza munthu wakupunduka ule pa nsiku ya Malinkhuma. Atsogoleri wabzipembedzowo adasaya cakulewa na nfundo yakubveka bwinoyi. Ndipo adandokhala zii.

Jezu atakalipa thangwe ra kudziwa makumbukidwe yawo yakuphonyeka, pa nthawe ibodzi-bodziyo adabva nsisi na munthu wakupunduka bokoyo ndipo adamuuza kuti: ‘Futhula boko lako.’ (Mateu 12:13) Pomwe adalifuthula, nthawe imweyoletu boko lacero lidalimba ndipo munthuyo adadekedwa kwene-kwene. Tsono n’ciyani comwe Afarizeu adacita?

M’mbuto mwa kudekedwa kuti munthu ule walimba, Afarizeu adabula mu sinagogamo ‘ndipo pa nthawe imweyoletu iwo adayenda kukaphatana na wa cipani ca Herode kuti akonze ciwembo cakuti aphe Jezu.’ (Marko 3:6) Wanthu winango omwe akhali mu cipani cimweci akhadacokera mu gulu la cipembedzo ca Asaduki. Nthawe zizinji Asaduki na Afarizeu akhabverana lini koma pa nthawe imweyi adabverana na cakulinga cakuti anesane na Jezu.