Ku Edjipito, banja la Djakobi lidadzadziwika na dzina la Jirayeri. Pambuyo pa kufa kwa Djakobi na Zuze, Farawo munango adadzayamba kutonga ku Edjipitoko. Ndipo iye adayamba kubva mantha pakuwona kuti Ajirayeri akhawanda, ndipo akhali wamphanvu kuposa Aedjipitowo. Ndipopa iye adakakamiza Ajirayeriwo kuti ambaphate basa ninga akapolo kumunda na kumbaumba njedwa. Napo Aedjipito akhambawaboneresa kwene-kwene, Ajirayeriwo akhapitiriza basi kumbabalana, acimbathumizirika. Pakuti Farawo akhakomedwa lini na bzimwebzo, iye adatonga kuti aphedwe mwana wacimuna ali-wense omwe abadwe na Ajirayeri. Ajirayeriwo adacita mantha kwene-kwene na bzimwebzo, nandi?

Tsono, mkazi m’bodzi Mjirayeri omwe akhacemeredwa Jokebedi, adabereka mwana wacimuna wakudeka kwene-kwene. Kuti amukhotcerere, iye adamuikha m’citundu mwanayo, acibisa citundoco m’mauswa matali-matali ya m’phepete mwa mkulo wa Nilo. Tenepo, Miriyamu mpfumakazi ya mwanayo, adaima pafupi kuti awone n’ciyani comwe cingadacitika.

Ndipo mwana wacikazi wa Farawo, adayenda mu mkulo wa Nilo kuti akasambe. Tsono pomwe adafika kumweko, iye adawona citunduco. Mkati mwace, adawona kamwana komwe kakhalira, ndipo adakabvera nsisi. Pomwe Miriyamu adawona bzimwebzo, iye adafendera, acibvunza mwana wa Farawoyo kuti: ‘Kodi mun’funa ndikunyang’anireni munthu kuti ambakumamisireni mwanayu?’ Pomwe mwana wa Farawo adatawira kuti inde, Miriyamu adayenda kukacemera Jokebedi mai wace caiye wa mwanayo. Ndipo mwana wacikazi wa Farawoyo adamuuza kuti: ‘Tenga mwanayu ukandilerere, ndipo ndin’dzakulipira.’

Pomwe mwanayo adakula pang’ono, Jokebedi adayenda kukamupereka kwa mwana wacikazi wa Farawo, ndipo mwana wa Farawoyo adamufuwa ninga mwana wace caiye, acim’pasa dzina lakuti Mozeji. Tenepo, Mozejiyo adaleredwa ninga nduna, ndipo akhana ciri-cense comwe angadafuna. Tsono Mozeji akhalibe kumuyebwa Yahova. Iye akhadziwa bwino-bwino kuti akhali Mjirayeri sikuti Mdjipito. Ndipo iye adasankhula kunamata Yahova.

Pomwe akhana magole 40 yakubadwa, Mozeji adakumbuka bza kuthandiza wanthu wa mtundu wace. Pa nsiku inango, Mozeji adawona Mdjipito m’bodzi akumenya kapolo Mjirayeri. Pamwepo Mozejiyo adamenya Mdjipitoyo mpaka kumupha, acifucira thupi racero pa mcenga. Pomwe Farawo adadziwa bzimwebzo, adafuna kupha Mozeji. Tsono Mozeji adathawa, aciyenda ku dziko lakucemeredwa Midiyani. Ndipo Yahova adapitiriza kumusamalira kumweko.

Mozeji adakhala magole 40 ku Midiyani. Iye adalowola, ndipo adakhala na wana. Pa nsiku inango, Mozeji adayenda kukadyesa mabira yace pafupi na phiri la Sinayi, ndipo adawona cinthu cakudabwisa. Iye adawona citsongodza comwe cikhagaka, koma cikhapsa lini! Pomwe Mozeji akhafendera pafupi kuti awone n’ciyani comwe cikhacitikaco, iye adabva fala linkucokera pa citsongodzapo, liciti: ‘Mozeji! Leka kufendera pafupi. Cosa xango zako thangwe mbuto yomwe udaimayo njakucenesedwa.’ Yahova ndiye akhalewalewa mwa kuphatisa basa anjo.

Mozeji adabva mantha, acimpsinkha nkhope yace. Yahova adapitiriza kulewalewa kuti: ‘Ndawona kutsautsika kwa Ajirayeri. Ndin’dzawacosa mu dziko la Edjipito, ndicikawapasa dziko labwino. Iwepo ndiye omwe un’dzatsogolera wanthu wangu pa kuwacosa mu Edjipitomo.’ Mpsakupenukisa lini kuti Mozeji adabva mantha, nandi?

Ndipopa iye adabvunza kuti: ‘Kodi iwo akakandibvunza kuti mbani wakutuma, ndin’kawatawira tani?’ Mulungu adamuuza kuti: ‘Ukawauze kuti Yahova, Mulungu wa Abalahamu, Mulungu wa Izaki na Mulungu wa Djakobi ndiye wakutuma.’ Patsogolo pace Mozeji adati: ‘Tsono, iwo akasaya kukandikhulupira, ndin’kacita tani?’ Yahova adamuwonesa kuti angadamuthandiza. Iye adauza Mozeji kuti athuse pansi mpsimbo yace, ndipo mpsimboyo idasanduka cinyoka! Pomwe Mozeji adaphata ku ncira kwa cinyokaco, cidadzasanduka pomwe mpsimbo. Ndipo Yahova adati: ‘Akakawona bzakudabwisabzi, iwo an’kakhulupira kuti ndine omwe ndakutumiza.’

Tsono Mozeji adati: ‘Inepano ndin’kwanisa lini kulewalewa patsogolo pa wanthu.’ Yahova adamupicira kuti: ‘Ndin’dzakuuza bzomwe ukalewe, ndipo ndin’lewalewa na m’bale wako Aroni kuti akuthandize.’ Pakudziwa kuti Yahova angadamulekerera lini, Mozeji adatenga mkazace na wana wace, aciyenda ku Edjipito.

Ajirayeri akhakakamizidwa kuphata basa ninga akapolo ku Edjipito. Ndipopa Yahova adatumiza Mozeji na Aroni kwa Farawo, acikamuuza kuti: ‘Leka wanthu wangu ayende ku dambo kuti akandinamate.’ Farawo pakubva bzimwebzo mwakubzikuza adatawira kuti: ‘Ndiribe basa na Yahova ne na bzomwe alewabzo, ndipo ndin’siya lini Ajirayeri ayende.’ Ndipo Farawo adapitiriza kukakamiza Ajirayeriwo kuphata basa lakuumiratu kuposa pakuyamba pale. Tenepo, Yahova adakumbuka bza kuwonesa mphanvu zace kwa Farawo. Un’dziwa adacita ciyani? Iye adatumizira Aedjipito Matsoka 10. Yahova adauza Mozeji kuti: ‘Farawo an’funa lini kundibvera! Mangwana macibese-bese iye an’dzayenda ku mkulo wa Nilo. Iwepo udzayende kukagumana naye kumweko, ndipo ukamuuze kuti: ‘Pakuti waletsa wanthu wangu kuyenda kukandinamata, madzi ya mu mkuloyu yan’sanduka mulopa.’ Mozeji adabvera, ndipo adayendadi kumweko. Pomwe Aroni adamenya mkuloyo na mpsimbo, madzi yense ya mu mkulo wa Nilo yadasanduka mulopa, ndipo Farawo adawona bzimwebzo na maso yace. Nsomba zidafa, ndipo madziyo yadayamba kununkha. Kukhalibe madzi yakumwa ku Edjipito. Na tenepo, Farawo adalamba basi kusiya Ajirayeri kuti ayende.

Patapita nsiku zinomwe, Yahova adatumiza pomwe Mozeji kuti akauze Farawo mafala aya: ‘Ukasaya kusiya wanthu wangu kuti ayende, mu Edjipito mwense mun’dzadzala na acule. Farawo alibe kubvera. Aroni adadzusa mpsimbo yace m’dzaulu, ndipo acule adayamba kudzala m’dzikomo. Aculewo akhali pense-pense, m’nyumba, m’bzombo na m’bzipinda bzense! Farawo adauza Mozeji kuti adandaulire Yahova kuti amalise tsokalo, acipicira kuti angadasiya Ajirayeri kuyenda ku dambo. Yahova adamalisa tsokalo, ndipo acule wense adafa. Aedjipito adawaunjika m’mimudu mikulu-mikulu, ndipo dzikolo likhanunkha kwene-kwene. Farawo pakuwona bzimwebzo iye adati: ‘Ndin’leka lini kuti Ajirayeri ayende.’

Patsogolo pace, Yahova adati kwa Mozeji: ‘Muuze Aroni amenye pansi na mpsimbo yaceyo, ndipo pfumbi lin’dzasanduka ncence.’ Pomwe Aroni adacita bzimwebzo, mu Edjipito mwense mudadzala na ncence. Pomwe Aedjipito adawona bzimwebzo iwo adati kwa Farawo: ‘Tsokali ndakucokeradi kwa Mulungu.’ Tsono Farawo alibe kucinja nzeru zace.

Mozeji na Aroni adayenda kwa Farawo kuti akalewe mafala ya Yahova yakuti: ‘Ukasaya kuleka wanthu wangu kuyenda, ndin’tumiza abulula mu Edjipitomo.’ Abululawo adadzapita m’nyumba za Aedjipito wense kuyambira nyakudala mpaka nyakusauka. Abululawo adadzala mu Edjipitomo, tsono komwe Ajirayeri akhakhala ku Goseni kukhalibe. Kuyambira tsoka lacinai mpaka lakumalizira likhagwera Aedjipito wokha. Farawo adadandaulira Mozeji kuti: ‘Kumbira Yahova amalise abululawa, ndipo ndin’kusiyani muyende.’ Pomwe Yahova adamalisa tsokalo, Farawo adacinja nzeru zace, acilewa kuti angadalekerera lini kuti Ajirayeri ayende. Farawo akhali munthu wakuuma mtima, nandi?

Yahova adati: ‘Farawo akasaya kuleka kuti wanthu wangu ayende, bzifuwo bza Aedjipito bzin’duwala, bzicifa.’ Mangwana yace bzifuwobzo bzidayambadi kufa. Tsono bzifuwo bza Ajirayeri bzikhafa lini. Na tenepo, Farawo adapitiriza basi kuumisa mtima wace, ndipo alibe kusiya kuti Ajirayeri ayende.

Patsogolo pace Yahova adati kwa Mozeji: ‘Tenga dotha uliwaze m’dzaulu.’ Pomwe adacita bzimwebzo, Aedjipito wense pabodzi na bzifuwo bzawo adakhala na bzironda bzakuwawa kwene-kwene. Na tenepo, Farawo adalamba basi kusiya Ajirayeri kuti ayende.

Ndipo Yahova adatuma Mozeji kuti akauuze Farawo mafala aya: ‘Thangwe ranyi un’kuwaletsa wanthu wangu kuyenda? Mangwana ndin’dzagwesa nvula ya matalala.’ Ndipo mangwana yace Yahova adatumizadi nvula ya matalala, bziphaliwali na mpheni. Ikhali nvula ya dzawoneni, yomwe idagwesa miti na bzense bzomwe bzikhadabzalidwa mu Edjipitomo. Tsono ku Goseni komwe Ajirayeri akhakhala, kukhacitika lini bzimwebzi. Farawo adati kwa Mozeji: ‘Dandaulira Yahova kuti aimise bzimwebzi! Ndipo ndin’dzakusiyani muyende.’ Mozeji adacitadi bzimwebzo. Tsono pomwe nvulayo idandoima, Farawo adacinjiratu nzeru zace.

Ndipo Mozeji adati: ‘Dzombe liti lidye bzinthu bzense bzomwe bzidasiidwa na nvula ya matalala ire.’ Bzulu na bzulu bza adzombe bzidadya bzense bzomwe bzikhadasalabzo. Farawo adakumbira Mozeji kuti: ‘Dandaulira Yahova kuti acose dzomberi.’ Tsono pomwe Yahova adamalisa dzombero, Farawo adapitiriza basi kuumisa mtima wace.

Patsogolo pace Yahova adauza Mozeji kuti: ‘Futhula boko lako m’dzaulu.’ Pomwe Mozeji adafuthula boko lacero, pa nthawe imweyoletu kudacita mdima. Aedjipito adamala nsiku zitatu ali mu mdima, ndipo akhawona lini cinthu ne munthu. Tsono ku Goseni komwe Ajirayeri akhakhala, kukhana ceza.

Tenepo, Farawo adati kwa Mozeji: ‘Iwepo na wanthu wako mungayende. Tsono lekani kutenga bzifuwo bzanu.’ Mozeji adati: ‘Tin’funika kutenga bzifuwo bzathubzo kuti tikapereke nsembe kwa Mulungu wathu.’ Tsono Farawo adakalipa kwene-kwene na bzimwebzo, ndipo adathotha Mozejiyo, aciti: ‘Coka muno tsapanopapa! Ndipo ndikadzakuwona pomwe, ndin’dzakupheratu.’

Mozeji adapicira Farawo kuti angadabwerera lini pomwe kudzawonana naye. Koma akanati kuyenda, iye adauza Farawo kuti: ‘Pakati pa usiku bwa lero, mwana ali-wense wakuyamba kubadwa mu Edjipito muno, anifa. Kuyambira mwana wa Farawo mpaka wana wa akapolo.’

Yahova adauza Ajirayeri kuti acite cilaliro cakupambulika. Ndipo iye adati: ‘Phani mwana wa bira ayai mwana wa mbuzi wa gole libodzi lakubadwa, ndipo mutenge mulopa wace, muciupalangira mphepete mwa misuwo yanu. Muwotce nyamayo mucidya na mkate wakusaya cakufufumisa. Mukhale wakukonzeka kuti mucoke. Usiku buno ndin’kucosani muno.’ Ajirayeri adakomedwa kwene-kwene kubva bzimwebzi, nandi?

Pakati pa usiku, anjo wa Yahova adapita m’nyumba zense za Aedjipito zomwe zikhalibe kupalangiridwa mulopa mphepete mwa msuwo, acipha mwana ali-wense wakuyamba kubadwa. Kuyambira mwana wa nyakudala mpaka mwana wa nyakusauka. Tsono anjoyo alibe kupita m’nyumba zomwe zikhadapalangiridwa mulopa. Ndipopa kwa Ajirayeri kulibe kufa mwana na m’bodziyo.

Napo mwana wakuyamba wa Farawo adafambo. Pamwepo Farawo adadzathetheratu. Pa nthawe imweyoletu, iye adauza Mozeji na Aroni kuti: ‘Cokani muno. Ndokoni mukanamate Mulungu wanuyo. Tengani bzifuwo bzanu bzense muyende!’

Ajirayeri adafuluka mu Edjipito pomwe mwezi ukhadadzala, ndipo iwo akhadalinganizidwa mwa mabanja na madzinza. Akhalipo amuna wakukwana 600.000 pabodzi na akazi na wana azinji. Ndipo winango omwe akhali lini Ajirayeri, adayendambo kuti akanamate Yahova. Tsapano, mtundu wa Jirayeri ukhadatsudzulidwa!

Kuti ambakumbukire momwe Yahova adawapulumusira, Ajirayeri akhambacita cilaliro cakupambulika kabodzi pa gole. Ndipo akhacicemera paskwa.

Pomwe Farawo adabva kuti Ajirayeri afuluka mu Edjipito, iye adacinjiratu nzeru zace, ndipo adakumbuka bza kuyenda kukawabweza. Iye adauza anyankhondo wace kuti: ‘Konzekerani ngolo za nkhondo, tiwatewere! Ifepano tikhafunika lini kuwalekerera kuti ayende.’ Iye na anyankhondo wacewo adayamba kutewera Ajirayeriwo.

Yahova ndiye omwe akhatsogolera wanthu wace. Masikati iye akhaphatisa basa mtambo, ndipo usiku akhaphatisa basa moto. Iye adawatsogolera mpaka pafupi na Nyanza Ifuira, aciwauza kuti abakadikhire pamwepo.

Patsogolo pace, Ajirayeriwo adawona Farawo na anyankhondo wace ankubwera. Iwo akhalibe kwa kuthawira, thangwe kutsogolo kwawo kukhana Nyanza Ifuira, ndipo m’mambuyo mwawo mukhana Aedjipito. Ajirayeriwo adabva mantha, aciyamba kulirira Mozeji, aciti: ‘Ifepano tinifa! Bzikhali bwino kutisiya ku Edjipito kule.’ Tsono Mozeji adatawira kuti: ‘Lekani kugopa. Dikhirani muwone momwe Yahova an’tipulumusira.’ Mozeji akhakhulupira Yahova na mtima wense, nandi?

Yahova adauza Ajirayeri kuti apitirize na ulendo bwawo. Iye adacosa mtambo omwe ukhali kutsogolo kwa Ajirayeriwo, aciuikha m’mambuyo mwawo. Ndipo mtamboyo udakhala pakati pa Ajirayeri na Aedjipito. Tenepo, kumbali kwa Aedjipito kukhana mdima, tsono kumbali kwa Ajirayeri kukhana ceza.

Yahova adauza Mozeji kuti adzuse mpsimbo yace, acilata Nyanza. Pamwepo, Yahova adacitisa conzi camphanvu usiku bwensebo. Ndipo Nyanzayo idagawika kati na kati, icisiya njira. Ajirayeriwo adayambuka nyanzayo acimbaponda pansi pakuuma.

Farawo na anyankhondo wace adapitiriza kutewera Ajirayeriwo. Iwo adapitambo mu njira yomwe Yahova akhadafungula pakati pa Nyanza Ifuirayo. Tenepo, Yahova adacitisa phiringu pakati pa Aedjipito, ndipo maroda ya ngolo zawo yadayamba kudzongeka. Aedjipitowo adakuwa kuti: ‘Mbatibwerereni! Yahova ankuwamenyera nkhondo!’

Tenepo Yahova adauza Mozeji kuti adzuse pomwe mpsimbo yace, acilata Nyanzayo. Pomwe Mozeji adacita bzimwebzo, madziyo yadagwa, yaciphatana kabodzi na kabodzi, ndipo Farawo na anyankhondo wace wense adafera pamwepo.

Na kumbali inango ire, Ajirayeri adawona bzense bzomwe Yahova adacita. Ndipo iwo adayamba kuimba nyimbo yakutenda Yahovayo, aciti: ‘Muimbireni Yahova thangwe wense adziwe kuti iye ngwamphanvu zense! Iye wathusa m’Nyanza ngolo na anyakuzifambisa.’ Pomwe wanthuwo akhaimba, akazi akhabzina, acimbamenya tung’oma. Ndipo wense akhakomedwa kwene-kwene thangwe akhali pa ufulu.

Patapita minyezi miwiri kuyambira pomwe Ajirayeri adacoka ku Edjipito, iwo adafika pafupi na phiri la Sinai, ndipo adamanga tsasa pamwepo. Yahova adauza Mozeji kuti akwire phiriro, acikamuuza kuti: ‘Inepano ndapulumusa Ajirayeriwa. Iwo akabvera fala langu, na kusunga mpangano wangu, an’dzakhala wanthu wangu wakupambulika.’ Ndipo Mozeji adabuluka, acikauza Ajirayeri bzense bzomwe Yahova akhadamuuza. Un’dziwa kuti iwo adatawira tani? Iwo adati: ‘Tin’dzacita bzense bzomwe Yahova walewa.’

Mozeji adakwira pomwe phiriro, ndipo Yahova adati: ‘Ndin’dzalewalewa nawe pomwe pakapita nsiku zitatu. Ndipo cenjeza mbumbayo kuti ireke kukwira phiri la Sinairi.’ Tenepo, Mozeji adayendadi kukauza Ajirayeriwo kuti akhale wakukonzeka kubva bzomwe Yahova akhafuna kudzawauza.

Pa nsiku yacitatu, Ajirayeri adayamba kuwona mpheni na mitambo yomwe ikhampswinkha phiriro, ndipo iwo akhabvambo kugunda na kulira kwa bziphaliwali na bzimbututu. Ndipo Ajirayeriwo adayamba kunjenjemera na mantha, pakuti padzulu pa phiri lensero pakhadampsikhidwa na utsi, ndipo kulira kwa bzimbututubzo kukhathumizirika. Patsogolo pace, iwo adawona moto unkubuluka pa phiripo. Ndipo pakati pa motopo, Ajirayeri adabva Fala la Mulungu, licimbalewa kuti: ‘Inepano ndine Yahova. Lekani kunamata mirungu inango.’

Yahova adauza Mozeji bzakutonga bzomwe Ajirayeri akhafunikira kubziteweza. Bzakutongabzo bzikhafotokoza momwe iwo akhafunikira kunamata Yahova, pabodzi na bzinthu bzomwe iye ambawenga. Mozeji adanemba bzakutongabzo, acikabziwerenga patsogolo pa Ajirayeri wense. Atamala kuwerenga bzakutongabzo, Ajirayeriwo adapicira kuti: ‘Tin’dzacita bzense bzomwe Yahova walewa.’ Iwo adapicira kwa Yahova. Tsono kodi iwo adasungadi piciro lawolo?

Yahova adauza Mozeji kuti: ‘Kwira pa phiri pano. Ndin’dzanemba bzakutonga bzangu pa minyala miwiri, ndicikupasa’. Mozeji adakwira phiriro, acimala nsiku 40 ali pa phiripo. Pomwe Mozeji akhali pa phiripo, Yahova adanemba Bzakutonga 10 pa minyala miwiri, acipasa Mozejiyo.

Patapita nthawe, Ajirayeri adakumbuka kuti Mozeji akhadawayebwa. Ndipo iwo adati kwa Aroni: ‘Ifepano tin’funa munthu kuti atitsogolere. Tikonzere mulungu!’ Ndipo Aroni adawauza kuti abwerese oro zawo. Aroniyo adasungunusa orozo, acikonza cifanikiso ca kamphulu. Ndipo wanthuwo adati: ‘Kamphuluka ndiye mulungu wathu omwe adaticosa ku Edjipito!’ Iwo adayamba kunamata kamphuluko, acicita madyo. Kodi kukhali kuphonyeka kucita bzimwebzo? Inde, thangwe iwo akhadapicira kuti angadanamata Yahova yekha basi. Tsono, iwo akhateweza lini bzomwe akhadapicira.

Yahova akhawona bzomwe bzikhacitikabzo, ndipo adauza Mozeji kuti: ‘Polika ukawone bzomwe Ajirayeri ankucita. Iwo ankundibvera lini, ndipo ankunamata cifanikiso.’ Ndipo Mozeji adapolika na minyala miwiri ire m’manja mwace.

Pomwe adafika pafupi na tsasalo, iye adabva wanthu ankuimba. Ndipo pomwe adafika pafupi, iye adawona Ajirayeri ankubzina, acimbagodamira kamphuluko. Mozeji adakalipa kwene-kwene. Iye adathusa pansi minyala ya bzakutonga ire, icipswekeratu. Ndipo pa nthawe ibodzi-bodziyo, iye adatenga kamphulu ka oroko, acikapfudziratu. Patsogolo pace, Mozeji adabvunza Aroni kuti: ‘Kodi wabvumiranyi kupumpsidwa na wanthuwa, ucicita cakuipa ninga cimweci?’ Ndipo Aroni adati: ‘Lekani kukalipa. Imwepo mun’dziwa kuti mbumbayi idakhala tani. Iwo akhafuna mulungu, ndipo ndatenga oro zawo, ndazisungunusa, ndiciwakonzera kamphuluka kale.’ Aroni akhafunika lini kucita bzimwebzire. Mozeji adabwerera pomwe pa phiri pale, acikadandaulira Yahova kuti alekerere wanthuwo.

Yahova adalekerera wale omwe akhafunisisa kumubvera. Ajirayeri akhafunika kubvera Mozeji omwe akhaphatisidwa basa na Yahova, nandi?

Pomwe Mozeji akhali pa phiri la Sinai, Yahova adamuuza kuti akonze tendi lakupambulika, lakucemeredwa tendi la mkonkhano. Tendiro ikhali mbuto yomwe Ajirayeri angadanamatira Mulungu. Ingadakonzedwa mu njira yakuti ingadanesa lini kuitsudzula na kumbainyamula pa kuyenda ku mbuto zinango.

Yahova adauza Mozeji kuti: ‘Auze wanthuwo apereke bzomwe angakwanise kuti athandize kukonzedwa kwa tendiro.’ Ndipo Ajirayeriwo adapereka oro, siriva, mkuwa, minyala minango yakudekesera, makanda, nguwo zabwino na bzinthu bzinango. Iwo adapereka bzinthu bzizinjisa mwakuti Mozeji adacita kuwauza kuti: ‘Bzakwana! Lekani kubweresa pomwe cinthu.’

Amuna na akazi azinji adabzipereka kuti athandize kumanga tendiro. Yahova adawapasa luso kuti akwanise kucita basalo, pakuti winango akhafunikira kukonza na kusona nguwo zabwino, ndipo winango akhafunikira kucita bzinthu bzizinji mwa kuphatisa basa oro, matabwa na minyala minango yakufunika.

Ajirayeriwo adakonza tendiro ninga momwe Yahova akhadawauzira. Kunja kwa tendiro kukhana bwalo. M’bwalomo mukhana cibasiya ca mkuwa na mphatso ikulu. Tsono mkati mwa tendiro, mukhana cinguwo cakudeka comwe cikhagawa tendiro m’bzipinda bziwiri, bzakudziwika ninga Cipinda Cakucena na Cipinda Cakucenesesa. Mu Cipinda Cakucenamo, mukhana mbvuniko wa oro, meza na kamphatso kakutenthera bzakununcira. Ndipo mkati mwa Cipinda Cakucenesesa, mukhana kakaxa kakukonzedwa na matabwa pabodzi na oro, kakudziwika ninga thungwa la cipangano. Un’dziwa kuti cipangano n’ciyani? Ni mbverano omwe wanthu ambacita. Thungwa la cipanganolo likhakumbusa Ajirayeri bza piciro lawo lakumbabvera Yahova yekha basi.

Yahova adasankhula Aroni na wana wace kuti ambaphate basa m’tendi la mkonkhanolo ninga wansembe. Iwo akhafunika kusamalira tendiro na kumbacita bzakupereka kwa Yahova. Aroni yekha, omwe akhali Mkulu wa ansembe, ndiye akhabvumizidwa kupita m’Cipinda Cakucenesesa. Ndipo iye akhapita m’mwemo kabodzi kokha pa gole kuti akacite bzakupereka bzakupepesera pikado zace, za banja lace na za mtundu wense wa Jirayeri.

Ajirayeri adamaliza kukonza tendi la mkonkhano pambuyo pa gole libodzi atacoka ku Edjipito. Tsapano iwo akhana mbuto kuti ambanamatire Yahova.

Yahova adacitisa kuti mtambo ukhale padzulu pa tendi la mkonkhano. Ndipo mtamboyo ukapitiriza padzulu pa tendiro, Ajirayeriwo akhapitirizambo kukhala pa mbuto imweyo. Tsono, mtamboyo ukakwira, iwo akhadziwa kuti ikhali nthawe yakufuluka, ndipo akhatsudzula tendiro, acitewera komwe kukhayenda mtamboyo.

Pomwe Ajirayeri adafuluka pafupi na phiri la Sinai, iwo adafamba m’dambo mpaka kukafika ku mbuto inango yomwe ikhacemeredwa Kadesi. Kumweko Yahova adauza Mozeji kuti: ‘Tumiza amuna 12 wa dzinza liri-lense kuti akazondere dziko la Kanani lomwe ndin’dzapasa Ajirayeri.’ Ndipo Mozeji adasankhula amuna 12, aciwauza kuti: ‘Ndokoni ku dziko la Kanani, ndipo kawoneni penu dzikolo ndabwino na penu lin’mera cakudya. Kawonenimbo penu wanthu wa kumweko mbamphanvu, na penu iwo ambakhala m’matendi ayai m’mizinda.’ Djosuwe na Kalebe akhali pakati pa azondiwo, ndipo wense adayenda ku Kananiko.

Patapita nsiku 40, azondiwo adadzabwerera, ndipo iwo adabweresa bzisapo bzabwino bzakusiyana-siyana. Iwo adalewa kuti: ‘Dzikolo ndabwinodi, tsono wanthu wa kumweko mbamphavu, mizinda yawo njakulimba, ndipo ina mipanda mitali-mitali.’ Tsono Kalebe adati: ‘Ifepano tingawakunde. Mbatiyendeni tsapanopa!’ Un’dziwa thangwe ranyi Kalebe adalewa tenepayu? Thangwe iye na Djosuwe akhakhulupira Yahova. Tsono, azondi winangowo adati: ‘Nee! Lekani kuwabvera amwewa. Wanthuwo mbatali kwene-kwene, ali ninga bzinzonzomtali! Ifepano tikhawoneka ninga tubziwala pa maso pawo.’

Ajirayeriwo adataya mtima pakubva bzimwebzo. Ndipo iwo adayamba kudandaula, aciti: ‘Mbatisankhuleni munthu munango, acititsogolera kuti tibwerere ku Edjipito. Tiniyenderanyi kumweko? Kuti tikafe?’ Djosuwe na Kalebe adati: ‘Lekani kupandukira Yahova, ndipo lekani kucita mantha. Yahova an’dzakukhotcererani.’ Tsono Ajirayeriwo alibe kufuna kubva bzimwebzo. Ndipo iwo akhafuna kupha Kalebe na Djosuwe!

Kodi Yahova adacita ciyani na bzimwebzo? Iye adati kwa Mozeji: ‘Ajirayeriwa an’funa lini kundibvera pambuyo pa bzense bzomwe ndawacitira. Ndipopa iwo an’khala mu dambomu kwa magole 40, acifera mom’muno. Wana wawo wokha pabodzi na Djosuwe na Kalebe ndiwo omwe an’dzapita mu dziko lomwe ndidawapicira.’

Pomwe Ajirayeri akhapitiriza kukhala m’dambo, Kora, Datani, Abiramu na wanthu winango wakukwana 250 adapandukira Mozeji na Aroni. Iwo adalewa kuti: ‘Ifepano taneta namwe! Thangwe ranyi Mozejiwe unkukhala mtsogoleri wathu, ndipo m’bale wako Aroni ankukhala mkulu wa ansembe? Yahova ali pakati pa tensenefe, sikuti kwa imwepo mwekha.’ Tsono Yahova adaipidwa na bzimwebzo, thangwe akhawona kuti wanthuwo akhapandukira iye!

Mozeji adauza Kora na anzacewo kuti: ‘Mangwana mubwere ku tendi la mkonkhano, ndipo mubwerese bzakununkhiza. Yahova an’dzalatiza mbani omwe iye adasankhula.’

Mangwana yace, Kora na anzace wale wakukwana 250 adayenda kukagumana na Mozeji ku tendi la mkonkhano. Pomwe adafika kumweko, iwo adatentha bzakununkhizabzo. Tsono limweri likhali basa la wansembe wokha. Tenepo, Yahova adauza Mozeji na Aroni kuti: ‘Cokani pakati pa Kora na anzacewo.’

Tsono, Datani, Abiramu na mabanja yawo adalamba kuyenda ku tendi la mkonkhano. Yahova adauza Ajirayeri kuti afundukire kutali na matendi ya Kora, Datani na Abiramu. Ndipo pa nthawe ibodzi-bodziyo Ajirayeriwo adacitadi bzimwebzo. Patsogolo pace, Datani, Abiramu na mabanja yawo adacoka m’matendi mwawo, aciima kunja kwa matendiyo. Ndipo mwadzidzi, pansi padafunguka, pacimeza Datani, Abiramu na mabanja yawo! Ndipo ku tendi la mkonkhano kule, moto udabwera kucokera kudzulu, ucimezambo Kora na anzace 250.

Patsogolo pace, Yahova adauza Mozeji kuti: ‘Tenga mpsimbo za atsogoleri wa dzinza liri-lense, ucinemba madzina yawo pa mpsimbozo. Pa mpsimbo ya dzinza la Levi, nemba dzina la Aroni, ndipo ukamala ziikhe mpsimbozo mu tendi la mkonkhano. Ndipo munthu omwe ndimusankhuleyo, mpsimbo yace in’dzaphukira maluwa.’

Mangwana yace, Mozeji adabweresa mpsimbo zensezo, aciziwonesa kwa atsogoleriwo. Ndipo mpsimbo ya Aroni ikhadaphukira maluwa na kuberekambo bzisapo. Tsapano Yahova akhadatsimikizira kwa wense kuti Aroni ndiye omwe akhadasankhulidwa kuti akhale mkulu wa ansembe.