Pafupi na mzinda wa Babeli, pakhana mzinda munango omwe ukhacemeredwa Uri, ndipo kumweko wanthu azinji akhambanamata kwene-kwene mirungu yakunama. Tsono, kumweko akhalipo munthu m’bodzi omwe akhanamata Yahova yekha basi. Dzina lace akhali Abalahamu.

Yahova adauza Abalahamuyo kuti: ‘Siya mui wako na wadzinza wako, ndipo ndoko ku dziko lomwe ndin’dzakulatiza’. Patsogolo pace, Yahova adamupicira kuti: ‘Banja lako lin’dzakhala mtundu ukulu, ndipo wanthu wense wa pa dziko la pansi ndin’dzawacitira bzinthu bzizinji bzabwino thangwe ra iwepo.’

Abalahamu akhadziwa lini komwe Yahova akhamuyendesa, tsono iye adakhulupira basi Yahovayo. Tenepo, Abalahamu, mkazi wace Sara, pai wace Tera na mzukulu wace Loti, adalongedza bzinthu bzawo, aciyamba kucita ulendo bwawo.

Abalahamu akhana magole 75 yakubadwa pomwe iye na banja lace adafika ku dziko lomwe Yahova akhafuna kumulatiza. Mbuto imweyo ikhacemeredwa Kanani. Kumweko Yahova adauza Abalahamu kuti: ‘Dziko lense lomwe unkuliwonali, ndin’dzapasa wana wako.’ Abalahamu na Sara akhadakalamba kale, ndipo akhalibe mwana na m’bodziyo. Tsono, kodi piciro la Yahovali lingadadzakwanisika tani?

Abalahamu na Sara akhadalowolana kwa magole mazinji. Iwo akhadasiya mui wawo wabwino ku mzinda wa Uri, acikakhala ku mbuto inango mu tendi. Tsono Sara akhadandaula lini na bzimwebzo, thangwe iye akhakhulupira Yahova.

Sara akhafunisisa kukhala na mwana mwakuti adauza Abalahamu kuti: ‘Berekani naye mwana mtumiki wangu Hagari, ndipo mwanayo an’dzakhala wangu.’ Tenepo, na kupita kwa nthawe, Hagariyo adaberekadi mwana wacimuna, omwe dzina lace akhali Jimayeri.

Pambuyo pa magole mazinji, pomwe Abalahamu akhana magole 99 yakubadwa, ndipo Sara akhana magole 89 yakubadwa, kudabwera alendo atatu kumui kwawo. Ndipo Abalahamu adawatambira, aciwaphikira cakudya. Un’dziwa alendowo akhali yani? Akhali wanjo! Ndipo iwo adati kwa Abalahamuyo: ‘Gole la mangwana, pa nthawe ninga ino, iwepo na mkazi wako mun’dzakhala na mwana wacimuna. Sara akhali mu tendi, ndipo pomwe adabva bzimwebzo, iye adaseka mu mtima mwace, aciti: ‘Kodi kankhalambane ndingabereke mwana inepano?’

Patapita gole libodzi, Sara adadzaberekadi mwana ninga momwe wanjo wale akhadalewera. Ndipo Abalahamu adapasa mwanayo dzina lakuti Izaki, lomwe limbathandauza ‘Msobwe.’

Pomwe Izaki akhana magole maxanu yakubadwa, Sara adawona kuti Jimayeri akhanyoza Izakiyo. Tenepo, kuti akhotcerere mwana waceyo, Sara adauza Abalahamu kuti: ‘Thamangisani Hagari na Jimayeriyu.’ Tsono Abalahamu akhafuna lini kucita bzimwebzo. Koma pakuti Yahova akhafunambo kukhotcerera Izaki, iye adati kwa Abalahamu: ‘Mutetekere Sarayo. Inepano ndin’dzamusamalira Jimayeriyo. Tsono bzomwe ndakupicira bzire, bzin’dzakwanisika mwa Izaki.’

Loti akhakhala na tiyu wace Abalahamu ku dziko la Kanani. Na nthawe, ali-wense adadzakhala na bzifuwo bzizinjisa mwakuti pakhalibe mbuto yakukwanira kuti ambadyesere pabodzi bzifuwobzo. Tenepo, Abalahamu adauza Loti kuti: ‘Ndikuwona kuti bziri lini bwino kuti ifepano tipitirize kukhala pabodzi. Tenepo, sankhula mbali yomwe un’funa kuyenda, ndipo inembo ndin’dzayenda ku mbali inangoyo.’ Abalahamu akhali munthu wakubzicepswa, nandi?

Loti adawona mbuto inango yakudeka, pafupi na mzinda wa Sodoma. Mbutoyo ikhana micera, miti na mauswa yakupswipirira bwino. Tenepo, iye na banja lace adafulukira kumweko. Ndipo na kupita kwa nthawe, iwo adadzamalizira kakhala mu mzinda wa Sodomayo.

Mzinda wa Sodoma ukhali pafupi na mzinda wa Gomora. Ndipo wanthu wa m’mizinda imweyi, akhali wakuipa kwene-kwene mwakuti Yahova adakumbuka bza kupfudza mizindayo. Tsono Mulungu adafuna kupulumusa Loti na banja lace. Ndipopa iye adatumiza wanjo kuti akacenjeze Lotiyo. Tenepo wanjowo adati: ‘Fulumiza! Coka mu mzinda muno, thangwe Yahova an’funa kuupfudza.’

Loti alibe kucokeratu pa nthawe ibodzi-bodziyo, iye akhacedwa. Tsono wanjowo adaphata manja ya Lotiyo, mkazace na wana wace awiri wacikazi, aciwacosa mu mzindamo. Ndipo adawauza kuti: ‘Thamangani kuti mupulumuse moyo wanu! Lekani kuceuka kuti muleke kufa!’

Pomwe iwo adafika ku mzinda munango wakucemeredwa Zoari, Yahova adayamba kubvumbisa moto m’mizinda ya Sodoma na Gomora. Mizindayo idapfudzidwiratu. Mkazi wa Loti alibe kubvera Yahova. Iye adaceuka, ndipo adasanduka culu ca munyu. Tsono Loti na wana wace adapulumuka thangwe iwo adabvera Yahova. Pinango iwo adasunama thangwe ra kufedwa mwanzawo, Tsono adatenda Yahova thangwe ra kuwapulumusa.

Abalahamu adapfunzisa mwana wace Izaki kuti ambafune Yahova na kumbakhulupira mapiciro yace yense. Tsono pomwe Izaki akhana magole 25 yakubadwa, Yahova adakumbira Abalahamu kuti acite cinthu cakunesa kwene-kwene. Un’dziwa cikhali ciyani?

Mulungu adauza Abalahamu kuti: ‘Ndaphata minyendo, tenga mwana wako m’bodzi yekhayo, ucikam’pereka ninga nsembe pa phiri la ku dziko la Moriya.’ Abalahamu akhadziwa lini thangwe ranyi Yahova akhamukumbira kuti acite bzimwebzo. Tsono iye adabvera basi.

Tenepo, kutandocena, Abalahamu adatenga mwana wace na anyabasa wace awiri, aciyamba kuyenda ku Moriya. Atafamba nsiku zitatu, phiri la Moriya lidayamba kuwonekera na patali. Pamwepo Abalahamu adauza anyabasa wacewo kuti: ‘Bakadikhirani pano, inepano na mwananguyu, tinkuyenda kukapereka nsembe.’ Abalahamu adauza mwana waceyo kuti anyamule nkhuni, ndipo iye adanyamula cisu. Tsono Izaki adabvunza pai wacewo kuti: ‘Kodi ciri kuponi cirombo comwe tikapereke nsembeco?’ Abalahamu adatawira kuti: ‘Mwanangu Yahova ankatipasa.’

Atafika pa phiripo, iwo adakonza mphatso. Patsogolo pace, Abalahamu adamanga manja na minyendo ya Izaki, acimuikha padzulu pa mphatsopo.

Ndipo pomwe Abalahamu adatenga cisu kuti aceke mwana wace, anjo wa Yahova adakuwa kucokera kudzulu, aciti: ‘Abalahamu! Leka kumucita cinthu mwanayo! Tsapano ndadziwa kuti umbakhulupira Mulungu thangwe ukhafunadi kupereka nsembe mwana wako m’bodzi yekhayo.’ Tenepo, Abalahamu adawona bira omwe akhadamangidwa manyanga pafupipo. Ndipo iye adatenga birayo, acipereka nsembe m’mbuto mwa Izaki.

Kuyambira nsiku imweyo, Yahova adacemera Abalahamu kuti ‘xamwali wangu.’ Un’dziwa thangwe ranyi? Thangwe Abalahamu akhafunisisa kubvera Yahova pa ciri-cense, napo acisaya kudziwa mathangwe yomwe akhamukumbirira kuti acite bzimwebzo.

Yahova adabwerezera piciro lace kwa Abalahamu lakuti: ‘Ndin’dzakusimba, ndipo ndin’dzawandisa wana wako, ayai mbadwo wako. Ndipo ndin’dzaphatisa basa mbadwo wakoyo kuti ndibwerese bzinthu bzabwino kwa wanthu wense wa pa dziko la pansi.’