Yahova adauza Samuyeri kuti: ‘Ndoko kumui kwa Djese. M’bodzi mwa wana wace, ndiye an’dzakhala mambo waciwiri wa Ajirayeri.’ Tenepo, Samuyeri adayenda kumui kwa Djese. Pomwe Samuyeri adawona mwana wakuyamba wa Djese, iye adati mu mtima mwace: ‘Umweyu ndiye omwe an’khala mambo.’ Tsono Yahova adauza Samuyeri kuti ndiye lini omwe akhadasankhulidwa, acithumizira kuti: ‘Inepano ndimbawona mu mtima mwa munthu, sikuti mawonekedwe yace yakunja.’

Djese adamubwesera pomwe Samuyeri wana wace atanthatu. Tsono Samuyeri adati: ‘Yahova alibe kusankhula na m’bodziyo pa amwewa. Kodi unawo wana winango?’ Djese adatawira kuti: ‘Ndinaye wakumalizira. Dzina lace ni Davide. Iye ali kubusa, akusamalira mabira yangu.’ Pomwe Davide adafika, Yahova adauza Samuyeri kuti: ‘Ngumweyo omwe an’khala mambo!’ Ndipo Samuyeri adamudzoza na mafuta kuti akhale mambo wa Ajirayeri.

Na kupita kwa nthawe, Afilisteu adayenda kamenya nkhondo na Ajirayeri. Ndipo kwa Afilisteuko, kukhana munthu m’bodzi omwe akhali cinzonzomtali, ndipo dzina lace akhali Goliyati. Nsiku na nsiku, Goliyatiyo akhambakhumbza Ajirayeri, acimbalewa kuti: ‘Nditumizireni munthu m’bodzi kuti ndidzamenyane naye. Iye akandikunda, ifepano tin’dzakhala akapolo wanu. Tsono ndikamukunda ndine, imwepo mun’dzakhala akapolo wathu.’

Pomwe Davide adayenda kapereka cakudya kuna abale wace omwe akhali acikunda, iye adabva bzomwe Goliyatiyo akhalewa, ndipo adati kwa Sauli: ‘Inepano ndin’kamenyana naye!’ Tsono mambo Sauli adati: ‘Iwepo ukali m’ng’ono.’ Koma Davide adati: ‘Yahova an’dzandithandiza.’

Pakuyamba Sauli adayezera kupasa Davide bzifuzo bzace bza nkhondo, tsono iye adalamba thangwe bzingadakamutazisa kumenyana na Goliyatiyo. Tenepo, iye adatenga sikopo yace, acikalokota minyala yace mixanu aciikha m’budu mwace. Patsogolo pace, Davide adathamanga lunga-lunga komwe kukhana Goliyatiko. Ndipo Goliyatiyo adati: ‘Bwera kamwanawe. Thupi lako ndin’dzalisandusa cakudya ca mbalame na bzirombo.’ Koma Davide alibe kugopa. Iye adati: ‘Iwepo ukubwera kuna ine na mphanga, dipa na msewe, tsono inepano ndinkubwera kuna iwepo m’dzina la Yahova. Iwepo unkumenyana lini na ifepano; koma unkumenyana na Mulungu. Ndipo wanthu wense ali panowa aniwona kuti Yahova ngwamphanvu kuposa cifuzo ciri-cense ca nkhondo. Iye an’dzakuperekani m’manja mwathu.’

Davide adaikha mwala pa sikopo yace, acithusira Goliyatiyo na mphanvu zace zense. Ndipo Yahova adalungamiza mwalayo pa mkuma pa Goliyatiyo. Ndipo Goliyati adagwa pansi ninga cisakha, aciferatu. Atawona bzimwebzo, Afilisteu wense adaliceka liwiro. Kodi iwepo umbakhulupirambo Yahova ninga momwe Davide adacitira?

Pambuyo pa Davide kupha Goliyati, Sauli adamusankhula kuti akhale mkulu wa anyankhondo wace. Davide adakunda nkhondo zizinji, ndipo adakhala wakubvekera kwene-kwene. Pa nsiku inango pomwe Davide adacokera ku nkhondo, akazi adamubzinira, aciimba nyimbo yakulatiza kuti Davideyo akhali mcikunda wabwino kuposa Sauli. Ndipo Sauli adacita nsanje, acikumbuka bza kumupha.

Pa nsiku inango, pomwe Davide akhaimbira zeze mambo Sauli, Sauliyo adamuthusira dipa. Tsono Davide adambzenga, ndipo dipalo lidakapfikirira pa parede. Patsogolo pace, Sauli adalinga kupha Davide mu njira iri-yense. Ndipopa Davide adathawa, acikabisalika m’dambo.

Sauli adakonkhanisa acikunda wace wakukwana 3.000, aciyenda kanyang’ana Davideyo. Ndipo Sauliyo mwakusaya kudziwa, adadzamalizira kupita m’cimphako comwe Davide akhadabisalika pabodzi na acikunda wace. Acikunda wa Davideyo adati: ‘Umweyu ni mpata wanu kuti muphe Sauli.’ Davide adayenda mwakubendera komwe kukhana Sauliko, acikagwata mbali ya cakubvala cace. Ndipo Sauli alibe na kundobvako. Patsogolo pace, cikumbu-mtima ca Davide cidayamba kumunesa thangwe iye alibe kulemekeza mambo wakudzozedwa wa Yahova. Tenepo, iye alibe kulekerera kuti wathu wace aphe Sauliyo. Pomwe Sauli adabula m’cimphakomo, Davide adamukuwira, aciti: ‘Onani, ndikhanaye mpata wakukuphani, tsono ndiribe kufuna kucita bzimwebzo.’ Kodi Sauli adacinja nzeru zace za kufuna kupha Davide?

Nee. Sauli adapitiriza basi kufuna kumupha. Usiku bunango, Davide na Abisai, mwana wa mpfumakazi yace, adayenda komwe kukhana Sauli na acikunda wace, ndipo adagumana wense adagona. Napo Abineri omwe akhalindirira mamboyo, akhadagonambo. Ndipo Abisai adati: ‘Umweyu ni mpata wathu! Ndisiyeni ndimuphe.’ Tsono Davide adati: ‘Nee Abisai, Yahova ndiye an’dziwa bzakucita naye. Bwera tindomutengere dipali na mkombo waceyu, timbayende.’

Ndipo Davide adakwira phiri lomwe likhali pafupi na pomwe akhagona Sauli na acikunda wace. Iye adakuwa, aciti: ‘Abineri, thangwe ranyi ulibe kukhotcerera mambo wako? Liri kuponi dipa la Sauli na mkombo wace?’ Sauli adazindikira fala la Davideyo, ndipo adati: ‘Iwepo ungadandiphadi, tsono ulibe kucita bzimwebzo. Tsapano ndatsimikiza kuti iwepo un’khaladi mambo waciwiri wa Ajirayeri.’ Tenepo, Sauli adabwerera kumui kwace. Tsono si wense wa m’banja la Sauli akhawenga Davide.

Jonatani, mwana wakuyamba wa mambo Sauli, akhali mcikunda wakulimba mtima. Davide adalewa kuti iye akhacita bzinthu mwakamfulumize kuposa mphungu, ndipo akhalimbo wamphanvu kwene-kwene kuposa mphondolo. Pa nsiku inango, Jonatani na mthandizi wace adawona Afilisteu wakukwana 20 omwe akhali pa phiri. Tenepo, Jonatani adauza mthandizi waceyo kuti: ‘Afilisteu wale akaticemera kuti tikamenyane nawo pa phiri pale, n’cizindikiro cakuti Yahova an’tithandiza.’ Ndipo mpsimwebzoletu bzomwe Afilisteuwo adacita. Iwo adawacemera, ndipo Jonatani na mthandizi waceyo adakwira pa phiripo, acikakunda Afilisteuwo.

Pakuti Jonatani akhali mwana wakuyamba wa Sauli, ndiye omwe angadapita pa mbuto ya pai wace ninga mambo. Tsono Jonataniyo akhadziwa kuti Davide ndiye omwe akhadasankhulidwa na Yahova kuti akhale mambo wa Ajirayeri. Napo bzikhali tenepoyo, Jonatani alibe kumucitira nsanje. M’mbuto mwace, Davide na Jonatani adakhala axamwali wa ponde-mpondembo. Iwo adapicirana kuti angadakhotcererana. Ndipo Jonatani adapasa Davide mkanjo, mphanga, uta pabodzi na sintu yace ninga umboni bwa mbverano wawoyo.

Pomwe Davide akhathawa Sauli, Jonatani adayenda kagumana na Davideyo, acikamuuza kuti: ‘Khwimika Davide, ndipo limba mtima. Yahova wasankhula iwepo kuti ukhale mambo. Ndipo pai wangu akudziwambo bzimwebzo.’ Kodi ungafunembo kukhala na xamwali ninga Jonatani?

Jonatani akhaikha moyo wace pa ngozi kazinji-kense kuti athandize xamwali wace Davide. Pomwe Jonatani adadziwa kuti pai wace Sauli akhafuna kupha Davide, iye adacita ciri-cense kuti Sauli acinje nzeru zace. Tsono Sauli adakalipa na Jonatani. Ndipo na kupita kwa nthawe, Sauli adadzafa ku nkhondo pabodzi na Jonataniyo.

Pomwe Jonatani adafa, Davide adanyang’ana Mefiboseti, mwana wa Jonatani, acimuuza kuti: ‘Pakuti pai wako akhali xamwali wangu, inepano nditi ndikusamalire pa moyo wako wense. Iwepo uti ukakhale m’nyumba mwangu, ndipo un’dzadya cakudya cangu.’ Bzimwebzi bzinkulatiza kuti Davide akhalibe kumuyebwa xamwali wace, Jonatani.

Pomwe Sauli adafa, Davide adadzakhala mambo pomwe akhana magole 30 yakubadwa. Patapita magole, nsiku inango usiku, iye akhali padzulu pa nyumba yace, ndipo adawona mkazi wakudeka kwene-kwene omwe akhasamba. Iye akhali Bateseba, mkazi wa mcikunda wa Davideyo omwe akhacemeredwa Uriya. Ndipo Davide adacemeresa Batesebayo, acigona naye m’nyumba mwacemo. Tsono pomwe Bateseba adakhala na pathupi, Davide adayezera kubisa bzomwe akhadacitabzo mwa kuphesa mwamuna waceyo, acimulowoleratu Batesebayo.

Tsono Yahova akhawona bzakuipa bzense bzomwe bzikhacitikabzo. Kodi n’ciyani comwe iye adacita? Iye adatumiza mpolofeta wace Natani kwa Davide, acikamuuza kuti: ‘Munthu m’bodzi wakudala ana mabira mazinji, ndipo munango wakusauka akhana bira wace m’bodzi yekha, ndipo akhamufuna kwene-kwene. Tsono munthu wakudalayu waba bira wa nyakusaukayu.’ Pamwepo, Davide adakalipa kwene-kwene, aciti: ‘Munthu wakudalayo, an’funika kuphedwa!’ Ndipo Natani adati kwa Davideyo: ‘Munthu wakudalayo ndimwepoletu!’ Tenepo Davide adasunama kwene-kwene, aciuza Nataniyo kuti: ‘Ndaphonyera Yahova!’ Pikado yaceyo idabweresa mabvuto mazinji kwa iye na banja lace lense. Tsono Yahova alibe kumupha thangwe iye adabzicepswa, acibvuma kuphonya kwaceko.

Davide adafuna kumangira Yahova tempwlo, tsono Yahovayo adasankhula Salomau, mwana wa Davideyo kuti amange tempwloyo. Ndipo Davide adayamba kukonzekera bzinthu kuti apase Salomau, ndipo adati: ‘Salomau akali tswaka, ndipo tempwlo ya Yahova in’funika kukhala yakudeka kwene-kwene. Ndipopa inepano ndinimuthandiza.’ Davide adapereka kobiri zizinji zakuthandizira kumangidwa kwa tempwloyo. Iye adanyang’ana anyabasa azinji wa luso, ndipo adakonkhanisa oro, siriva na matabwa kuti amangire tempwloyo. Pomwe akhadasala pang’ono kufa, Davide adauza Salomau kuti: ‘Yahova wandiuza kuti ndidzakufotokozere momwe udzamangire tempwlo yace. Leka kugopa mwanangu. Yahova an’dzakuthandiza. Limba mtima, ndipo phata basa.’