15. N’thangwe ranyi Jezu ambacemeredwa ‘cisapo cakuyambirira?’

¹⁵ Jezu adakhala munthu wakuyamba kulamusidwa kuti ayende kudzulu na thupi lauzimu. (Mabasa 26:23) Koma ndiye lini yekha omwe adalamusidwa aciyenda kudzulu. Jezu adapicira anyakupfunza wace wakukhulupirika kuti iwo angadadzatonga naye pabodzi kudzuluko. (Luka 22:28-30) Koma iwo angadayenda kudzuluko pokhapokha akafa, ndipo angadalamusidwa na thupi lauzimu ninga Jezu. Paulo adanemba kuti: ‘Kristu adalamusidwa kwa anyakufa, acikhala cisapo cakuyambirira kwa wale omwe adagona mu infa.’ Paulo adalewa kuti alipo winango omwe angadalamusidwa aciyenda kudzulu. Iye adati: ‘Ali-wense pa nthawe yace: Pakuyamba Kristu ninga cisapo cakuyambirira, patsogolo pace wale omwe mba Kristu pa nthawe ya kukhala kwace.’—1 Wakolinto 15:20, 23.

16. Mwa kubverana na Bibliya, kodi ni lini pomwe cilamuso ca wale omwe an’dzayenda kudzulu cingadacitika?

¹⁶ Mafala ya Paulo yambatithandiza kuwona kuti ni lini pomwe cilamuso ca kuyenda kudzulu cingadacitika. Paulo adalewa kuti cilamusoci cingadacitika pa nthawe ya kukhala kwa Kristu. Kwa magole mazinji, Mboni za Yahova zimbalewa kucokera m’Bibliya kuti ‘kukhala’ kwa Kristu kudayamba mu gole la 1914. Ifepano tikali mu nsiku za ‘kukhala’ kwace ndipo dziko lakuipa lino linkufika kuphampha caiko.

17, 18. Kodi n’ciyani comwe cin’dzacitika na anyakudzozedwa winango pa nthawe ya kukhala kwa Kristu?

¹⁷ Bibliya limbafotokoza bzinthu bzizinji pa nkhani ya wale omwe an’dzayenda kudzulu. Iro limbati: Tin’funa lini kuti imwepo mukhale wakusaya kudziwa pakulewa bza wale omwe adagona mu infa, . . . Pakuti penu timbakhulupira kuti Jezu adafa, acilamusidwa pomwe, ndiye kuti timbakhulupirambo kuti Mulungu an’dzatsonkhanisa wale omwe mwakubverana na Jezu, adagona mu infa kuti akhale naye pabodzi, . . . wamoyofe omwe tin’dzakhala pa nthawe yakukhala kwa Mbuya, tin’dzakhala lini patsogolo pa omwe adagona mu infa, pakuti Mbuyayo an’dzabuluka kucokera kudzulu na kucemera mwa mphanvu ya utsogoleri, . . . ndipo omwe adafa mwa Kristu ndiwo an’dzayamba kulamuka. Patsogolo pace, wamoyo omwe tasalafe, tin’dzatengedwa nawo pabodzi m’mitambo kuti tikagumane na Mbuya m’mlengalenga, ticikakhala naye pabodzi mpaka kale-kale.’—1 Watesalonika 4:13-17.

¹⁸ Mavesiya yan’kulatiza kuti cilamuso cakuyenda kudzulu cingadacitika pambuyo pa Kristu kukhazikisidwa ninga mambo ayai pa nthawe ya kukhala kwace. Ndipo anyakudzozedwa omwe an’dzakhala akana moyo pa nthawe ya citsautso cikulu ‘an’dzatengedwa m’mitambo.’ (Mateu 24:31) Kodi bzimwebzi bzinkuthandauza ciyani? Bzinkuthandauza kuti omwe ‘an’dzatengedwawo’ an’dzagona lini ‘mu infa,’ ayai an’dzakhala lini mu infa kwa nthawe itali. M’mbuto mwace, iwo akadzafa, ‘an’dzasandulika, m’tumphindi twakucepa, pa kupoira kwa maso, pa kulira kwa cimbututu cakumalizira.’—1 Wakolinto 15:51, 52.

20. Kodi timbadziwa tani kuti cilamuso cin’dzakhala cakulinganizidwa bwino?

²⁰ Bibliya limbalewa kuti wale omwe ambalamusidwa kuti ayende kudzulu, ali-wense ambalamusidwa ‘pa nthawe yace.’ (1 Wakolinto 15:23) Bzimwebzi bzinkulatiza kuti cilamuso ca pa dziko la pansi cin’dzakhalambo cakulinganizika bwino. Pinango tingabzibvunze kuti: Kodi omwe adamalizira kufa ndiwo omwe an’dzayamba kulamusidwa kumayambiriro kwa Utongi bwa Kristu bwa magole 1000 kuti adzatambiridwe na abale wawo omwe akhawadziwa? Kodi amuna wakukhulupirika wa nthawe za kale omwe akhatsogolera wanthu wa Yahova, ndiwo an’dzakhala wakuyamba kulamusidwa kuti adzathandizire kulinganiza wanthu wa Mulungu m’dziko lipsa? Kodi n’ciyani comwe cin’dzacitikira wanthu omwe alibe kutumikira Yahova? Kodi ni lini pomwe iwo an’dzalamusidwa ndipo an’dzalamusidwira kuponi? Pana mibvunzo mizinji yomwe tingabzibvunze. Koma tin’funika lini kukhala na thupo na bzimwebzi. Bziri bwino kudikhira kuti tidzawone momwe bzin’dzacitikira. Tin’funika kukhulupira kuti bzin’dzakhala bzakukondwesa kwene-kwene kuwona momwe Yahova an’dzacitira bzinthu.