Beni-hadade, mambo wa ku Siriya, adayezera kazinji-kense kumenya nkhondo na Ajirayeri. Tsono nthawe zense mpolofeta Elizeu akhadziwisa mambo wa Jirayeri bzomwe Beni-hadadeyo akhafuna kucita nawo, ndipo nkhondoyo ikhamenyedwa lini. Tenepo, Beni-hadade adatumiza acikunda wace ku mzinda wa Dotani kuti akamuphate Elizeuyo.

Acikunda wa ku Siriyawo adafika ku Dotani usiku. Mangwana yace ku macibese, pomwe mtumiki wa Elizeu adabula panja, iye adawona kuti mzindayo ukhadazunguliridwa na acikunda wa ku Siriya. Ndipo iye adabva mantha kwene-kwene, acikuwa kuti: ‘A Elizeu, tin’citanyi ifepano?’ Tsono Elizeu adamutawira kuti: ‘Leka kucita mantha. Anyankhondo omwe ali ku mbali kwathu mbazinji kuposa iwo.’ Ndipo pa nthawe ibodzi-bodziyo, Yahova adacitisa kuti mtumiki wa Elizeuyo akwanise kuwona kuti mapiri yense yomwe yakhazungulira mzindayo, yakhadadzala na wanjo omwe akhana mahaci na ngolo za nkhondo.

Pomwe acikunda wa ku Siriya adayezera kuphata Elizeu, Elizeuyo adapemba kwa Yahova, aciti: ‘Yahova, ndaphata minyendo, akhaliseni azimola.’ Yahova alibe kuwakhalisiratu azimola, koma adandocitisa kuti mwadzidzidzi iwo atazire kuzindikira kuti akhali kuponi. Ndipo Elizeu adati kwa acikundawo: ‘Imwepo mwataika, mwapita mu mzinda wakuphonyeka. Nditewereni kuti ndikakuwoneseni mzinda omwe una munthu munkumunyang’anayo.’ Tenepo, iwo adamuteweradi mpaka ku Samariya komwe mambo wa Jirayeri akhakhala.

Pomwe acikunda wa ku Siriya adadzazindikira kuti akhali mu mzinda wa Samariya, pakhalibe comwe angadacite. Ndipo mambo wa Jirayeri adabvunza Elizeu kuti: ‘Kodi ndiwaphe?’ Umweyo ukhali mpata wakuti Elizeu aphese wanthu omwe akhafuna kumuphatawo. Tsono Elizeu adati: ‘Nee. Lekani kuwapha, koma apaseni cakudya, ndipo akamala, asiyeni abwerere kwawo. Tenepo mamboyo adawakonzera phwando likulu, ndipo atamala kudya, adawatumiza kwawo.

Jezabeli akhana mwana wacikazi omwe dzina lace akhali Ataliya, ndipo Ataliyayo akhali munthu wakuipa kwene-kwene ninga mai wacewo. Bayace akhali mambo wa Juda, ndipo pomwe iye adafa, mwana wace ndiye omwe adadzakhala mambo. Tsono pomwe mwana waceyo adadzafambo, Ataliyayo adabziikha yekha kukhala mambo wa Juda. Ndipo iye adayezera kupha wense omwe akhali pa mzere wakudzakhala wamambo wa Juda, kuphatanidzambo azukulu wace. Ndipo iye akhagopedwa na wanthu wense.

Jehoyada, mkulu wa ansembe pabodzi na mkazi wace, Jehoseba, akhadziwa kuti bzomwe Ataliya akhacita bzikhali bzakuipa kwene-kwene. Iwo adaikha moyo wawo pa ngozi mwa kubisa mu tempwlo kamzukulu kabodzi ka Ataliyayo komwe kakhacemeredwa Jehowasi.

Pomwe Jehowasi adapfitsa magole 7 yakubadwa, Jehoyada adacemeresa akulu-akulu wa mu Juda na Alevi, aciwauza kuti: ‘Lindirani misuwo yense ya mu tempwlo muno, ndipo lekani kulekerera kuti munthu ali-wense apite.’ Patsogolo pace, Jehoyada adakhalisa Jehowasi mambo wa Juda, acimubvazika mu msolo nsinga-msolo ayai korowa. Ndipo wanthu wa mu Judamo adakuwa, aciti: ‘Mambo akhale na moyo utali.’

Ndipo Ataliya atabva kukuwa kwa wanthuwo, iye adayenda ku tempwloko. Pomwe adawona mambo mupsayo, iye adakuwa, aciti: ‘Munkundipandukira! Munkundipandukira!’ Akulu-akulu wa mu Judawo adamuphata, ndipo adabula naye kunja kwa tempwloyo, acikamupha. Tsono, kodi n’ciyani cidacitika na wanthu omwe akhadasiya kunamata Yahova thangwe ra iye?

Jehoyada adathandiza wanthuwo kucita mpangano na Yahova, ndipo iwo adapicira kuti angadanamata Yahova yekhayo basi. Jehoyada adapfudzisambo tempwlo ya Baala na bzifanikiso bzense. Iye adasankhula wansembe na Alevi kuti ambaphate basa mu tempwlo ya Yahova. Ndipo adasankhulambo amuna winango kuti ambalindire mu tempwloyo. Patsogolo pace, Jehoyada na akulu-akulu wa mu Juda adatenga Jehowasi, acikamuikha pa mpando wa umambo. Ndipo wanthu wense wa mu Juda adakondwa kwene-kwene. Tsapano iwo angadanamata Yahova mwakutsudzuka, ndipo angadapumpsidwa lini pomwe na Ataliya kuti anamate Baala. Ukuwona momwe kulimba mtima kwa Jehoyada kudathandizira wanthu azinji?