Ku dziko la Asiriya, kukhana mzinda munango wakucemeredwa Ninive, ndipo mzinda umweyo ukhana wanthu wakuipa kwene-kwene. Yahova adauza mpolofeta wace Djona kuti ayende ku Niniveko, acikawacenjeza bza makhalidwe yawo yakuipayo. Tsono Djona alibe kubvera. Iye adakwira ngalawa, acithawira ku Tarisi.

Ali pa ulendobo, kudayambika conzi camphanvu kwene-kwene, mpaka amalinyero adacita mantha. Ndipo iwo adayamba kupemba kwa mirungu yawo, acibvunzanambo kuti: ‘Kodi thangwe ranyi bzimwebzi bzinkucitika?’ Patsogolo pace, Djona adati: ‘Bzimwebzi bzinkucitika thangwe ra inepano. Ndiribe kubvera bzomwe Yahova wandiuza kuti ndicite. Tsono ndithuseni m’madzimu, ndipo conzici ciniima.’ Amalinyerowo akhafuna lini kucita bzimwebzo, tsono iye adawangingimira. Ndipo pomwe iwo adadzamuthusa m’madzimo, conzico cidadzaimadi.

Djona akhakumbuka kuti angadafa. Pomwe akhamira pang’ono na pang’ono m’nyanzamo, iye adapemba kwa Yahova. Patsogolo pace, Yahova adatumiza cinsomba. Ndipo cinsombaco cidamukhudyula, koma ciribe kumupha. Pomwe Djona akhali m’mimba mwa cinsombaco, iye adapemba kwa Yahova, aciti: ‘Ndinkupicira kuti ndin’dzakubverani nthawe zense.’ Yahova adacitisa kuti Djona apitirize kukhala na moyo m’mimba mwa cinsombaco kwa nsiku zitatu, ndipo patsogolo pace, cidakamupsipa kunja.

Yahova adapulumusa Djona kwa cinsomba cire. Tsono kodi bzimwebzi bzin’funa kulewa kuti iye angadamutumiza lini pomwe ku Niniveko? Nee. Yahova adamutumiza basi. Tsapano, Djona adabvera, ndipo adayenda ku Niniveko, acikauza wanthu wakuipawo kuti: ‘Mzinda wa Ninive un’pfudzidwa mkati mwa nsiku 40.’ Tenepo, cidacitika cinthu cakudabwisa. Wanthu wa ku Ninivewo adacinja makhalidwe yawo. Ndipo mambo wa ku Ninive adauza wanthuwo kuti: ‘Mbatikumbireni Mulungu kuti atilekerere. Pinango angatiphe lini.’ Pomwe Yahova adawona kuti wanthuwo akhadacinja, iye alibe kupfudza mzinda wa Niniveyo.

Djona adabva ciya kwene-kwene pomwe mzindayo ulibe kupfudzidwa. Ona kuti Yahova adapirira na Djona, acimucitira nsisi. Tsono iye alibe kucitirambo nsisi wanthu wa ku Ninive, ndipo adacoka mu mzindamo na matsinya, acikakhala pa mthunzi wa kamuti kanango. Tsono Yahova adacitisa kuti kamutiko kaume, ndipo bzimwebzo bzidamukalipisa kwene-kwene Djonayo. Tenepo, Yahova adamuuza kuti: ‘Iwepo unkubvera nsisi kamutika. Kodi wanthu wa ku Ninivewa, akhathemera lini kucitiridwa nsisi kuposa kamutika?’ Tenepo, nfundo njakuti: Kwa Yahova, wanthu wa ku Ninive akhali wakufunika kwene-kwene kuposa kamuti kali-kense.

A Asiriya akhadakunda kale umambo bwa madzinza 10 ya Jirayeri. Ndipo tsapano iwo akhafunambo kukunda umambo bwa madzinza mawiri ya Ajuda, ndipo adayamba kukunda mzinda ubodzi na ubodzi. Pa mizinda yenseneyo, Sanakerube, mambo wa Asiriyawo, akhafuna maka-maka mzinda wa Jeruzalemu. Tsono iye akhadziwa lini kuti Yahova akhakhotcerera mzindayo.

Ezekiya, mambo wa Juda, adapereka kobiri zizinji kuti Sanakerube aleke kumenya nawo nkhondo. Tsono Sanakerubeyo adatenga kobirizo, acipitiriza basi kutumiza anyankhondo wace kuti akagwese mzinda wa Jeruzalemu. Pomwe Asiriya akhafendera pang’ono na pang’ono, wanthu wa ku Jeruzalemuko adayamba kubva mantha. Tsono Ezekiya adawauza kuti: ‘Lekani kugopa. A Asiriyawa mbamphanvu, tsono Yahova an’dzatikhalisa wamphanvu kwene-kwene kuposa iwo.’

Sanakerube adatuma Rabisake, mtumiki wace, kuti akagopswe wanthu wa ku Jeruzalemuwo. Pomwe Rabisakeyo adafika ku Jeruzalemuko, iye adaima kunja kwa mzindayo, acilewa mwakukuwa kuti: ‘Yahova an’dzakuthandizani lini. Lekani kubvuma kupumpsidwa na Ezekiya. Kulibe mulungu omwe angakupulumuseni m’manja mwathu.’

Ezekiya adabvunza Yahova bzomwe angadacita, ndipo Yahovayo adamutawira kuti: ‘Leka kugopa bzomwe Rabisake walewa. Sanakerube, mambo wa Asiriya an’dzakunda lini mzinda wa Jeruzalemu.’ Patsogolo pace, Ezekiya adatambira matsamba yakucokera kwa Sanakerube. Matsambayo yakhati: ‘Ndobziperekani. Yahova an’kupulumusani lini.’ Ezekiya adapemba kwa Yahova, aciti: ‘Yahova, ndaphata minyendo, tipulumuseni, kuti wanthu wense adziwe kuti imwepo mwekha ndimwe Mulungu wacadidi.’ Tenepo, Yahova adamuuza kuti: ‘Mambo wa Asiriya an’dzapita lini mu Jeruzalemu. Inepano ndin’dzakhotcerera mzinda wanguyu.’

Patsogolo pace, anyankhondo wa Asiriya adayenda, acikakhala kunja kwa mzinda wa Jeruzalemuyo. Sanakerube akhadatsimikiza na mtima wace wense kuti angadakwanisa kukunda mzindayo. Tsono, un’dziwa n’ciyani cidadzacitika? Usiku bwa nsiku imweyo, Yahova adatumiza anjo wace, acikapha anyankhondo wense wa Asiriya wakukwana 185.000! Sanakerube adaluza anyankhondo wace wense wamphanvu, ndipo palibe comwe iye angadacita kuposa kundobwerera kumui. Yahova adakhotcerera Ezekiya na mzinda wa Jeruzalemu ninga momwe iye akhadalewera. Bzingadakhala kuti iwepo ukhalipombo mu mzinda wa Jeruzalemuyo, kodi ungadakhulupirambo Yahova?