Wanthu wa mu Jeruzalemu adapitiriza kupandukira Yahova, acimbanamata bzifanikiso. Kwa magole mazinji, Yahova adayezera kutumiza apolofeta wace kuti akawacenjeze. Tsono iwo akhambawabvera lini, ndipo akhambawanyoza. Kodi Yahova angadacita ciyani kuti wanthu wale asiyiretu kumbanamata bzifanikisobzo?

Mu nthawe imweyire, Nabukadinazori, mambo wa ku Babulo, akhakunda mizinda yakusiyana-siyana. Pomwe adakunda mzinda wa Jeruzalemu pakuyamba, iye adaphata mambo Jeoyakimu, nduna zace na acikunda azinji wa ku Jeruzalemuko, aciyenda nawo ku Babulo. Ndipo iye adatengambo bzombo bzense bzomwe bzikhali mu tempwlo ya Yahova. Patsogolo pace, Nabukadinazoriyo adaikha Zedekiya kuti akhale mambo wa mu mzinda wa Jeruzalemuyo.

Pakuyamba Zedekiyayo akhambabvera Nabukadinazori. Tsono apolofeta wakunama pabodzi na wanthu wa mizinda ya pafupi, akhambamuuza kuti apandukire Nabukadinazoriyo. Mpolofeta Jeremiya adacenjeza Zedekiya kuti: ‘Imwepo mukandophindukira mambo wa ku Babulo, mu mzinda wa Jeruzalemuyu wanthu an’dzabonera na njala pabodzi na matenda, ndipo an’dzaphana.’

Atatonga kwa magole 8, Zedekiya adadzapandukira mambo wa ku Babulo, acikumbira thandizo anyankhondo wa ku Edjipito. Tsono Nabukadinazori adatumiza anyankhondo wace omwe adakazungulira mzinda wa Jeruzalemuyo kuti aupfudze. Jeremiya adauza Zedekiya kuti: ‘Yahova walewa kuti mukabzipereka kwa Ababulo, imwepo na mzindayu mun’dzapfudzidwa lini. Tsono mukasaya kubzipereka, Ababulo an’dzatentha mzindayu, acidzakuyendesani ku ukapolo.’ Tsono Zedekiya adati: ‘Inepano ndin’bzipereka lini.’

Pambuyo pa gole libodzi na meya, Ababulo adadzapita mu mzindamo, aciutentha pabodzi na Tempwlo. Ndipo iwo adaphambo wanthu azinjisa, acitenga winango ninga akapolo.

Zedekiya adathawa ku Jeruzalemuko. Tsono Ababulowo adamuthamangisa, acikamuphata pafupi na mzinda wa Jeriko. Ndipo iwo adamuyendesa kwa mambo Nabukadinazori, omwe adatonga kuti aphedwe wana wense wa Zedekiyayo, iye aciwona. Patsogolo pace, Nabukadinazoriyo adaboola maso ya Zedekiya, acikamufungira m’kawoko mpaka kufa kwace. Tsono Yahova adapicira wanthu omwe akhayendesedwa ku Babulowo, kuti: ‘Pambuyo pa magole 70, inepano ndin’dzakubweresani pomwe ku Jeruzalemu.’

Kodi n’ciyani cidacitikira maswaka yomwe yadayendesedwambo ku Babuloko? Kodi yadapitiriza kukhala yakukhulupirika kwa Yahova?

Alumbwana omwe akhali nduna za ku Jeruzalemu wale adadzafika ku Babulo. Ndipo mambo Nabukadinazori adauza mtumiki wace Asipenazi kuti awanyang’anire na kusankhulambo omwe akhana thanzi labwino na wakucenjera kwene-kwene kuti awapfunzise kuwerenga na kunemba cirewedwe ca ku Babuloko kuti adzakhale nduna za mambo. Mapfunziroyo yangadatenga magole matatu. Ndipo iwo akhafunikirambo kudya bzakudya bzomwe mambo akhadya. Pa alumbwanawo, anai madzina yawo akhali Danyeri, Ananiya, Misaeli na Azariya. Tsono Asipenazi adawapasa madzina manango ya kwawoko. Tenepo, Danyeri akhacemeredwa Belitesazari, Ananiya akhacemeredwa Sadraki, Misaeli akhacemeredwa Mesaki, ndipo Azariya akhacemeredwa Abedinego. Kodi mapfunziro yomwe alumbwanawa adatambira ku Babuloko, yangadacitisa kuti iwo aleke kutumikira Yahova?

Alumbwana anaiwa akhadatsimikiza kubvera Yahova, bzinese bzitani. Iwo alibe kufuna kudya bzakudya bzomwe mamboyo akhadya, thangwe bzakudya bzinango bzomwe bzikhadyedwabzo bzikhali bzakupswipa mwakubverana na Cakutonga ca Yahova. Tenepo, iwo adalewalewa na Asipenazi, aciti: ‘Taphata minyendo, lekani kutidyesa bzakudya bza mambo.’ Tsono Asipenazi adati: ‘Mukasaya kubzidya, mambo an’dzawona kuti mulibe mawonekedwe yabwino, ndipo an’dzandipha!’

Tsono Danyeri adauza Asipenaziyo kuti: ‘Taphata minyendo, yezerani kutipasa muliwo na madzi kwa nsiku 10, ndipo patsogolo pace, mudzawone momwe tikuwonekera, mucidzatindendemeza na alumbwana omwe ankudya bzakudya bza mambo.’ Ndipo, Asipenaziyo adabvuma kucita bzimwebzo.

Pambuyo pa nsiku 10, Danyeri na anzace atatu wale akhawoneka wathanzi labwino kwene-kwene kuposa alumbwana winangowo. Yahova adakomedwa nawo thangwe ra kumubvera, ndipo iye adapasa Danyeri luso lakumbabvesesa thandauzo la masomphenya na maloto.

Pomwe alumbwanawo adamala kupfunzisidwako, Asipenazi adawayendesa kwa mambo Nabukadinazori. Ndipo mamboyo adaceza nawo, aciwona kuti Danyeri, Ananiya, Misaeli na Azariya akhali wanzeru kwene-kwene kuposa alumbwana winangowo. Tenepo, iwo adasankhulidwa kuti ambaphate basa m’nyumba mwa mamboyo. Ndipo, nthawe zense mamboyo akhambawakumbira nzeru pa nkhani zikulu-zikulu. Yahova adacitisa kuti alumbwana anaiwa akhale wanzeru kwene-kwene kuposa alangizi na anyamatsenga wense wa mamboyo.

Napo akhali ku dziko lacirendo, Danyeri, Ananiya, Misaeli na Azariya alibe kuyebwa kuti akhali atumiki wa Yahova. Kodi iwepo un’dzakumbukirambo nthawe zense kuti ndiwe mtumiki wa Yahova, napo utakhala kutali na abereki wako?