Pa nsiku inango, usiku, mambo Nabukadinazori adalota bzinthu bzakudabwisa kwene-kwene mwakuti akhawona lini tulo. Tenepo, iye adacemeresa anyamatsenga wace, aciwauza kuti: ‘Ndifotokozereni thandauzo la bzomwe ndalota.’ Anyamatsengawo adati: ‘Mambo, tiuzeni ndipo bzomwe mwalotabzo.’ Tsono mamboyo adawauza kuti: ‘Nee! Ndiuzeni ndimwepo bzomwe ndalotabzo, mukasaya kundiuza, ndin’kuphani.’ Tsono iwo adapitiriza kulewa kuti: ‘Yambani mwatiuza ndipo bzomwe mwalotabzo, kuti tikuuzeni thandauzo lace.’ Koma mamboyo adati: ‘Mwensenemwe mun’funa kundinamiza. Ndiuzeni, n’ciyani comwe ndalota!’ Ndipo iwo adati kwa mamboyo: ‘Bzimwebzi mpsakunesa mambo, thangwe palibe omwe angakwanise kucita bzimwebzo.’

Tsono mamboyo adabva ciya kwene-kwene mwakuti adatonga kuti wanthu wense wanzeru wa m’dzikolo aphedwe, kuphatanidza Danyeri, Sadraki, Mesaki na Abedinego. Danyeri adakumbira mamboyo kuti awapase kanthawe. Patsogolo pace, iye na anzace atatu wale adapemba kwa Yahova kuti awathandize. Kodi n’ciyani comwe Yahova adacita?

Yahova adamuwonesa Danyeri ku tulo bzomwe Nabukadinazoriyo akhadalota, acimuzimbulirambo thandauzo lace. Mangwana yace, Danyeriyo adayenda kuna Asipenazi, acikamuuza kuti: ‘Lekani kupha munthu ali-wense. Inepano ndinifotokoza bzomwe mambo adalota.’ Tenepo Danyeri adayendesedwa kwa mamboyo, acikalewa kuti: ‘Yahova wandizimbulira bza tsogolo lanu. Bzomwe mudalota mpsibzi: Imwepo mudalota cifanikiso citali comwe cikhana msolo wa oro, cifuwa na manja ya siriva, mimba na ncafu za mkuwa, minyendo ya simbi na bzala bza simbi yakusanganizikana na dongo. Ndipo mwala udagwatidwa pa phiri, ucikaboma minyendo ya cifanikisoco, ndipo cifanikisoco cidapeyeka, cicisanduka pfumbi, ndipo pfumbiro lidatakulidwa na conzi. Patsogolo pace, mwala omwe udaboma cifanikisoco udadzasanduka phiri likulu lomwe lidadzaza dziko lense la pansi.’

Patsogolo pace, Danyeri adati: ‘Thandauzo la bzomwe mwalotabzo ndiri: Msolo wa oroyo unkuimira umambo bwanubu. Siriva inkuimira umambo bomwe bun’dzawoneka pambuyo pa umambo bwanu. Patsogolo pace, kun’dzakhala na umambo bwakundendemerana na mkuwa bomwe bun’dzatonga dziko lense la pansi. Ndipo kun’dzawoneka pomwe umambo bwakulimba kwene-kwene ninga simbi. Ndipo pakumalizira pace, kun’dzawoneka umambo bwakugawanika pawiri, bomwe mbali ibodzi in’dzakhala yakulimba ninga simbi, ndipo mbali inangoyo in’dzakhala yakutepa ninga dongo. Ndipo mwala omwe udacokera pa phiri ule, ni umambo bwa Mulungu bomwe bun’dzapfudza umambo bwensenebu, bucidzakhala mpaka muyaya.’

Atabva bzimwebzi, mambo Nabukadinazori adagodamira Danyeri, acilewa kuti: ‘Mulungu wako ndiye wakuthumbudzuliradi malotoya. Kulibe Mulungu munango ninga iye.’ Tenepo, m’mbuto mwa Nabukadinazori kupha Danyeri, iye adamuikha kukhala mkulu wa wanthu wense wanzeru, acikhalambo mtongi wa cigawo ca Babulo. Unkukwanisa kuwona momwe Yahova adatawirira mpembo wa Danyeri?

Patapita nthawe, mambo Nabukadinazori adakonzesa cifanikiso citali ca oro, aciciikha ku mbuto inango yomwe ikhacemeredwa Dura. Ndipo iye adacemeresa wanthu wakufunika kwene-kwene wa m’dzikolo, kuphatanidza Sadraki, Mesaki na Abedinego kuti adzawone cifanikisoco. Pomwe iwo adafika, mamboyo adawauza kuti: ‘Mukandobva kulira kwa nyimbo, imwepo mu’funika kugodamira cifanikiso ca oroci! Munthu ali-wense omwe asaye kucigodamira, an’thusidwa mu forno ya moto.’ Kodi Sadraki, Mesaki na Abedinego angadacita tani? Angadagodamira cifanikisoco ayai angadapitiriza kukhala wakukhulupirika kwa Yahova?

Pomwe mamboyo adamala kulewa bzimwebzo, nyimbo idayamba kuimbidwa. Wanthu wense adagodama, acinamata cifanikisoco, tsono Sadraki, Mesaki na Abedinego alibe kucigodamira. Tenepo, wanthu winango atawona bzimwebzo, iwo adakauza mambo kuti: ‘Mambo, Ahebereu atatu wale akulamba kugodamira cifanikiso canu.’ Atabva bzimwebzo, mamboyo adawacemeresa, aciwauza kuti: ‘Ndin’kupasani pomwe mpata munango kuti mugodamire cifanikiso cire. Mukandosaya kucigodamira, ndin’kuthusaniretu mu forno ya moto ire. Palibe mulungu omwe angakwanise kukupulumusani m’manja mwangu.’ Tsono alumbwanawo adati: ‘Mambo, ifepano tin’funa lini kupasidwa mpata munango. Mulungu wathu an’tipulumusa. Ndipo, napo acisaya kutipulumusa, dziwani kuti tin’namata lini cifanikiso canuco.’

Atabva bzimwebzi, Nabukadinazori adakalipa kwene-kwene, aciuza wanthu wace kuti: ‘Citisani kuti fornoyo ipse kwene-kwene kuposa nsiku zense!’ Patsogolo pace, iye adauza acikunda wace kuti: ‘Amangeni, muciwathusa mu fornomo!’ Fornoyo ikhadapsa kwene-kwenesa mwakuti acikunda omwe akhadawamangawo, adapseratu pomwe adandoifenderera pafupi. Alumbwana atatuwo adathusidwa mu forno ya moto ire. Tsono, pomwe mamboyo adanyang’anisa mkati mwa fornoyo, iye adawona kuti mukhana wanthu anai omwe akhafamba-famba pakati pa motoyo. Ndipo iye adabva mantha na bzimwebzo, acibvunza acikunda wace kuti: ‘Kodi ifepano tiribe kuthusa wanthu atatu mu forno mule? Inepano ndikuwona wanthu anai, ndipo wacinaiyo ana mawonekedwe ya anjo!’

Ndipo mamboyo adafendera pafupi, acikuwa kuti: ‘Bulani panja, imwe atumiki wa Mulungu Mkululetu!’ Ndipo wanthu wense adadabwa kwene-kwene pomwe Sadraki, Mesaki na Abedinego adacoka mu forno mule mwakusaya kupsa na pang’onopo. Thupi lawo, tsisi lawo na bzakubvala bzawo bzikhalibe na kundopsako, ndipo bzikhanunkhambo lini utsi.

Tenepo, Nabukadinazori adati: ‘Mulungu wa Sadraki, Mesaki na Abedinego ngwamphanvu kwene-kwene. Iye watumiza anjo wace, aciwapulumusa. Palibe munango wakundendemera naye.’

Ahebereu atatu wale akhadatsimikiza kukhala wakhulupirika kwa Yahova, bzinese bzitani. Kodi un’funambo lini kukhala ninga iwo?