Pa nsiku inango, usiku, mambo Nabukadinazori adalota bzinthu bzakudabwisa. Iye adacemeresa adziwi wace, aciwauza kuti athumbudzule bzomwe akhadalotabzo. Tsono palibe omwe adakwanisa. Pakumalizira pace, mamboyo adadzalewalewa na Danyeri.

Iye adati kwa Danyeriyo: ‘Ndalota cimuti citali kwene-kwene comwe cikhafika mpaka kudzulu, ndipo cikhawonedwa na pa mbuto iri-yense ya pa dziko la pansi. Cimutico cikhana masamba yabwino na bzisapo bzizinji. Bzirombo bzikhakhala pa mthunzi wace, ndipo mbalame zikhamanga bzitsa m’mithambi yace. Tsono, anjo m’bodzi adabuluka kudzulu, acikuwa kuti: “Gwesani cimutico, mucitema-temambo mithambi yace. Tsono siyani tsinde lace pansipo, mucilimanga na cibande ca simbi na mkuwa. Mtima wa cimutico un’dzasiya kukhala wa munthu, ucikhala wa cirombo ca m’thengo, ndipo pan’dzapita magole 7. Wanthu wense an’dzadziwa kuti Mulungu ni Mtongi na kuti iye ambapasa umambo kwa munthu ali-wense omwe iye angafune.” ’

Yahova adazimbulira Danyeri thandauzo la bzomwe mamboyo akhadalota. Pomwe Danyeri adabvesesa thandauzo lace, iye adabva mantha kwene-kwene, aciti: ‘Mambo, ndingadafuna kuti bzomwe mwalotabzi, bzicitikire anyamadulanthaka wanu, koma, bzin’citikira imwepo. Cimuti cikulu comwe cidagwesedwaco, ndimwepo. Imwepo mun’dzaluza umambo bwanu kwa kanthawe, ndipo mun’dzakadya mauswa ku thengo ninga momwe bzirombo bzimbacitira. Tsono pakuti anjo ule walewa kuti tsinde lace lisiyidwe, imwepo mun’dzabwerera, mucidzatonga pomwe.’

Pambuyo pa gole libodzi, Nabukadinazori akhafamba padzulu pa nyumba yace, acimbatumbiza mzinda wa Babulo, mwakumbalewa kuti: ‘Onani mzinda wakudeka omwe ndidamangayu! Inepano ndine wamphanvudi!’ Pomwe iye akhalewalewa bzimwebzi, lidabveka fala, lomwe lidati: ‘Nabukadinazori! Iwepo tsapano waluza umambo bwako.’

Pa nthawe ibodzi-bodziyo, Nabukadinazoriyo adayamba misala, acikhala ninga cirombo ca m’thengo. Iye adathamangisidwa pa mui pace, acikakhala ku thengo pabodzi na bzirombo. Tsisi lace lidakula ninga matenga ya mphungu, ndipo ncala zace zidakula ninga za mbalame.

Pambuyo pa magole 7, Nabukadinazori adadzasiya kucita misala ire, ndipo Yahova adacitisa kuti akhale pomwe mambo wa Babulo. Pamwepo, Nabukadinazori adati: ‘Ndinkutumbiza Yahova, Mambo wa kudzulu. Tsapano ndadziwa kuti Yahova ndiye omwe ambatonga. Iye ambacepswa wanthu wakubzikuza, ndipo angapasembo umambo munthu ali-wense omwe iye angafune.’

Patapita nthawe, Belisazari adadzakhala mambo wa ku Babulo. Pa nsiku inango, usiku, iye adacemeresa ku madyo wanthu wakufunika kwene-kwene wa mu dziko lacero. Iye adauza atumiki wace kuti akatenge makopo ya oro yomwe Nabukadinazori adayatenga mu tempwlo ya Yahova. Mambo Belisazari pabodzi na wanthu wense omwe iye adacemera, adamwera makopoyo, uku ankutumbiza mirungu yawo. Tsono, mwadzidzidzi boko lidawoneka, liciyamba kunemba mafala yakunesa kuthumbudzula pa parede ya m’cipinda comwe akhacitira madyoyo.

Mamboyo adabva mantha kwene-kwene na bzimwebzo. Ndipo iye adacemera adziwi wace, aciwauza kuti: ‘Munthu omwe akwanise kundithumbudzulira mafalaya, ndin’mukhalisa munthu wacitatu wakufunika mu Babulo muno.’ Iwo adayezera kuwerenga mafalayo, koma alibe kukwanisa kudziwa bzomwe bzikhadanembedwabzo. Patsogolo pace, mai wa mamboyo adabwera, aciti: ‘Alipo munthu munango omwe dzina lace ni Danyeri. Iye akhambathumbudzula maloto na bzinthu bzinango bzakudabwisa kwa Nabukadinazori. Iye angakwanise kukuthumbudzulirani mafalaya.’

Tenepo, mamboyo adacemeresa Danyeri, acimuuza kuti: ‘Ukandiwerengera na kundithumbudzulira mafalaya, ndin’kupasa mphaso ya oro, ndicikukhalisambo munthu wacitatu wakufunika mu Babulo muno.’ Tsono Danyeri adati: ‘Ndin’funa lini mphaso zanu, koma ndin’kuuzani thandauzo la mafalaya. Baba wanu, Nabukadinazori, akhali munthu wakubzikuza, tsono Yahova adamucepswa. Imwepo mun’dziwa bzense bzomwe bzidamucitikira, koma mwanyoza basi Yahova mwa kutenga makopo ya oro ya mu tempwlo mwace, mucimwera vinyu. Ndipopa Mulungu wanemba kuti: Mene, Mene, Tekeli na Parisini. Mafalaya yankuthandauza kuti wamambo wa ku Mediya na ku Perisiya an’kunda mzinda wa Babuloyu, ndipo imwepo mun’khala lini pomwe mambo.’

Bzikhawoneka ningati palibe omwe angadakwanisa kukunda mzinda wa Babulo, thangwe mzindayo ukhakhotcereredwa na mpanda utali pabodzi na mkulo wakuzika kwene-kwene. Tsono, usiku bumwebule anyankhondo wa ku Mediya na wa ku Perisiya omwe akhatsogoleredwa na Siro, mambo wa ku Perisiya, adaphwesa mkuloyo, aciyambuka mpaka pa bzipata bza mzindayo, bzomwe bzikhali bwanzu! Iwo adapita mu mzindamo, ndipo adaukunda, aciphambo Belisazari. Patsogolo pace, Siroyo adadzakhalambo mtongi wa ku Babulo.

Patapita gole libodzi, Siro adati kwa Ajuda omwe akhali ku Babuloko: ‘Yahova wandiuza kuti tempwlo yace ku Jeruzalemu in’funika kukonzedwa pomwe. Ndipo ali-wense akhale wakutsudzuka kuti akathandize.’ Ninga momwe Yahova akhadapicirira, Ajuda azinji adabwerera ku Jeruzalemu pambuyo pa magole 70 ya kupfudzidwa kwa mzinda wa Jeruzalemu. Mambo Siro adabwezera bzombo bzense bza oro na bza siriva bzomwe Nabukadinazori akhadatenga mu tempwlo ya Yahova. Ukuwona momwe Yahova adaphatisira basa Siro kuti athandize wanthu wace?