Ngimba Yehova Ikuhoboka Nanumwe?

1. Ngimba ababombi ba Yehova bamo abasubiliwa babaghile ukukayikila isyafiki?

SYAKUKASYA fiyo ukumanya ukuti Yehova ikuhoboka na bandu bake pakuya gulu. Ibaibolo likuti: “Yehova Kyala ikwikyela mbandu bake.” (Sal. 149:4) Loli utubalilo tumo, bamo babaghile ukwilalusya ukuti, ‘Ngimba Yehova ikuhoboka nanine panimwene?’ Ababombi ba Yehova bingi abasubiliwa aba bikuyobiwa mu Baibolo, utubalilo tumo bakayikilagha linga Yehova ahobokagha nabo.—1 Samu. 1:​6-10; Jobu 29:​2, 4; Sal. 51:11.

2. Ngimba bo banani aba Yehova ikuhoboka nabo?

² Ibaibolo likuyoba mwakupilikiwa kanunu ukuti abandu abasitabugholofu, babaghile ukunhobosya Yehova. Bulebule? Tukulondiwa ukuya nulwitiko mwa Yesu Kristu nukosiwa. (Yoh. 3:16) Linga tukubomba isi tukunangisya kubangi ukuti tulapile ubutulanongwa bwitu nukufinga kwa Kyala ukuti tukubombagha ubwighane bwake. (Imbo. 2:38; 3:19) Yehova ikuhoboka fiyo linga tubombile isi ukuti tuye nawe pabumanyani bwamaka. Linga tukughelaghela ukufwanisya isi twafingile ukuti tukumbombelagha Yehova, umwene ikuhoboka nanuswe kangi ikutuketa ukuya bamanyani bake.—Sal. 25:14.

3. Ngimba malalusyo matatu ghaliku agha tukuya pakuyobesania?

³ Loli nongwa yafiki utubalilo tumo bamo babaghile ukwinong’ona ukuti Kyala atikuhoboka nabo? Ngimba Yehova ikunangisya bulebule ukuti ikuhoboka nanuswe? Kangi ngimba Unkristu abaghile ukusubila bulebule ukuti Kyala ikuhoboka nawe?

NONGWA YAFIKI BAMO BABAGHILE UKWINONG’ONA UKUTI YEHOVA ATIKUHOBOKA NABO?

4-5. Nalinga ukuti tukwiketa ukuti tukaya bakulondiwa, ngimba tubaghile ukuya nulusubilo luliku?

⁴ Ukufuma pakabalilo aka twali bana, twebingi ba uswe tukwiketa ukuti tukaya bakulondiwa. (Sal. 88:15) Unkamu Adrián atile: “Utubalilo twingi niketagha ukuti ngaya wakulondiwa. Bo ndi wakilumyana, ngukumbuka ukuti niputagha kwa Yehova ukuti imbumba yangu yisikale mu Paradaiso, loli une niketagha ukuti ngabaghiliwa ukwisakwaghiwamo.” Tony, uyu akakulile mumbumba ya Baketi atile: “Abapapi bangu bakalimbulilemo ukuti banganile pamo ukuti bahobokagha nanine. Isi syambangisyagha ukwinong’ona ukuti kikalipo iki nabombagha iki kyabahobosyagha.”

⁵ Linga utubalilo tumo tukutamiwa naminong’ono ukuti tukaya bakulondiwa, tubaghile ukukumbuka ukuti Yehova atukwabile kumyake. (Yoh. 6:44) Umwene ikuketa utuyilo utununu myitu utu uswe tukabaghila ukuketa kangi ayimenye kanunu indumbula yitu. (1 Samu. 16:7; 2 Syambu. 6:30) Po lelo tubaghile ukunsubila umwene papo ikuti tulibakulondiwa fiyo.—1 Yoh. 3:​19, 20.

6. Ngimba untumiwa Pauli ipilikagha bulebule isyakufwana nubutulanongwa ubu abombile kunyuma?

⁶ Bo tukali ukumanyila ubwanaloli, twebamo twabombagha ubutulanongwa ubu bukutupangisya ukwiyipa inongwa. (1 Pet. 4:3) Abakristu abasubiliwa bope bikulimbana nifinyonywa fyabutulanongwa. Ngimba indumbula yako yikukususya? Ababombi ba Yehova abasubiliwa bikulimbana naminong’ono aghakufwana itolo. Mwakifwanikisyo untumiwa Pauli ipelelagha ikisa linga ikwinong’onela ubutulanongwa bwake. (Rom. 7:24) Bwanaloli ukuti, Pauli alapile imbibi syake kangi alyosiwe. Loli pope aliyobile mwene ukuti “namanga ndinnandi kubatumiwa bosa,” kangi ndi ‘ntulanongwa wakwanda.’—1 Kor. 15:9; 1 Tim. 1:15.

7. Ngimba tukulondiwa ukukumbukila isyafiki isyakufwana nubutulanongwa ubu twabombile kunyuma?

⁷ Tata witu wakumwanya afingile ukuti ikuya pakutuhobokela linga tulapile. (Sal. 86:5) Yonongwa yake linga tulapile ubutulanongwa bwitu ukufuma pasi pandumbula, tubaghile ukusubila ukuti isi Yehova ayobile syabwanaloli kangi atuhobokile.—Kolos. 2:13.

8-9. Ngimba tubaghile ukumalana bulebule naminong’ono aghakuti tukabaghila ukubomba nyingi ukuti tunhobosyeghe Yehova?

⁸ Twesa tukulonda ukubomba nyingi pakumbombela Yehova. Loli bamo bikwinong’ona ukuti bakabaghila ukubomba nyingi kangi Yehova akabaghila ukuhoboka nabo. Umulumbu Amanda atile: “Utubalilo twingi ninong’onagha ukuti ukumpa Yehova ifindu ifinunu kukusanusya ukuti akabalilo kosa ngulondiwa ukubomba nyingi. Yonongwa yake utubalilo twingi ngughelaghela ukubomba nyingi muno mbaghile ukufwanisyila. Loli linga ‘ndoliwe ukufwanisya isi nalondagha,’ ngwanda ukwinong’ona ukuti Yehova atikuhoboka nanine.”

⁹ Ngimba tubaghile ukumalana bulebule naminong’ono aghakuti tukabaghila ukubomba nyingi ukuti tunhobosye Yehova? Tukumbukeghe ukuti Yehova ikubomba ifindu mwamahala. Umwene atikughulila ukuti tukuya pakubomba nyingi isi tukabaghila ukufwanisya. Ikundaghisya kilikyosa iki tukumbombela, fiyofiyo linga tukubomba ukufuma pasi pandumbula. Kangi inong’onela isya bandu aba bikuyobiwa mu Baibolo aba bambombelagha Yehova nindumbula yabo yosa. Mwakifwanikisyo, inong’onela isya Pauli. Kwa fyinja fingi, umwene iyipagha ukwenda ubulendo ubutali kangi alyandisye ifipanga fingi. Loli bo ifindu fichenjile pabumi bwake, umwene akafumusyagha fiyo bo muno abombelagha pakwanda. Loli ngimba isi syasanusyagha ukuti Yehova akahobokagha nawe? Hayi. Pauli akindilile ukubomba isi abaghile ukufwanisya, kangi Yehova alinsayile fiyo. (Imbo. 28:​30, 31) Mwakufwana itolo, nanuswe utubalilo tumo ifi tubaghile ukumpa Yehova fibaghile ukuchenja. Loli ikyakulondiwa fiyo kumyake ko kuya nubwighane ubwakumbombela. Lino isagha tuyobesanie injila simo isi sikunangisya ukuti Yehova ikuhoboka nanuswe.

NGIMBA YEHOVA IKUNANGISYA BULEBULE UKUTI IKUHOBOKA NANUSWE?

10. Ngimba tubaghile ukubomba bulebule ukuti “tupilike” muno Yehova ikunangisyila ukuti ikuhoboka nanuswe? (Yohani 16:27)

¹⁰ Atupele Ibaibolo. Yehova ikunangisya munjila nyingi ukuti abaghanile ababombi bake kangi ikuhoboka nabo. Amalemba ghikulingania ifyakubombiwa fibili pakabalilo aka Yehova ambulagha Yesu ukuti Mwanake unganiwa kangi ikyelile nawe. (Mat. 3:17; 17:5) Ngimba mukulonda ukuti Yehova ababuleghe ukuti ikuhoboka nanumwe? Yehova atikuyoba nanuswe ukufuma kumwanya loli ikuyoba nanuswe ukwendela mu Baibolo. Tubaghile ukupilika amasyu gha Yehova linga tukubelenga amasyu gha Yesu agha ghikwaghiwa mu mabuku agha Masyu amanunu. (Belenga Yohani 16:27.) Yesu akongagha kanunu utuyilo twa Tata wake. Yonongwa yake linga tukubelenga ukuti Yesu ahobokagha nabafundiwa bake abasubiliwa aba bali basitabugholofu, tubaghile ukwinong’onela ukuti Yehova ikuyoba amasyu agha kumyitu.—Yoh. 15:​9, 15.

11. Nongwa yafiki linga tukwaghana nindamyo sitikunangisya ukuti Yehova atikuhoboka nanuswe? (Yakobu 1:12)

¹¹ Ikutupa ifi tukulondiwa. Yehova ikulonda fiyo ukututula, bo ukutupa ifindu fyakumbili. Utubalilo tumo, Yehova abaghile ukwitikisya ukuti twaghane nindamyo bo muno abombile kwa Yobu. (Jobu 1:​8-11) Linga twaghene nindamyo, sitikusanusya ukuti Kyala atikuhoboka nanuswe. Mmalo mwake, sikutupa ulusako ulwakunangisya ukuti tunganile fiyo kangi tukunsubila. (Belenga Yakobu 1:12.) Kangi linga twaghene nindamyo, tukuya pakuketa muno Yehova atughanile nukututula ukwifimbilisya.

12. Ngimba tubaghile ukumanyilako isyafiki kwa Dmitrii?

¹² Inong’onela isi syabombiwe ku nkamu Dmitrii uwa ku Asia. Imbombo yalimmalikile kangi akayaghile iyingi kwa myesi mingi. Yonongwa yake alinong’wine isyakuti abombeghe nyingi mubufumusi ukuti anangisye ukuti ikunsubila Yehova. Yakindilepo imyesi mingi bo akali ukuyagha imbombo. Ukufuma apo alyandile ukubina ububine ubunywamu kangi akafwanisyagha ukusumuka apa alambalele. Umwene alyandile ukwinong’ona ukuti akaya nnyambala pamo tata nnunu kangi akayikilagha linga Yehova ikuhoboka nawe. Kangi isiku limo kunamayolo umwanake undindwana apulintile ipepala ili lyali namasyu agha ghikwaghiwa pa Yesaya 30:15 agha ghikuti: “Mubikeghe ulusubilo lwinu pamyangu.” Kangi alinnangisye tata wake bo ali pabedi nukuyoba ukuti, “Tata, linga utikwipilika kanunu, ukumbukileghe ilemba ili.” Dmitrii asyaghenie ukuti panongwa ya Yehova, imbumba yake yali nifyakulya fingi, imyenda na malo aghakughona. Umwene atile “Isi nalondiwagha ukubomba ko kuya mololo nukukindilila ukunsubila Kyala wangu.” Linga mukwaghana nindamyo iyakufwana itolo, mubaghile ukusubila ukuti Yehova ikubapasikisya kangi ikuya pakubatula ukwifimbilisya.

13. Ngimba bo banani aba Yehova ikubabombesyela ukuti anangisye ukuti ikuhoboka nanuswe kangi ikubomba bulebule?

¹³ Atupele abakamu na balumbu. Yehova ikubombesyela abakamu na balumbu ukunangisya ukuti ikuhoboka nanuswe. Mwakifwanikisyo, abaghile ukubapangisya abangi ukuti batukasye pakabalilo akanunu. Isi syo isi syabombiwe ku mulumbu yumo uyu ikwikala ku Asia pakabalilo aka alyaghene nindamyo. Umwene imbombo yalimmalikile kangi alyandile ukubina fiyo. Ukufuma apo, undume wake abombile ubutulanongwa ubunywamu kangi akakindilile ukuya nkulumba wakipanga. Umulumbu uyu atile, “Ngapilikisyagha inongwa iyi isi syabombiwagha kumyangu. Nalyandile ukwinong’ona ukuti lumo mbombile ikindu kimo ikibibi iki kikanhobosya Yehova.” Umulumbu witu alinsumile Yehova ukuti amanye linga anganile naloli. Ngimba Yehova abombile bulebule? Umulumbu uyu atile, “Abakulumba ba kipanga kyitu balindulile ukumanya ukuti Yehova anganile.” Ukufuma apo, asumile kangi ubutuli kwa Yehova. Umwene atile, “Isiku lilalila nalyambilile kalata uwakufuma ku bakamu na balumbu aba kukipanga kyitu. Bo ngubelenga amasyu ghabo aghakusubisya, nasyaghenie ukuti Yehova ambilike.” Ukuyoba ubwanaloli, utubalilo tosa Yehova ikunangisya ukuti ikuhoboka nanuswe ukwendela mmasyu aghakisa aghakufuma kubangi.—Sal. 10:17.

14. Ngimba njila yiliku iyingi iyi Yehova ikunangisya ukuti ikuhoboka nanuswe?

¹⁴ Yehova ikunangisya kangi ukuti ikuhoboka nanuswe mwakubombela Abakristu abinitu ukuti batupe ubulongosi ubu tukulondiwa. Mwakifwanikisyo, nkabalilo kakunyuma, Yehova alimbombesyile untumiwa Pauli ukuti abalembele Abakristu abinake abakalata 14. Mu bakalata aba, Pauli abapele abakamu na balumbu ubulongosi ubwakupilikiwa kanunu mwalughano. Nongwa yafiki Yehova alinkasisye Pauli ukuti alembe ubulongosi ubu? Yehova yo Tata unnunu kangi ikubafunda abanake “aba abaghanile.” (Mbu. 3:​11, 12) Yonongwa yake linga twambilile ubulongosi ubwakufuma mu Baibolo, tuketeghe ubuketi ubwakuti Yehova ikuhoboka nanuswe komma ukuti akatughana. (Hib. 12:6) Ngimba njila siliku isingi isi sikunangisya ukuti Yehova ikuhoboka nanuswe?

UBUKETI UBUNGI UBU BUKUNANGISYA UKUTI YEHOVA IKUHOBOKA NANUSWE

15. Ngimba bo banani aba Yehova ikubapa mbepo wake mwikemo kangi nongwa yafiki isi sikutukasya?

¹⁵ Yehova ikubapa mbepo wake mwikemo abandu aba ikuhoboka nabo. (Mat. 12:18) Tubaghile ukwilalusya ukuti, ‘Ngimba ngunangisya iseke simo isya mbepo wa Kyala pabumi bwangu?’ Ngimba mukunangisya ubololo ku bangi ukukinda kunyuma bo mukali ukummanya Yehova? Linga mukukindilila ukunangisya iseke sya mbepo wa Kyala, mukuya pakuya nubuketi ubwakuti Yehova ikuhoboka nanumwe.—Keta ibokosi ilyakuti, “Uluseke lwa Mbepo lo . . . ”

16. Ngimba bo banani aba Yehova ikubabombesyela ukuti bafumusyeghe amasyu amanunu, kangi isi sikubapangisya ukuti mwipilikeghe bulebule? (1 Batesalonike 2:4)

¹⁶ Yehova abapele imbombo iyakufumusya amasyu amanunu abandu aba ikuhoboka nabo. (Belenga 1 Batesalonike 2:4.) Keta muno umulumbu Jocelyn alwaghile ulusayo panongwa yakufumusya amasyu amanunu kubangi. Isiku limo, Jocelyn bo alembwike atamiwe naminong’ono. Umwene atile, “Ngali namaka kangi niketagha ukuti ngaya wakulondiwa.” Loli nabombagha ubupayiniya kangi lyali isiku ilyakuti ningile mubufumusi. Yonongwa yake naliputile nukwingila mubufumusi.” Isiku lila nulubunju Jocelyn alyaghene na Mary, unkikulu wakisa uyu alitike ukuti amanyileghe nawe Ibaibolo. Bo imyesi minandi yikindilepo, Mary ayobile ukuti iputagha kwa Kyala ukuti antule pakabalilo aka Jocelyn agogodagha pakifigho kyake. Bo ikwinong’onela ikyakubombiwa iki, Jocelyn atile, “Nafwanagha ngumpilika Yehova ikumbula ukuti, ‘Nguhoboka nanuwe.’” Bwanaloli ukuti, akaya mundu aliwesa uyu abaghile ukupilikisya isi tukufumusya. Loli tubaghile ukuya nulusubilo losa ukuti Yehova ikuhoboka fiyo linga tukughelaghela ukufumusya amasyu amanunu kubangi.

17. Ngimba mukumanyilako isyafiki kwa Vicky isyakufwana nikitabulilo? (Salimo 5:12)

¹⁷ Yehova ikubombela ikitabulilo ku bandu aba ikuhoboka nabo. (1 Tim. 2:​5, 6) Loli bule linga tukwinong’ona ukuti Yehova akabaghila ukuhoboka nanuswe nalinga ukuti tuli nulwitiko mu kitabulilo kangi tosiwe? Tukumbukeghe ukuti, tutikulondiwa ukuti tusubileghe itolo isi tukwinong’ona loli tukulondiwa ukunsubila Yehova. Umwene ikubaketa aba bali nulwitiko nkitabulilo ukuya bagholofu mmaso ghake kangi afingile ukuti ikuya pakubasaya. (Belenga Salimo 5:12; Rom. 3:26) Umulumbu Vicky aketile ukuti kwakulondiwa fiyo ukwinong’onela isya kitabulilo. Isiku limo bo inong’onile fiyo isyakufwana nikitabulilo, atile: “Yehova anangisye ubololo kwa kabalilo akatali. Loli nafwanagha ngumbula Yehova ukuti: ‘Ukabaghila ukungana umundu bo une. Ikemo lya Mwanako likabaghila ukupangisya ukuti ubutulanongwa bwangu buhobokeliwe.’” Panongwa yakwinong’onela ikyabupe kya kitabulilo, Vicky alyandile ukuketa ukuti Yehova anganile. Nanuswe tubaghile ukuketa ukuti Yehova atughanile kangi ikuhoboka nanuswe linga tukwinong’onela isya kitabulilo.

18. Ngimba tubaghile ukuya nulusubilo luliku linga tukukindilila ukunangisya ulughano kwa Tata witu wakumwanya?

¹⁸ Nalinga ukuti tubaghile ukughelaghela ukukonga amasakisyo agha tuyobesenie munkhani iyi, loli utubalilo tumo tubaghile ukuwa amaka nukukayikila linga Yehova ikuhoboka nanuswe. Linga isi sibombiwe, tukumbukeghe ukuti Umwene ikuhoboka “na aba banganile.” (Yak. 1:12) Yonongwa yake mukulondiwa ukukindilila ukuseghelela kwa Yehova nukuketa muno ikunangisyila ukuti ikuhoboka nanumwe. Utubalilo tosa mukumbukeghe ukuti Yehova “akaya pabutali pali yumoyumo mmyitu.”—Imbo. 17:27.