-
Mateyu 20:29-34Ngɛlɛlera Nwuanzanwuanza Ewiade Fofolɛ Ngilebɛbo
-
-
29 Mɔɔ bɛvi Gyɛleko bɛkɔ la, menli dɔɔnwo doale ye. 30 Na nea! mekɛ mɔɔ anyenzinliravolɛma nwiɔ mɔɔ bɛde adenle ne anloa dele kɛ Gyisɛse ɛlɛpɛ nu la, bɛdeɛdeanle nu kɛ: “Awulae, Devidi Ara, nwu yɛ anwunvɔne!”+ 31 Na menli ne deanle bɛ na bɛzele bɛ kɛ bɛyɛ koonwu; noko bɛdeɛdeanle nu kpole kɛ: “Awulae, Devidi Ara, nwu yɛ anwunvɔne!” 32 Yemɔti Gyisɛse gyinlanle, ɔvɛlɛle bɛ na ɔbizale bɛ kɛ: “Duzu a bɛkulo kɛ meyɛ memaa bɛ a?” 33 Bɛbuale ye kɛ: “Awulae, buke yɛ nye.” 34 Alɔbɔlɛ hunle Gyisɛse na ɔvale ɔ sa ɔhehanle bɛ nye,+ na ɛkɛ ne ala bɛ nye bukebukele na bɛdoale ye.
-
-
Luku 18:35-43Ngɛlɛlera Nwuanzanwuanza Ewiade Fofolɛ Ngilebɛbo
-
-
35 Mɔɔ Gyisɛse ɛlɛbikye Gyɛleko la, ɛnee nrenyia anyenzinliravolɛ bie de adenle ne anloa ɛlɛsɛlɛzɛlɛ debie.+ 36 Kɛmɔ ɔdele kɛ menli dɔɔnwo ɛlɛpɛ nu la ati, ɔbizale mɔɔ ɛlɛkɔ zo la. 37 Bɛbuale ye kɛ: “Gyisɛse mɔɔ vi Nazalɛte la a ɛlɛse a!” 38 Yemɔti ɔdeanle nu kɛ: “Gyisɛse, Devidi Ara, nwu me anwunvɔne!” 39 Na menli mɔɔ li bɛ nyunlu la bɔle ɔ bo deanle ye na bɛzele ye kɛ ɔyɛ koonwu, noko ɔhɔle zo ɔdeɛdeanle nu kpole kɛ: “Devidi Ara, nwu me anwunvɔne!” 40 Yemɔti Gyisɛse gyinlanle na ɔhanle kɛ bɛva nrenyia ne bɛrɛlɛ ye. Mɔɔ ɔbikyele Gyisɛse anwo ɛkɛ ne la, ɔbizale ye kɛ: 41 “Duzu a ɛkulo kɛ meyɛ memaa wɔ a?” Ɔbuale ye kɛ: “Awulae, maa menwu debie.” 42 Yemɔti Gyisɛse zele ye kɛ: “Nwu debie; wɔ diedi ɛmaa wɔde kpɔkɛ.”+ 43 Na ɛkɛ ne ala ɔnwunle debie na ɔbɔle ɔ bo ɔdoale ye,+ na ɔwulale Nyamenle anyunlunyia. Na mɔɔ menli dɔɔnwo ne nwunle ye la, bɛdabɛ noko bɛyele Nyamenle ayɛlɛ.+
-