Gyɛlɛmaya
19 Mɔɔ Gyihova ɛha la ɛne: “Kɔ na kɔdɔ buakɛ fi nwovolɛ ɛkɛ.+ Fa menli ne anu mgbanyima ne mɔ bie yɛɛ ɛsɔfo ne mɔ anu mgbanyima ne mɔ bie, 2 na bɛhɔ Henɛm Ara Ne Bɔnza ne+ mɔɔ wɔ Nwovolɛ Anlenkɛ Kpole ne anloa la anu. Na ka edwɛkɛ ne mɔɔ mebaha meahile wɔ la wɔ ɛkɛ. 3 Ka kɛ, ‘Bɛmɛ Dwuda arelemgbunli nee Gyɛlusalɛmma, bɛdie Gyihova edwɛkɛ. Mɔɔ ɛlɔne Gyihova, Yizilayɛ Nyamenle ne ɛha la ɛne:
“‘“Melɛmaa munzule ara ɛke, na awie biala mɔɔ bade la anwo babubu ye. 4 Ɔluakɛ bɛkpo me+ yɛɛ bɛmaa ɛke ɛhakyi.+ Bɛbɔ afɔle wɔ ɛke bɛmaa nyamenle gyɛne mɔɔ bɛdabɛ nee bɛ nenyia mɔ nee Dwuda arelemgbunli ɛnze bɛ la, na bɛva menli mɔɔ ɛnze nwolɛ bie la mogya bɛyi ɛke.+ 5 Bɛsisile Beeyale ɛzonlenlɛ ɛleka ne mɔ amaa bɛayela bɛ mra mrenyia wɔ senle nu kɛ ɛyelalɛ afɔlebɔdeɛ bɛamaa Beeyale,+ debie mɔɔ meanga kɛ bɛyɛ anzɛɛ metɛkanle nwolɛ edwɛkɛ bɔbɔ yɛɛ ɔtɛbale me ahonle* nu ɛlɛ bɔbɔ la.”’+
6 “‘“Ɛhye ati, bɛnlea! mekɛ ɛlɛba,” Gyihova a se a, “mɔɔ bɛnrɛvɛlɛ ɛke Tofɛte anzɛɛ Henɛm Ara Ne Bɔnza ne bieko a, emomu bɛbavɛlɛ ye Ahunleɛ Bɔnza.+ 7 Mebazɛkye ngyehyɛleɛ biala mɔɔ Dwudama nee Gyɛlusalɛmma ɛyɛ ye wɔ ɛke la, na mebamaa bɛawu konle dadeɛ nloa wɔ bɛ kpɔvolɛma anyunlu nee bɛdabɛ mɔɔ bɛkpondɛ bɛ bɛahu bɛ* la asa anu. Na mebamaa bɛ avunli ayɛ anwomanyunlu nloma nee azɛlɛ ye azo nane aleɛ.+ 8 Na mebamaa suakpole ɛhye ahakyi debie ɛzulolɛ bie na menli abɔ nwolɛ nvonloma. Awie biala mɔɔ bapɛ nu wɔ ɛkɛ ne la bava ɛzulolɛ anlea na yeabɔ nwolɛ nvonloma ɔlua ye amaneɛnwunlɛ ne mɔ amuala ati.+ 9 Na mebamaa bɛali bɛ mra mrenyia nee bɛ mra mraalɛ nwonane, na awie biala ali ɔ gɔnwo nwonane, ɔlua ngyegyelɛ nee amaneɛnwunlɛ mɔɔ bɛ kpɔvolɛma nee menli mɔɔ kpondɛ bɛ ahu bɛ* bava ara bɛ nwo zo la ati.”’+
10 “Akee bɔ buakɛ ne wɔ menli mɔɔ ɛ nee bɛ bahɔ la anyunlu ɛkɛ, 11 na se bɛ kɛ, ‘Mɔɔ ɛlɔne Gyihova ɛha la ɛne: “Kɛ mɔɔ awie bɔ nwovolɛ buakɛ a bɛngola bɛnyɛ ye boɛ bieko la, zɔhane ala a mebabɔ menli ɛhye nee suakpole ɛhye abo zo a; na bɛbazie avunli wɔ Tofɛte too mɔɔ bɛnrɛnyia ɛleka bieko bɛnrɛzie bɛ a.”’+
12 “‘Kɛ mebayɛ ɛke nee menli mɔɔ wɔ zo la ɛne,’ Gyihova a se a, ‘mebamaa suakpole ɛhye ayɛ kɛ Tofɛte. 13 Na Gyɛlusalɛm azua nee Dwuda arelemgbunli azua, ɛhɛe, ɛleka mɔɔ bɛbɔ afɔle wɔ azua ti zo bɛmaa anwuma ɛlɔne kɔsɔɔti nee ɛleka mɔɔ bɛfa nza bɛbɔ afɔle bɛmaa nyamenle gyɛne la amuala anwo bagua evinli kɛ Tofɛte la.’”+
14 Mɔɔ Gyɛlɛmaya vi Tofɛte, ɛleka mɔɔ Gyihova maanle ɔhɔhanle ngapezo ne rale la, ɔhɔgyinlanle Gyihova sua ne alie ne anwo na ɔzele menli ne amuala kɛ: 15 “Mɔɔ ɛlɔne Gyihova, Yizilayɛ Nyamenle ne ɛha la ɛne, ‘Nea, melɛmaa munzule kɔsɔɔti mɔɔ menganle mentiale suakpole ɛhye nee azua mɔɔ zuozua ye amuala la ado bɛ, ɔluakɛ bɛyɛle anzosesebɛ, bɛandie me edwɛkɛ.’”+