Samoɛle Mɔɔ Limoa

31 Ɛnee Filisitiama nee Yizilayɛma ɛlɛko.+ Na Yizilayɛma nriandile vile Filisitiama anyunlu, na menli dɔɔnwo wule guale Gelebowa Boka ne azo.+ 2 Filisitiama voanle Sɔɔlo nee ɔ mra mrenyia ne mɔ ndinlizo na bɛbikyele bɛ, na Filisitiama hunle Dwɔnatan,+ Abenadabe yɛɛ Malekae-hyua, Sɔɔlo amra mrenyia ne mɔ.+ 3 Konle ne anu yɛle se kpalɛ maanle Sɔɔlo, ɛdatovoma ne nwunle ye na ɛdatovoma ne bodale ye kpole.+ 4 Akee Sɔɔlo zele ye sonvolɛ ne mɔɔ soa ye konle ninyɛne ne la kɛ: “Twe wɔ konle dadeɛ ne fa wɔ me amaa menli ɛhye mɔ mɔɔ bɛtɛpɛle bɛ mrenyiazo la+ ambanyɛ me amumuyɛ* na bɛangu me.” Noko ɛnee ye sonvolɛ ne ɛngulo kɛ ɔkɛyɛ ɔluakɛ ye ahonle dule kpole. Yemɔti Sɔɔlo vale konle dadeɛ ne na ɔdɔle zolɛ.+ 5 Mɔɔ ye sonvolɛ ne nwunle kɛ Sɔɔlo ɛwu la,+ ɔdaye noko ɔdɔle ye konle dadeɛ ne azo na ɔ nee ye wule. 6 Ɔti Sɔɔlo, ɔ mra mrenyia nsa ne, ye sonvolɛ ne mɔɔ soa ye konle ninyɛne ne la yɛɛ ye menli ne kɔsɔɔti wule kenle zɔhane.+ 7 Mekɛ mɔɔ Yizilayɛma mɔɔ wɔ bɔnza ne maanzinli ne anu yɛɛ Dwɔdan maanzinli ne anu nwunle kɛ Yizilayɛma ɛnriandi na Sɔɔlo nee ɔ mra mrenyia ne mɔ ɛwu la, bɛvi bɛ azuamgbole ne mɔ azo bɛnriandile;+ akee Filisitiama radɛnlanle zolɛ.

8 Aleɛ hyenle mɔɔ Filisitiama rale kɛ bɛbayeye avunli ne mɔ anwo ninyɛne la, bɛnwunle Sɔɔlo nee ɔ mra mrenyia nsa ne kɛ bɛwu bɛgua Gelebowa Boka ne azo.+ 9 Yemɔti bɛpɛle ɔ ti na bɛyele ye konle tɛladeɛ* ne na bɛhɔhanle ye wɔ Filisitiama azɛlɛ ne kɔsɔɔti azo kɛ bɛbɔ ye nolo+ wɔ bɛ ananze azua* ne mɔ anu+ na bɛha bɛhile menli ne. 10 Akee bɛvale ye konle tɛladeɛ* ne bɛguale Ahyetɔlɛte ananze ne mɔ sua ne anu na bɛhendale ye funli ne wɔ Bɛte-hyean bane ne anwo.+ 11 Mɔɔ Gyeebɛhye-geleade amra+ dele mɔɔ Filisitiama ɛva ɛyɛ Sɔɔlo la, 12 kovolɛma ne kɔsɔɔti dwazole na bɛdiale nɔe ne amuala bɛhɔyele Sɔɔlo nee ɔ mra mrenyia ne mɔ avunli bɛvile Bɛte-hyean bane ne anwo. Bɛziale bɛrale Gyeebɛhye na bɛrayelale bɛ wɔ ɛkɛ. 13 Akee bɛsesale bɛ mbowule ne mɔ+ na bɛziele bɛ wɔ tamaleseke baka ne mɔɔ wɔ Gyeebɛhye la abo,+ na bɛhyele ɛhɔne kenle nsuu.