Gyɛlɛmaya
50 Edwɛkɛ mɔɔ Gyihova luale ngapezonli Gyɛlɛmaya anwo zo hanle ye wɔ Babelɔn,+ Kaledeama azɛlɛ ne anwo la ɛne:
2 “Bɛha ye wɔ maanle maanle ne mɔ anu na bɛbɔ ye nolo.
Bɛmaa sɛkɛlɛneɛ baka zo na bɛbɔ ye nolo.
Bɛmmafa debie biala bɛfea!
Bɛha kɛ, ‘Bɛho bɛva Babelɔn.+
Bɛgua Bɛle anyunlu aze.+
Mɛlodake ahonle ɛdu.
Bɛgua ye ananze ne mɔ anyunlu aze.
Ye kyibadeɛ ananze* ne mɔ ahonle ɛdu.’
3 Ɔluakɛ maanle bie vi sɔlɔ nehane ɛra ɔ nwo zo.+
Yemaa ye azɛlɛ ne ɛhakyi debie ɛzulolɛ bie;
Awie biala ɛnde ɛkɛ.
Menli nee nane kɔsɔɔti ɛnriandi;
Bɛvi ɛkɛ bɛhɔ.”
4 “Kenle zɔhane mɔ nee mekɛ zɔhane,” Gyihova a se a, “Yizilayɛma nee Dwudama babɔ nu ara.+ Bɛlɛtia bɛara amuala la ɛnee bɛlɛsu,+ na bɛbabɔ nu bɛakpondɛ Gyihova bɛ Nyamenle ne.+ 5 Bɛbabiza Zayɔn adenle ne, na bɛahakyi bɛ nye wɔ lɔ+ bɛaha kɛ, ‘Bɛrɛla, bɛmaa yɛ nee Gyihova ɛyɛ dahuu ngyekyeleɛ mɔɔ awie biala arɛle ɛnrɛvi ye ɛlɛ la.’+ 6 Me menli ne ɛyɛ kɛ mboane mɔɔ ɛminli la.+ Bɛ mboaneneavolɛma ɛmaa bɛminli.+ Bɛmaa bɛkɔ awoka ne mɔ azo lɔ, bɛkpɔsɛkpɔsa awoka mgbole nee awoka ngyikyi zo. Bɛ rɛle ɛvi bɛ ɛnwomenlelielɛ ɛleka ne. 7 Bɛdabɛ mɔɔ bɛnwunle bɛ la amuala hunle bɛ lile,+ na bɛ kpɔvolɛma hanle kɛ, ‘Yɛnli fɔlɛ, ɔluakɛ bɛyɛle ɛtane bɛtiale Gyihova, tenleneyɛlɛ tɛnlabelɛ ne nee bɛ nenyia mɔ anyelazo ne, Gyihova.’”
8 “Bɛnriandi bɛvi Babelɔn,
Bɛvi Kaledeama azɛlɛ ne azo bɛhɔ,+
Na bɛyɛ bɛ nwo kɛ nane mɔɔ li mboane ekpunli ne anyunlu la.
9 Ɔluakɛ bɛnlea, melɛboɔboa menli dɔɔnwo anloa meavi sɔlɔ maanle maanle mgbole nu+
Meara Babelɔn anwo azo.
Bɛbahyehyɛ bɛ pɛpɛɛpɛ bɛ nee ye araho;
Ɛkɛ ne a bɛbahye ye a.
10 Bɛbave Kaledea ninyɛne.+
Bɛdabɛ mɔɔ bɛbave ye ninyɛne ne mɔ la amuala ako bɛayi tetɛkɛɛ,”+ Gyihova a se a.
Ɔluakɛ bɛtietiale bɛ nwo zo kɛ mɔɔ ɛnlankɛ ralɛ belɛ tietia ndile zo la,
Na bɛdeɛdeanle nu kɛ mgbɔnwɔ nyinli la.
12 Bɛgua wɔ mame anyunlu aze.+
Bɛye mɔɔ wole wɔ la arɛle bɛdo ɔ sa nu.
Nea! Ɔle ekyi wɔ maanle maanle avinli,
Fienemgbole mɔɔ nzule ɛnle zo nee ɛsɛlɛ.+
Awie biala mɔɔ bapɛ nu wɔ Babelɔn la bava ɛzulolɛ anlea ye
Na yeabɔ nvonloma ɔlua ye amaneɛnwunlɛ ne mɔ amuala ati.+
14 Bɛvi ɛleka biala bɛhyehyɛ bɛ nwo pɛpɛɛpɛ bɛva konle bɛdoa Babelɔn,
Bɛdabɛ mɔɔ bɛto* ɛda la amuala.
15 Bɛdea nu wɔ ɛleka biala kɛ konle ɛlɛba ɔ nwo zo.
Yemaa ɔ sa zo.
Bɛli ye nzenralɛ.
Bɛva mɔɔ yeva yeyɛ awie mɔ la bie bɛyɛ ye.+
16 Bɛmaa mɔɔ gua ma
Nee mɔɔ fa ɛdedadeɛ te ma la ɛvi Babelɔn.+
Konle dadeɛ atisesebɛ ne ati, bɛ nuhua ko biala bazia ahɔ ye menli ne anu,
Awie biala banriandi ahɔ ye azɛlɛ ne azo.+
17 “Yizilayɛma le kɛ mboane mɔɔ ɛbɔ asande la.+ Awenade ɛbɔ bɛ asande.+ Mɔɔ limoa la, Aselea belemgbunli ne hunle bɛ lile;+ akee Babelɔn Belemgbunli Nɛbukadenɛza bobɔle* bɛ mbowule nu.+ 18 Ɛhye ati mɔɔ ɛlɔne Gyihova, Yizilayɛ Nyamenle ne ɛha la ɛne: ‘Nea, me nee Babelɔn belemgbunli ne nee ye azɛlɛ ne bɛali kɛ mɔɔ me nee Aselea belemgbunli ne lile la.+ 19 Na mebava Yizilayɛ meazia meara ye adidileka ne,+ na ɔbadidi Kamɛle nee Beehyan,+ na ɔ ko ayi wɔ Yifelaem+ nee Geleade awoka ne mɔ azo.’”+
20 “Kenle zɔhane mɔ nee mekɛ zɔhane,” Gyihova a se a,
“Bɛbakpondɛ Yizilayɛ fɔlɛlilɛ,
Na bɛnrɛnyia bie,
Yɛɛ bɛnrɛnwu Dwuda ɛtane ne mɔ,
Ɔluakɛ mebava bɛdabɛ mɔɔ mebamaa bɛaha la ɛtane meahyɛ bɛ.”+
21 “Dwazo kɔ Mɛlateeyem azɛlɛ ne nee menli mɔɔ de Pikɔdo la anwo zo.+
Maa bɛhu bɛ na bɛzɛkye bɛ bɔkɔɔ,” Gyihova a se a.
“Yɛ mɔɔ meha mehile wɔ la amuala.
22 Bɛte konle nee ɛzɛkyelɛ kpole ne,
Wɔ azɛlɛ ne azo.
23 Nea kɛ bɛpɛ azɛlɛ ye azo amuala hamenle ne bɛdo aze na bɛbubu nu a!+
Nea kɛ Babelɔn ɛhakyi debie ɛzulolɛ bie wɔ maanle maanle avinli a!+
24 O Babelɔn, mezua wɔ ɛhane na mehye wɔ,
Noko wɔannwu ye.
Bɛnwunle wɔ bɛhyele wɔ,+
Ɔluakɛ Gyihova a ɛdwazole ɛtiale ye a.
25 Gyihova ɛdukue ɛleka mɔɔ ɔsie ye konle ninyɛne ne mɔ la,
Na yeye ye ɛya konle ninyɛne ne mɔ yevinde.+
Ɔluakɛ Tumivolɛ Awulae, ɛlɔne Gyihova lɛ gyima di
Wɔ Kaledeama azɛlɛ ne azo.
26 Bɛvi moamoa bɛrɛla ɔ nwo zo.+
Bɛbukebuke ɛleka mɔɔ ɔsie ye aleɛ la.+
Bɛhuohua ye afedeɛ nloa kɛ ma edukue edukue la.
Bɛzɛkye ye bɔkɔɔ.+
Bɛmmagyakyi awie biala.
27 Bɛhu ye nlankɛ nyinli ngyikyi kɔsɔɔti;+
Bɛhɔhu bɛ.
Bɛ gyakɔ, ɔluakɛ bɛ kenle ne ɛdwu,
Bɛ ndɛnebualɛ mekɛ ne!
28 Bɛte bɛdabɛ mɔɔ bɛlɛnriandi la,
Bɛdabɛ mɔɔ bɛlɛfi Babelɔn la ane,
Bɛlɛkɔ bɛahɔha Gyihova yɛ Nyamenle ne nzenralɛlilɛ ne wɔ Zayɔn,
Ye ɛzonlenlɛsua ne anwo nzenralɛlilɛ ne.+
Bɛ muala bɛbɛnga ye bɛyia; bɛmmamaa awie biala fi ɛsalɛ.
Bɛdua ye kakɛ kɛ mɔɔ ye gyima de la.+
Bɛva mɔɔ yeva yeyɛ awie mɔ la bie bɛyɛ ye.+
Ɔluakɛ yememaa ɔ nwo zo yetia Gyihova,
Yizilayɛ Nwuanzanwuanza Ko ne.+
30 Ɔti ye mgbavolɛ bɛadɔ amolɛ nu wɔ ye gua ne mɔ azo,+
Na ye ɛlɔnema kɔsɔɔti bɛayɛ koonwu wɔ kenle zɔhane,” Gyihova a se a.
31 “Nea! Me nee wɔ ɛnyia ye,+ O Babelɔn anwomemaazo,”+ Tumivolɛ Awulae, ɛlɔne Gyihova a se a,
“Ɔluakɛ wɔ kenle ne badwu, mekɛ mɔɔ mebamaa wɔabu mgbonda la.
32 O Babelɔn anwomemaazo, ɛbakpula na wɔadɔ aze,
Mɔɔ awie biala ɛnrɛmaa wɔ zo a.+
Na mebado senle wɔ wɔ azuamgbole ne mɔ azo,
Na ɔbayela debie biala mɔɔ ɛbɔ wɔ ɛyia la.”
33 Mɔɔ ɛlɔne Gyihova ɛha la ɛne:
“Bɛlɛsisi Yizilayɛma nee Dwudama,
Na bɛdabɛ mɔɔ bɛva bɛ bɛhɔ akɛlɛzonlenlɛ nu la ɛzɔ bɛ kyengye.+
Bɛngulo kɛ bɛgyakyi bɛ bɛmaa bɛkɔ.+
34 Noko bɛ Kpɔnevolɛ ne anwo yɛ se.+
Ye duma a le ɛlɔne Gyihova.+
Kɛzi ɔde ye biala la, ɔbali bɛ edwɛkɛ yeamaa bɛ,+
Amaa azɛlɛ ne alie ɔ menle+
Na yeava ngyegyelɛ yeara Babelɔnoma anwo zo.”+
35 Kɛ Gyihova se la ɛne, “Konle dadeɛ bara Kaledeama,
Babelɔnoma nee bɛ mgbanyima nee bɛ nrɛlɛbɛvolɛma anwo zo.+
36 Konle dadeɛ bara ye adalɛ ngapezoma anwo zo, na bɛbayɛ bɛ ninyɛne kɛ ahoasea la.
Konle dadeɛ bara ye ɛlɔnema anwo zo na ɛzulolɛ baha bɛ.+
37 Konle dadeɛ bara bɛ mgbɔnwɔ nee bɛ konle ehwili nwo zo,
Yɛɛ nyɛvolɛ mɔɔ wɔ ye avinli la amuala anwo zo,
Na bɛbayɛ kɛ mraalɛ la.+
Konle dadeɛ bara ye agyapadeɛ zo, na bɛave bɛ ninyɛne.+
38 Ye nzule ne mɔ ɛzɛkye, na bɛbasesa.+
Ɔluakɛ ɔle ananze azɛlɛ,+
Na ɔlua bɛ ɛnyelɛzodeɛnwunlɛ ne mɔ mɔɔ yɛ ɛzulolɛ la ati, bɛyɛ bɛ ninyɛne kɛ ɛzɛlɛ la.
39 Ɛhye ati, ɛsɛlɛ zo abɔdeɛ nee nane mɔɔ kpo la babɔ nu adɛnla ɛkɛ,
Na soholo noko badɛnla ɛkɛ.+
Menli ɛnrɛdɛnla ɛkɛ ne bieko,
Na wɔ awolɛndoazo kɔsɔɔti anu, awie ɛnrɛdɛnla ɛkɛ ne ɛlɛ.”+
40 “Kɛ mɔɔ Nyamenle butule Sodɔm nee Gomɔla+ nee azuamgbole mɔɔ zuozua bɛ la anye aze la,”+ Gyihova a se a, “zɔhane ala a awie biala ɛnrɛdɛnla zolɛ, yɛɛ awie biala ɛnrɛzokoɛ ɛkɛ a.+
41 Nea! Menli vi sɔlɔ nehane ɛlɛba;
Maanle kpole bie nee arelemgbunli mgbole+ bɛadwazo
Avi azɛlɛ ne ɛleka moamoa ara.+
42 Bɛdedɛ ɛda nee atwɛ ezinra.*+
Bɛ ti yɛ se na bɛnrɛze anwunvɔne.+
Bɛdede mgbɔnwɔ zo,
Na bɛ nwo soa kɛ nyevile la.+
Bɛhyehyɛ bɛ pɛpɛɛpɛ kɛ sonla ko la, na bɛlɛfa konle bɛara ɛ nwo zo, O Babelɔnoma.+
Ɔ nwo woso ye,
Ɔte nyane kɛ raalɛ mɔɔ ɛlɛwo la.
44 “Nea! Awie bara adidileka ne mɔɔ gyi kpundii la anwo ɛkɛ ne kɛ awenade mɔɔ vi Dwɔdan kpɔkɛmile ne anu la, noko wɔ mekɛ ekyi bie ala anu mebamaa yeanriandi yeavi ɔ nwo ɛkɛ. Na mebaye awie meamaa yeanlea ɔ nwo zo.+ Na nwane a le kɛ medame a, na nwane a kɛhola nee me kɛdwudwu a? Mboaneneavolɛ boni a kɛhola kɛgyinla me nyunlu a?+ 45 Ɛhye ati, bɛdie kpɔkɛ mɔɔ Gyihova ɛbɔ ye wɔ Babelɔn anwo+ nee adwenle mɔɔ yeva ye wɔ Kaledeama azɛlɛ ne anwo la.
Nɔhalɛ nu, bɛbahwenle mboane ngyikyi ne mɔ aze bɛahɔ.
Na bɛdabɛ ti ɔbamaa bɛ tɛnlabelɛ ne adɔ mgbane.+
46 Babelɔn ɛtetalɛ ne anwo dede bamaa azɛlɛ ne akpusu,
Na bɛbade ɛzunlɛ wɔ maanle maanle ne mɔ anu.”+