Lɛvitikɔso
5 “‘Saa awie* nwu ɛtaneyɛlɛ bie anzɛɛ ɔte nwolɛ edwɛkɛ na ɔle nwolɛ dasevolɛ na bɛfɛlɛ ye bagua nu kɛ ɔrali nwolɛ daselɛ*+ na yeanga a, ɛnee yeyɛ ɛtane, na ɔbali ye ɛtane ne anwo ɛzonle.
2 “‘Anzɛɛ saa awie* anwo ka debie mɔɔ anwo ɛgua evinli, ɛbɔ nu nane mɔɔ anwo ɛnde la funli o, ayɛmoa mɔɔ anwo ɛnde la funli o, abɔdeɛ ekyi mɔɔ anwo ɛnde la funli o,+ saa ɔnze bɔbɔ a, ɔ nwo ɛgua evinli na ɔdi fɔlɛ. 3 Anzɛɛ saa awie ɛnze na ɔfa ɔ nwo ɔka debie mɔɔ anwo ɛnde+ na ɔmaa ɔ nwo gua evinli na nzinlii ɔnwu ye a, ɔdi nwolɛ fɔlɛ.
4 “‘Anzɛɛ saa awie* pele ndɛndɛ ka ndane kɛ ɔyɛ debie—saa debie kpalɛ anzɛɛ ɛtane a ɔyɛ o, kɛzi ɔde ye biala la—na ɔnze, noko nzinlii ɔnwu kɛ ɔpelele a ɔhanle ndane ne a, ɔdi nwolɛ fɔlɛ.*+
5 “‘Saa ɔdi ninyɛne ɛhye mɔ ko anwo fɔlɛ a, ɛnee ɔwɔ kɛ ɔka ɛtane mɔɔ yeyɛ la.+ 6 Eza ɔbava ɛtane mɔɔ yeyɛ la anwo fɔlɛlilɛ afɔlebɔdeɛ yearɛlɛ Gyihova,+ ɔbava boaneralɛ belɛ anzɛɛ abɔnkye ralɛ belɛ a yeabɔ ɛtane afɔle ne a. Na ɛsɔfo ne bali ye ɛtane ne anwo mgbɔdalɛ yeamaa ye.
7 “‘Noko saa ɔnrɛhola ɔnrɛva boane a, ɔwɔ kɛ ɔfa abubule nwiɔ anzɛɛ mɔlɔnoma mralɛ nwiɔ+ ɔbɛlɛ Gyihova kɛ ye ɛtane ne anwo fɔlɛlilɛ afɔlebɔdeɛ, ɔbava ko yeabɔ ɛtane afɔle na yeava ko yeabɔ ɛyelalɛ afɔle.+ 8 Ɔbava yearɛlɛ ɛsɔfo ne, na ɛsɔfo ne bava mɔɔ limoa la abɔ ɛtane afɔle na yeapɛ ɔ komenzia noko ɔnrɛde ɔnrɛvi zolɛ. 9 Ɔbakponde ɛtane afɔlebɔdeɛ ne mogya ne bie wɔ afɔlemokyea ne anwo, noko ɔbamaa mogya ne mɔɔ ɛha la ahwi agua afɔlemokyea ne abo.+ Ɔle ɛtane afɔlebɔlɛ. 10 Ɔbava ko ne mɔɔ ɛha la yeabɔ ɛyelalɛ afɔle kɛ mɔɔ bɛyɛ ye ala la;+ na ɛsɔfo ne bali ɛtane mɔɔ yeyɛ la anwo mgbɔdalɛ yeamaa ye na bɛava bɛahyɛ ye.+
11 “‘Na saa ɔnrɛhola ɔnrɛva abubule nwiɔ anzɛɛ mɔlɔnoma mralɛ nwiɔ a, ɔwɔ kɛ ɔfa esamo motoo yifa ngyɛnu bulu anu ko*+ ɔbabɔ ɛtane afɔle wɔ ye ɛtane ne anwo. Ɔnle kɛ ɔfa nwole ɔgua nu anzɛɛ ɔfa ɛyɛlɛvuanlɛ ɔboka nwo, ɔluakɛ ɔle ɛtane afɔlebɔlɛ. 12 Ɔbava yearɛlɛ ɛsɔfo ne, na ɛsɔfo ne bavula ɔ sa ko ayɛ ngakyelɛ afɔlebɔdeɛ* na yeakpu ye wɔ afɔlemokyea ne azo yeaboka afɔle mɔɔ bɛva senle bɛbɔ bɛmaa Gyihova la anwo. Ɔle ɛtane afɔlebɔlɛ. 13 Ɛsɔfo ne bali ɛtane ɛhye mɔ ko mɔɔ yeyɛ la anwo mgbɔdalɛ yeamaa ye na bɛava bɛahyɛ ye.+ Afɔlebɔdeɛ ne mɔɔ baha la bayɛ ɛsɔfo ne ɛdeɛ,+ kɛ mɔɔ ma afɔlebɔlɛ ne de la.’”+
14 Gyihova doale zo zele Mosisi kɛ: 15 “Saa awie* anli nɔhalɛ na ɔyɛ ɛtane ɔtia Gyihova ninyɛne nwuanzanwuanza ne mɔ+ wɔ mekɛ mɔɔ ɔ nye ɛnla nwolɛ la a, ɔwɔ kɛ ɔfa boane nyinli mɔɔ te kpɔkɛ la ɔbɛlɛ Gyihova kɛ fɔlɛlilɛ afɔlebɔdeɛ;+ ɔwɔ kɛ ye bolɛ wɔ dwɛtɛ fufule hyikɛle* nu nee kɛzi bɛsuzu hyikɛle wɔ ɛleka nwuanzanwuanza+ ne la* yɛ ko. 16 Na ɔbadua ɛtane mɔɔ yeyɛ yetia ɛleka nwuanzanwuanza ne la anwo kakɛ, na eza yeava ye bolɛ ne ngyɛnu nnu anu ko yeaboka nwo.+ Ɔbava yeamaa ɛsɔfo ne amaa ɛsɔfo ne ava boane nyinli ne mɔɔ ɔfa yeabɔ fɔlɛlilɛ afɔle ne la ali ɔ ti mgbɔdalɛ+ na bɛava bɛahyɛ ye.+
17 “Saa awie* yɛ ɛtane na ɔyɛ ninyɛne mɔɔ Gyihova ɛha kɛ bɛmmayɛ la bie na ɔnze bɔbɔ a, ɔdi fɔlɛ na ɔbali ye ɛtane ne anwo ɛzonle.+ 18 Ɔwɔ kɛ ɔfa boane nyinli mɔɔ te kpɔkɛ mɔɔ bɛli ye bolɛ la ɔbɛlɛ ɛsɔfo ne ɔmaa ɔfa ɔbɔ fɔlɛlilɛ afɔle.+ Akee ɛsɔfo ne bali ɛtane ne mɔɔ ɔ nye ɛnla nwo na ɔyɛle wɔ mekɛ mɔɔ ɔnze la anwo mgbɔdalɛ amaa ye na bɛava bɛahyɛ ye. 19 Ɔle fɔlɛlilɛ afɔlebɔlɛ. Ɔdi ɛtane mɔɔ yeyɛ yetia Gyihova la anwo fɔlɛ.”