Ditilɔnomi
23 “Ɔnle kɛ nrenyia biala mɔɔ bɛbɔ ɔ ndɔma anzɛɛ bɛpɛ ye mrenyianu bɛvi ɛkɛ la ba Gyihova menli* ne avinli.+
2 “Ɔnle kɛ adwɔmane ralɛ biala ba Gyihova menli ne avinli.+ Ɔnle kɛ ɔ bo zo amra awolɛndoazo mɔɔ tɔ zo bulu bɔbɔ la ba Gyihova menli ne avinli.
3 “Ɔnle kɛ Amɔnonli anzɛɛ Mowabenli biala ba Gyihova menli ne avinli.+ Ɔnle kɛ bɛ bo zo amra awolɛndoazo mɔɔ tɔ zo bulu bɔbɔ la ba Gyihova menli ne avinli ɛlɛ, 4 ɔluakɛ mɔɔ bɛvi Yigyibiti bɛlɛba la, bɛanva aleɛ nee nzule bɛambɛlɛ bɛ,+ yɛɛ bɛbɔle Biyɔ ara Beelam mɔɔ vi Pitɔ mɔɔ wɔ Mɛsɔpɔteemea la ɛkpa kɛ ɔwa bɛ amonle.*+ 5 Noko Gyihova bɛ Nyamenle ne andie Beelam.+ Emomu, Gyihova bɛ Nyamenle ne hakyile ye amowa ne maanle ɔyɛle nyilalɛ ɔmaanle bɛ,+ ɔluakɛ Gyihova bɛ Nyamenle ne hulole bɛ.+ 6 Ɔnle kɛ bɛboa bɛ bɛmaa bɛnyia anzodwolɛ anzɛɛ bɛmaa ɔwie bɛ boɛ ɛlɛ wɔ bɛ ngoane mekɛ kɔsɔɔti anu.+
7 “Ɔnle kɛ ɛkpɔ Yidɔmenli, ɔluakɛ ɔle ɛ diema.+
“Ɔnle kɛ ɛkpɔ Yigyibitinli, ɔluakɛ ɛnee ɛle ɛyɛvolɛ wɔ ye maanle nu.+ 8 Bɛ mra mɔɔ bɛbawo bɛ la awolɛndoazo mɔɔ tɔ zo nsa la bahola ahɔ Gyihova menli ne avinli.
9 “Saa ɛyɛ azokoɛleɛ kɛ ɛ nee wɔ agbɔvolɛ kaho a, ɔnle kɛ ɛyɛ debie mɔɔ le ɛtane la.*+ 10 Saa nrenyia da nɔɔzo na nzule vi ɔ nwo se gua na ɔ nwo gua evinli a,+ ɔwɔ kɛ ɔkɔ azokoɛleɛ ne anzi na ɔnle kɛ ɔsia ɔba azokoɛleɛ ɛkɛ. 11 Saa aleɛ ɛlɛdwo a, ɔwɔ kɛ ɔfa nzule ɔbia na sɛnzɛne ne kɔtɔ a, yeazia yeara azokoɛleɛ ɛkɛ.+ 12 Ɔwɔ kɛ ɛsiezie ɛleka* wɔ azokoɛleɛ ne anzi mɔɔ ɛkɔ bakazo wɔ ɛkɛ a. 13 Ɔwɔ kɛ ɛnyia amgbɔma* ɛboka wɔ ninyɛne ne anwo. Saa ɛkazɔho ɛ gyakɛ a, ɔwɔ kɛ ɛfa ɛwɔ na ɛwie a wɔaheda wɔ tiefi ne azo. 14 Ɔluakɛ Gyihova bɛ Nyamenle ne luolua bɛ azokoɛleɛ ɛkɛ ne+ kɛ ɔdie bɛ na yeava bɛ agbɔvolɛ yeawula bɛ sa nu, ɔti ɔwɔ kɛ bɛ azokoɛleɛ ɛkɛ yɛ nwuanzanwuanza,+ amaa yeannwu debie ɛtane biala wɔ bɛ avinli na yeandwe ɔ nwo yeanvi bɛ nwo.
15 “Saa akɛlɛ bie nriandi fi ɔ menle anwo ba bɛ ɛkɛ a, ɔnle kɛ bɛye ye bɛmaa ɔ menle ne. 16 Ɔbahola yeadɛnla bɛ avinli wɔ ɛleka biala mɔɔ ɔkulo la wɔ bɛ azuamgbole ne mɔ ko azo. Ɔnle kɛ bɛyɛ ye basabasa.+
17 “Ɔnle kɛ Yizilayɛnli raalɛ biala yɛ ɛzonlenlɛsua nu tuutuunli+ yɛɛ ɔnle kɛ Yizilayɛnli nrenyia biala yɛ ɛzonlenlɛsua nu tuutuunli.+ 18 Ɔnle kɛ ɛfa ezukoa mɔɔ raalɛ tuutuunli kɛlie anzɛɛ ezukoa* mɔɔ nrenyia tuutuunli* kɛlie la ɛba Gyihova wɔ Nyamenle ne sua nu kɛ ɛfa wɔadua ɛwɔkɛ ɔluakɛ ɔ mu nwiɔ le Gyihova wɔ Nyamenle ne kyibadeɛ.
19 “Ɔnle kɛ ɛmaa ɛ diema tua mpaefoa,+ kɛ ɔle ezukoa, aleɛ anzɛɛ debie biala mɔɔ ɛkola ɛdie nwolɛ mpaefoa la. 20 Ɛbahola wɔamaa ɛyɛvolɛ adua mpaefoa,+ noko ɔnle kɛ ɛmaa ɛ diema tua mpaefoa,+ amaa Gyihova wɔ Nyamenle ne ayila wɔ wɔ gyima biala mɔɔ ɛbayɛ ye wɔ azɛlɛ ne mɔɔ ɛbava wɔayɛ wɔ agyapadeɛ la azo.+
21 “Saa ɛbɔ Gyihova wɔ Nyamenle ne ɛwɔkɛ a,+ mmatwenlehwenle ɛ bo aze wɔ ye ɛdualɛ nwo.+ Ɔluakɛ ye biala anu, Gyihova wɔ Nyamenle ne balie avi wɔ ɛkɛ, tɛ ye zɔ a, ɔbayɛ ɛtane yeamaa wɔ.+ 22 Noko saa wɔambɔ ɛwɔkɛ a, ɛnrɛli ɛtane nwo fɔlɛ.+ 23 Ɔwɔ kɛ ɛdi edwɛkɛ mɔɔ vi ɛ nloa anu kɛvinde la azo,+ na ɛyɛ mɔɔ ɛvale ɛ nloa ɛbɔle nwolɛ ɛwɔkɛ kɛ ɛbavi wɔ ahonle nu wɔabɔ afɔle wɔamaa Gyihova wɔ Nyamenle ne la.+
24 “Saa ɛkɔ ɛ gɔnwo vanye egyinli nu a, ɛbahola wɔali ma ne bie wɔamaa ɛ ko ayi, noko ɔnle kɛ ɛfa bie ɛgua wɔ kɛndɛne nu.+
25 “Saa ɛkɔ ɛ gɔnwo ma ɛya nu a, ɛbahola wɔava ɛ sa wɔade ma mɔɔ ɛbolo la bie, noko ɔnle kɛ ɛfa ɛdedadeɛ ɛto ɛ gɔnwo ne ma ne anwo.+