Ditilɔnomi
21 “Saa bɛnwu kɛ bɛhu awie bɛdo kpɔkɛ bie anu wɔ azɛlɛ ne mɔɔ Gyihova bɛ Nyamenle ne ɛlɛfa amaa bɛ la azo na bɛannwu ahenle mɔɔ hunle ye la a, 2 ɔwɔ kɛ bɛ mgbanyima ne nee ndɛnebuavolɛma ne mɔ+ kɔsuzu adenle mɔɔ vi funli ne anwo ɛkɛ mɔɔ kɔ azuamgbole mɔɔ zuozua ɛkɛ ne azo la. 3 Na ɔwɔ kɛ mgbanyima mɔɔ wɔ suakpole mɔɔ bikye funli ne anwo la azo la fa ɛnlankɛ ralɛ belɛ mɔɔ bɛtɛfale bɛtɛyɛle gyima ɛlɛ yɛɛ bɛtɛfale gyɛnvayile bɛtɛtole ɔ kɔme zo ɛlɛ la, 4 na mgbanyima mɔɔ wɔ zɔhane suakpole ne azo la fa ɛnlankɛ ralɛ belɛ ne kɔ bɔnza mɔɔ nzule se nu na bɛtɛyɛle nuhua gyima anzɛɛ bɛtɛduale ma wɔ zolɛ ɛlɛ la anu, na bɛbu ɛnlankɛ ralɛ belɛ ne akɔme wɔ bɔnza ne anu.+
5 “Akee Livae ɛsɔfo ne mɔ bara ɛkɛ, ɔluakɛ Gyihova bɛ Nyamenle ne ɛkpa bɛ kɛ bɛzonle ye,+ na bɛyila menli wɔ Gyihova duma nu.+ Bɛbaha kɛzi ɔwɔ kɛ bɛdi edwɛkɛ biala mɔɔ fale basabasayɛlɛ nwo la.+ 6 Akee ɔwɔ kɛ mgbanyima kɔsɔɔti mɔɔ wɔ suakpole ne mɔɔ bikye funli ne anwo azo la wowo bɛ sa anwo+ gua ɛnlankɛ ralɛ belɛ ne mɔɔ bɛbu ɔ kɔme wɔ bɔnza ne anu la anwo zo, 7 na bɛka kɛ, ‘Tɛ yɛ sa a hanle mogya ɛhye guale a, yɛɛ yɛanva yɛ nye yɛannwu ahenle mɔɔ hanle guale la. 8 O Gyihova, mmabua wɔ menli Yizilayɛma mɔɔ wɔlie bɛ+ la fɔlɛ wɔ ɛhye anwo, yɛɛ mmamaa tenlenenli mogya nwo fɔlɛlilɛ tɛnla wɔ menli Yizilayɛma avinli.’+ Akee bɛnrɛva mogya nwo fɔlɛlilɛ ne bɛnrɛdo bɛ nwo zo. 9 Ɛhye bamaa bɛaye tenlenenli mogya nwo fɔlɛlilɛ ne bɛavi bɛ avinli na bɛayɛ mɔɔ le kpalɛ wɔ Gyihova anye zo la.
10 “Saa bɛ nee bɛ agbɔvolɛ kɔko na Gyihova bɛ Nyamenle ne di bɛ nwo zo konim maa bɛ na bɛkye bɛ agbɔvolɛ bɛkɔ akɛlɛzonlenlɛ nu,+ 11 na ɛnwu raalɛ bie mɔɔ anwo yɛ fɛ la wɔ nu na ɛ nye die ɔ nwo na ɛkulo kɛ ɛfa ye ɛyɛ ɛ ye a, 12 ɛbahola wɔava ye wɔahɔ wɔ sua nu. Akee ɔwɔ kɛ ɔkpa ɔ ti enrinli ne, ɔpepɛ ɔ sa nee ɔ gyakɛ ati, 13 na ɔye ye tɛladeɛ ne mɔɔ ɔvale ɔrale akɛlɛzonlenlɛ nu la, na ɔtɛnla wɔ sua nu. Ɔbazu ye papa nee ye mame too siane ko,+ na ɔwie a ɛbahola ɛ nee ye ala; ɛbayɛ ɔ hu na ɔdaye yeayɛ ɛ ye. 14 Noko saa ɛ nye ɛnlie ɔ nwo a, ɔwɔ kɛ ɛmaa ɔkɔ+ ɛleka biala mɔɔ ɔkulo la.* Noko ɔnle kɛ ɛtɔne ye ɛdie ezukoa anzɛɛ ɛyɛ ye basabasa, ɔluakɛ ɛtinlitinlinle ɔ nwo zo a ɛmaanle ɔgyale wɔ a.*
15 “Saa nrenyia bie gya mraalɛ nwiɔ na ɔkulo ko ɔtɛla ko* na bɛ mu nwiɔ bɛwo mralɛ mrenyia bɛmaa ye na ralɛ nrenyia kpanyinli ne le ɔ ye ne mɔɔ ɔngulo ye la ara a,+ 16 kenle mɔɔ ɔkyɛ ye agyapadeɛ yeamaa ɔ mra mrenyia ne mɔ la, ɔnrɛhola ɔnrɛva ɔ ye ne mɔɔ ɔkulo ye la ara nrenyia ne ɔnrɛyɛ ɔ ra kpanyinli na ɔnrɛgyakyi ɔ ye ne mɔɔ ɔngulo ye la ara ne mɔɔ le kpanyinli ne la. 17 Ɔwɔ kɛ ɔkakye kɛ ɔ ye ne mɔɔ ɔngulo ye la ara nrenyia ne a le kpanyinli a, na ɔkyɛ debie biala mɔɔ ɔlɛ la anu ɔfa nwiɔ ɔmaa ye, ɔluakɛ ɔdaye a ɔle ye awolɛ tumi mɔlebɛbo a. Awolɛ kpanyinli gyinlabelɛ ne le ye ɛdeɛ.+
18 “Saa nrenyia bie lɛ ɔ ra nrenyia mɔɔ anzo yɛ se na ɔte atua yɛɛ ɔndie ye papa anzɛɛ ye mame,+ yɛɛ bɛbɔ mɔdenle kɛ bɛtenrɛ ye noko ɔndie bɛ a,+ 19 ɔwɔ kɛ ye papa nee ye mame sɔ ye na bɛfa ye bɛkɔmaa mgbanyima ne mɔ wɔ ye sua ne azo anlenkɛ kpole ne anloa 20 na bɛka bɛkile mgbanyima mɔɔ wɔ ye sua ne azo la kɛ, ‘Yɛ ra nrenyia ɛhye anzo yɛ se yɛɛ ɔte atua, na ɔndie yɛ. Ɔle adidikpoku+ nee nzanli.’+ 21 Akee ɔwɔ kɛ mrenyia kɔsɔɔti mɔɔ wɔ ye sua ne azo la si ye awolɛ ku ye. Ɔwɔ kɛ bɛye debie mɔɔ ɛnle kpalɛ la bɛfi bɛ avinli, na Yizilayɛma kɔsɔɔti bade na bɛazulo.+
22 “Saa awie yɛ ɛtane mɔɔ ɔfɛta kɛ bɛku ye na bɛku ye+ na bɛkenda ye wɔ baka zo+ a, 23 ɔnle kɛ ye funli ne kenda baka ne azo nɔe ne amuala.+ Emomu, ɔwɔ kɛ bɛnea bɛsie ye kenle ko ne ala, ɔluakɛ awie mɔɔ bɛkɛhenda ye la, ɛnee munzule ɛha ye wɔ Nyamenle anyunlu,+ na ɔnle kɛ bɛgua azɛlɛ ne mɔɔ Gyihova bɛ Nyamenle ne ɛlɛfa amaa bɛ la anwo evinli.+