Mɔɔ Limoa Kɔmaa Kɔlentema
3 Ɔti mediema, meangola meandendɛ meangile bɛ kɛ menli mɔɔ Nyamenle sunsum ne kile bɛ adenle la,*+ emomu kɛ menli mɔɔ di bɛ atiakunluwɔzo nzi,* kɛ mbɔdɔma+ wɔ Kelaese anu. 2 Memaanle bɛ nyɛfonzule, meammaa bɛ aleɛ mɔɔ anu yɛ ɛlomboɛ la, ɔluakɛ ɛnee bɛ nwo ɛtɛmianle. Na kɛkala bɔbɔ, bɛ nwo ɛtɛmianle,+ 3 ɔluakɛ bɛtɛdi nwonane nu atiakunluwɔzo nzi.+ Kɛmɔ nungulehwenlɛ nee butulelilɛ wɔ bɛ avinli la ati, asoo bɛnli nwonane nu atiakunluwɔzo nzi+ na bɛmbɔ bɛ ɛbɛla kɛ ewiade ne anu amra ɔ? 4 Na saa bɛ nuhua bie ka kɛ, “Mele Pɔɔlo ɛdeɛ,” na bie noko ka kɛ, “Mele Apɔlɔso ɛdeɛ”+ a, ɛnee bɛmbɔ bɛ ɛbɛla kɛ ewiade ne anu amra ɔ?
5 Ɛnee akee Apɔlɔso a le nwane? Na Pɔɔlo noko a le nwane? Bɛle sonvolɛma+ mɔɔ bɛluale bɛ nwo zo bɛrayɛle diedima, kɛ mɔɔ Awulae vale maanle bɛ nuhua ko biala ala la. 6 Menluale,+ Apɔlɔso guguale zolɛ nzule,+ noko Nyamenle a maanle ɔnyinle a, 7 yemɔti tɛ mɔɔ dua anzɛɛ mɔɔ gugua zolɛ nzule la a fɛta nganvolɛ a, emomu Nyamenle mɔɔ maa ɔnyi la ɔ.+ 8 Mɔɔ dua nee mɔɔ gugua zolɛ nzule la yɛ gyima ko,* na awie ko biala banyia ye ahatualɛ kɛ mɔɔ ye gyima de la.+ 9 Ɔluakɛ Nyamenle le yɛ gɔnwo gyimayɛvo. Bɛle Nyamenle egyinli mɔɔ bɛlɛyɛ nuhua gyima, Nyamenle sua.+
10 Kɛ mɔɔ Nyamenle ɛlolɛ ne mɔɔ yeva yemaa me la de la, menwulale sua ne abo+ kɛ suasivolɛ kpalɛ,* noko awie a ɛlɛtoa zo a. Na ɔwɔ kɛ awie biala nea kɛzi ɔlɛtoa zolɛ la boɛ. 11 Ɔluakɛ awie biala ɛnrɛhola ɛnrɛwula sua ne abo fofolɛ ɛnrɛdɛla mɔɔ bɛwula ye dɛba mɔɔ yemɔ a le Gyisɛse Kelaese la.+ 12 Na saa awie fa nvutuke, dwɛtɛ fufule, awolɛ mɔɔ sonle bolɛ, taboa, fiene, anzɛɛ manra toa adiabo ne azo 13 na kenle ne dwu a, kɛzi awie biala gyima de la bala ali, ɔluakɛ senle ne bamaa yeala ali,+ na senle ne a bamaa bɛanwu gyima mɔɔ awie ko biala yɛle la a. 14 Saa awie gyima mɔɔ ɔyɛle ɔziele zo la gyinla a, ɔbanyia ahatualɛ; 15 saa awie gyima yela a, ɔbaminli debie kpole, noko bɛbalie ɔdaye mumua ne ngoane; noko ɔbayɛ kɛ sonla mɔɔ bɛlie ye bɛvi senle nu la.
16 Bɛnze kɛ bɛdabɛ mumua ne bɛle Nyamenle ɛzonlenlɛsua+ na Nyamenle sunsum ne de bɛ nu ɔ?+ 17 Saa awie sɛkye Nyamenle ɛzonlenlɛsua ne a, Nyamenle bazɛkye ye; ɔluakɛ Nyamenle ɛzonlenlɛsua ne le nwuanzanwuanza, na zɔhane ɛzonlenlɛsua ne a le bɛdabɛ.+
18 Awie biala mmabɛlɛbɛla ɔ nwo: Saa awie wɔ bɛ avinli na ɔdwenle kɛ ɔze nrɛlɛbɛ wɔ ewiade ɛhye* anu a, ɔyɛ ɔ nwo koasea amaa yeayɛ nrɛlɛbɛvolɛ. 19 Ɔluakɛ ewiade ɛhye anu nrɛlɛbɛ le ngoaseasɛm maa Nyamenle, na bɛhɛlɛ kɛ: “Ɔkye nrɛlɛbɛvolɛma wɔ bɛdabɛ mumua ne bɛ agyibadolɛ nu.”+ 20 Bieko: “Gyihova* ze kɛ nrɛlɛbɛvolɛma nzuzulɛ le mgbane.”+ 21 Ɔti awie biala mmafa mɔɔ menli yɛ la tu ɔ nwo; ɔluakɛ ninyɛne kɔsɔɔti le bɛ ɛdeɛ, 22 Pɔɔlo o, Apɔlɔso o, Sifase* o,+ ewiade ye o, ngoane o, ewule o, ninyɛne mɔɔ wɔ ɛkɛ ne ɛnɛ la o, ninyɛne mɔɔ bara kenle bie la o, ninyɛne kɔsɔɔti le bɛ ɛdeɛ; 23 bɛdabɛ noko bɛle Kelaese ɛdeɛ;+ Kelaese noko le Nyamenle ɛdeɛ.