Gyɛnɛsese

35 Ɛhye anzi Nyamenle zele Gyekɔbo kɛ: “Dwazo kɔ Bɛtɛle+ na kɔdɛnla ɛkɛ, na si afɔlemokyea wɔ ɛkɛ ne maa nɔhalɛ Nyamenle ne mɔɔ yele ɔ nwo hilele wɔ wɔ mekɛ mɔɔ ɛnee ɛlɛnriandi ɛ diema Yisɔ la.”+

2 Akee Gyekɔbo zele ye sua nu amra nee menli mɔɔ ɔ nee bɛ lua la amuala kɛ: “Bɛye adalɛ nyamenle ne mɔ bɛvi bɛ avinli+ na bɛde bɛ nwo na bɛhakyi bɛ adɛladeɛ ne mɔ, 3 na bɛmaa yɛdwazo yɛhɔ Bɛtɛle. Na mebazi afɔlemokyea wɔ ɛkɛ ne meamaa nɔhalɛ Nyamenle ne mɔɔ diele me wɔ me anwongyelelɛ mekɛ nu, na ɔ nee me ɛlua wɔ ɛleka biala mɔɔ mekɛhɔ la.”*+ 4 Ɔti bɛvale adalɛ nyamenle ne mɔ mɔɔ bɛlɛ la kɔsɔɔti nee bɛ asomadeɛ mɔɔ wɔ bɛ nzo nu la bɛmaanle Gyekɔbo, na Gyekɔbo vunle bɛ wulale* baka kpole ne mɔɔ bikye Hyikɛm la abo.

5 Mɔɔ bɛlɛkɔ la, Nyamenle anwo ɛzulolɛ dɔle azua mɔɔ ɛbɛnga bɛ ɛyia la anwo zo, ɔti bɛanli Gyekɔbo amra mrenyia ne mɔ anzi bɛanvoa bɛ. 6 Akee Gyekɔbo nee menli mɔɔ ɔ nee bɛ lua la kɔsɔɔti hɔdwule Lɛɛze,+ mɔɔ le Bɛtɛle, mɔɔ wɔ Keena azɛlɛ zo la. 7 Ɔzile afɔlemokyea wɔ ɛkɛ na ɔvɛlɛle ɛkɛ ne Ɛle-bɛtɛle,* ɔluakɛ ɛkɛ ne a nɔhalɛ Nyamenle ne yele ɔ nwo hilele ye wɔ mekɛ mɔɔ ɔlɛnriandi ɔ diema nrenyia ne la a.+ 8 Nzinlii Dɛbola+ mɔɔ nea Relebɛka la wule, na bɛziele ye wɔ Bɛtɛle aze nehane wɔ oku baka bie abo. Ɔti ɔvɛlɛle ɛkɛ ne Alɔn-bakate.*

9 Nyamenle yele ɔ nwo hilele Gyekɔbo bieko wɔ mekɛ mɔɔ ɔvi Padan-elam ɔlɛba la na ɔyilale ye. 10 Nyamenle zele ye kɛ: “Bɛfɛlɛ wɔ Gyekɔbo.+ Bɛnrɛvɛlɛ wɔ Gyekɔbo bieko, emomu bɛbavɛlɛ wɔ Yizilayɛ.” Na ɔbɔle ɔ bo ɔvɛlɛle ye Yizilayɛ.+ 11 Eza Nyamenle hanle hilele ye kɛ: “Medame a mele Nyamenle Tumivolɛ Bedevinli ne a.+ Wo maa ɛ nwo ɛzo. Maanle maanle dɔɔnwo bavi wɔ nu ara+ yɛɛ arelemgbunli bavi wɔ nu ara.*+ 12 Na mebava azɛlɛ ne mɔɔ menvale memaanle Ebileham nee Ayezeke la meamaa ɛdawɔ nee ɛ bo zo amra mɔɔ bali ɛ nzi ara la.”+ 13 Akee Nyamenle gyakyile ye wɔ ɛleka mɔɔ ɔ nee ye dendɛle la na ɔhɔle.

14 Yemɔti Gyekɔbo kpɔnlanle bolɛ wɔ ɛleka mɔɔ ɔ nee ye dendɛle la kɛ ngakyedeɛ, na ɔwolale nza ɔguale zolɛ ɔbɔle afɔle yɛɛ ɔwolale nwole ɔguale zolɛ.+ 15 Na Gyekɔbo hɔle zo vɛlɛle ɛleka mɔɔ Nyamenle nee ye dendɛle la Bɛtɛle.+

16 Akee bɛdule bɛ bo bɛvile Bɛtɛle. Noko mɔɔ ɛnee bɛ nee Ɛfelate avinli tɛwa la, Relahyɛle ako hanle ye na ye awolɛ ne anu yɛle se kpalɛ. 17 Noko mɔɔ ye awolɛ ne anu yɛle se kpalɛ la, ahenle mɔɔ ɛlɛdie ye awolɛ la hanle kɛ: “Mmasulo, ɔluakɛ ɛ sa baha ralɛ nrenyia ɛhye noko.”+ 18 Mekɛ mɔɔ ye ngoane* ɛlɛfi ɔ sa la (ɔluakɛ ɛnee ɔlɛwu), ɔdonle ye Bɛn-onae* noko ye papa vɛlɛle ye Bɛngyaman.*+ 19 Ɔti Relahyɛle wule na bɛziele ye wɔ Ɛfelate, mɔɔ le Bɛtelɛhɛm la adenle nu.+ 20 Gyekɔbo vale bolɛ kpɔnlanle ye nla ne azo; badwu ɛnɛ bolɛ ne tɛkpɔnla Relahyɛle nla ne azo.

21 Ɛhye anzi, Yizilayɛ vile ɛkɛ na ɔhɔyɛle ye ɛdanlɛsua wɔ Yidaa tawa ne anzi lɔ. 22 Mekɛ bie mɔɔ ɛnee Yizilayɛ de zɔhane azɛlɛ ne azo la, Wulubɛn nee ye papa nwewe* Belehaa lale, na Yizilayɛ dele edwɛkɛ ne.+

Ɔti ɛnee Gyekɔbo amra mrenyia ne mɔ le 12. 23 Liya amra mrenyia ne mɔ a le Wulubɛn,+ Gyekɔbo ara kpanyinli ne, akee Semɛyɔn, Livae, Dwuda, Yesakaa yɛɛ Zɛbulɛn. 24 Relahyɛle amra mrenyia a le Dwosefi nee Bɛngyaman. 25 Relahyɛle sonvolɛ Belehaa amra mrenyia a le Dan nee Nafetalae. 26 Yɛɛ Liya sonvolɛ Zelepa amra mrenyia a le Gaade nee Ahya. Ɛhye mɔ a le Gyekɔbo amra mrenyia mɔɔ bɛwole bɛ bɛmaanle ye wɔ Padan-elam la.

27 Akee Gyekɔbo radwule ɛleka mɔɔ ye papa Ayezeke de wɔ Mameli,+ Keleate-aaba, mɔɔ le Hibulɔn, ɛleka mɔɔ Ebileham nee Ayezeke dɛnlanle kɛ nyɛvolɛ la.+ 28 Ayezeke dɛnlanle aze lile ɛvolɛ 180.+ 29 Akee Ayezeke gule ye ɛnwomenle mɔɔ li awieleɛ la na ɔwule, na bɛziele ye kɛ ye menli ne la,* ɔyɛle ɛrelera na ɔ kunlu dwole ɔ nwo;* na ɔ mra mrenyia Yisɔ nee Gyekɔbo ziele ye.+