Mɔɔ Limoa Kɔmaa Kɔlentema
6 Saa bɛ nuhua bie nee ɔ gɔnwo nyia edwɛkɛ a,+ asoo ɔsi ɔ kɛnra ɔfa ye ɔkɔ kɔɔto ɔkɔmaa menli mɔɔ bɛnle diedima la, na ɔnva ye ɔngɔ nwuanzanwuanzama ne anyunlu ɔ? 2 Anzɛɛ bɛnze kɛ nwuanzanwuanzama ne a babua ewiade ne ndɛne a?+ Na saa bɛmɛ a bɛbabua ewiade ne ndɛne a, ɛnee bɛngola bɛnli edwɛkɛ ngyikyi ɔ? 3 Bɛnze kɛ yɛbabua anwumabɔvolɛma ndɛne ɔ?+ Ɛnee kɛmɔti a yɛngola yɛnli ɛbɛlabɔlɛ ye anu ninyɛne nwo edwɛkɛ ɛ? 4 Na saa bɛlɛ ɛbɛlabɔlɛ ɛhye anu edwɛkɛ mɔɔ ɔwɔ kɛ bɛdi a,+ asoo menli mɔɔ asafo ne ɛmbu bɛ bie la a bɛmaa bɛali a? 5 Melɛka ɛhye meamaa bɛabɔ anyiemgba. Asoo nrɛlɛbɛvolɛ ko bɔbɔ ɛnle bɛ nu mɔɔ kola siezie ɔ mediema avinli a? 6 Mɔɔ ɔti adiema fa adiema kɔ kɔɔto wɔ menli mɔɔ bɛnle diedima la anyunlu a!
7 Nɔhalɛ nu, ɔle anyiemgba kɛ bɛ nee bɛ nwo bɛ nwo kɛhɔ kɔɔto. Kɛmɔti a bɛngulo kɛ awie kɛvo bɛ ɛ?+ Kɛmɔti a bɛngulo kɛ awie kɛsisi bɛ ɛ? 8 Noko bɛfo awie mɔ yɛɛ bɛsisi bɛ, bɔbɔ bɛ mediema!
9 Anzɛɛ bɛnze kɛ amumuyɛma ɛnrɛnyia Nyamenle Belemgbunlililɛ ne ɔ?+ Bɛmmamaa bɛbɛlɛbɛla bɛ.* Menli mɔɔ bɔ adwɔmane,*+ awozonle ɛzonlenlɛma,+ agyalɛzɛkyelɛma,+ mrenyia mɔɔ maa mrenyia fa bɛ,+ mrenyia mɔɔ fa bɛ gɔnwo mɔ mrenyia,+ 10 nwule, anyeboloma,+ nzabovoma,+ menli mɔɔ bɔ aholoba* yɛɛ nzisima ɛnrɛnyia Nyamenle Belemgbunlililɛ ne.+ 11 Kɛ ɛnee bɛ nuhua bie mɔ de la ɛne. Noko bɛbia bɛ kɛnlɛma;+ bɛde bɛ nwo;+ bɛbu bɛ tenlenema+ wɔ Awulae Gyisɛse Kelaese duma ne nee yɛ Nyamenle ne sunsum ne anu.
12 Melɛ adenle meyɛ debie biala, noko tɛ debie biala a nvasoɛ wɔ zo a.+ Melɛ adenle meyɛ debie biala, noko menrɛmaa debie biala ɛnrɛva me ɛnrɛyɛ ye akɛlɛ. 13 Aleɛ wɔ ɛkɛ maa ɛkolɛ yɛɛ ɛkolɛ wɔ ɛkɛ maa aleɛ, noko Nyamenle bazɛkye bɛ mu nwiɔ.+ Sonlabaka ne ɛnle ɛkɛ ɛmmaa adwɔmane ɛbɛla,* emomu ɔwɔ ɛkɛ ɔmaa Awulae,+ yɛɛ Awulae noko wɔ ɛkɛ ne maa sonlabaka ne. 14 Noko Nyamenle dwazole Awulae,+ na ɔlua ye tumi ne+ azo ɔbadwazo yɛdayɛ noko yeavi ewule nu.+
15 Asoo bɛnze kɛ bɛ sonlabaka ne mɔ le Kelaese nvɛyeba ne mɔ bie ɔ?+ Bɛnea a, asoo ɔwɔ kɛ mefa Kelaese nvɛyeba ne mɔ mekɔbeta tuutuunli nwo ɔ? Kyɛkyɛ! 16 Bɛnze kɛ awie biala mɔɔ ɛva ɔ nwo ɛbeta tuutuunli nwo la nee ye ɛyɛ nwonane ko ɔ? Ɔluakɛ ɔka kɛ, “bɛ mu nwiɔ” bɛbayɛ “nwonane ko.”+ 17 Noko awie biala mɔɔ ɛva ɔ nwo ɛbeta Awulae anwo la nee ye ɛyɛ ko wɔ sunsum nu.+ 18 Bɛnriandi adwɔmane ɛbɛla!*+ Ɛtane gyɛne biala mɔɔ sonla kɛyɛ la ɛnga ye sonlabaka ne, noko awie biala mɔɔ kɛbɔ adwɔmane ɛbɛla la yɛ ɛtane tia ɔdaye ye sonlabaka ne.+ 19 Asoo bɛnze kɛ bɛ sonlabaka ne le sunsum nwuanzanwuanza ne mɔɔ wɔ bɛ nu, mɔɔ bɛnyianle ye bɛvile Nyamenle ɛkɛ la ɛzonlenlɛsua ɔ?+ Bieko, bɛdabɛ bɛnlɛ bɛ nwo,+ 20 ɔluakɛ bɛdɔle bɛ bolɛ ɛsesebɛ.+ Yemɔti bɛva bɛ sonlabaka ne+ bɛwula Nyamenle anyunlunyia.+