Mɔɔ Tɔ Zo Nwiɔ Kɔmaa Kɔlentema

8 Mediema, akee yɛkpondɛ kɛ bɛnwu ɛlolɛ kpole ne mɔɔ Nyamenle ɛva ɛlo Masidonea asafo ne mɔ la.+ 2 Bɛhɔle sɔnea kpole nu wɔ anwongyelelɛ nu la, bɛ anyelielɛ molozo nee bɛ ehyia kpole ne maanle bɛ anwonyia mɔɔ vi atiakunlukɛnlɛma nu la yɛle kpole.* 3 Ɔluakɛ bɛyɛle mɔɔ bɛkɛhola la,+ ɛhɛe, medi daselɛ kɛ, bɛyɛle bɛmaanle ɔbole zolɛ,+ 4 bɛzɛlɛle yɛ ɛsesebɛ kɛ yɛmaa bɛ adenle yɛmaa bɛye ndoboa, na bɛnyia kyɛfoa wɔ moalɛ ɛzonlenlɛ gyima ne mɔɔ bɛlɛfa bɛaboa nwuanzanwuanzama ne la anu.+ 5 Na bɛyɛle mɔɔ ɛnee yɛ nye ɛnla la, ɔluakɛ bɛluale Nyamenle ɛhulolɛdeɛ zo bɛlimoale bɛvale bɛ nwo bɛmaanle Awulae nee yɛdayɛ noko. 6 Yemɔti yɛzɛlɛle Taetɛse+ kɛ, kɛ mɔɔ ɔbɔle gyima ɛhye abo wɔ bɛ avinli la, ɔnlea ɔmaa bɛye ndoboa ɛhye mɔɔ ɔvi bɛ ɛhulolɛ nu la bɛwie. 7 Noko akee, kɛ mɔɔ bɛbɔ mɔdenle wɔ debie biala anu, diedi nee ɛdendɛlɛ nee ndelebɛbo nee mɔdenlebɔlɛ kɔsɔɔti nee ɛlɔlɛ mɔɔ yɛlɛ yɛmaa bɛ anu la, bɛye ndoboa ɛhye bɛmaa ɔbo zo.+

8 Menga ɛhye kɛ ɔle mɛla, emomu mekulo kɛ bɛnwu mɔdenle mɔɔ awie mɔ ɛbɔ la na menwu kɛzi bɛ ɛlɔlɛ ne le nɔhalɛ la. 9 Ɔluakɛ bɛze yɛ Awulae Gyisɛse Kelaese ɛlolɛ kpole ne, kɛ ɛnee ɔle sukoavolɛ ɛdeɛ, noko bɛdabɛ ti ɔrayɛle ehyianli+ amaa bɛalua ye ehyia ne azo bɛayɛ sukoavolɛma.

10 Adwenle mɔɔ melɛ ye wɔ ɛhye anwo la a le kɛ:+ Ɛhye le kpalɛ maa bɛ, wɔ ɛvolɛ ne mɔɔ ɛraze ɛhɔ la anu, bɛbɔle ɔ bo kɛ bɛyɛ na eza bɛnyianle ɛhulolɛ kɛ bɛkɛyɛ. 11 Ɔti kɛkala, bɛwie mɔɔ bɛbɔle ɔ bo kɛ bɛyɛ la noko, amaa bɛava ɛhulolɛ ko ne ala mɔɔ bɛvale bɛbɔle ndoboa ne ɛyelɛ bo la bɛawie. 12 Na saa ɛhulolɛ ne wɔ ɛkɛ a, mɔɔ awie lɛ la a sɔ ɛnyelɛ a,+ na tɛ mɔɔ ɔnlɛ la ɔ. 13 Na mengulo kɛ ɔyɛ bɛtɛɛ ɔmaa bie mɔ na ɔyɛ se ɔmaa bɛmɛ; 14 emomu amaa debie biala ayɛ sɛsɛ la, ɛnɛ mɔɔ bɛlɛ ye dɔɔnwo la, bɛboa bɛdabɛ mɔɔ bɛnlɛ bie la, amaa mekɛ mɔɔ bɛdabɛ noko bɛkɛhyia la menli mɔɔ lɛ bie dɔɔnwo la aboa bɛ. Ɔba ye zɛhae a ɛnee moalɛ ne ɛyɛ sɛsɛ. 15 Kɛ mɔɔ bɛhɛlɛ ala la: “Sonla mɔɔ lɛ dɔɔnwo la annyia ye molozo, yɛɛ sonla mɔɔ lɛ ekyi la angyia.”+

16 Akee yɛyɛ Nyamenle mo kɛ yeva ɛlɔlɛ kpole ne mɔɔ yɛlɛ yɛmaa bɛ la bie yewula Taetɛse ahonle nu la,+ 17 ɔluakɛ yedie yɛ anwosesebɛmaanlɛ ne bɔkɔɔ, na kɛmɔ ɔkulo kɛ ɔyɛ mɔɔ yɛhanle la ati, yevi ye ɛhulolɛ nu ɔlɛba bɛ nwo lɔ. 18 Na yɛlɛsoa ye nee adiema ne mɔɔ edwɛkpa ne nolobɔlɛ ti ye ayɛlɛyelɛ ɛdɛlɛ asafo ne mɔ amuala anu la. 19 Tɛ yemɔ angome, eza asafo ne mɔ ɛye ye kɛ ɔ nee yɛ ɛhɔ na yɛva ahyɛlɛdeɛ ɛhye yɛhɔmaa, yɛva yɛwula Awulae anyunlunyia na yɛhile kɛ yɛkulo kɛ yɛboa. 20 Noko wɔ ndoboa ɛhye mɔɔ yɛlɛfa yɛaboa la anu, yɛngulo kɛ awie kɛnyia yɛ nwo edwɛkɛ ɛtane kɛha.+ 21 Ɔluakɛ ‘yɛfa nɔhalɛlilɛ yɛyɛ debie biala wɔ Gyihova* nee menli nyunlu.’+

22 Bieko, eza yɛlɛsoa yɛ diema ne mɔɔ yɛzɔ ye yɛnlea fane dɔɔnwo na yɛnwu kɛ ɔbɔ mɔdenle wɔ ninyɛne dɔɔnwo anu, na kɛkala ɔlɛ bɛ nu anwodozo kpole la ati ye mɔdenlebɔlɛ ɛyɛ kpole la, yearaboka bɛ nwo. 23 Na saa bɛlɛ Taetɛse anwo edwɛkɛ bie a, ɔle me gɔnwo* mɔɔ me nee ye yɛ gyima boa bɛ a; anzɛɛ saa bɛlɛ yɛ mediema ne mɔ anwo edwɛkɛ bie a, bɛle asafo ne mɔ ɛzoanvolɛma nee Kelaese anyunlunyia. 24 Yemɔti bɛla bɛ ɛlɔlɛ ne ali bɛhile bɛ,+ na bɛmaa asafo ne mɔ ɛnwu deɛmɔti yɛvale bɛ yɛdule yɛ nwo la.