Hozia
4 O Yizilayɛma, bɛdie Gyihova edwɛkɛ ne,
Ɔluakɛ Gyihova lɛ edwɛkɛ tia azɛlɛ ne azo amra,+
Ɔboalekɛ nɔhalɛlilɛ anzɛɛ ɛlɔlɛ kpundii anzɛɛ Nyamenle anwo nrɛlɛbɛ ɛnle azɛlɛ ne azo.+
2 Ndane adalɛ nee adalɛbɔlɛ+ yɛɛ kodiawuyɛlɛ,+
Debiewualɛ nee agyalɛzɛkyelɛ+ ɛbu,
Na bɛka mogya ko bɛgua a ɔngyɛ ɛnee bɛha mogya bieko bɛgua.+
3 Ɛhye ati a azɛlɛ ne bali nyane la+
Na debie biala mɔɔ wɔ zo la bazɛkye;
Ɛbɔ nu nane nee anwomanyunlu nloma,
Nyevile nu fɛlɛ bɔbɔ bawu.
4 “Noko akee mmamaa awie biala dwazo tia ɔ gɔnwo anzɛɛ twi ɔ nyunlu,+
Ɔluakɛ wɔ menli ne le kɛ bɛdabɛ mɔɔ bɛdwazo bɛtia ɛsɔfo la.+
5 Yemɔti ɛbadɔ aze wɔ alehyenlɛ nu,
Na ngapezonli ne nee wɔ badɔ aze kɛ asɛɛ bɛlua nɔɔzo la.
Na mebazɛkye wɔ mame.
6 Bɛbazɛkye me menli ne ɔluakɛ bɛnze nrɛlɛbɛ biala.
Kɛmɔ wɔkpo nrɛlɛbɛ la ati,+
Medame noko mebakpo wɔ na ɛnrɛyɛ me ɛsɔfo;
Yɛɛ kɛmɔ ɛ rɛle ɛvi wɔ Nyamenle ne mɛla* la ati,+
Medame noko me rɛle bavi ɛ mra ne mɔ.
7 Mɔɔ bɛ nwo ɛlɛso la, ɛnee bɛlɛyɛ ɛtane dɔɔnwo bɛatia me.+
Mebamaa bɛ anyunlunyia ne ahakyi anyiemgba.*
8 Bɛdidi me menli ne ɛtane nwo,
Na bɛnyia bɛ ɛtane nwo atiakunluwɔzo.*
9 Mɔɔ bado menli ne la bie ala a bado ɛsɔfo ne a;
Mebamaa bɛabu bɛ ndenle ne mɔ anwo mgbonda,
Na meahwe bɛ nzo wɔ bɛ nyɛleɛ ne anwo.+
10 Bɛbali debie noko bɛ ko ɛnrɛyi.+
12 Me menli ne biza edwɛkɛ wɔ bɛ mbaka ananze ne mɔ ɛkɛ,
Bɛyɛ mɔɔ bɛ kpɔma* ne ka kile bɛ la;
Ɔluakɛ tuutuu ɛbɔlɛ* sunsum ne maa bɛminli,
Na ɔlua bɛ tuutuu ɛbɔlɛ* ne azo, bɛkpo kɛ bɛkɛbɛlɛ bɛ nwo aze bɛkɛmaa bɛ Nyamenle ne.
13 Bɛbɔ afɔle wɔ awoka ne mɔ azo,+
Yɛɛ bɛkpu afɔlebɔdeɛ wɔ awoka ngyikyi zo,
Oku mbaka nee setɔlɛse* mbaka yɛɛ baka kpole biala abo,+
Ɔluakɛ bɛ alubo ne le kpalɛ.
14 Menrɛmaa ɛ mra mraalɛ ne mɔ ɛnrɛbu bɛ tuutuu ɛbɔlɛ* ne anwo mgbonda,
Yɛɛ menrɛmaa wɔ ase mɔ ɛnrɛbu bɛ agyalɛzɛkyelɛ ne anwo mgbonda.
Ɔluakɛ mrenyia ne mɔ tu toa tuutuuma
Na bɛ nee ɛzonlenlɛsua nu tuutuuma bɔ afɔle;
Bɛbazɛkye menli ɛhye mɔ mɔɔ bɛnlɛ ndelebɛbo la.+
16 Ɔluakɛ Yizilayɛ anzo ɛyɛ se kɛ ɛnlankɛ mɔɔ anzo yɛ se la.+
Asoo kɛkala Gyihova banlea bɛ kɛ boaneralɛ wɔ adidileka mɔɔ ɛkɛ ne tɛlɛ la ɔ?*
17 Yifelaem ɛva ɔ nwo ɛbɔnle ananze.+
Bɛgyakyi ye!
Yɛɛ ye tumivolɛma* kulo anyiemgba kpalɛ.+
19 Anwoma ne bava ɔ ndɛba apia ye ahɔ,
Na bɛ nyunlu bagua aze wɔ bɛ afɔlebɔlɛ ne mɔ anwo.”