Lɛvitikɔso

19 Gyihova zele Mosisi bieko kɛ: 2 “Ka kile Yizilayɛma amuala kɛ, ‘Ɔwɔ kɛ bɛyɛ nwuanzanwuanza, ɔluakɛ medame Gyihova bɛ Nyamenle ne, mele nwuanzanwuanza.+

3 “‘Ɔwɔ kɛ bɛ nuhua ko biala bu* ye mame nee ye papa,+ yɛɛ ɔwɔ kɛ bɛdi me ɛnwomenlelielɛ kenle ne.+ Medame a mele Gyihova bɛ Nyamenle ne a. 4 Bɛmmatoa nyamenle mɔɔ nvasoɛ ɛnle bɛ nwo zo la+ anzɛɛ bɛmmagua mbulalɛ ananze bɛmaa bɛ nwo.+ Medame a mele Gyihova bɛ Nyamenle ne a.

5 “‘Saa bɛbɔ anzodwolɛ afɔle bɛamaa Gyihova a,+ ɔwɔ kɛ bɛbɔ ye wɔ adenle mɔɔ ɔbalie bɛ yeado nu la azo.+ 6 Ɔwɔ kɛ bɛdi ye wɔ kenle mɔɔ bɛbabɔ afɔle ne la nee ye alehyenlɛ nu, noko saa bie ka na ɔdi kenle nsa a, ɔwɔ kɛ bɛfa senle bɛyela ye.+ 7 Saa ɔdi kenle nsa na bɛdi a, ɔle kyibadeɛ mɔɔ ɔnrɛlie ɔnrɛdo nu a. 8 Ahenle mɔɔ bali la bali ye ɛtane ne anwo ɛzonle, ɔluakɛ yegua debie nwuanzanwuanza mɔɔ le Gyihova ɛdeɛ la anwo evinli, na ɔwɔ kɛ bɛye* zɔhane sonla* ne bɛfi ye menli ne avinli.

9 “‘Saa bɛlɛte bɛ azɛlɛ ne azo ma a, ɔnle kɛ bɛte mɔɔ wɔ bɛ ɛya ne anloa la amuala yɛɛ ɔnle kɛ bɛsesa bɛ ma mɔɔ bɛkɛde la abo zo ne.*+ 10 Eza bɛmmatete bɛ vanye egyinli nu ma mɔɔ kɛha la yɛɛ bɛmmasesa vanye ma mɔɔ kɛtete kɛgua aze la. Bɛgyakyi bɛmaa ehyiavolɛma*+ nee nyɛvolɛ. Medame a mele Gyihova bɛ Nyamenle ne a.

11 “‘Bɛmmawua,+ bɛmmabɛlɛbɛla awie,+ yɛɛ bɛmmabɔ adalɛ bɛkile bɛ nwo. 12 Bɛmmafa me duma bɛka adalɛ ndane+ na bɛgua bɛ Nyamenle ne duma ne anwo evinli. Medame a mele Gyihova a. 13 Mmasisi ɛ gɔnwo,+ yɛɛ mmawua.*+ Mmafa ɛkpanli ahatualɛ ɛsie too aleɛ kye zolɛ.+

14 “‘Mmaka munzule edwɛkɛ* ɛtia anzondiliravolɛ yɛɛ mmafa debie ɛto anyenzinliravolɛ adenle nu,+ na ɔwɔ kɛ ɛsulo wɔ Nyamenle ne.+ Medame a mele Gyihova a.

15 “‘Bɛmmadi mɔguazo wɔ bɛ ndɛnebualɛ nu. Ɔnle kɛ bɛnea ehyianli nyunlu bɛdi ye edwɛkɛ anzɛɛ bɛdi bɛboa sukoavolɛ.+ Ɔwɔ kɛ bɛbua bɛ gɔnwo mɔ ndɛne pɛlepɛle nu.

16 “‘Ɔnle kɛ ɛduolua wɔ menli ne akɔme nu ɛsɛkye awie mɔ duma.+ Ɔnle kɛ ɛbɔ mɔdenle kɛ ɛmaa ɛ gɔnwo ngoane* avi ɔ sa.*+ Medame a mele Gyihova a.

17 “‘Ɔnle kɛ ɛkpɔ ɛ diema wɔ wɔ ahonle nu.+ Ɔwɔ kɛ ɛtwi ɛ gɔnwo anyunlu,+ amaa ɛdawɔ noko wɔanyɛ ɛtane kɛ ɔdaye la.

18 “‘Mmadi nzenralɛ+ anzɛɛ mmafa wɔ menli ne amra ne mɔ anwo edwɛkɛ ɛsie wɔ nu, na ɔwɔ kɛ ɛkulo ɛ gɔnwo kɛ ɛ nwo.+ Medame a mele Gyihova a.

19 “‘Ɔwɔ kɛ bɛdi me mɛla ne mɔ azo: Ɔnle kɛ bɛmaa nyɛmoa gyɛne nwiɔ fola bɛ nwo. Ɔnle kɛ bɛdua ma ngakyile nwiɔ wɔ bɛ ɛya nu,+ yɛɛ ɔnle kɛ bɛwula tɛladeɛ mɔɔ bɛva nyɛma ngakyile nwiɔ bɛbɔ nu bɛnwo la.+

20 “‘Saa nrenyia nee raalɛ da, na ɔle sonvolɛ mɔɔ bɛva ye bɛbɔ nrenyia fofolɛ ɛwɔkɛ noko bɛtɛdiele ye anzɛɛ ɔtɛnyianle ye fanwodi a, ɔwɔ kɛ bɛtwe bɛ nzo. Noko ɔnle kɛ bɛku bɛ, ɔluakɛ ɔtɛnyianle fanwodi. 21 Ɔwɔ kɛ nrenyia ne fa boane nyinli bɛlɛ Gyihova wɔ nyianu ɛdanlɛsua ne anuhɔlɛ ne kɛ ye afɔlebɔdeɛ na ɔmaa bɛfa bɛbɔ fɔlɛlilɛ afɔle.+ 22 Ɛsɔfo ne bava boane nyinli ne abɔ fɔlɛlilɛ afɔle wɔ Gyihova anyunlu yeava yeali ɔ ti mgbɔdalɛ wɔ ɛtane mɔɔ yeyɛ la anwo, na bɛava ɛtane mɔɔ yeyɛ la bɛahyɛ ye.

23 “‘Saa bɛdwu azɛlɛ ne azo na bɛdua bakama biala a, ɔwɔ kɛ bɛbu ye ma mɔɔ ɔkɛzo la kɛ nwolɛ ɛnde yɛɛ ɔle kyibadeɛ. Ɔbayɛ kyibadeɛ yeamaa bɛ ɛvolɛ nsa. Ɔnle kɛ bɛdi bie. 24 Noko ɛvolɛ nna ne azo, ye ma ne amuala bayɛ nwuanzanwuanza na ɔbayɛ mekɛ mɔɔ bɛbali fɛlɛko wɔ Gyihova anyunlu a.+ 25 Akee ɛvolɛ nnu ne azo, bɛbahola bɛali ye ma ne bie amaa bɛava ye ma ne bɛaboka bɛ ma mɔɔ bɛbade la anwo. Medame a mele Gyihova bɛ Nyamenle ne a.

26 “‘Ɔnle kɛ bɛdi debie biala mɔɔ mogya wɔ nu la.+

“‘Ɔnle kɛ bɛkpondɛ edwɛkɛ mɔɔ bazi kenle bie la anzɛɛ bɛye ngonyia.+

27 “‘Ɔnle kɛ bɛkpa* bɛ nzo tɛbanu enrinli anzɛɛ bɛsɛkye bɛ kɛsa enrinli ne anloa.+

28 “‘Ɔnle kɛ bɛpepɛ bɛ nwo wɔ awie* mɔɔ ɛwu la ati,+ yɛɛ ɔnle kɛ bɛyɛ tatuu* bɛgua bɛ nwo. Medame a mele Gyihova a.

29 “‘Mmamaa ɛ ra raalɛ bɔ tuutuu na ɛgua ɔ nyunlu aze,+ amaa azɛlɛ ne ambɔ tuutuu na ɛbɛla ɛtane anyi zolɛ.+

30 “‘Ɔwɔ kɛ bɛdi me ɛnwomenlelielɛ kenle ne,+ yɛɛ ɔwɔ kɛ bɛdi me ɛleka nwuanzanwuanza ne eni.* Medame a mele Gyihova a.

31 “‘Bɛmmatoa menli mɔɔ tendɛ sunsum ɛtane nloa zo la,+ yɛɛ bɛmmakɔ menli mɔɔ ka kenle bie edwɛkɛ la ɛkɛ+ amaa bɛangua bɛ nwo evinli. Medame a mele Gyihova bɛ Nyamenle ne a.

32 “‘Ɔwɔ kɛ ɛdi egyɛne eni+ na ɛbu kpanyinli,+ yɛɛ ɔwɔ kɛ ɛsulo wɔ Nyamenle ne.+ Medame a mele Gyihova a.

33 “‘Saa ɛyɛvolɛ batɛnla bɛ azɛlɛ zo a, bɛmmakile ye nyane.+ 34 Ɔwɔ kɛ bɛbu ɛyɛvolɛ mɔɔ de bɛ avinli la kɛ ekulomeni;+ yɛɛ ɔwɔ kɛ bɛkulo ye kɛ bɛ nwo la, ɔluakɛ ɛnee bɛle nyɛvolɛ wɔ Yigyibiti azɛlɛ zo.+ Medame a mele Gyihova bɛ Nyamenle ne a.

35 “‘Saa bɛlɛsuzu debie tendenle anzɛɛ ye ɛlomboɛ anzɛɛ debie mɔɔ le nzule la a, bɛmmawua nu.+ 36 Bɛva tone, debie ɛlomboɛ ɛzuzudeɛ, debie resee* ɛzuzudeɛ nee debie mɔɔ le nzule la* ɛzuzudeɛ mɔɔ di munli la bɛzuzu debie.+ Medame a mele Gyihova bɛ Nyamenle ne mɔɔ yele bɛ vile Yigyibiti azɛlɛ zo la a. 37 Yemɔti ɔwɔ kɛ bɛdi me ngyehyɛleɛ nee me mɛla ne mɔ amuala azo na bɛfa bɛbɔ bɛ ɛbɛla.+ Medame a mele Gyihova a.’”