Ditilɔnomi
18 “Livae ɛsɔfo ne mɔ, nɔhalɛ nu, Livae abusua ne amuala, bɛnrɛmaa bɛ kyɛfoa anzɛɛ agyapadeɛ wɔ Yizilayɛ. Bɛbali ɛyelalɛ afɔle mɔɔ bɛbɔ bɛmaa Gyihova, mɔɔ le ye agyapadeɛ la bie.+ 2 Ɔti ɔnle kɛ bɛnyia agyapadeɛ biala wɔ bɛ mediema ne mɔ avinli. Gyihova a le bɛ agyapadeɛ a, kɛ mɔɔ yeha yehile bɛ la.
3 “Noko debie mɔɔ ɔfɛta kɛ menli ne fa maa ɛsɔfo ne mɔ la ɛne: Awie biala mɔɔ ɛlɛfa ɛnlankɛ anzɛɛ boane abɔ afɔle la, ɔwɔ kɛ ɔfa ye awane, ye awudwelɛ nee ɔ ko ne ɔmaa ɛsɔfo ne. 4 Ɔwɔ kɛ bɛfa bɛ ma mɔɔ limoa, bɛ nwanye fofolɛ, bɛ nwole nee bɛ boane nwo enrinli mɔɔ bɛkɛlimoa bɛkɛpepɛ la bɛmaa ye.+ 5 Gyihova bɛ Nyamenle ne ɛkpa ɔdaye nee ɔ mra mrenyia ne mɔ wɔ bɛ mbusua ne mɔ amuala anu kɛ bɛzonle wɔ Gyihova duma nu dahuu.+
6 “Noko saa Livaenli bie fi bɛ azua mɔɔ wɔ Yizilayɛ la anu ko mɔɔ ɔde zo+ la azo na ɔkulo* kɛ ɔkɔ ɛleka mɔɔ Gyihova kɛhile* la+ a, 7 ɔbahola yeazonle wɔ ɛkɛ wɔ Gyihova ye Nyamenle ne duma nu kɛ mɔɔ ɔ mediema Livaema ne mɔ amuala sonle wɔ Gyihova anyunlu+ wɔ ɛkɛ la. 8 Ɔbanyia aleɛ mɔɔ bɛnyia la ko ne ala bie+ yeaboka ye abusua ne ninyɛne mɔɔ ɔbadɔne ye la anwo.
9 “Saa bɛkɔdwu azɛlɛ ne mɔɔ Gyihova bɛ Nyamenle ne ɛlɛfa amaa bɛ la azo a, bɛmmasukoa kɛ bɛyɛ bɛkyi ninyɛne mɔɔ zɔhane maanle maanle ne mɔ yɛ la bie.+ 10 Ɔnle kɛ bɛnwu awie biala mɔɔ maa ɔ ra nrenyia anzɛɛ ɔ ra raalɛ fa senle nu+ la wɔ bɛ avinli, awie mɔɔ kɔ abisadeɛ,+ awie mɔɔ ye ngonyia,+ awie mɔɔ kpondɛ mɔɔ bazi kenle bie la anwo sɛkɛlɛneɛ,+ 11 awie biala mɔɔ kye awie mɔ sili, awie biala mɔɔ biza awie mɔɔ tendɛ sunsum ɛtane nloa zo+ la edwɛkɛ anzɛɛ awie mɔɔ ka kenle bie edwɛkɛ,+ anzɛɛ awie biala mɔɔ biza mowuamra anwo edwɛkɛ la.+ 12 Ɔluakɛ Gyihova kyi awie biala mɔɔ yɛ ninyɛne ɛhye mɔ la, na bɛkyi ninyɛne ɛhye mɔ ati a Gyihova bɛ Nyamenle ne ɛlɛfoa bɛ avi bɛ nyunlu a. 13 Bɛmmamaa edwɛkɛ biala ba bɛ nwo wɔ Gyihova bɛ Nyamenle ne anyunlu.+
14 “Ɔluakɛ ɛnee maanle maanle ɛhye mɔ mɔɔ bɛlɛkɔ bɛahɔvoa bɛ la tie menli mɔɔ ye ngonyia+ na bɛkɔ abisadeɛ+ la, noko Gyihova bɛ Nyamenle ne ɛtɛmaanle bɛ adenle kɛ bɛyɛ debie zɛhae. 15 Gyihova bɛ Nyamenle ne bamaa ngapezonli bie mɔɔ le kɛ medame la avi bɛ mediema ne mɔ anu ara. Ɔwɔ kɛ bɛtie ye.+ 16 Ɛhye le edwɛkɛ mɔɔ bɛbizale Gyihova bɛ Nyamenle ne wɔ kenle mɔɔ bɛyiale wɔ Hɔlɛbe+ na bɛhanle kɛ, ‘Mmamaa yɛte Gyihova yɛ Nyamenle ne ane anzɛɛ mmamaa yɛnwu senle kpole ɛhye bieko, amaa yɛanwu’+ la anwo mualɛ. 17 Na Gyihova zele me kɛ, ‘Mɔɔ bɛha la le kpalɛ. 18 Mebaye ngapezonli mɔɔ le kɛ ɛdawɔ la+ wɔ bɛ mediema ne mɔ avinli meamaa bɛ, na mebava me edwɛkɛ ne meadua ɔ nloa,+ na ɔbaha edwɛkɛ mɔɔ mebaha meahile ye la amuala yeahile bɛ.+ 19 Nɔhalɛ nu, mebamaa awie mɔɔ andie me edwɛkɛ ne mɔɔ ɔbaha wɔ me duma nu la abu nwolɛ mgbonda.+
20 “‘Saa ngapezonli bie memaa ɔ nwo zo* ka edwɛkɛ wɔ me duma nu mɔɔ tɛ medame a menganle mengilele ye kɛ ɔha anzɛɛ ɔtendɛ wɔ nyamenle gyɛne duma nu a, ɔwɔ kɛ zɔhane ngapezonli ne wu.+ 21 Noko bie a bɛbaha ye wɔ bɛ ahonle nu kɛ: “Kɛ ɔkɛyɛ na yɛanwu kɛ Gyihova ɛtɛkanle edwɛkɛ ɛ?” 22 Saa ngapezonli ne tendɛ wɔ Gyihova duma nu na edwɛkɛ ne amba nu anzɛɛ anyɛ nɔhalɛ a, ɛnee tɛ Gyihova a hanle edwɛkɛ ne a. Anwomemaazo* a ngapezonli ne vale hanle edwɛkɛ ne a. Ɔnle kɛ bɛsulo ye.’