Mrɛlɛbulɛ

Ralɛ nrɛlɛbɛvolɛ maa ye papa anye die,+

Noko ralɛ koasea maa ye mame di nyane.

 2 Nvasoɛ ɛnrɛra agyapadeɛ mɔɔ bɛdua amumuyɛ adenle zo bɛnyia la azo,

Noko tenleneyɛlɛ a die sonla fi ewule nu a.+

 3 Gyihova ɛnrɛmaa ɛhɔne ɛnrɛhu tenlenenli,*+

Noko ɔnrɛmaa amumuyɛma asa ɛnrɛha mɔɔ bɛkpondɛ la.

 4 Ɛsalɛ mɔɔ ɛnyɛ gyima la bali ehyia,+

Noko ɛsalɛ mɔɔ yɛ gyima ɛsesebɛ la nyia ɔ nwo.+

 5 Ralɛ mɔɔ fa nwunu yɛ gyima la boɔboa ye ma nloa wɔ wawaa mekɛ nu,

Noko ralɛ mɔɔ dafe botoo wɔ ma ɛdelɛ mekɛ nu la bɔ ɔ nwo anyiemgba.+

 6 Tenlenenli banyia nyilalɛ,+

Noko amumuyɛnli anloa kedɛheda basabasayɛlɛ zo.

 7 Tenlenenli duma kpalɛ* maa bɛyila ye,+

Noko amumuyɛnli duma baminli.*+

 8 Sonla mɔɔ ze nrɛlɛbɛ la balie adehilelɛ* ado nu,+

Noko sonla mɔɔ tendɛ koasea nu la, bɛbatietia ɔ nwo zo.+

 9 Sonla mɔɔ fa nɔhalɛlilɛ* dua la banyia banebɔlɛ,+

Noko sonla mɔɔ maa ye ndenle nu kyeɛhyea la, bɛbanwu ɔ nzi.+

10 Sonla mɔɔ bɔ ɔ nye bɛlɛbɛla awie mɔ la maa bɛdi nyane,+

Yɛɛ sonla mɔɔ tendɛ koasea nu la, bɛbatietia ɔ nwo zo.+

11 Tenlenenli anloa le ngoane ɛvileka,+

Noko amumuyɛnli anloa kedɛheda basabasayɛlɛ zo.+

12 Ɛkpɔlɛ a fa manzonlehwenlɛ ba a,

Noko ɛlɔlɛ keda mɛladonlɛ kɔsɔɔti azo.+

13 Nrɛlɛbɛ wɔ sonla mɔɔ lɛ nwunu la anloa anu,+

Noko bɛfa baka bɛbila sonla mɔɔ ɛnlɛ adwenle* la anzi.+

14 Menli mɔɔ ze nrɛlɛbɛ la a le bɛdabɛ mɔɔ bɛkɔ zo bɛsukoa ninyɛne mɔɔ nvasoɛ wɔ zo la,+

Noko koasea nloa twehwe ɛzɛkyelɛ.+

16 Tenlenenli gyimayɛlɛ maa ɔnyia ngoane,

Noko amumuyɛnli asa anloa gyima kɔwie ɛtane nu.+

17 Sonla mɔɔ die ɛdenrɛdenrɛlɛ to nu la le ngoane adenle,*

Noko sonla mɔɔ kpo ahwibɛnyunlu la maa awie mɔ fo adenle.

18 Sonla mɔɔ fea ye ɛkpɔlɛ zo la bɔ adalɛ,+

Yɛɛ sonla mɔɔ kpɔsa sɛkye awie mɔ duma la le koasea.

19 Saa ɛdendɛlɛ so a, mɛladonlɛ ɛmkpa nu,+

Noko sonla mɔɔ nea ɔ nloa boɛ la ze nrɛlɛbɛ.+

20 Tenlenenli atafinlima le kɛ dwɛtɛ fufule kpalɛ,+

Noko amumuyɛnli ahonle ɛdeɛ, asɛɛ nvasoɛ biala ɛnle zo.

21 Tenlenenli anloa maa menli dɔɔnwo nyia aleɛ di,*+

Noko koasea wu ɔluakɛ ɔnlɛ adwenle.+

22 Gyihova nyilalɛ a maa sonla nyia ɔ nwo a,+

Na Ɔnva nyanelilɛ* biala ɔmboka nwo.

23 Koasea ɛlɛbɔ anyiemgba ɛbɛla a, ɔfa ye kɛ ɔle nwɔhoa,

Noko sonla mɔɔ lɛ adwenlenunwunlɛ la ze nrɛlɛbɛ.+

24 Mɔɔ amumuyɛnli sulo la bara ɔ nwo zo;

Noko mɔɔ tenlenenli kulo la, bɛbayɛ bɛamaa ye.+

25 Saa ahumu ne pɛ nu a, amumuyɛnli ne ɛnrɛdɛnla ɛkɛ ne bieko,+

Noko tenlenenli le adiabo dahuu.+

26 Kɛzi nza nyinyialera yɛ egyele na esike yɛ ɛnyelɛ la,

Zɔhane ala a mgbovonle sonla de maa awie mɔɔ kɛzoa ye la* a.

27 Gyihova ɛzulolɛ maa bɛnyi bɛkyɛ,+

Noko bɛbapɛ amumuyɛma ɛvolɛ zo.+

28 Tenlenema anyelazo maa bɛ nye die,+

Noko amumuyɛma anyelazo baminli.+

29 Gyihova adenle le aranemgbole maa awie mɔɔ edwɛkɛ ɛnle ɔ nwo la,+

Noko ɔle ɛzɛkyelɛ ɔmaa ɛtanevolɛma.+

30 Bɛnrɛmaa tenlenenli ɛnrɛdɔ aze ɛlɛ,+

Noko amumuyɛnli ɛnrɛdɛnla azɛlɛ ne azo bieko.+

31 Tenlenenli anloa so nrɛlɛbɛ ma,

Noko bɛbapɛ adalɛ ɛtafinlimalɛ bado ye lɔ.

32 Tenlenenli anloa ze mɔɔ le kpalɛ la,

Noko amumuyɛnli anloa ka adalɛ edwɛkɛ.