Mɔɔ Limoa Kɔmaa Kɔlentema
10 Mediema, akee mekulo kɛ bɛnwu kɛ yɛ nenyia mɔ kɔsɔɔti luale amungu ne abo+ yɛɛ bɛ muala bɛluale nyevile ne anu+ 2 na bɛzɔnenle* bɛ muala kɛ Mosisi ɛdoavolɛma wɔ amungu ne nee nyevile ne anu, 3 na bɛ muala bɛlile sunsum nu aleɛ ko ne ala+ 4 na bɛ muala bɛnlonle sunsum nu nzule ko ne ala.+ Ɔluakɛ bɛnlonle ye wɔ sunsum nu bodane ne mɔɔ ɛnee li bɛ nzi la anu, na zɔhane bodane ne a le Kelaese.+ 5 Noko Nyamenle anye anlie bɛ nuhua dɔɔnwo anwo, na bɛhunle bɛ wɔ fienemgbole ne anu.+
6 Na ninyɛne ɛhye mɔ yɛle neazo maanle yɛ, amaa yɛ ti akunlu amba ninyɛndane ɛyɛlɛ zo, kɛ mɔɔ bɛ ti atiakunlu rale zo la.+ 7 Bɛmmasonle awozonle kɛ mɔɔ bɛ nuhua bie mɔ yɛle la; kɛ mɔɔ bɛhɛlɛ ala la: “Menli ne dɛnlanle aze lile na bɛnlonle. Akee bɛdwazole na bɛliele bɛ nye.”+ 8 Bɛmmamaa yɛbɔ adwɔmane ɛbɛla* kɛ mɔɔ bɛ bie mɔ bɔle adwɔmane ɛbɛla,* na bɛ nuhua 23,000 wule kenle ko la.+ 9 Bɛmmamaa yɛsɔ Gyihova* yɛnea+ kɛ mɔɔ bɛ bie mɔ zɔle ye nleanle na nwɔlɛ kekale bɛ hunle bɛ la.+ 10 Eza bɛmmatendɛ bɛ nzo abo, kɛ mɔɔ bɛ bie mɔ dendɛle bɛ nzo abo+ na sɛkyevolɛ ne bɔle bɛ bo zo la.+ 11 Ninyɛne ɛhye mɔ dole bɛ na ɔle neazo, yɛɛ bɛhɛlɛle kɛ bɛfa bɛabɔ yɛdayɛ mɔɔ yɛwɔ ewiade ɛhye awieleɛ mekɛ ne anu la kɔkɔ.+
12 Ɔti mɔɔ dwenle kɛ ɔgyi kpundii la, ɛnlea boɛ na yeandɔ aze.+ 13 Sɔnea biala ɛtɛtole bɛ kyesɛ mɔɔ to awie biala la ala.+ Noko Nyamenle le nɔhavo, na ɔnrɛmaa bɛnrɛzɔ bɛ bɛnrɛnlea bɛnrɛdɛla mɔɔ bɛkɛhola ɔ nloa gyinla la,+ na saa sɔnea ba a, ɔbamaa adenle ala nwolɛ amaa bɛahola bɛagyinla ɔ nloa.+
14 Ɛhye ati, me kulovolɛma, bɛnriandi awozonle ɛzonlenlɛ.+ 15 Melɛtendɛ meahile bɛ kɛ menli mɔɔ lɛ adwenlenunwunlɛ la; bɛdabɛ bɛbua mɔɔ melɛka la anwo ndɛne. 16 Nyilalɛ kanrɛlɛ ne mɔɔ yɛyila zolɛ la, asoo yɛnnyia kyɛfoa wɔ Kelaese mogya ne anu?+ Paano ne mɔɔ yɛbubu nu la, asoo yɛnnyia kyɛfoa wɔ Kelaese sonlabaka ne anu?+ 17 Kɛmɔ paano ne le ko la ati, saa yɛle dɔɔnwo bɔbɔ a yɛle sonlabaka ko,+ ɔluakɛ yɛ muala yɛdi zɔhane paano ko ne ala.
18 Bɛnlea nwonane afoa nu Yizilayɛma: Bɛdabɛ mɔɔ bɛdi afɔlebɔdeɛ ne bie la ɛnlɛ kyɛfoa wɔ afɔlemokyea ne anu ɔ?+ 19 Ɛnee duzu a mekpondɛ meaha a? Asoo mɔɔ bɛva bɛbɔ afɔle bɛmaa bozonle la le debie, anzɛɛ bozonle le debie ɔ? 20 Kyɛkyɛ; mɔɔ melɛka la a le kɛ, mɔɔ maanle maanle ne fa bɔ afɔle la, bɛfa bɛbɔ afɔle bɛmaa sunsum ɛtane ne mɔ, bɛmbɔ bɛmmaa Nyamenle;+ na memkpondɛ kɛ bɛ nee sunsum ɛtane nyia debie yɛ.+ 21 Bɛnrɛhola bɛnrɛnlo Gyihova* kanrɛlɛ nu na bɛanlo sunsum ɛtane kanrɛlɛ nu; bɛnrɛhola bɛnrɛli aleɛ wɔ “Gyihova* ɛkponle zo”+ na eza bɛali aleɛ wɔ sunsum ɛtane ɛkponle zo. 22 Anzɛɛ ‘yɛkulo kɛ yɛmaa Gyihova* twe nungule ɔ’?+ Asoo yɛ nwo yɛ se tɛla ye?
23 Debie biala anwo adenle wɔ ɛkɛ, noko tɛ ɔ muala a nvasoɛ wɔ zo a. Debie biala anwo adenle wɔ ɛkɛ, noko tɛ ɔ muala a maa ngɔzo a.+ 24 Awie biala mmakpondɛ ɔ ngome ye boɛyɛlɛ, ɔkpondɛ awie mɔ noko ɛdeɛ.+
25 Bɛli nane biala mɔɔ bɛtɔne ye wɔ gua nu la, bɛmmabizebiza nwolɛ edwɛkɛ ɔlua bɛ adwenle ne ati, 26 ɔluakɛ “azɛlɛ ye nee debie biala mɔɔ wɔ zolɛ la le Gyihova* ɛdeɛ.”+ 27 Saa awie mɔɔ ɛnle diedinli la to ɛsalɛ fɛlɛ bɛ na bɛkulo kɛ bɛkɔ a, bɛli debie biala mɔɔ ɔkɛva ɔkɛzie bɛ nyunlu la, bɛmmabizebiza nwolɛ edwɛkɛ ɔlua bɛ adwenle ne ati. 28 Noko saa awie ka kile bɛ kɛ, “Ɛhye le debie mɔɔ bɛva bɛbɔ afɔle a,” ahenle mɔɔ hanle hilele bɛ la ati bɛmmadi amaa yeangyegye awie biala adwenle.+ 29 Tɛ wɔ adwenle ɛdeɛ ne a melɛka a, emomu ahenle ɛdeɛ ne ɔ. Ɛnee kɛmɔti a ɔwɔ kɛ awie adwenle bua fanwodi mɔɔ melɛ la ndɛne ɛ?+ 30 Saa melɛdi debie na meda Nyamenle ase wɔ nwolɛ a, kɛmɔti a ɔwɔ kɛ bɛtendɛ bɛtia me wɔ debie mɔɔ mela Nyamenle ase wɔ nwolɛ la anwo ɛ?+
31 Ɛhye ati, saa bɛlɛdi o, bɛlɛno o, anzɛɛ bɛlɛyɛ debie gyɛne biala o, bɛyɛ ɔ muala bɛwula Nyamenle anyunlunyia.+ 32 Bɛmmayɛ debie biala bɛmaa Dwuuma nee Gilikima yɛɛ Nyamenle asafo ne kpo aze,+ 33 kɛ mɔɔ melɛbɔ mɔdenle meazɔ menli kɔsɔɔti anye wɔ debie biala anu la, memkpondɛ me ngome me boɛyɛlɛ,+ emomu menli dɔɔnwo ɛdeɛ, amaa bɛalie bɛ ngoane.+