Mɔɔ Tɔ Zo Nwiɔ Kɔmaa Kɔlentema

12 Ɔwɔ kɛ metu me nwo. Nvasoɛ ɛnle zo, noko mebaha Awulae ɛnyelɛzodeɛnwunlɛ+ nee ye yekile nwo edwɛkɛ.+ 2 Meze nrenyia bie mɔɔ le Kelaese ɛdoavolɛ mɔɔ ɛvolɛ 14 mɔɔ ɛpɛ nu la bɛvale ye bɛhɔle anwuma mɔɔ tɔ zolɛ nsa la—saa bɛvale ye bɛhɔle nwonane nu o, anzɛɛ tɛ nwonane nu o, menze; Nyamenle a ze a. 3 Ɛhɛe, meze sonla zɔhane—saa bɛvale ye bɛhɔle nwonane nu o, anzɛɛ tɛ nwonane nu o, menze; Nyamenle a ze a— 4 bɛvale ye bɛhɔle paladaese na ɔdele edwɛkɛ mɔɔ bɛngola bɛnga yɛɛ mɛla ɛmmaa adenle kɛ sonla kɛha la. 5 Sonla zɛhae ati a mebadu me nwo a, mame, menrɛdu me nwo kyesɛ me bɛtɛɛyɛlɛ nwo ala. 6 Na saa mekulo kɛ metu me nwo bɔbɔ a, ɔnrɛhile kɛ mende edwɛkɛ bo, ɔluakɛ mebaha nɔhalɛ ne. Noko menrɛyɛ zɔ amaa awie ambu me andɛla mɔɔ ɔnwu kɛ meyɛ anzɛɛ ɔte kɛ meka la, 7 kɛmɔ menyia yekile ɛhye mɔ mɔɔ yɛ nwanwane la ati.

Amaa meammemaa me nwo zo somaa la ati, bɛvale debie mɔɔ le kɛ bowule la bɛwulale me nwonane nu,+ Seetan anwumabɔvolɛ bie, kɛ ɔrabobɔ* me, amaa meammemaa me nwo zo somaa. 8 Menzɛlɛle Awulae fane nsa kɛ ɔmaa deɛ ɛhye ɛvi me nwo. 9 Noko ɔzele me kɛ: “Me ɛlolɛ kpole ne le kpalɛ maa wɔ, ɔluakɛ me tumi ne di munli wɔ bɛtɛɛyɛlɛ nu.”+ Yemɔti mebava fɛlɛkolilɛ kpole meadu me nwo wɔ me bɛtɛɛyɛlɛ nwo, amaa Kelaese tumi ne aheda me nwo zo kɛ ɛdanlɛsua. 10 Kelaese ati, medi fɛlɛko wɔ bɛtɛɛyɛlɛ, aholobabɔlɛ, anwongyelelɛ, kpɔdekpɔdeyɛlɛ nee ngyegyelɛ nu. Ɔluakɛ saa meyɛ bɛtɛɛ a ɛnee me nwo ɛyɛ se kpalɛ.+

11 Meyɛ kɛ sonla mɔɔ ɛnde edwɛkɛ bo la. Bɛdabɛ a bɛmaa meyɛ zɔ a, ɔluakɛ anrɛɛ ɔwɔ kɛ bɛkanvo me. Saa menle ɛhwee bɔbɔ a, bɛ ɛzoanvolɛma kpalɛ ne mɔ ɛndɛla me wɔ debie biala anu.+ 12 Nɔhalɛ nu, menvale kpundiigyinlanlɛ kpole menlale ye ali mengilele bɛ kɛ mele ɛzoanvolɛ,+ na menyɛle sɛkɛlɛneɛ nee nwanwane ninyɛne nee gyima mgbole.+ 13 Saa ɛye adesoa mɔɔ meanyɛ meammaa bɛ la ɛsie ahane a, duzu bieko a ammaa bɛando asafo ne mɔ mɔɔ ɛha la ɛ?+ Mesɛlɛ bɛ, saa mevo bɛ wɔ ɛhye anu a bɛva bɛhyɛ me.

14 Nea! Ye fane nsa mɔɔ meboɔboa me nwo kɛ meba bɛ nwo lɔ la ɛne, noko menrɛyɛ adesoa menrɛmaa bɛ. Ɔluakɛ bɛdabɛ a mekpondɛ bɛ a, tɛ bɛ ninyɛne ɔ;+ tɛ mralɛ+ a kpondɛ ninyɛne sie bɛ awovolɛ a, awovolɛ a kpondɛ sie bɛ mra a. 15 Mame, mebavi fɛlɛkolilɛ kpole nu meava me nwo ninyɛne nee me nwo amuala meamaa bɛ.*+ Saa mehulo bɛ kpole zɛhae a, asoo ɔwɔ kɛ ɛlɔlɛ mɔɔ bɛlɛ bɛmaa me la ka aze ɔ? 16 Kɛ ɔde ye biala la, meanyɛ adesoa meammaa bɛ.+ Noko bɛse “me nye ɛde” na menvale “mɛlɛbɛla” a mengyele bɛ a. 17 Asoo menluale menli mɔɔ menzoanle bɛ wɔ bɛ nwo lɔ la bie anwo zo memkpondɛle bɛ nwo zo nvasoɛ? 18 Menzɛlɛle Taetɛse na menzoanle ye nee adiema ko. Asoo Taetɛse kpondɛle bɛ nwo zo nvasoɛ?+ Yɛannyia adwenle ko ɔ? Asoo yɛambɔ yɛ ɛbɛla ko?

19 Mekɛ ɛhye amuala, bɛdwenle kɛ yɛlɛka edwɛkɛ yɛalie yɛ nwo ɔ? Yɛle Kelaese ɛdoavolɛma yɛɛ yɛlɛka nɔhalɛ wɔ Nyamenle anyunlu. Noko alɔvolɛ, debie biala mɔɔ yɛyɛ la yɛyɛ yɛmaa bɛ anwosesebɛ. 20 Na mesulo kɛ saa meba a, bie a me nye ɛnrɛlie bɛ nyɛleɛ ne anwo yɛɛ bɛ nye ɛnrɛlie me ɛdeɛ ne anwo, emomu bie a butulelilɛ, nungulehwenlɛ, ɛya mgbole ɛvalɛ, manzonlehwenlɛ, aholobabɔlɛ, awie mɔ anwo edwɛkɛ ɛhehanlɛ, anwomemaazo nee basabasayɛlɛ a bahɔ zo a. 21 Bie a meba bieko a, me Nyamenle ne baha me aze wɔ bɛ nyunlu na meali bɛdabɛ mɔɔ bɛyɛle ɛtane na bɛtɛnunle bɛ nwo wɔ bɛ evinli nyɛleɛ nee adwɔmane ɛbɛla* yɛɛ anyiemgba ɛbɛla* mɔɔ bɛbɔle la anwo nyane.