Arelemgbunli Mɔɔ Limoa

16 Gyihova luale Haneenae+ ara Gyihu+ anwo zo hanle hilele Beeyahya kɛ: 2 “Memkpogyale wɔ zo menvile ndɛtɛlɛ nu na menyɛle wɔ adekilevolɛ wɔ me menli Yizilayɛma anwo zo,+ noko wɔhɔ zo wɔlua adenle ko ne ala mɔɔ Gyɛlɔbowam luale zolɛ la azo na wɔmaa me menli Yizilayɛma ɛyɛ ɛtane na bɛva bɛ ɛtane ne mɔ+ bɛha me ɛya. 3 Ɔti mebabɔ Beeyahya nee ye sua nu amra abo zo na meayɛ ye sua nu kɛ Nibate ara Gyɛlɔbowam sua nu la.+ 4 Awie biala mɔɔ vi Beeyahya abusua nu mɔɔ bawu sua zo la, ahwea bali ye nwonane; na awie biala mɔɔ wɔ ye abusua nu mɔɔ bawu ɛbɔ nu la, anwomanyunlu nloma bali ye nwonane.”

5 Beeyahya anwo tetedwɛkɛ mɔɔ ɛha, mɔɔ ɔyɛle nee ye ninyɛne mgbole mɔɔ ɔyɛle la kɔsɔɔti, asoo bɛtɛkɛlɛle ye wɔ Yizilayɛ arelemgbunli mekɛ zo tetedwɛkɛ buluku ne anu ɔ? 6 Akee Beeyahya nee ye nenyia mɔ hɔlale na bɛziele ye wɔ Tɛza;+ ɔ ra Yilaa ralile ye agya yɛle belemgbunli. 7 Eza Gyihova luale Haneenae ara ngapezonli Gyihu anwo zo hanle ye ndɛnebualɛ mɔɔ ɔbava yeara Beeyahya nee ye sua nu amra anwo zo la, ɔlua ɛtane kɔsɔɔti mɔɔ ɔyɛle wɔ Gyihova anye zo ɔvale ɔ sa anloa gyima ɔhanle ye ɛya kɛ Gyɛlɔbowam sua nu amra, na eza ɔhunle Needabe la ati.+

8 Dwuda Belemgbunli Esa ɛvolɛ 26 ne azo, Beeyahya ara Yilaa rayɛle Yizilayɛ belemgbunli wɔ Tɛza, na ɔlile ebia ɛvolɛ nwiɔ. 9 Ye sonvolɛ Zemelae mɔɔ le ye sogyama mɔɔ ka konle ehwili la anu foa ko azo kpanyinli la vale ɔ nwo adwenle ɛtane wɔ mekɛ mɔɔ ɔwɔ Aaza sua nu wɔ Tɛza na ɔlɛno nza yeabo la; Aaza a nea belemgbunli sua nu ɛkɛ wɔ Tɛza a. 10 Zemelae hɔle ɔ nwo zo na ɔbɔle ye ɔhunle ye+ wɔ Dwuda Belemgbunli Esa ɛvolɛ 27 ne azo na ɔlile ye agya ɔyɛle belemgbunli. 11 Mɔɔ ɔrayɛle belemgbunli na ɔdɛnlanle belemgbunli ebia ne azo ala la, ɔhunle Beeyahya sua nu amra kɔsɔɔti. Yeangyakyi nrenyia* ko bɔbɔ, ye mbusuafoɔ* anzɛɛ ɔ gɔnwo mɔ. 12 Ɔti Zemelae hunle Beeyahya sua nu amra kɔsɔɔti kɛ mɔɔ ndɛnebualɛ mɔɔ Gyihova luale ngapezonli Gyihu anwo zo hanle tiale Beeyahya la kile la.+ 13 Ɔlua ɛtane kɔsɔɔti mɔɔ Beeyahya nee ɔ ra Yilaa yɛle nee ɛtane mɔɔ bɛmaanle Yizilayɛma yɛle na bɛvale bɛ ananze ne mɔ mɔɔ nvasoɛ ɛnle bɛ nwo zo la+ bɛhanle Gyihova, Yizilayɛ Nyamenle ne ɛya la ati a ɔrale ye zɔ a. 14 Yilaa anwo tetedwɛkɛ mɔɔ ɛha, mɔɔ ɔyɛle la kɔsɔɔti, asoo bɛtɛkɛlɛle ye wɔ Yizilayɛ arelemgbunli mekɛ zo tetedwɛkɛ buluku ne anu ɔ?

15 Dwuda Belemgbunli Esa ɛvolɛ 27 ne azo, Zemelae rayɛle belemgbunli kenle nsuu wɔ Tɛza wɔ mekɛ mɔɔ ɛnee sogyama ne ɛyɛ bɛ azokoɛleɛ kɛ bɛko bɛatia Filisitiama sua Gebɛtɔn+ la. 16 Nzinlii, sogyama ne mɔɔ wɔ azokoɛleɛ ne la dele kɛ bɛlɛka kɛ: “Zemelae ɛva adwenle ɛtane na yehu belemgbunli ne.” Ɔti Yizilayɛma amuala yɛle Ɔmelae+ mɔɔ le ɛlɔnema kpanyinli la Yizilayɛ belemgbunli kenle zɔhane wɔ azokoɛleɛ ne. 17 Ɔmelae nee Yizilayɛma mɔɔ boka ɔ nwo la vile Gebɛtɔn na bɛhɔbɛngale Tɛza anwo bɛyiale. 18 Mɔɔ Zemelae nwunle kɛ bɛho bɛva suakpole ne la, ɔhɔle belemgbunli sua nu ɛkɛ ne aranemgbole ne anu na ɔyelale sua ne ɔguale ɔ nwo zo na ɔwule.+ 19 Ɔlua ɛtane mɔɔ ɔdaye mumua ne ɔyɛle na ɔyɛle mɔɔ le ɛtane wɔ Gyihova anye zo kɛ mɔɔ Gyɛlɔbowam yɛle la nee ɛtane mɔɔ ɔmaanle Yizilayɛma yɛle la+ ati a ɔrale ye zɔ a. 20 Zemelae anwo tetedwɛkɛ mɔɔ ɛha nee adwenle ɛtane mɔɔ ɔvale la kɔsɔɔti, asoo bɛtɛkɛlɛle ye wɔ Yizilayɛ arelemgbunli mekɛ zo tetedwɛkɛ buluku ne anu ɔ?

21 Mekɛ zɔhane a Yizilayɛma anu hyɛle nwiɔ a. Ekpunli ko lile Gaenate ara Tebenae anzi na bɛhulole kɛ bɛkɛzie ye belemgbunli, yɛɛ ekpunli ko ne lile Ɔmelae anzi. 22 Noko menli mɔɔ ɛnee li Ɔmelae anzi la lile menli mɔɔ li Gaenate ara Tebenae anzi la anwo zo konim. Ɔti Tebenae wule, na Ɔmelae rayɛle belemgbunli.

23 Dwuda Belemgbunli Esa ɛvolɛ 31 ne azo, Ɔmelae rayɛle Yizilayɛ belemgbunli, na ɔlile ebia ɛvolɛ 12. Ɔlile ebia ɛvolɛ nsia wɔ Tɛza. 24 Ɔdɔle Samɛlea boka ne dwɛtɛ fufule talɛnte* nwiɔ ɔvile Hyimɛ ɛkɛ, na ɔkyekyele suakpole wɔ boka ne azo. Ɔvale azɛlɛ menle Hyimɛ duma ɔdole suakpole ne mɔɔ ɔkyekyele la azo na ɔvɛlɛle ye Samɛlea.*+ 25 Ɔmelae hɔle zo yɛle mɔɔ le ɛtane wɔ Gyihova anye zo la, na ye ɛtane ne dɛlale bɛdabɛ mɔɔ bɛlimoale ɔ nyunlu la amuala.+ 26 Ɔluale adenle ko ne ala mɔɔ Nibate ara Gyɛlɔbowam luale zolɛ la azo na ɔyɛle ye ɛtane ne mɔɔ ɔmaanle Yizilayɛma yɛle na bɛvale bɛ ananze ne mɔ mɔɔ nvasoɛ ɛnle bɛ nwo zo la bɛhanle Gyihova, Yizilayɛ Nyamenle ne ɛya la bie.+ 27 Ɔmelae anwo tetedwɛkɛ mɔɔ ɛha, mɔɔ ɔyɛle nee ye konimlilɛ mgbole ne mɔ, asoo bɛtɛkɛlɛle ye wɔ Yizilayɛ arelemgbunli mekɛ zo tetedwɛkɛ buluku ne anu ɔ? 28 Akee Ɔmelae nee ye nenyia mɔ hɔlale na bɛziele ye wɔ Samɛlea; ɔ ra Ehabe+ ralile ye agya yɛle belemgbunli.

29 Ɔmelae ara Ehabe rayɛle Yizilayɛ belemgbunli wɔ Dwuda Belemgbunli Esa ɛvolɛ 38 ne azo, na Ɔmelae ara Ehabe yɛle Yizilayɛ belemgbunli ɛvolɛ 22 wɔ Samɛlea.+ 30 Ɔmelae ara Ehabe yɛle ɛtane kpole wɔ Gyihova anye zo dɛlale bɛdabɛ mɔɔ bɛlimoale ɔ nyunlu la amuala.+ 31 Ɔbule Nibate ara Gyɛlɔbowam ɛtane ne mɔ+ mɔɔ ɔyɛle bie la debie ekyi na eza ɔgyale Saedɛnema+ Belemgbunli Ɛtebeeyale ara raalɛ Gyɛzɛbɛle+ na ɔbɔle ɔ bo ɔzonlenle Beeyale+ na ɔbɔle ɔ ti aze ɔmaanle ye. 32 Yeanga ye zɔ, eza ɔzile afɔlemokyea ɔmaanle Beeyale wɔ Beeyale ɛzonlenlɛsua ne+ mɔɔ ɔzile wɔ Samɛlea la anu. 33 Ehabe eza yɛle ɛzonlenlɛ baka.*+ Ehabe yɛle ninyɛne dɔɔnwo hanle Gyihova, Yizilayɛ Nyamenle ne ɛya kpole dɛlale Yizilayɛ arelemgbunli mɔɔ limoale ɔ nyunlu la amuala.

34 Ye mekɛ zo a Hayɛle mɔɔ vi Bɛtɛle la kyekyele Gyɛleko bieko a. Ɔ ra nrenyia kpanyinli Abaelam wule wɔ mekɛ mɔɔ ɔdole suakpole ne adiabo la, yɛɛ ɔ ra kakula Sigɛbe wule wɔ mekɛ mɔɔ ɔtuodua suakpole ne nlenkɛ ne mɔ la, kɛ mɔɔ Gyihova luale Nɛn ara Dwɔhyua anwo zo hanle la.+