Edwɛkɛsisilɛ Mɔɔ Tɔ Zo Nwiɔ
22 Na menli mɔɔ de Gyɛlusalɛm la maanle ɔ ra ekyi kpalɛ ne, Ehazaya ralile ye agya lile belemgbunli, ɔluakɛ nwule ekpunli ne mɔɔ nee Arelabema rale azokoɛleɛ ne la hunle mgbanyinli ne mɔ kɔsɔɔti.+ Yemɔti Gyɛholam ara Ehazaya bɔle ɔ bo kɛ ɔdi belemgbunli wɔ Dwuda.+ 2 Ehazaya lile ɛvolɛ 22 la yɛɛ ɔrayɛle belemgbunli a, na ɔlile tumi ɛvolɛ ko wɔ Gyɛlusalɛm. Ye mame a le Ɔmelae+ anlɔnra raalɛ* Atalaya.+
3 Ɔdaye noko ɔluale Ehabe sua nu amra ndenle ne mɔ anu,+ ɔluakɛ ye mame dule ye folɛ maanle ɔyɛle amumuyɛ. 4 Na ɔhɔle zo ɔyɛle ɛtane wɔ Gyihova anye zo, kɛ mɔɔ Ehabe sua nu amra yɛle la, ɔluakɛ mɔɔ ye papa wule la, bɛdule ye folɛ bɛmaanle ɔzɛkyele. 5 Ɔlile bɛ folɛdulɛ zo na ɔ nee Yizilayɛ Belemgbunli Ehabe ara Gyɛholam hɔle kɛ bɛ nee Selea Belemgbunli Hazeeyɛle+ kaho wɔ Releemɔto-geleade,+ ɛleka mɔɔ ɛdatovoma ne bodale Gyɛholam la. 6 Ɔziale ɔrale Gyɛzeɛle+ kɛ ɔbayɛ ɔ nwo ayile ɔluakɛ bɛbodale ye wɔ Releema wɔ mekɛ mɔɔ ɔ nee Selea Belemgbunli Hazeeyɛle hɔhonle la.+
Dwuda belemgbunli Gyɛholam+ ara Ehazaya* hɔle Gyɛzeɛle kɛ ɔkanlea Ehabe ara Gyɛholam,+ ɔluakɛ ɛnee bɛboda ye.*+ 7 Noko mekɛ mɔɔ Ehazaya hɔkpɔlale Gyɛholam la, Nyamenle luale zo zɛkyele ye; na mɔɔ ɔradwule la, ɔ nee Gyɛholam hɔyiale Nemehyae anlɔnra* Gyihu,+ mɔɔ Gyihova ɛkpokpa ye kɛ ɔzɛkye Ehabe sua nu amra* la.+ 8 Mɔɔ Gyihu bɔle ɔ bo kɛ ɔbua Ehabe sua nu amra ndɛne la, ɔnwunle Dwuda mgbanyima nee Ehazaya amediema ne mɔ amra, Ehazaya azonvolɛ ne mɔ, na ɔhunle bɛ.+ 9 Akee ɔkpondɛle Ehazaya; bɛnwunle kɛ ɔvea Samɛlea na bɛhyele ye na bɛvale ye bɛrɛlɛle Gyihu. Akee bɛhunle ye na bɛziele ye,+ ɔluakɛ bɛhanle kɛ: “Ɔle Gyɛhɔhyafate, mɔɔ vale ye ahonle muala kpondɛle Gyihova la anlɔnra.”+ Ɛnee awie biala ɛnle Ehazaya sua nu mɔɔ lɛ tumi kola nea belemgbunlililɛ ne azo a.
10 Mɔɔ Ehazaya mame Atalaya+ nwunle kɛ ɔ ra ne ɛwu la, ɔdwazole na ɔzɛkyele Dwuda sua nu dehelɛ abusua ne anu amra amuala.*+ 11 Noko, belemgbunli ne ara raalɛ Gyehohyabeya vale Ehazaya ara Gyɛhowahye,+ ɔwuale ye ɔvile belemgbunli ne amra ne mɔ mɔɔ bɛkahu bɛ la anu, na ɔvale ye nee ahenle mɔɔ nea ye la ɔhɔveale suakunlu nehane. Belemgbunli Gyɛholam+ ara raalɛ Gyehohyabeya (ɔle ɛsɔfo Gyɛhɔyada+ aye nee Ehazaya adiema raalɛ) bɔle mɔdenle vale ye veale Atalaya, amaa yeangu ye.+ 12 Ɔdɛnlanle bɛ nwo ɛkɛ ne too ɛvolɛ nsia, ɔveale nɔhalɛ Nyamenle ne sua nu ɛkɛ ne wɔ mekɛ mɔɔ ɛnee Atalaya ɛlɛdi tumi wɔ azɛlɛ ne azo la.