Dwobu
4 Akee Ɛlefaze+ mɔɔ vi Timan la buale kɛ:
2 “Saa awie bɔ mɔdenle kɛ ɔtendɛ yeahile wɔ a, ɛbava ɛya ɔ?
Noko nwane a kɛhola kɛzɔ ɔ nwo, amaa yeandendɛ a?
3 Nɔhalɛ nu, wɔdenrɛdenrɛ menli dɔɔnwo,
Yɛɛ ɛmaanle ɛsalɛ mɔɔ anu ɛtuto la anu mianle.
4 Wɔ edwɛkɛ maa sonla mɔɔ ɛlɛtɔ aze la dwazo,
Yɛɛ ɛmaa bɛdabɛ mɔɔ bɛ gyakɛ kpɔkɛ anu ɛtuto la anu mia.
5 Noko kɛkala mɔɔ yedo wɔ la, ɛ nwo ɛbubu wɔ;*
Yeha wɔ la, ɛ sa nu ɛdo.
6 Wɔ Nyamenle ɛzulolɛ ɛmmaa wɔ anwodozo ɔ?
Wɔ nɔhalɛlilɛ*+ mɔɔ ɛfa ɛdua la ɛmmaa wɔ anyelazo ɔ?
7 Mesɛlɛ wɔ kakye ɛhye: Sonla mɔɔ edwɛkɛ ɛnle ɔ nwo la boni a abo zo ɛminli ɛlɛ a?
Kenlenzu a bɛzɛkyele tenlenema ɛlɛ a?
8 Mɔɔ menwu ye la a le kɛ bɛdabɛ mɔɔ bɛso ninyɛndane ɛya*
Nee bɛdabɛ mɔɔ bɛdua ngyegyelɛ la, yemɔ ala a bɛbabu a.
9 Nyamenle ɛnwomenle ɛgulɛ maa bɛ bo zo bɔ,
Yɛɛ ye ɛya ne maa bɛba awieleɛ.
10 Awenade kpo, yɛɛ awenade ngyikyi kulu,
Noko bɛbubu awenade mɔɔ anwo yɛ se bɔbɔ la agye.
11 Awenade wu ɔluakɛ ɔnnyia nane ɔnli,
Yɛɛ awenade mra bɔ asande.
12 Bɛvale edwɛkɛ bie bɛrɛlɛle me wɔ fealeranu,
Na bɛhanle ye ekyii bɛguale me nzo nu.
13 Wɔ nɔɔzo, mekɛ mɔɔ menli ɛlafe botoo la,
Menwunle ɛnyelɛzodeɛnwunlɛ mɔɔ gyegyele me adwenle,
14 Anwowosolɛ kpole bie hanle me,
Ɔmaanle ɛzulolɛ wolowolole me mbowule kɔsɔɔti anu.
15 Sunsum bie pɛle nu wɔ me nye zo;
Me nwo enrinli dwazole.
16 Akee ɔgyinlanle koonwu,
Noko meannwu ye deɛ holɛ.
Ɛnee debie bie gyi me nyunlu ɛkɛ;
Ɛkɛ ne yɛle dii, akee mendele ɛnelɛ bie:
17 ‘Asoo sonla dasanli bahola ayɛ tenlene adɛla Nyamenle?
Asoo sonla nwo bahola ade adɛla ye Yɛvolɛ ne ɔ?’
18 Nea! Ɔnlɛ ye sonvolɛma anu diedi,
Yɛɛ ɔnwu nvonleɛ wɔ ye anwumabɔvolɛma* anwo.
19 Na akee bɛdabɛ mɔɔ bɛde ndɛtɛlɛ azua nu,
Mɔɔ bɛ adiabo wɔ ndɛtɛlɛ nu,+
Mɔɔ bɛ ɛbɛtɛlɛ ɛnyɛ se kɛ ngɛkɛba la!
20 Ɔvi nwonlomɔ kɔdwu nɔsolɛ, bɛbɛtɛ bɛ bɔkɔɔ;
Bɛ bo zo minli bɔkɔɔ, na awie ɛndwenle bɛ nwo bieko.
21 Asoo bɛnle kɛ ɛdanlɛsua mɔɔ bɛtulu ye nyɛma ne la ɔ?
Nrɛlɛbɛ mɔɔ bɛnze la ati, bɛwu.