Lɛvitikɔso

16 Mekɛ mɔɔ Aalɔn amra mrenyia nwiɔ ne hɔle Gyihova anyunlu na bɛwule la anzi, Gyihova dendɛle hilele Mosisi.+ 2 Gyihova zele Mosisi kɛ: “Ka kile ɛ diema Aalɔn kɛ ɔnle kɛ ɔba nwuanzanwuanza ɛleka ne+ wɔ mgbɛnudanlɛ ne anzi,+ wɔ Ɛlɛka ne ati ne anyunlu wɔ mekɛ biala mɔɔ ɔkulo la amaa yeanwu,+ ɔluakɛ mebaye me nwo meahile wɔ amungu nu+ wɔ ɛlɛka ne azo.+

3 “Saa Aalɔn ɛlɛba nwuanzanwuanza ɛleka ne a, mɔɔ ɔwɔ kɛ ɔfa ɔba la ɛne: ɔva ɛnlankɛ nyinli ralɛ ɔrabɔ ɛtane afɔle+ na ɔva boane nyinli ɔrabɔ ɛyelalɛ afɔle.+ 4 Ɔwɔ kɛ ɔwula lenen tɛladeɛ tendenle nwuanzanwuanza ne,+ yɛɛ ɔwɔ kɛ ɔwula lenen nika* ne+ ɔkeda ɔ nwo,* ɔwɔ kɛ ɔfa lenen tabule ne ɔkye zo+ na ɔsoa ye lenen abotile ne.+ Bɛle adɛladeɛ nwuanzanwuanza.+ Ɔbabia nzule nu+ na yeawula.

5 “Ɔwɔ kɛ ɔdie mbɔnkye mralɛ nyinli nwiɔ ɔfi Yizilayɛma ɛkɛ+ ɔfa ɔbɔ ɛtane afɔle na ɔdie boane nyinli ko ɔfa ɔbɔ ɛyelalɛ afɔle.

6 “Ɔwɔ kɛ Aalɔn fa ɛnlankɛ nyinli ne mɔɔ ɔbava yeabɔ ɛtane afɔle yeamaa ɔ nwo la ba, na ɔdi mgbɔdalɛ ɔmaa ɔ nwo+ nee ye abusua ne.

7 “Akee ɔbava mbɔnkye nwiɔ ne yeahɔgyinla Gyihova anyunlu wɔ nyianu ɛdanlɛsua ne anuhɔlɛ. 8 Aalɔn bagua mbɔnkye nwiɔ ne ati zo ma,* ma ko bayɛ Gyihova ɛdeɛ yɛɛ ko ne noko bayɛ Azazɛle* ɛdeɛ. 9 Aalɔn bava abɔnkye ne mɔɔ bɛguale ma+ bɛyele ye bɛmaanle Gyihova la abɔ ɛtane afɔle. 10 Noko ɔwɔ kɛ ɔfa abɔnkye ne mɔɔ bɛguale ma bɛyele ye bɛmaanle Azazɛle la anyewɔzo ɔbagyinla Gyihova anyunlu amaa yeali mgbɔdalɛ yeagua zolɛ, amaa bɛava bɛahɔ Azazɛle wɔ fienemgbole ne anu.+

11 “Aalɔn bava ɛnlankɛ nyinli ne mɔɔ ɔfa yeabɔ ɛtane afɔle yeamaa ɔ nwo la yeara na yeali mgbɔdalɛ yeamaa ɔ nwo nee ye abusua ne; akee ɔbahu ɛnlankɛ ne mɔɔ ɔfa yeabɔ ɛtane afɔle yeamaa ɔ nwo la.+

12 “Akee ɔbava senlevalɛ kyɛnze ne+ yeavula samɛnlakɛ wɔ afɔlemokyea ne+ mɔɔ wɔ Gyihova anyunlu la azo na yeavula ayilevuanlɛ motoo ɔ sa nwiɔ,+ na yeava yeara mgbɛnudanlɛ ne anzi.+ 13 Eza ɔbava ayilevuanlɛ ne yeagua senle ne azo wɔ Gyihova anyunlu,+ na ayilevuanlɛ ne esike ne baheda Ɛlɛka tile ne+ mɔɔ dua Daselɛlilɛ ne azo la azo+ amaa yeanwu.

14 “Ɔbava ɔ sa ɛrɛlɛsɛka yeabɔ ɛnlankɛ ne mogya ne anu+ na yeava bie yeakponde ɛlɛka tile ne anyunlu wɔ aduduleɛ afoa nu, na yeava ɔ sa ɛrɛlɛsɛka yeakponde mogya ne bie fane nsuu wɔ ɛlɛka tile ne anyunlu.+

15 “Akee ɔbahu abɔnkye ne mɔɔ ɔfa yeabɔ ɛtane afɔle yeamaa menli ne la,+ na yeava ye mogya ne yeahɔ mgbɛnudanlɛ ne anzi+ na yeayɛ ye mogya ne+ kɛ mɔɔ ɔyɛle ɛnlankɛ nyinli ne mogya ne la; ɔbava yeakponde ɛlɛka tile ne anyunlu.

16 “Ɔbali nwuanzanwuanza ɛleka ne ati mgbɔdalɛ wɔ Yizilayɛma nyɛleɛ evinli ne nee bɛ mɛladonlɛ yɛɛ bɛ ɛtane ne mɔ anwo,+ na ɔwɔ kɛ ɔyɛ zɔhane ala ɔmaa nyianu ɛdanlɛsua ne mɔɔ gyi bɛ nyɛleɛ evinli ne avinli la.

17 “Saa ɔkɔ nwuanzanwuanza ɛleka ne kɛ ɔkali mgbɔdalɛ a, ɔnle kɛ awie biala kɔ nyianu ɛdanlɛsua ne anu kɔkpula kɛ ɔkɛvinde. Ɔbali mgbɔdalɛ yeamaa ɔ nwo nee ye abusua ne+ yɛɛ Yizilayɛma* amuala.+

18 “Akee ɔbavinde yeahɔ afɔlemokyea ne+ mɔɔ wɔ Gyihova anyunlu la anwo na yeali ɔ ti mgbɔdalɛ, na ɔbava ɛnlankɛ ne nee abɔnkye ne mogya ne bie yeaheha afɔlemokyea ne mɛne ne mɔ amuala anwo. 19 Eza ɔbava ɔ sa ɛrɛlɛsɛka yeakponde mogya ne bie wɔ nwolɛ fane nsuu na yeade nwolɛ yeavi Yizilayɛma nyɛleɛ evinli ne anwo.

20 “Saa ɔdi nwuanzanwuanza ɛleka ne nee nyianu ɛdanlɛsua ne yɛɛ afɔlemokyea ne+ ati mgbɔdalɛ ɔwie a,+ eza ɔbava abɔnkye anyewɔzo ne yeara.+ 21 Aalɔn bava ɔ sa amu nwiɔ agua abɔnkye anyewɔzo ne ati zo na yeaha Yizilayɛma nvonleɛ nee bɛ mɛladonlɛ nee bɛ ɛtane ne mɔ kɔsɔɔti yeagua ɔ ti zo,+ na yeamaa sonla mɔɔ bɛye ye* kɛ ɔva ɔhɔ la ava ye ahɔ fienemgbole ne anu lɔ. 22 Abɔnkye ne bazoa bɛ ɛtane ne mɔ amuala+ ahɔ ɛsɛlɛ zo ɛleka bie,+ na yeagyakyi abɔnkye ne yeamaa yeahɔ fienemgbole ne anu lɔ.+

23 “Akee Aalɔn bawolo nyianu ɛdanlɛsua ne anu na yeaye lenen adɛladeɛ ne mɔɔ ɔwulale ɔhɔle nwuanzanwuanza ɛleka ne la na yeagua bɛ ɛkɛ. 24 Ɔwɔ kɛ ɔfa nzule ɔbia ɔ nwo*+ wɔ ɛleka mɔɔ le nwuanzanwuanza la na ɔwula ye adɛladeɛ ne mɔ;+ akee ɔbavinde na yeabɔ ye ɛyelalɛ afɔle ne+ nee menli ne ɛyelalɛ afɔle ne+ na yeali mgbɔdalɛ yeamaa ɔ nwo nee menli ne.+ 25 Ɔbamaa ɛtane afɔlebɔdeɛ ɛnlome ne akpu wɔ afɔlemokyea ne azo.

26 “Ɔwɔ kɛ ahenle mɔɔ vale Azazɛle abɔnkye ne hɔle la+ kpo ye adɛladeɛ na ɔfa nzule ɔbia ɔ nwo na akee yeara azokoɛleɛ ɛkɛ.

27 “Bɛbava ɛnlankɛ nyinli ne nee abɔnkye ne mɔɔ bɛvale bɛbɔle ɛtane afɔle na bɛvale bɛ mogya ne bɛhɔle nwuanzanwuanza ɛleka ne bɛhɔlile mgbɔdalɛ la bɛahɔ azokoɛleɛ ne anzi lɔ, na bɛava senle bɛayela bɛ nwoma, bɛ nane nee bɛ ebinli ne.+ 28 Ɔwɔ kɛ ahenle mɔɔ kɛyela bɛ la kpo ye adɛladeɛ na ɔfa nzule ɔbia na akee yeara azokoɛleɛ ɛkɛ.

29 “Ɔbayɛ mɛla mɔɔ wɔ ɛkɛ ne dahuu yeamaa bɛ: Siane nsuu ne kenle bulu ne azo, ɔwɔ kɛ bɛkile bɛ nwo nyane,* na ɔnle kɛ ekulomeni o, ɛyɛvolɛ mɔɔ de bɛ avinli la o, yɛ gyima biala.+ 30 Wɔ kenle ɛhye anu, bɛbali bɛ ti mgbɔdalɛ+ na bɛade bɛ nwo. Bɛbade bɛ nwo bɛavi bɛ ɛtane ne mɔ amuala anwo wɔ Gyihova anyunlu.+ 31 Ɔle ɛnwomenlelielɛ kenle ɔmaa bɛ, bɛbalie bɛ menle bɔkɔɔ, na ɔwɔ kɛ bɛkile bɛ nwo nyane.*+ Ɔle mɛla mɔɔ wɔ ɛkɛ ne dahuu.

32 “Ɛsɔfo ne mɔɔ bɛkpokpa ye+ na bɛkpa ye* kɛ ɛsɔfo+ bɛzie ye papa agyakɛ anu la+ bali mgbɔdalɛ na yeawula lenen adɛladeɛ ne,+ adɛladeɛ nwuanzanwuanza ne mɔ.+ 33 Ɔbali ɛleka nwuanzanwuanza kpalɛ ne, nyianu ɛdanlɛsua ne+ nee afɔlemokyea ne+ ati mgbɔdalɛ,+ na yeali ɛsɔfo ne mɔ nee menli ne amuala ati mgbɔdalɛ.+ 34 Ɛhye bayɛ mɛla mɔɔ wɔ ɛkɛ ne dahuu la yeamaa bɛ,+ amaa bɛali Yizilayɛma ɛtane ne mɔ amuala anwo mgbɔdalɛ kokye ɛvolɛ biala.”+

Yemɔti ɔyɛle ye kɛ mɔɔ Gyihova hanle hilele Mosisi la pɛpɛɛpɛ.