Gyɛlɛmaya
29 Kɛlata ne mɔɔ ngapezonli Gyɛlɛmaya maanle bɛvale bɛvile Gyɛlusalɛm bɛhɔmaanle mgbanyima mɔɔ ɛha wɔ menli mɔɔ wɔ akɛlɛzonlenlɛ nu la, ɛsɔfoma, ngapezoma nee menli ne amuala, mɔɔ Nɛbukadenɛza vale bɛ vile Gyɛlusalɛm hɔle akɛlɛzonlenlɛ nu wɔ Babelɔn la anu edwɛkɛ ɛne, 2 mekɛ mɔɔ ɛnee bɛva Belemgbunli Gyɛkonaya,+ ɔbahyema* ne,+ suakunlu mgbanyima, Dwuda nee Gyɛlusalɛm mgbanyima, dwinvolɛma nee mbulalɛ dwinvolɛma* bɛvi Gyɛlusalɛm bɛhɔ la.+ 3 Ɔvale kɛlata ne ɔmaanle Hyeefan+ ara Ɛleesa nee Helekaya ara Gɛmalaya mɔɔ Dwuda Belemgbunli Zɛdikaya+ zoanle bɛ wɔ Babelɔn, wɔ Babelɔn Belemgbunli Nɛbukadenɛza ɛkɛ ne la. Kɛlata ne se:
4 “Mɔɔ ɛlɔne Gyihova, Yizilayɛ Nyamenle ne ɛha ɛhile menli kɔsɔɔti mɔɔ wɔ akɛlɛzonlenlɛ nu, mɔɔ memaanle bɛvile Gyɛlusalɛm bɛhɔle akɛlɛzonlenlɛ nu wɔ Babelɔn la ɛne, 5 ‘Bɛsisi azua na bɛdɛnla nu. Bɛyɛ tola na bɛli nuhua ma. 6 Bɛgya mraalɛ na bɛwo mralɛ mrenyia nee mralɛ mraalɛ; bɛgya mraalɛ bɛmaa bɛ mra mrenyia na bɛva bɛ mra mraalɛ bɛmaa agyalɛ amaa bɛdabɛ noko bɛawo mralɛ mrenyia nee mralɛ mraalɛ. Bɛmaa bɛ nwo ɛzo wɔ lɔ, bɛmmamaa bɛ nwo ka ekyi. 7 Bɛkpondɛ anzodwolɛ bɛmaa suakpole ne mɔɔ memaa bɛhɔ akɛlɛzonlenlɛ nu wɔ ɛkɛ la, na bɛzɛlɛ Gyihova bɛmaa ye, ɔluakɛ saa anzodwolɛ wɔ ɛkɛ a yɛɛ bɛbanyia anzodwolɛ a.+ 8 Na mɔɔ ɛlɔne Gyihova, Yizilayɛ Nyamenle ne ɛha la ɛne: “Bɛmmamaa bɛ ngapezoma nee bɛ menli mɔɔ ka kenle bie edwɛkɛ mɔɔ wɔ bɛ avinli la bɛlɛbɛla bɛ,+ yɛɛ bɛmmatie bɛ ɛlalɛ mɔɔ bɛka la. 9 Ɔluakɛ ‘bɛlɛka adalɛ ngapezo bɛahile bɛ wɔ me duma nu. Metɛsoanle bɛ,’+ Gyihova a se a.”’”
10 “Mɔɔ Gyihova ɛha la ɛne, ‘Saa bɛpɛ ɛvolɛ 70 wɔ Babelɔn a, mebahakyi me nye wɔ bɛ nwo,+ na mebali me ɛwɔkɛ zo meava bɛ meazia meara ɛke.’+
11 “‘Ɔluakɛ meze adwenle mɔɔ melɛdwenle ye wɔ bɛ nwo la,’ Gyihova a se a, ‘anzodwolɛ adwenle ɔ, na tɛ munzule adwenle,+ kɛ mebamaa bɛ kenle bie nee anyelazo.+ 12 Na bɛbavɛlɛ me na bɛara me ɛkɛ bɛarayɛ asɔne, na mebadie bɛ.’+
13 “‘Bɛbakpondɛ me na bɛbanwu me,+ ɔluakɛ bɛbava bɛ ahonle kɔsɔɔti bɛakpondɛ me.+ 14 Na mebamaa bɛanwu me,’+ Gyihova a se a. ‘Na mebaboɔboa bɛdabɛ mɔɔ bɛwɔ akɛlɛzonlenlɛ nu la anloa na meaye bɛ meavi maanle maanle kɔsɔɔti mɔɔ membɔle bɛ asande mengɔle nu la anu,’+ Gyihova a se a. ‘Na mebava bɛ meazia meara ɛleka mɔɔ memaanle bɛvile ɛkɛ bɛhɔle akɛlɛzonlenlɛ nu la.’+
15 “Noko bɛse, ‘Gyihova ɛmaa yɛ ngapezoma wɔ Babelɔn.’
16 “Mɔɔ Gyihova ɛha ɛhile belemgbunli ne mɔɔ de Devidi belemgbunli ebia+ ne azo nee menli mɔɔ de suakpole ɛhye azo amuala, bɛ mediema mɔɔ bɛ nee bɛ angɔ akɛlɛzonlenlɛ nu la ɛne, 17 ‘Mɔɔ ɛlɔne Gyihova ɛha la ɛne: “Nea, melɛmaa konle dadeɛ, ɛhɔne nee ewulenzane*+ ara bɛ nwo zo, na mebamaa bɛayɛ kɛ feege mɔɔ ɛkpɔlɔ* mɔɔ bɛdi a ɔnyɛ boɛ la.”’+
18 “‘Mebava konle dadeɛ, ɛhɔne nee ewulenzane meavoa bɛ,+ na mebamaa bɛahakyi debie ɛzulolɛ bie bɛamaa azɛlɛ ye azo arelemgbunlililɛ kɔsɔɔti,+ menli bawa bɛ amonle, na bɛ nwo ayɛ azibɛnwo,+ debie mɔɔ bɛbabɔ nwolɛ nvonloma, na bɛagua bɛ nyunlu aze wɔ maanle mɔɔ mebabɔ bɛ asande meahɔ nu la amuala anu,+ 19 ɔluakɛ bɛandie me edwɛkɛ ne mɔɔ menvale menzoanle me azonvolɛ ngapezoma ne mɔ la,’ Gyihova a se a, ‘menzoanle bɛ fane dɔɔnwo.’*+
“‘Noko bɛandie,’+ Gyihova a se a.
20 “Ɛhye ati, bɛdabɛ mɔɔ meva bɛ mevi Gyɛlusalɛm mehɔ akɛlɛzonlenlɛ nu wɔ Babelɔn la kɔsɔɔti, bɛdie Gyihova edwɛkɛ. 21 Mɔɔ ɛlɔne Gyihova, Yizilayɛ Nyamenle ne ɛha ye wɔ Kolaya ara Ehabe nee Meeyasaya ara Zɛdikaya mɔɔ bɛlɛfa me duma bɛaha adalɛ ngapezo bɛahile bɛ anwo la ɛne,+ ‘Nea, mebava bɛ meawula Babelɔn Belemgbunli Nɛbukadenɛza asa anu na ɔbahu bɛ wɔ bɛ nye zo. 22 Na Dwudama mɔɔ wɔ akɛlɛzonlenlɛ nu wɔ Babelɔn la kɔsɔɔti bɛava mɔɔ bado bɛ la awa amonle kɛ: “Gyihova ɛyɛ wɔ kɛ Zɛdikaya nee Ehabe mɔɔ Babelɔn belemgbunli ne dondonle bɛ wɔ senle nu la!” 23 ɔluakɛ bɛbɔ anyiemgba ɛbɛla wɔ Yizilayɛ,+ bɛ nee bɛ gɔnwo mɔ aye mɔ ɛzɛkye agyalɛ na bɛbɔ adalɛ wɔ me duma nu wɔ mekɛ mɔɔ metɛsoanle bɛ la.+
“‘“Medame a meze a, yɛɛ medame a medi nwolɛ daselɛ a,”+ Gyihova a se a.’”
24 “Na ka kile Hyɛmaya+ mɔɔ vi Nihɛlam la noko kɛ, 25 ‘Mɔɔ ɛlɔne Gyihova, Yizilayɛ Nyamenle ne ɛha la ɛne: “Wɔva wɔ duma wɔhɛlɛ kɛlata wɔhɔmaa menli mɔɔ wɔ Gyɛlusalɛm la amuala, Meeyasaya ara Zɛfanaya,+ ɛsɔfo ne nee ɛsɔfo ne mɔ amuala kɛ, 26 ‘Gyihova ɛyɛ wɔ ɛsɔfo ɛzie ɛsɔfo Gyɛhɔyada agyakɛ anu kɛ ɛyɛ kpanyinli wɔ Gyihova sua nu ɛkɛ, na ɛnlea ɛbɔ ɛzɛlɛ biala mɔɔ ɔbaha ngapezo la baka nu na ɛva bulalɛ ɛgyela ɔ kɔme;+ 27 ɛnee duzu ati a ɛtɛtwile Gyɛlɛmaya mɔɔ vi Anatɔto+ mɔɔ yeyɛ ɔ nwo ngapezonli la anyunlu ɛ?+ 28 Ɔluakɛ ɔzoanle ɔmaanle bɛrale yɛ nwo lɔ wɔ Babelɔn bɔbɔ na ɔhanle kɛ: “Ɔbahyɛ kpalɛ! Bɛsisi azua na bɛdɛnla nu. Bɛyɛ tola na bɛli nuhua ma,+—”’”’”
29 Mɔɔ ɛsɔfo Zɛfanaya+ gengale kɛlata ɛhye hilele ngapezonli Gyɛlɛmaya wiele la, 30 Gyihova edwɛkɛ rale Gyɛlɛmaya ɛkɛ ne kɛ: 31 “Soa maa bɛhɔha bɛhile menli mɔɔ wɔ akɛlɛzonlenlɛ nu la kɔsɔɔti kɛ, ‘Mɔɔ Gyihova ɛha ye wɔ Hyɛmaya mɔɔ vi Nihɛlam anwo la ɛne: “Kɛmɔ Hyɛmaya ɛha ngapezo ɛhile bɛ wɔ mekɛ mɔɔ metɛsoanle ye na ɔbɔle mɔdenle kɛ ɔmaa bɛava bɛ nwo bɛado adalɛ edwɛkɛ zo la ati,+ 32 mɔɔ Gyihova ɛha la ɛne, ‘Nea, mebahwe Hyɛmaya mɔɔ vi Nihɛlam la nee ɔ bo zo amra anzo. Ɔ bo zo amra biala ɛnrɛha wɔ menli ɛhye mɔ anu, yɛɛ ɔnrɛnwu kpalɛ mɔɔ mebayɛ meamaa me menli ne la, Gyihova a se a, ‘ɔluakɛ yemaa bɛde Gyihova anwo atua.’”’”