Edwɛkɛsisilɛ Mɔɔ Tɔ Zo Nwiɔ

32 Ninyɛne ɛhye mɔ nee nɔhalɛlilɛ nyɛleɛ ɛhye mɔ anzi,+ Aselea Belemgbunli Sɛnakɛlebe rale Dwuda anwo zo. Ɔbɛngale azuamgbole ne mɔ mɔɔ bɛlie nwolɛ bane la ɔyiale, na ɔyɛle ye adwenle kɛ ɔbubu yeawolo nuhua na yeaho yeava bɛ.+

2 Mɔɔ Hɛzikaya nwunle kɛ Sɛnakɛlebe ɛra na yeyɛ ye adwenle kɛ ɔ nee Gyɛlusalɛm ko la, 3 ɔzile kpɔkɛ wɔ mekɛ mɔɔ ɔ nee ye mgbanyima nee ye kovolɛma ne vale adwenle wiele la, kɛ bɛtuodua nzubula mɔɔ wɔ suakpole ne anzi la,+ na bɛboale ye. 4 Menli dɔɔnwo boɔboale bɛ nloa, na bɛhɔduoduale nzubula ne mɔ nee azudenle ne mɔ mɔɔ se azɛlɛ ne azo la, na bɛhanle kɛ: “Duzu ati a ɔwɔ kɛ Aselea arelemgbunli ba ɛke na bɛnyia nzule dɔɔnwo ɛ?”

5 Eza ɔzile ɔ kɛnra ɔdole bane ne mɔɔ ɛbubu la amuala bieko na ɔsisile tawa wɔ zolɛ, na ɔdole bane bieko wɔ sua ne anzi. Eza ɔyɛle Devidi Suakpole ne Boka*+ ne boɛ, na ɔyɛle akodeɛ nee enyinlike dɔɔnwo. 6 Akee ɔkpale sogya mgbanyima kɛ bɛnlea menli ne anwo zo na ɔboɔboale bɛ nloa wɔ gua ne azo wɔ suakpole ne anlenkɛ kpole ne anwo ɛkɛ na ɔmaanle bɛ anwosesebɛ* kɛ: 7 “Bɛnyia akɛnrasesebɛ na bɛmaa bɛ nwo ɛyɛ se. Bɛmmasulo yɛɛ bɛmmamaa bɛ ahonle tu ɔlua Aselea belemgbunli ne+ nee ye ɛlɔnema ne mɔɔ boka ɔ nwo la ati, ɔluakɛ bɛdabɛ mɔɔ bɛ nee yɛ lua la anwo zonle tɛla bɛdabɛ mɔɔ bɛ nee ye lua la.+ 8 Yemɔ, nwonane ɛsalɛ* a nee ye lua a, noko yɛmɛ, Gyihova yɛ Nyamenle ne a nee yɛ lua kɛ ɔboa yɛ na yeaho yɛ konle ne mɔ yeamaa yɛ a.”+ Na Dwuda Belemgbunli Hɛzikaya edwɛkɛ ne maanle menli ne anwosesebɛ.+

9 Ɛhye anzi, mɔɔ ɛnee Aselea Belemgbunli Sɛnakɛlebe wɔ Leekehye+ na ye ɛlɔnema* ne amuala boka ɔ nwo la, ɔzoanle ye sonvolɛma wɔ Gyɛlusalɛm, wɔ Dwuda Belemgbunli Hɛzikaya nee Dwuuma mɔɔ wɔ Gyɛlusalɛm la amuala+ anwo ɛkɛ ne kɛ:

10 “Mɔɔ Aselea Belemgbunli Sɛnakɛlebe ɛha la ɛne, ‘Duzu a bɛva bɛ nwo bɛdo zo mɔɔ ɔdaye ti bɛtɛte Gyɛlusalɛm wɔ mekɛ mɔɔ bɛbɛnga ye bɛyia la ɛ?+ 11 Asoo tɛ ɛbɛlɛbɛlalɛ a Hɛzikaya ɛlɛbɛlɛbɛla bɛ yeamaa ɛhɔne nee nzuhɔne ahu bɛ, wɔ mekɛ mɔɔ ɔlɛka kɛ: “Gyihova yɛ Nyamenle ne balie yɛ avi Aselea belemgbunli ne asa anu a”?+ 12 Asoo tɛ Hɛzikaya ko ye ala a yeyele bɛ Nyamenle ne ɛzonlenlɛ ɛleka ne mɔ*+ nee Ye afɔlemokyea ne mɔ+ na ɔzele Dwudama nee Gyɛlusalɛmma kɛ: “Bɛbɔ bɛ ti aze wɔ afɔlemokyea kokye anyunlu na bɛbɔ afɔle wɔ zolɛ bɛmaa ɔkpu esike la ɔ”?+ 13 Bɛnze mɔɔ me nee me nenyia mɔ ɛva ɛyɛ menli mɔɔ de azɛlɛ ne azo la amuala la ɔ?+ Asoo maanle maanle mɔɔ wɔ azɛlɛ ne azo la nyamenle ne mɔ holale liele bɛ azɛlɛ ne vile me sa nu ɔ?+ 14 Maanle maanle ɛhye mɔ mɔɔ me nenyia mɔ zɛkyele bɛ la nyamenle ne mɔ amuala anu boni a holale liele ye menli vile me sa nu, mɔɔ ɔdaye ti ɔwɔ kɛ bɛ Nyamenle ne kola die bɛ fi me sa nu a?+ 15 Noko bɛmmamaa Hɛzikaya bɛlɛbɛla bɛ anzɛɛ di bɛ adwenle zɛhae!+ Bɛmmadie ye bɛdi, ɔluakɛ maanle anzɛɛ belemgbunlililɛ biala nyamenle bie angola anlie ye menli anvi medame nee me nenyia mɔ asa anu. Ɛnee fane nyɛ a bɛ Nyamenle ne kɛhola kɛlie bɛ kɛvi me sa nu a!’”+

16 Ye sonvolɛma ne hanle edwɛkɛ dɔɔnwo bɔbɔ tiale Gyihova, nɔhalɛ Nyamenle ne nee ye sonvolɛ Hɛzikaya. 17 Eza ɔhɛlɛle ngɛlata+ ɔhɔbɔle Gyihova, Yizilayɛ Nyamenle ne aholoba+ na ɔdendɛle ɔtiale ye kɛ: “Kɛ mɔɔ maanle maanle mɔɔ wɔ azɛlɛ ye azo la nyamenle ne mɔ angola anlie bɛ menli ne mɔ anvi me sa nu la,+ zɔhane ala a Hɛzikaya Nyamenle ne noko ɛnrɛlie ye menli ne ɛnrɛvi me sa nu a.” 18 Na bɛhɔle zo bɛdendɛle kpole wɔ Dwuuma aneɛ nu bɛhilele Gyɛlusalɛmma mɔɔ gua bane ne ati zo la amaa bɛaha bɛ ɛzulolɛ na bɛamaa bɛ ahonle adu na bɛaho bɛava suakpole ne.+ 19 Bɛdendɛle bɛtiale Gyɛlusalɛm Nyamenle ne kɛ mɔɔ bɛdendɛle bɛtiale menli mɔɔ wɔ azɛlɛ ne azo la nyamenle ne mɔ mɔɔ bɛle sonla asa anloa gyima la. 20 Noko Belemgbunli Hɛzikaya nee Emɔzo ara ngapezonli Ayezaya+ hɔle zo yɛle ɛhye anwo asɔne na bɛzunle bɛvɛlɛle Nyamenle ne mɔɔ wɔ anwuma la kɛ ɔboa bɛ.+

21 Akee Gyihova zoanle anwumabɔvolɛ bie na ɔrabɔle konle nu katakyie,+ adekilevolɛ yɛɛ kpanyinli biala mɔɔ wɔ Aselea belemgbunli ne azokoɛleɛ ɛkɛ ne la abo zo, yemɔti ɔvale anyiemgba ɔziale ɔhɔle ye azɛlɛ zo. Nzinlii ɔhɔwolole ye nyamenle ne sua* ne anu, na ɔdaye mumua ne ɔ mra mrenyia ne mɔ bie vale konle dadeɛ hunle ye wɔ ɛkɛ.+ 22 Ɔti Gyihova liele Hɛzikaya nee menli mɔɔ de Gyɛlusalɛm la vile Aselea Belemgbunli Sɛnakɛlebe asa anu nee bɛdabɛ mɔɔ bɛha la amuala asa anu na ɔmaanle bɛliele bɛ menle wɔ ɛleka biala. 23 Na menli dɔɔnwo vale ahyɛlɛdeɛ rɛlɛle Gyihova wɔ Gyɛlusalɛm na bɛvale ninyɛne mgbalɛ bɛmaanle Dwuda Belemgbunli Hɛzikaya,+ na ɛhye anzi maanle maanle ne mɔ amuala bule ye kpole kpalɛ.

24 Zɔhane mekɛ ne anu, Hɛzikaya anwo dole ye mɔɔ ɛnee ɔkpondɛ yeawu, na ɔzɛlɛle Gyihova,+ ɔdiele ye na ɔmaanle ye sɛkɛlɛneɛ.+ 25 Noko Hɛzikaya angile kpalɛ ne mɔɔ bɛyɛle bɛmaanle ye la anwo anyezɔlɛ, ɔluakɛ ye ahonle memaanle ɔ nwo zo, na ɔmaanle ɛya kpole rale ɔdaye nee Dwuda yɛɛ Gyɛlusalɛm anwo zo. 26 Noko Hɛzikaya bɛlɛle ɔ nwo aze wɔ ye ahonle ne mɔɔ memaanle ɔ nwo zo la anwo,+ ɔ nee menli mɔɔ de Gyɛlusalɛm la, na Gyihova ɛya kpole ne amba bɛ nwo zo wɔ Hɛzikaya mekɛ zo.+

27 Na Hɛzikaya nyianle anwonyia dɔɔnwo nee anyunlunyia kpole;+ na ɔyɛle ninyɛnezielɛ ɛleka+ mɔɔ ɔbava dwɛtɛ fufule, nvutuke, awolɛ mɔɔ sonle bolɛ, balesam nwole, enyinlike nee ninyɛne mgbalɛ kɔsɔɔti yeazie la. 28 Eza ɔyɛle ninyɛnezielɛ ɛleka mɔɔ bɛbava ma, nwanye fofolɛ nee nwole bazie la, yɛɛ tunli dɔɔnwo mɔɔ bɛbava nyɛmoa ngakyile ne mɔ amuala bie bɛagua nu nee tunli mɔɔ bɛbava mboane bɛagua nu la. 29 Eza ɔnyianle azuamgbole nee nyɛmoa, mboane yɛɛ nlankɛ dɔɔnwo, ɔluakɛ Nyamenle maanle ye ninyɛne dɔɔnwo kpalɛ. 30 Hɛzikaya a maanle bɛzile azule ne mɔ mɔɔ vi Gaehɔn+ anwuma ba la+ na bɛhakyile bɛ nye wɔ adɔleɛ bɛhɔle Devidi Suakpole ne azo+ a, na gyima biala mɔɔ Hɛzikaya yɛle la wiele boɛ. 31 Noko mɔɔ bɛzoanle menli mɔɔ tendɛ Babelɔn mgbanyima ne mɔ anloa azo kɛ bɛhɔbiza ye sɛkɛlɛneɛ ne+ mɔɔ zile azɛlɛ ne azo la+ anwo edwɛkɛ la, nɔhalɛ Nyamenle ne gyakyile ye ɔvale ɔzɔle ye ɔnleanle,+ amaa yeanwu mɔɔ wɔ ye ahonle nu la amuala.+

32 Na Hɛzikaya anwo tetedwɛkɛ mɔɔ ɛha nee ye ɛlɔlɛ kpundii ne anwo edwɛkɛ ne,+ bɛhɛlɛ bɛ wɔ Emɔzo ara ngapezonli Ayezaya ɛnyelɛzodeɛnwunlɛ+ ne anu wɔ Dwuda nee Yizilayɛ Arelemgbunli Buluku ne anu.+ 33 Akee bɛmaanle Hɛzikaya nee ye nenyia mɔ hɔlale na ɔliele ɔ menle, na bɛziele ye wɔ boka ne mɔɔ wɔ Devidi amra mrenyia ne mɔ azie ne anwo ɛkɛ ne la azo;+ na Dwudama amuala nee menli mɔɔ dede Gyɛlusalɛm la lile ye eni wɔ mekɛ mɔɔ ɔwule la. Na ɔ ra Manasɛ ralile ye agya lile belemgbunli.