Edwɛne

103 Maa menye* Gyihova ayɛlɛ;

Maa debie biala mɔɔ wɔ me nu la ɛye ye duma nwuanzanwuanza ne ayɛlɛ.

 2 Maa menye* Gyihova ayɛlɛ;

Mmamaa me rɛle fi mɔɔ yeyɛ la amuala ɛlɛ.+

 3 Ɔfa wɔ nvonleɛ kɔsɔɔti ɔkyɛ wɔ+

Na ɔyɛ wɔ anwonyane kɔsɔɔti ayile;+

 4 Ɔdie wɔ ngoane ɔfi kuma* ne anu+

Na ɔfa ɛlɔlɛ kpundii nee anwunvɔnezelɛ ɔbɔ wɔ abotile.+

 5 Ɔmaa ɛnyia ninyɛne mgbalɛ wɔ wɔ ɛbɛlabɔlɛ*+ kɔsɔɔti anu,

Amaa wɔazia wɔayɛ kpavolɛ kɛ kɔleɛ la.+

 6 Gyihova yɛ ye ninyɛne tenlene+ nu na ɔdi pɛlepɛle

Ɔmaa bɛdabɛ mɔɔ bɛsisi bɛ la amuala.+

 7 Ɔmaanle Mosisi nwunle ye ndenle ne mɔ,+

Ɔmaanle Yizilayɛma nwunle ye nyɛleɛ ne mɔ.+

 8 Gyihova se anwunvɔne yɛɛ ɔ kunlu yelɛyela ye,*+

Ɔkyɛ na yeava ɛya yɛɛ ɛlɔlɛ kpundii ɛyi ye tɛkɛɛ.+

 9 Ɔnrɛkpondɛ yɛ nwo nvonleɛ dahuu,+

Yɛɛ ɔnrɛva yɛ nwo ɛya ɔnrɛzie ye nu dahuu.+

10 Ɔ nee yɛ ɛnli ye kɛ mɔɔ yɛ ɛtane ne mɔ de la,+

Yɛɛ ɔnnea yɛ nvonleɛ ne mɔ anwo ɔndua yɛ kakɛ.+

11 Kɛ mɔɔ anwuma wale tɛla azɛlɛ ne la,

Zɔhane ala a ye ɛlɔlɛ kpundii ne le kpole wɔ bɛdabɛ mɔɔ bɛsulo ye la anwo zo a.+

12 Kɛ mɔɔ aduduleɛ nee adɔleɛ avinli twe la,

Zɔhane ala a yemaa yɛ nee yɛ mɛladonlɛ ne mɔ avinli ɛhwe a.+

13 Kɛ mɔɔ selɛ se ɔ mra anwunvɔne la,

Zɔhane ala a Gyihova ɛze bɛdabɛ mɔɔ bɛsulo ye la anwunvɔne a.+

14 Ɔluakɛ ɔze kɛzi yɛde la kpalɛ,+

Ɔkakye kɛ yɛle ndɛtɛlɛ.+

15 Sonla dasanli ɛdeɛ, ye ngoane mekɛ le kɛ ndile la;+

Ɔkpakye kɛnlɛma kɛ ɛbɔ nu felawɔse.+

16 Noko saa anwoma ne bɔ a, ɛnee yeminli,

Kɛ asɛɛ ɛnee ɔnle ɛkɛ ne bɔbɔ la.*

17 Noko Gyihova ɛlɔlɛ kpundii ne wɔ ɛkɛ ne dahuu*

Maa bɛdabɛ mɔɔ bɛsulo ye la,+

Yɛɛ ye tenleneyɛlɛ ne wɔ ɛkɛ ne maa bɛ mra ne mɔ amra,+

18 Ɔwɔ ɛkɛ ne ɔmaa bɛdabɛ mɔɔ bɛdi ye ngyekyeleɛ zo+

Nee bɛdabɛ mɔɔ bɛnea boɛ bɛdi ye adehilelɛ ne mɔ azo la.

19 Gyihova ɛva ye belemgbunli ebia ne ɛzie ɛkɛ ne kpundii wɔ anwuma;+

Na ye belemgbunlililɛ ne nea debie biala azo.+

20 Bɛye Gyihova ayɛlɛ, bɛmɛ ye anwumabɔvolɛma kɔsɔɔti,+ mɔɔ bɛlɛ tumi kpole,

Mɔɔ bɛdi ye edwɛkɛ zo,+ na bɛtie ɔ ne la.

21 Bɛye Gyihova ayɛlɛ, ye ɛlɔnema kɔsɔɔti,+

Ye azonvolɛ mɔɔ bɛyɛ ye ɛhulolɛdeɛ la.+

22 Gyihova abɔdeɛ kɔsɔɔti, bɛye ye ayɛlɛ,

Wɔ ɛleka biala mɔɔ ɔdi tumi la.