Edwɛkɛsisilɛ Mɔɔ Tɔ Zo Nwiɔ

36 Na menli mɔɔ wɔ azɛlɛ ne azo la vale Dwosaya ara Gyɛhɔwahaze+ na bɛyɛle ye belemgbunli bɛziele ye papa agyakɛ anu wɔ Gyɛlusalɛm.+ 2 Gyɛhɔwahaze lile ɛvolɛ 23 la yɛɛ ɔrayɛle belemgbunli a, na ɔlile tumi siane nsa wɔ Gyɛlusalɛm. 3 Noko Yigyibiti belemgbunli ne dule ye wɔ ebia ne azo wɔ Gyɛlusalɛm na ɔmaanle azɛlɛ ne duale dwɛtɛ fufule talɛnte* 100 yɛɛ nvutuke talɛnte ko.+ 4 Yeanga ye zɔ, Yigyibiti belemgbunli ne vale Gyɛhɔwahaze adiema Yilayakem ziele Dwuda nee Gyɛlusalɛm belemgbunli na ɔhakyile ye duma ɔdonle ye Gyɛhɔyakem; noko Niko+ vale ɔ diema Gyɛhɔwahaze hɔle Yigyibiti.+

5 Gyɛhɔyakem+ lile ɛvolɛ 25 la yɛɛ ɔrayɛle belemgbunli a, na ɔlile tumi ɛvolɛ 11 wɔ Gyɛlusalɛm. Ɔhɔle zo ɔyɛle mɔɔ le ɛtane wɔ Gyihova ye Nyamenle ne anye zo la.+ 6 Babelɔn Belemgbunli Nɛbukadenɛza+ rale ɔ nwo zo kɛ ɔfa kɔbele kyeenyi nwiɔ yeagua ye na yeava ye yeahɔ Babelɔn.+ 7 Na Nɛbukadenɛza vale Gyihova sua ne anu ahyɛnze ne mɔ bie hɔle Babelɔn na ɔvale ɔguale ye belemgbunli sua nu ɛkɛ wɔ Babelɔn.+ 8 Na Gyɛhɔyakem anwo tetedwɛkɛ mɔɔ ɛha la, bɛkyi ninyɛne mɔɔ ɔyɛle nee ninyɛndane mɔɔ bɛnwunle ye wɔ ɔ nwo la, bɛhɛlɛ bɛ wɔ Yizilayɛ nee Dwuda Arelemgbunli Buluku ne anu; na ɔ ra Gyɛhɔyakɛn ralile ye agya lile belemgbunli.+

9 Gyɛhɔyakɛn+ lile ɛvolɛ 18 la yɛɛ ɔrayɛle belemgbunli a, na ɔlile tumi siane nsa kenle bulu wɔ Gyɛlusalɛm; na ɔhɔle zo ɔyɛle mɔɔ le ɛtane wɔ Gyihova anye zo la.+ 10 Wɔ ɛvolɛ ne mɔlebɛbo,* Belemgbunli Nɛbukadenɛza zoanle kɛ bɛhɔva ye nee ninyɛne mɔɔ sonle bolɛ mɔɔ wɔ Gyihova sua nu ɛkɛ ne la bɛrɛla Babelɔn.+ Na ɔvale ye papa adiema Zɛdikaya ɔziele belemgbunli wɔ Dwuda nee Gyɛlusalɛm.+

11 Zɛdikaya+ lile ɛvolɛ 21 la yɛɛ ɔrayɛle belemgbunli a, na ɔlile tumi ɛvolɛ 11 wɔ Gyɛlusalɛm.+ 12 Ɔhɔle zo ɔyɛle mɔɔ le ɛtane wɔ Gyihova ye Nyamenle ne anye zo la. Yeambɛlɛ ɔ nwo aze wɔ ngapezonli Gyɛlɛmaya mɔɔ luale Gyihova edwɛkɛ zo dendɛle la anyunlu.+ 13 Eza ɔdele atua ɔtiale Belemgbunli Nɛbukadenɛza+ mɔɔ maanle ɔvale Nyamenle ɔhanle ndane la, na ɔhɔle zo ɔyɛle anzosesebɛ* na ɔmaanle ye ahonle yɛle se, na ɔkpole kɛ ɔbazia yeara Gyihova, Yizilayɛ Nyamenle ne anwo ɛkɛ. 14 Ɛsɔfo mgbanyima ne mɔ amuala nee menli ne anli nɔhalɛ fee, bɛyɛle maanle maanle ne mɔ bɛkyi ninyɛne ne mɔ amuala bie, na bɛguale Gyihova sua ne mɔɔ ɔdele nwolɛ wɔ Gyɛlusalɛm la anwo evinli.+

15 Gyihova, bɛ nenyia mɔ Nyamenle ne luale ye soanvolɛma anwo zo hɔle zo bɔle bɛ kɔkɔ, ɔbɔle bɛ kɔkɔ fane dɔɔnwo, ɔluakɛ ɔ kunlu yelɛyelale ye maanle ye menli ne nee ye tɛnlabelɛ ne. 16 Noko bɛhɔle zo bɛgolole nɔhalɛ Nyamenle ne soanvolɛma ne anwo,+ na bɛambu ye edwɛkɛ ne bie+ na bɛzelele ye ngapezoma ne+ hɔkpulale kɛ Gyihova ɛya ne rale ye menli ne anwo zo+ too mɔɔ ɛnee bɛngola bɛ ayile yɛ a.

17 Ɔti ɔmaanle Kaledea belemgbunli ne rale bɛ nwo zo+ na ɔvale konle dadeɛ ɔhuhunle bɛ mgbavolɛ+ mɔɔ wɔ bɛ ɛzonlenlɛsua ne anu la;+ ɔ kunlu anyelɛyela ye ammaa kpavolɛ anzɛɛ bɛlɛra, kpanyinli anzɛɛ mɔɔ ɛnlɛ anwosesebɛ la.+ Nyamenle vale debie biala wulale ɔ sa nu.+ 18 Nɔhalɛ Nyamenle ne sua ne anu ahyɛnze ne mɔ amuala, mgbole nee ngyikyi yɛɛ agyapadeɛ mɔɔ wɔ Gyihova sua ne anu nee belemgbunli ne nee mgbanyima ne mɔ agyapadeɛ ne, ɔvale debie biala ɔhɔle Babelɔn.+ 19 Ɔyelale nɔhalɛ Nyamenle ne sua ne,+ ɔbubule Gyɛlusalɛm bane ne ɔguale aze,+ ɔvale senle ɔyelale ye tawa ne mɔ amuala, na ɔzɛkyele debie biala mɔɔ sonle bolɛ la.+ 20 Ɔvale bɛdabɛ mɔɔ bɛanva konle dadeɛ bɛangu bɛ la ɔhɔle akɛlɛzonlenlɛ nu wɔ Babelɔn,+ na bɛyɛle sonvolɛma+ bɛmaanle ye nee ɔ mra ne mɔ hɔkpulale kɛ Pɛhyea belemgbunlililɛ ne bɔle ɔ bo kɛ ɔdi tumi,+ 21 amaa Gyihova edwɛkɛ ne mɔɔ Gyɛlɛmaya hanle la ara nu,+ kɔkpula kɛ azɛlɛ ne duale ye ɛnwomenlelielɛ kenle ne mɔ anwo kakɛ wiele la.+ Mekɛ mɔɔ azɛlɛ ne lale ɛkɛ ne mgbane la amuala, ɔliele ɔ menle na ɔmaanle ɛvolɛ 70 ne rale nu.+

22 Wɔ Pɛhyea Belemgbunli Saelɛse+ ɛvolɛ mɔɔ limoa la anu, amaa Gyihova edwɛkɛ ne mɔɔ ɔluale Gyɛlɛmaya+ anwo zo ɔhanle la ara nu la, Gyihova hanle Pɛhyea Belemgbunli Saelɛse ahonle ɔmaanle ɔbɔle nolo wɔ ye belemgbunlililɛ ne anu amuala, eza ɔhɛlɛle ɔdole ɛkɛ,+ ɔse: 23 “Kɛ Pɛhyea Belemgbunli Saelɛse se la ɛne, ‘Gyihova, anwuma Nyamenle ne ɛva azɛlɛ ye azo arelemgbunlililɛ kɔsɔɔti ɛmaa me,+ na yeha yehile me kɛ menzi sua memaa ye wɔ Gyɛlusalɛm mɔɔ wɔ Dwuda la.+ Awie biala mɔɔ wɔ bɛ avinli mɔɔ boka ye menli ne kɔsɔɔti anwo la, Gyihova ye Nyamenle ne nee ye ɛlua na ɔvo ɔhɔ lɔ.’”+