Edwɛkɛsisilɛ Mɔɔ Limoa
22 Akee Devidi hanle kɛ: “Ɛhye a le nɔhalɛ Nyamenle Gyihova sua ne a, yɛɛ afɔlemokyea mɔɔ Yizilayɛma babɔ ɛyelalɛ afɔle wɔ zolɛ la ɛne.”+
2 Akee Devidi hanle kɛ bɛboɔboa nyɛvolɛ+ mɔɔ wɔ Yizilayɛ azɛlɛ ne azo la anloa bɛva bɛ bɛrɛla, na ɔmaanle bɛ gyima kɛ menli mɔɔ se awolɛ la, kɛ bɛze awolɛ na bɛziezie awolɛ mɔɔ bɛbava bɛazi nɔhalɛ Nyamenle ne sua ne la.+ 3 Eza Devidi boɔboale mbulalɛ dɔɔnwo kpalɛ mɔɔ bɛbava bɛayɛ nlenkɛ ne mɔ pɛlɛko nee mɔɔ bɛbava bɛasosɔ nu, yɛɛ kɔbele dɔɔnwo mɔɔ bɛngola ye suzu la anloa,+ 4 yɛɛ sida mbaka+ noko mɔɔ bɛngola bɛ tia la, ɔluakɛ Saedɛnema+ nee Tayama+ vale sida mbaka dɔɔnwo kpalɛ rɛlɛle Devidi. 5 Na Devidi hanle kɛ: “Me ra Sɔlɔmɔn le kakula yɛɛ ɔnlɛ anwubielɛ,*+ na ɔwɔ kɛ sua ne mɔɔ bɛbazi bɛamaa Gyihova la yɛ kpole kpalɛ,+ amaa bɛade ye nganeɛ na bɛanwu ye kɛnlɛma+ ne wɔ azɛlɛ ye kɔsɔɔti azo.+ Ɛhye ati, mebaboɔboa ninyɛne nloa meamaa ye.” Ɔti Devidi boɔboale ninyɛne dɔɔnwo anloa kolaa na yeawu.
6 Eza ɔvɛlɛle ɔ ra Sɔlɔmɔn na ɔzele ye kɛ ɔzi sua ɔmaa Gyihova, Yizilayɛ Nyamenle ne. 7 Devidi zele ɔ ra Sɔlɔmɔn kɛ: “Mame, ɛnee ɔwɔ me ahonle nu kɛ mesi sua meamaa Gyihova me Nyamenle ne duma.+ 8 Noko Gyihova nee me dendɛle kɛ, ‘Wɔha mogya dɔɔnwo wɔgua, yɛɛ wɔho konle mgbole. Ɛnrɛzi sua ɛnrɛmaa me duma ne,+ ɔluakɛ wɔha mogya dɔɔnwo wɔgua azɛlɛ ye azo wɔ me nyunlu. 9 Nea! Ɛbawo ralɛ nrenyia,+ na ɔbayɛ anzodwolɛ* sonla, na mebamaa ɔ nwo adɔ ye wɔ ye agbɔvolɛ mɔɔ ɛbɔ ye ɛyia la amuala anwo,+ ɔluakɛ bɛbavɛlɛ ye Sɔlɔmɔn*+ na mebamaa Yizilayɛma anyia anzodwolɛ na bɛ nwo adɔ bɛ wɔ ye mekɛ zo.+ 10 Ɔdaye a ɔbazi sua yeamaa me duma ne a.+ Ɔbayɛ me ra, na meayɛ ye papa.+ Mebava ye belemgbunlililɛ ebia ne meazie ɛkɛ ne kpundii wɔ Yizilayɛma anwo zo dahuu.’+
11 “Ɔti, me ra, Gyihova nee wɔ ɛlua, na ɔwie wɔ boɛ na si Gyihova wɔ Nyamenle ne sua ne, kɛ mɔɔ yeha ye wɔ ɛ nwo la.+ 12 Saa Gyihova maa wɔ tumi wɔ Yizilayɛma anwo zo a, ɔmaa wɔ nrɛlɛbɛ nee ndelebɛbo+ amaa wɔali Gyihova wɔ Nyamenle ne mɛla zo.+ 13 Saa ɛdi mɛla+ nee ndɛnebualɛ mɔɔ Gyihova hanle kɛ Mosisi ɛva ɛmaa Yizilayɛma+ la azo pɛpɛɛpɛ a, yemɔ ɔbawie wɔ boɛ. Nyia akɛnrasesebɛ na maa ɛ nwo ɛyɛ se. Mmasulo yɛɛ mmamaa wɔ ahonle tu.+ 14 Nea, mebɔ mɔdenle kpalɛ meboɔboa nvutuke talɛnte* 100,000 nee dwɛtɛ fufule talɛnte 1,000,000 yɛɛ kɔbele nee bulalɛ dɔɔnwo kpalɛ+ mɔɔ bɛngola bɛ tia la anloa memaa Gyihova sua ne, eza meboɔboa mbaka nee awolɛ+ nloa, noko ɛbakpondɛ bie wɔaboka nwolɛ. 15 Gyimayɛvoma dɔɔnwo baboa wɔ—menli mɔɔ se awolɛ, menli mɔɔ fa awolɛ si sua,+ kapentama yɛɛ gyimayɛvoma mɔɔ ze gyima ngakyile kɔsɔɔti anye zo kpalɛ la.+ 16 Bɛnze nvutuke, dwɛtɛ fufule, kɔbele yɛɛ bulalɛ ne mɔ anloa.+ Ɔti dwazo na bɔ gyima ne abo, na Gyihova nee wɔ ɛlua.”+
17 Akee Devidi zele Yizilayɛ mgbanyima kɔsɔɔti kɛ bɛboa ɔ ra Sɔlɔmɔn: 18 “Asoo Gyihova bɛ Nyamenle ne nee bɛ ɛnlua, yɛɛ ɔtɛmaanle bɛ ɛnwomenlelielɛ wɔ ɛleka biala ɔ? Ɔluakɛ ɔvale menli mɔɔ de azɛlɛ ye azo la ɔwulale me sa nu, na Gyihova nee ye menli ne ɛli azɛlɛ ne anwo zo konim. 19 Akee bɛva bɛ ahonle nee bɛ ɛkɛla* muala bɛkpondɛ Gyihova bɛ Nyamenle ne,+ na bɛbɔ ɔ bo bɛzi Gyihova, nɔhalɛ Nyamenle ne ɛzonlenlɛsua ne,+ amaa bɛava Gyihova ngyekyeleɛ ɛlɛka ne nee nɔhalɛ Nyamenle ne ahyɛnze nwuanzanwuanza ne mɔ+ bɛahɔ sua ne mɔɔ bɛzi bɛmaa Gyihova duma ne la anu.”+