Mɔɔ Limoa Kɔmaa Kɔlentema
1 Pɔɔlo mɔɔ bɛluale Nyamenle ɛhulolɛdeɛ zo bɛvɛlɛle ye kɛ ɔrayɛ Kelaese Gyisɛse ɛzoanvolɛ+ la nee yɛ diema Sɔsetinɛse 2 ɛlɛkɛlɛ ahɔmaa Nyamenle asafo ne mɔɔ wɔ Kɔlente,+ bɛdabɛ mɔɔ bɛde bɛ nwo wɔ Kelaese Gyisɛse anu,+ mɔɔ bɛvɛlɛ bɛ kɛ bɛrayɛ nwuanzanwuanzama nee bɛdabɛ kɔsɔɔti mɔɔ bɛwɔ ɛleka biala mɔɔ bɛbɔ yɛ Awulae Gyisɛse Kelaese mɔɔ le bɛ nee yɛ Awulae duma la:+
3 Yɛ Ze Nyamenle nee yɛ Awulae Gyisɛse Kelaese ɛlo bɛ kpole na bɛmaa bɛ anzodwolɛ.
4 Dahuu meyɛ me Nyamenle ne mo memaa bɛ ɔlua ɛlolɛ kpole ne mɔɔ Nyamenle ɛva ɛmaa bɛ wɔ Kelaese Gyisɛse anu la ati; 5 ɔluakɛ yemaa bɛnyia bɛ nwo wɔ debie biala anu wɔ ye nu, wɔ kɛzi bɛtendɛ nee ndelebɛbo muala anu,+ 6 kɛ mɔɔ Kelaese anwo daselɛlilɛ ne+ ɛzɔ ndinli wɔ bɛ nu la, 7 yemɔti bɛngyia ahyɛlɛdeɛ biala anwo, wɔ mekɛ mɔɔ bɛlɛkendɛ ɛsesebɛ kɛ bɛbaye yɛ Awulae Gyisɛse Kelaese bɛahile la.+ 8 Eza ɔbamaa bɛagyinla kpundii bɛahɔdwu awieleɛ amaa bɛambɔ bɛ somolɛ biala wɔ yɛ Awulae Gyisɛse Kelaese kenle ne.+ 9 Nyamenle ne mɔɔ vɛlɛle bɛ kɛ bɛ nee ɔ Ra Gyisɛse Kelaese, yɛ Awulae ɛrayɛ agɔnwolɛ la, le nɔhavo.+
10 Mediema, akee mesɛlɛ bɛ wɔ yɛ Awulae Gyisɛse Kelaese duma nu kɛ bɛmaa bɛ nloa ɛzɛ bɛ nwo na ɔnle kɛ mgbakyemgbakyenu ba bɛ avinli,+ emomu bɛmaa bɛ adwenle nee bɛ nzuzulɛ muala ɛyɛ ko.+ 11 Me mediema, melɛka ɛhye, ɔluakɛ Kuloyi sua nu amra bie mɔ ɛbɔ me amaneɛ kɛ akɛsakɛsa wɔ bɛ avinli. 12 Mɔɔ mekpondɛ meahile la a le kɛ, bɛ nuhua bie mɔ ka kɛ: “Mame, mele Pɔɔlo ɛdeɛ,” bie mɔ noko ka kɛ “Mame, mele Apɔlɔso ɛdeɛ,”+ yɛɛ bie mɔ ka kɛ “Mame, mele Sifase* ɛdeɛ,” akee bie mɔ noko ka kɛ “Mame, mele Kelaese ɛdeɛ.” 13 Bɛhyɛ Kelaese anu ɔ? Asoo Pɔɔlo a bɛhunle ye wɔ baka ne azo bɛmaanle bɛ a? Anzɛɛ bɛzɔnenle* bɛ wɔ Pɔɔlo duma nu ɔ? 14 Meda Nyamenle ase kɛ meanzɔne bɛ nuhua biala kyesɛ Kelesepɛse+ nee Geeyɛse+ ala, 15 amaa awie biala anga kɛ bɛzɔnenle bɛ wɔ me duma nu. 16 Ɛhɛe, eza menzɔnenle Setɛfanase sua nu amra.+ Na bɛdabɛ mɔɔ bɛha la ɛdeɛ, mengakye saa menzɔnenle awie bieko a. 17 Ɔluakɛ Kelaese anzoa me kɛ membanzɔne, emomu, ɔzoanle me kɛ memambɔ edwɛkpa ne nolo,+ na memmafa menli mɔɔ ɛzukoa nwoma mgbole la edwɛkɛ* mebɔ ye nolo, anrɛɛ Kelaese amaneɛnwunlɛ baka* ne anwo edwɛkɛ ne kɛyɛ mgbane.
18 Ɔluakɛ amaneɛnwunlɛ baka* ne anwo edwɛkɛ ne le ngoaseasɛm maa bɛdabɛ mɔɔ bɛlɛkɔ ɛzɛkyelɛ nu la,+ noko ɔle Nyamenle tumi ɔmaa yɛdayɛ mɔɔ bɛlɛdie yɛ ngoane la.+ 19 Ɔluakɛ bɛhɛlɛ kɛ: “Mebamaa nrɛlɛbɛvolɛma nrɛlɛbɛ aminli, na meakpo nwomama ndelebɛbo.”*+ 20 Nienwu a nrɛlɛbɛvolɛma hale a? Nienwu a mɛla kilehilevolɛma* hale a? Nienwu a ewiade* ye anu kpolerazulɛma hale a? Asoo Nyamenle ɛtɛkakyile ewiade nrɛlɛbɛ ngoaseasɛm ɔ? 21 Na kɛmɔ wɔ Nyamenle nrɛlɛbɛ ne anu, ewiade angola anlua ye nrɛlɛbɛ ne azo+ annwu Nyamenle+ la ati, Nyamenle anye liele nwo kɛ ɔbalua ngoaseasɛm ne+ mɔɔ bɛbɔle ye nolo la azo yealie bɛdabɛ mɔɔ bɛdie bɛdi la ngoane.
22 Ɔluakɛ Dwuuma biza sɛkɛlɛneɛ+ yɛɛ Gilikima kpondɛ nrɛlɛbɛ; 23 noko yɛmɛ yɛka Kelaese mɔɔ bɛhunle ye wɔ baka zo la anwo edwɛkɛ, ɔle azedolɛ bolɛ ɔmaa Dwuuma yɛɛ ɔle ngoaseasɛm ɔmaa maanle maanle ne mɔ.+ 24 Noko, bɛdabɛ mɔɔ bɛvɛlɛ bɛ la ɛdeɛ, Dwuuma nee Gilikima amuala, Kelaese a le Nyamenle tumi ne nee Nyamenle nrɛlɛbɛ ne a.+ 25 Ɔluakɛ Nyamenle debie mɔɔ le ngoaseasɛm la ze nrɛlɛbɛ tɛla menli, yɛɛ Nyamenle debie mɔɔ le bɛtɛɛ la yɛ se tɛla menli.+
26 Ɔluakɛ mediema, bɛdabɛ bɛnwu ye wɔ bɛ ɛvɛlɛlɛ ne anu kɛ wɔ sonla nye zo tɛ nrɛlɛbɛvolɛma dɔɔnwo,+ tumivolɛma dɔɔnwo nee alehelɛ* dɔɔnwo+ a bɛvɛlɛle bɛ a, 27 noko Nyamenle kpale ewiade ninyɛne mɔɔ le ngoaseasɛm la kɛ ɔfa yeagua nrɛlɛbɛvolɛma anyunlu aze; yɛɛ Nyamenle kpale ewiade ninyɛne mɔɔ le bɛtɛɛ la kɛ ɔfa yeagua ninyɛne mɔɔ yɛ se la anyunlu aze;+ 28 na Nyamenle ɛkpa ninyɛne mɔɔ anwo ɛngyia wɔ ewiade nee ninyɛne mɔɔ bɛmbu bɛ bie la, ninyɛne mɔɔ ɛnle ɛkɛ la kɛ ɔfa yeazɛkye ninyɛne mɔɔ wɔ ɛkɛ la,+ 29 amaa awie* biala ammemaa ɔ nwo zo wɔ Nyamenle anyunlu. 30 Noko ɔdaye ti a bɛwɔ Kelaese Gyisɛse anu a, ahenle mɔɔ ɛrayɛ nrɛlɛbɛ mɔɔ vi Nyamenle ɛkɛ, nee tenleneyɛlɛ+ nee anwodelɛ+ nee fanwodi mɔɔ lua ɛkpɔnedeɛ ne azo+ ɛmaa yɛ la, 31 amaa yeayɛ kɛ mɔɔ bɛhɛlɛ ala la: “Mɔɔ ɔtu ɔ nwo la, maa ɔdu ɔ nwo wɔ Gyihova* anu.”+